1 KORINT 2
2
Khrista Yümkihkhi dünkheak Thiyusheak
1Keoniorübo, küyimki I nüsa kilim arükheanü, inü thiyu ato yungsho lümlung thade Thrünpuh aramyu nüsa ki müthsangyuthsangra. 2Tümüde Jisu Khrista tüsho api yümkihkhi kheak hode inü nüsa bolung tümü mükheahpü mupungkhi. 3#Yunir 18.9Tüsho I nüsa lung ayiuhyiuhkhi, trede tüsho ajankhi ching lakheah; 4tüsho I yu thakhi le I yusheak ju thiyu-ake tüsho lümlung yu chingnü yung, tüshe Me tüsho wu huhpü lakheah, 5junangde nüsa akin ju mihtsürü lümlung ching yungde Thrünpuh wu ching labah.
Thrünpuh Lümlung
6Tütüshe lümzorü bolung isanü lümlung yu tha, tüshe ju adükheakbe ha lün yungsho ha lün yakzanshuhrü lümlung yung. 7Tüshe isanü aramyu tüsho rama lakhi Thrünpuh lümlung, isa müretahpü lünbo müngüh Thrünpuhnü athsakhamkhi isanü tha. 8Ha lün yakzanshuhrü shenü she ha manikhit; arünü anikhitkhülaa müretahkhi Atungpuh müyümkih-a labah. 9Tüshe ha thrüta lah,
“Tümü she müknü müngükhea, yungsho nükhünnü muso,
yungsho mihtsürü mulongnü mülümkhea,
juju Thrünpuhnü api muzhorü khilim thsakhamkheah.”
10Thrünpuhnü Me hode isa ki akhiuka huh. Tümüde Menü lüpdükhi, Thrünpuh lümkhi asükbo she yimchoh. 11Tümütüsho mihtsürü kheak lakhi menü yungsho, shepünü mihtsürü lümkhi mükheahla? 12Kheakü isanü alomi yo me yung, tüshe Thrünpuhnü isa kheak jih-a lakhi thsambah anikhitpü Thrünpuh kilimnü Me leangkhi. 13Tüsho isanü ha mihtsürü lümlungnü thsangyukhi yubo chingnü mütha, tüshe Menü thsangyukhi, Me larü me thiyuro thanakkhi lah.
14Me mülakhi mihtsürünü Thrünpuh Me thsambah müleangkhichoh, tümüde arübo api ki makharü ah, tüsho apinü jurübo anikhitpü mukuk, tümütüsho jurübo me hodü lang mütsankhitchoh. 15Me lakhi mihtsürünü lüpdükhi yukhappü kuklah, tüshe shenü she api yukhappü mukuk. 16“Tümütüsho api ki thanakpü thsüde shepünü Atungpuh lümkhi mükheah de?” Tüshe isa a Khrista lümkhi lah.
Currently Selected:
1 KORINT 2: YIMCBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.