1 KORINT 5
5
Borü ching Müzammüram
1Amükinrü bolung she müdünjikhi, nüsa bolung mihtsürü khülangnü bethsürü lung lakhi müzammüram lah de atsütsü thiyusheak jihdo. 2Tüsho nüsa kükheanglah. Nüsanü ju müthri tüzhobe yung de? Nüsa bolung shepünü ha rhimokheanü yihkhita bahang.
3I pang mülaa lalashe, me ching I nüsa lung lah. Tüsho I bekhi nangde ha rhimobuh kheak inü thiyukhapabahdo. 4Küyimki nüsa, isa Atungpuh Jisu Khrista mung chingnü mukhungbanü, tüsho isa Atungpuh Jisu wu bebanü, 5ha mihtsürü Arimri kilim jihang, junangde pang ju athsümünimbah tüsho Atungpuh nimung ching api me khümkhitbah.
6 #
Gal 5.9
Nüsa kükheangkhi ju atsü yung. Phaüm anikhühnü yikhap abümnü lamshihchoh de nüsanü mümükheah de? 7Nüsa yikhap aso kampü thsüde phaüm awün yihkhita bahang, tümütüsho atsütsü inü mükheahkhi nangde nüsa phaüm muyukkhi yikhap nangde alabah. Tümüde isa phungho-thünio namfimihnunu Khrista laksah-a kingaündo. 8Jumonü isanü lungchihkhi tüsho amütsü awün phaümnü yung tüshe atsangkhitkhi tüsho thiyuro phaüm muyukkhi yikhap bede thünio leangkhianü.
9Müzammüram mihtsürü lung marihpü inü nüsa kilim I yo kihüm ching thrütdo; 10ju amütsan amükinrübo müzammüram, yihnelune, ahührü yungsho sangthsü kingaünrü yung. Arü kheaknü atsokhipü thsüsho nüsanü alomi chingnü shahde atsopü kambah. 11Tüshe inü nüsa kilim thrütkhi ju a keoniorü shepü müzammüram, yihnelune, sangthsü kingaün, mülapmüji, müshangmuru, yungsho jangkhijangra amülim lanü darihako. Hadürü lung a ayimtsüh she düyimtsüh. 12Tümütüsho aleangkheakrü thiyukhapkhi ching inü küde athsüjihpü? Nüsanü thiyukhappü larü ju borü ching yung de? 13Aleangkheakrü Thrünpuhnü thiyukhapbah. “Nüsa bolungnü mihbukmuyuk mihtsürü yankhita bahang.”
Currently Selected:
1 KORINT 5: YIMCBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.