ROM 13
13
Thiyukhüm-sühmüh Khüp Lapü
1Mihtsürü abannü thiyukhümsühmüh khüp laang. Tümütüsho Thrünpuhnü amülüjihkhi kheak hode thiyukhüm-sühmüh püpü müla, tüsho sherü lanü Thrünpuhnü amokhitkhi lah. 2Jumonü shepünü thiyukhüm-sühmühbo azhihchonü Thrünpuhnü amokhitkhi azhihchoh, tüsho shepünü azhihchonü nihbuh kheak mahkhap hande arübah. 3Tümüde yakzanshuhrübo ju atsü rhimorü ki mihtrebe yung tüshe amütsürü ki ah. Shepü thiyukhümsühmüh lanü nünü api ki mütrebea de? Junangde nünü tümü atsüanü rhimoang, tüsho apinü nü shijihbah, 4tümüde api ju nü tsüpü thsungkheak Thrünpuh yamlarü ah. Tüshe nünü amülim rhimosho, trede laang, tümüde apinü nukshang ju akeangkeang ching mühanchoh; api ju amülim rhimorü kheak bukakhiuk rhimopü Thrünpuh yamlarü ah. 5Jumonü nüsanü Thrünpuh bukakhiukpü thsungkheak lang yung tüshe lümzülümdo thsungkheak she thiyukhüm-sühmüh khüp laang. 6#Mt 22.21; Mk 12.17; Lk 20.25Hamonü nüsanü rukbo jihchoh, tümüde thiyukhüm-sühmüh larü ju ha rhimode Thrünpuh tankihrübo ah. 7Ajihpü larü alala ki jihang, rukbo jihpü larü ki jihang, ashakpü larü ki shakang, akin tüsho wüntre jihpü larü ki jihang.
Khülangnü Khülang ki Rhimobebo
8Khülangnü khülang ki muzhoachihpü kheak hode she ki she azüng düzo; tümüde shepünü nihbuh yamhingrü muzhochonü yakzan mihyuanido. 9Thiyuzüngbo, “Nünü müzammüram düthsü, nünü dülaksah, nünü dahüh, nünü yihnelune düla,” tüsho thiyuzüng püpü tharüpkhi ju, “Nünü nihbuh nangde nü yamhingrü muzhoang.” 10Amuzhonü yamhingrü ki amülim müthsüchoh; jumonü amuzho ju yakzan mihyuanikhi ah.
11Ha kheak khiode ha kim tümü a, kheakü künangde ayapkhi chingnü asürüpü kim khiuka lanü nünü mükheahlah, tümüde akhümkhit ju isanü atan kinkhi kheaknü athüninbe lah; 12azhing tsodo, animung thünina lah. Jumonü isanü azhing rhimobo tukloanü tüsho ayin zülu yihanü; 13isanü animung lakhi nangde rhimoanü–kushimkhi yungsho amüshangkhi, müzammüram yungsho mümüsühkhi, rukachihkhi yungsho mükthsükhi yung. 14Tüshe Atungpuh Jisu Khrista zülu yihang, tüsho akünkhi reangkeamshihpü shih-yakli lim mulong düjih.
Currently Selected:
ROM 13: YIMCBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
