Hosea 14

1 Samaria gaan boet,

want sy was in opstand teen haar God.

Deur die swaard sal hulle val;

hulle kinders sal verpletter word,

hulle swanger vroue sal oopgesny word.

Oproep om terug te keer

2 Keer terug, Israel,

na die Here jou God,

want jy het deur jou sondeskuld gestruikel.

3 Kom met julle woorde

en keer terug na die Here.

Sê vir Hom:

“Vergewe ons sondeskuld volkome,

aanvaar ons belydenis;

ons wil met die vrug van ons lippe vergoed.

4 Assirië kan ons nie red nie,

op perde wil ons nie ry nie,

en ons sal nie meer ons handewerk

‘ons god’ noem nie;

want net by U vind die vaderlose

ontferming.”

5“ Ek sal hulle afvalligheid genees,

Ek sal hulle uit vrye wil liefhê.

Omdat my woede teen hom bedaar het,

6 sal Ek vir Israel wees soos dou.

Hy sal bloei soos 'n narsing,

en wortels skiet soos die Libanon.

7 Sy lote sal uitsprei;

sy prag sal wees soos dié

van 'n olyfboom,

en sy geur soos dié

van die Libanon.

8 Dié wat in sy skaduwee

gewoon het, sal terugkeer;

hulle sal koring verbou,

en uitspruit soos 'n wingerdstok.

Die roem van Israel sal wees

soos die wyn van die Libanon.

9 “Efraim, watter ooreenkoms

is daar nog tussen My en die afgode?

Ek is die Een wat hom antwoord,

en Ek hou hom in die oog.

Ek is soos 'n immergroen sipres –

by My word jou vrugbaarheid gevind.”

Nawoord

10 Wie is wys dat hy hierdie dinge

kan verstaan,

en verstandig dat hy dit kan begryp?

Ja, die paaie van die Here is reguit –

regverdiges loop daarop,

maar oortreders sal daarop struikel.

Nu geselecteerd:

Hosea 14: AFR20

Markering

Kopiëren

Vergelijk

Wil je jouw markerkingen op al je apparaten opslaan? Meld je aan of log in

Bybel in Afrikaans 2020-vertaling © Bybelgenootskap van Suid-Afrika 2020. Digitale Weergawe © Bybelgenootskap van Suid-Afrika 2020. Alle regte voorbehou. www.biblesa.co.za.

Bybel in Afrikaans 2020-vertaling met Deuterokanonieke Boeke © Bybelgenootskap van Suid-Afrika 2020. Digitale Weergawe © Bybelgenootskap van Suid-Afrika 2020. Alle regte voorbehou. www.biblesa.co.za.

Meer informatie over Die Bybel 2020-vertaling