ಮತ್ತಾಯ 2
2
ಪುರ್ವ ದಿಕ್ತಾ ಗ್ಯಾನಿಯೊ ದೆಕಾನೆ ಆಯಲ
1ಹೆರೊದ ರಾಜೊ ಥಯಲ ಟೈಮಮಾ ಯೆಸು ಯುದಾಯನಾ ಬೆತ್ಲೆಹೆಮ ಕವಾನಾ ಗಾಮಮಾ ಹುಟ್ಯೊ. ಯೆಸು ಹುಟ್ಟಲ್ಪರ, ಪುರ್ವ ದೆಶನಾ ದಕ್ಹಾ ಗ್ಯಾನಿಯೊ ಯೆರುಸಲೆಮೆ ಆಯಾ. 2ತೆ ಗ್ಯಾನಿಯೊ ಮನಕ್ಹೊನೆ, ಯೆಹುದಿಯೊನೊ ರಾಜೊ ಹುಟ್ಯೊಸ ತೆ ಕಿಜಾ ಛೆ? ತೆ ಹುಟ್ಯೊಸ ಕೈನ ದೆಕಾಡಾನಿ ಚಿಕ್ಕಿ ಪುರ್ವ ದಿಕ್ಕಮಾ ಹುಟ್ಟಲ ದೆಕಿನ ತಿನೆ ಆರಾಧನಾ ಕರಾನೆ ಆಯಾಸ ಕದ್ಯಾ.
3ಯಹುದಿಯೊನಾ ಎ ನಯಾ ರಾಜಾ಼ನಿ ವಿಶಯ ಗ್ವತ್ತ ಥಯಲ್ಪರ ಹೆರೊದ ವರಿ ಯೆರುಸಲೆಮನಾ ಕ್ಹಾರಾ ಮನಕ್ಹೊ ಗಲಿಬಿಲಿ ಥಯಾ. 4ತೆಳಾಮಾಜ಼, ಹೆರೊದ ಕ್ಹಾರ ಖಾಸ ಯಾಜಕೊನೆ ಶಾಸ್ತ್ರಿಯೊನೆ ಸಭೆ ಮಳೈನ ಕ್ರಿಸ್ತ ಹುಟ್ಟನಿ ಜ಼ಗಾ ಕೈ ವ್ಹೈ? ಕೈನ ಪುಚ್ಯೊ.
5ತ್ಯುನೆ, ಯುದಾಯನಾ ಬೆತ್ಲೆಹೆಮ ಕವಾನಾ ಗಾಮಮಾ ಹುಟ್ಟಸ. ಕಾಕದ್ಯಾಮ ಪ್ರವಾದಿ ಪವಿತ್ರ ಗ್ರಂಥಮಾ ಇಮ್ಮ ಬರದ್ಯೊಸ.
6ಯಹುದ ಸಿಮೆನಿ ಬೆತ್ಲೆಹೆಮ,
ಯಹುದನಾ ಖಾಸ ಗಾಮೊಮಾ ತು ನಕ್ಕರಬಿ ನ್ಹಾನು ನ್ಹವೈ.
ಯಕ್ಕ ಅದಿಪತಿ ತಾರಾಮಾತೊಜ಼ ಆವಸ,
ತೆ ಮಾರಾ ಮನಕ್ಹೊ ಥಯಲ ಇಸ್ರಾಯೆಲೊನೆ ಆಳಾಲೊ ವ್ಹೈ
ಕವಾನು ಪ್ರವಾದಿನಾ ಮುಲಕ ಬರ್ದಲ ಛೆ ಕೈನ ಕದ್ಯಾ.
7ತೆಳಾಮಾ ಹೆರೊದ ಪುರ್ವ ದಿಕ್ಕನಾ ದೆಶನಾ ಗ್ಯಾನಿಯೊನೆ ಚೊ಼ರಿಕ್ಹು ಬಲೈನ, ತ್ಯುನೆ ತೆ ಚಿಕ್ಕಿನೆ ದೆಕಲ ಕರೆಕ್ಟ ಟೈಮ ತ್ಯುನೊಕಂತೊ ಗ್ವತ್ತ ಕರಿಲಿದ್ಯೊ. 8ಹೆರೊದ ತೆ ಗ್ಯಾನಿಯೊನೆ, ತುಮೆ ಗೈನ ಚೊ಼ಕಿತರಾ ಪುಚ್ಚಿಲಿನಿ ತೆ ಬಚ್ಚು ಕಜಾ ಶೆ ಕೈನ ಗ್ವತ್ತ ಥಯಲ್ಪರ ಐನ ಮನೆ ತಿಳಸಾವೊ. ತೆಳಾಮಾ ಮಿ ಗೈನ ತಿನೆ ಆರಾಧನಾ ಕರುಸ ತಿಮ್ಮ ಕೈನ ತ್ಯುನೊನೆ ಬೆತ್ಲೆಹೆಮನೆ ವಳೈನ ದಿದ್ಯೊ. 9ತೆ ಗ್ಯಾನಿಯೊ ರಾಜಾ಼ನಿ ವಾತ ಐಕಿನ ತ್ಯಾಂತಾ ಗಯೆಲ್ಪರ, ಪುರ್ವ ದಿಕ್ಕಮಾ ಹುಟ್ಟಲ ಚಿಕ್ಕಿನೆ ವರಿ ದೆಕ್ಯಾ. ತ್ಯುನೆ ತೆ ಚಿಕ್ಕಿನಾ ಪಾಚಾ಼ ಗಯಾ. ತೆ ಚಿಕ್ಕಿ ತ್ಯುನಾ ಅಗಿ ಜಾ಼ತಿ ಪಟ್ಟೊ ರ್ಹಯಲ ಜ಼ಗಾಪರ ಗೈನ ಹುಬ್ರೈ. 10ತ್ಯುನೆ ತೆ ಚಿಕ್ಕಿನೆ ದೆಕಿನ ಘನ್ನಾಕಿ ಕ್ಹುಶಿ ಥಯಾ. 11ತ್ಯುನೆ ತೆ ಘರೆ ಆಯೆಲ್ಪರ, ಪಟ್ಟಾನೆ ಮರಿಯಳಕನ ದೆಕಿನ, ಸಾಷ್ಟಾಂಗ ಥೈನ ಆರಾಧನಾ ಕರ್ಯಾ ತೆನೈಸೊ ತ್ಯುನೆ ತೆ ಪಟ್ಟಾನಾಹುತಿ ಲಾಯಲ ಕಾಣಿಕೆ ಕಾಡಿನ ಕ್ಹೊನು, ಉದ ವರಿ ಬಾಸನಾ ದ್ರವ್ಯೊನೆ ದಿದ್ಯಾ. 12ತೆನೈಸೊ ಕ್ಹುದಾ ತೆ ಗ್ಯಾನಿಯೊನಾ ಕ್ಹಪನ್ಮಾ ಐನ, ತುಮೆ ಹೆರೊದಕನ ಫರಿನ ಜೌ಼ ನೈ ಕೈನ ಹುಶಾರ ಕರ್ಯೊ. ತ್ಯುನೆ ಬಿಜಿ಼ ಯಕ್ಕ ಜ಼ಗಾನಾ ಮುಲಕ ತ್ಯುನಾ ದೆಶನೆ ಫರಿನ ಗಯಾ.
ಇಜಿಪ್ಟೆ ಗಯಲ
13ಗ್ಯಾನಿಯೊ ಫರಿನ ಗಯೆಲ್ಪರ ಪ್ರಭುನೊ ದುತ ಯೊಸೆಫನೆ ಕ್ಹಪನ್ಮಾ ದಿಕ್ಹಿನಿ, ಉಟ್ಟ! ಬಚ್ಚಾ಼ನೆ ವರಿ ತಿನಿ ಯಾನೆ ಬಲೈಲಿನ ಇಜಿಪ್ಟನೆ ನ್ಹಾಟಿನ ಜಾ಼. ಹೆರೊದ ಬಚ್ಚಾ಼ನೆ ಹುಡ್ಕಾನು ಶುರು ಕರಸ. ತೆ ಬಚ್ಚಾ಼ನೆ ಕ್ಹಲಾಸ ಕರು ಕೈನ ಕೈಲಿದ್ಯೊಸ. ‘ಸುಜ ಕೆಟ್ಟ ನತ್ತಿ’ ಕೈನ ಮಿ ತುನೆ ಕದೆಲಕ್ಕಾ ತು ಇಜಿಪ್ಟಮಾ ರ್ಹೈ” ಕೈನ ಕದ್ಯೊ.
14ತೆಳಾಮಾಜ಼, ಯೊಸೆಫ ಉಟಿನ ಬಚ್ಚಾ಼ನೆ ವರಿ ತಿನಿ ಯಾನಾ ಕ್ಹಾತೆ ಇಜಿಪ್ಟೆ ರಾತನಾ ಟೈಮಮಾ ಗೈಪಡ್ಯೊ. 15ಹೆರೊದ ಮರೆಲಕ್ಕಾ ಯೊಸೆಫ ಇಜಿಪ್ಟಮಾಜ ವ್ಹತ್ತೊ. ಮಿ ಮಾರಾ ದಿಕ್ರಾನೆ ಇಜಿಪ್ಟಮಾತೊ ಬಲಾಯೊ ಕೈನ ಪ್ರವಾದಿನಾ ಮುಲಕ ಪ್ರಭು ಕದಲ ವಾತ ಇನಾಕ್ಹು ಪುರಾ ಥೈ.
ಪಟ್ಟಾವೊನೆ ಖಲಾಸ ಕರಲ
16ಗ್ಯಾನಿಯೊ ತಿನೆ ಮೊಸ ಕರ್ಯಾಸ ಕೈನ ಗ್ವತ್ತ ಥಯಲ್ಪರ ಹೆರೊದ ಘನ್ನೊ ಶಿಟ್ಟ ಥಯೊ. ತೆಳಾಮಾ ಬಚ್ಚು಼ ಹುಟ್ಟಲ ಟೈಮ ಹೆರೊದ ಗ್ಯಾನಿಯೊಕ್ಹು ಗ್ವತ್ತ ಕರಿಲಿದ್ಯೊತೊ. ತೆ ಬಚ್ಚು಼ ಹುಟ್ಟಿನ ಬೆ ವರಕ್ಹ ಥಯಾತಾ. ತಿನಾಹುತಿ ಹೆರೊದ ಬೆತ್ಲೆಹೆಮಮಾ ವರಿ ತಿನಾ ಆಜು಼ ಬಾಜು಼ನಾ ಗಾಮೊಮಾ ರ್ಹಯಲ ಬೆ ವರಕ್ಹನಾ ವರಿ ತ್ಯುನಾತಿ ನ್ಹಾನಾ ರ್ಹಯಲ ಕ್ಹಾರಾ ಪಟ್ಟಾವೊನೆ ಕ್ಹಲಾಸ ಕರು ಕೈನ ಆಗನ್ಯಾ ದಿದ್ಯೊ.
17ಅಮ್ಮ ಕ್ಹುದಾ ತಿನೊ ಪ್ರವಾದಿ ಥಯಲ ಯೆರೆಮಿಯನಾ ಮುಲಕ ಕದಲ ಎ ವಾತ ಪುರಾ ಥೈ.
18ರಾಮಮಾ ಬೊಂಬಡ್ಯಾ ಮಾರಾನು ಐಕು ಐಯು;
ರವಾನು ವರಿ ಘನ್ನು ಗೊಳಾಟ ಉಂಟ ಥಯು;
ರಾಹೆಳ ತ್ಯುನಾ ಬಚ್ಚಾ಼ವೊನಾಹುತಿ ರೊತಿ ತ್ಯುನೆ ನೈ
ರ್ಹಯಲಕ್ಹು ಸಮಾಧಾನ ಹೊಂದಿಲಿದ್ಯಾವಾಚಿ ವ್ಹತ್ತಿ.
ಇಜಿಪ್ಟತಾ ವಾಪಸ ಆಯಲ
19ಹೆರೊದ ಮರಲ್ಪರ, ಪ್ರಭುನೊ ದುತ ಯೊಸೆಫನೆ ಕ್ಹಪನ್ಮಾ ದಿಕ್ಹಿನ, ಯೊಸೆಫ ಇಜಿಪ್ಟಮಾ ರ್ಹತಾಮಾಜ಼ ಆಂ ಥಯು. 20ಕ್ಹುದಾನೊ ದುತ ತಿನೆ, ಉಟ್ಟ! ಪಟ್ಟಾನೆ ವರಿ ತಿನಿ ಯಾನೆ ಬಲೈಲಿನ ಇಸ್ರಾಯೆಲೆ ಜಾ಼. ಪಟ್ಟಾನೆ ಕ್ಹಲಾಸ ಕರು ಕೈನ ಕೊಶಿಶ ಕರಾಲಾ ಮರಿ ಗಯಾಸ” ಕೈನ ಕದ್ಯೊ. 21ತಿನಾಹುತಿ ಯೊಸೆಫ ಪಟ್ಟಾನೆ ವರಿ ಪಟ್ಟಾನಿ ಯಾನೆ ಬಲೈಲಿನ ಇಸ್ರಾಯೆಲೆ ಗಯೊ.
22ತೆನೈಸೊ ಹೆರೊದ ಮರಲ್ಪರ ತಿನೊ ದಿಕ್ರೊ ಥಯಲ ಅರ್ಖೆಲಾಯ ಯುದಾಯನೊ ರಾಜೊ಼ ಥಯೊಸ ಕರಿನ ಕವಾನು ಐಕಿನ ತ್ಯಾ ಜಾ಼ವಾನೆ ಭುಚ್ಚಕ್ಯೊ. ಕ್ಹಪನ್ಮಾ ದಿದಲ ಹುಶಾರಕಿ ಲಿಂಗತಜ಼ ತೆ ತೆ ಜ಼ಗಾನೆ ಛೊಡಿನ ಗಲಿಲಾಯ ಗಾಮನೆ ಗೈನ, 23ನಜರೆತ ಕವಾನಾ ಗಾಮ್ಮಾ ರ್ಹಯೊ. ಕ್ರಿಸ್ತನೆ ‘ನಜ಼ರೆತನೊ’ ವ್ಹೈ ಕೈನ ಬಲಾವಸ” ಕೈನ ಕ್ಹುದಾ ಪ್ರವಾದಿಯೊನಾ ಮುಲಕ ಕದಲ ಅಮ್ಮ ಪುರಾ ಥಯು.
Nu geselecteerd:
ಮತ್ತಾಯ 2: Srr25
Markering
Delen
Vergelijk
Kopiëren
Wil je jouw markerkingen op al je apparaten opslaan? Meld je aan of log in
The Sikkiligar Bible © The Word for the World International and Sikkiligar Bhasha Samiti, Madhya Pradesh, 2025
