Ghalasi 1
1
Mɛswosel
1Yɛ ɛ́ mam Pɔl, mot-lwoma ɛ Klisto. Ye tok bot nasa náá, mɛ di mot-lwoma ɛ Klisto, ààkobɛ-bɛak ɛkwosak ɛ mot. Tin, yɛ ɛ́ kɔ ɛkwosak ɛ Yezu Klisto nɛ Zɛɛb Sɛɛg, mot nagomal nyɛ bhis ɛsyee ɔ, mɛ di mos mot-lwoma. 2Bis nɛ bɔn-nyɛɛg bam djas di wak ɛ, bis eesɛɛgaa étɛp ɛkwyal mɛkana mak nɛ ezɛɛga mendjaala kyee dik Ghalasi. 3Beta náá, Zɛɛb Sɛɛg'enaka nɛ Ghɛŋ Yezu Klisto djɛ bin enɛm nɛ embɛɛ nɛ egwyem bɛ. 4Klisto naaka nyel'ɛ met buwa, étɛp ɛtsik ɛ mena tɔ mesyem. Ye nabɛ ɛ́ étɛp nyɛ neepɛk mena tɔ mbee tsik bɔs'ak. Nyɛ nasa deenek ɛ́ nɛ ɛkwosak ɛ Zɛɛb Sɛɛg'ena. 5Duu nɛ Zɛɛb, kɔm-kɔm sii nɛ kɔm! Amɛn!
Sim Mbɛɛ Bhaadal
6Mɛ ɛpedjoka nɛ dáa bi zeleelum Zɛɛb mot nazedjóo bin kɔ enɛm nɛ embɛɛ ɛ Klisto ɔ koŋ ɛ. Étɛp ɛdu dhiiti mbi mɛlyo mɛ bɛdhiiti bot di eke náá, yɛ ɛ́ Mbɛɛ Bhaadal ɔ. 7Deenek, ye tok nɛ dhiiti mbi Mbɛɛ Bhaadal! Yɛ ɛ́ bot ɛ di ezɛm bin, bɛ kwyɛl ɛ́ ɛswoola Mbɛɛ Bhaadal ɛ Klisto. 8Tin, ye nakoozodi bisɔ bɛmet, nɛghu fofop dus tɔ gwoo ɔ, mot ɛ zyɛ zɛgoola bin dhiiti Mbɛɛ Bhaadal di ààbɛ tyee wat nɛ yii bis nagoola bin ɔ, mot tak bela mbee baka! 9Bis eezelɛɛ yɛ, mɛ ɛpebaabasal bin yɛ nenak. Mot ɛ zɛgoola bin Mbɛɛ Bhaadal sis di ààbɛ tyee wat nɛ yii bi nazegwak ɔ, mot tak goka ɛ́ nɛ ɛbela mbee baka. 10É di'enek, mɛ ààsaa náá, bot myaala nɛ nam, mɛ saŋ ɛ́ náá, Zɛɛb myaala nɛ nam. Mɛ ààkwyɛl náá, bot myaala nɛ nam. Mɛ ɛpedi ɛ́ di ekwyɛl náá, bot myaala nɛ nam ɔɔ, pe mɛ tok mot-mɛsa ɛ Klisto.
Pɔl nazɛdi mot-lwoma dáa?
11Bɔn-nyɛɛg bam, mɛ lɛɛ bin ɛ́ náá, Mbɛɛ Bhaadal mɛ goola bin ɛ, ye tok esua-esua yii mot zesu ɛ. 12Etɛɛ náá, ye tok mot nadjɛ mɛ yɛ, nɛghu ɛlyaal mɛ yɛ, deenek, yɛ ɛ́ Yezu Klisto ɛ natel mɛ.
13Ye nabɛ ɛ́, bi naagwak mɛfulu mɛ mɛ nadi nɛ yɛ, é sok mɛ nadi mɛ dinaa mot zɛɛga mendjaala mɛ eYuda ɔ. Bi nɛ gu dáa mɛ nadi ewa bot ɛ zɛɛga mendjaala mɛ Zɛɛb tɔ tsik mezuk, nɛ ɛwa zii étɛp ɛwaaz yɛ ɛ. 14É sok mɛ nadi tɔ zɛɛga mendjaala mɛ eYuda ɛ, mɛ naadhaa bɛtɛ nɛ bɔn-nyɛɛg bam eYuda yii kɔkɔ membu mam nɛ zii ɛduwal ɛ etsi e bɛbhaab bis.
15Tin, Zɛɛb naaloozesɛ́ɛ mɛ tɔ mɔ nyaagam, ɛsok nɛ mɛ nɛ byel, nyɛ naadjóo mɛ tɔ enɛm nɛ embɛɛ bɛ. É ɛwala ɛ nyɛ nakwos ɛ, 16nyɛ eelyaal mɛ Mɔn'ɛ, etɛɛ náá, mɛ neekɛgoola Mbɛɛ Bhaadal nɛ bot ɛ di ààbɛ bot ɛ mbyak eYuda ɔ. Tin, mɛ nabɛ ɛ́ ààkɛsaa mɛlyo pɛ daa mot. 17Bela náá, mɛ ààpatɔ́ pɛ Yeluzalɛm, pɛ daa bot ɛ nadi bot ɛ lwoma ɛsok nɛ nam ɔ. Mɛ natɔ́ ɛ́ pɛ kyee dik Aalabi, bhii tak mɛ eezɛsik pɛ ghaada Dhamas. 18Membu melɛl bhii tak, mɛ eezɛtɔ́ pɛ Yeluzalɛm, étɛp ɛkɛboma nɛ Pyɛɛd, tin, mɛ eezɛdi mɛlu kam nɛ etɛn bis nɛ nɛ. 19Mɛ nabɛ ɛ́ ààboma nɛ dhiiti mot-lwoma sis, bhii Zak mɔn-nyɛɛg ɛ Ghɛŋ. 20Etɛp ee mɛ di ekwyal bin wak ɛ, yɛ ɛ́ etɛp etsɛɛtsɛ é mis ɛ Zɛɛb, mɛ ààpakɔɔ.
21Bhii tak, mɛ eezɛtɔ́ pɛ kyee mɛdhik mɛ Siili nɛ Silisi. 22Bot ɛ zɛɛga mendjaala mɛ Klisto di pɛ kyee dik Yude ɔ, nabɛ ɛ́, bɛ dinaa ààgu ɛbhwoob ɛ lam. 23Bɛ nazogwak ɛ́ bot eke náá: «Mot nadi ewaka mena tɔ tsik mezuk kpaambel ɔ, nyɛ moo mos ɛ́ egoola Mbɛɛ Bhaadal ɛdum ɛ koŋ nɛ Zɛɛb, yii nyɛ nadi ewa zii étɛp ɛwaaz ɛ.» 24Tin, bɛ nadi eduwal Zɛɛb kɔ ɛsu ɛ lam.
Nu geselecteerd:
Ghalasi 1: bkwNT
Markering
Delen
Kopiëren
Wil je jouw markerkingen op al je apparaten opslaan? Meld je aan of log in
© (Active), Wycliffe Bible Translators, Inc. All rights reserved.