Matiyo 28

Yesu wuzeɠe vai, é ɠula saai ya

1Dooɠo foloi leʋegai ma, dɔɔɠɔi ma volo mɔungi sobuzobui, Magedala nui Mali ta Mali zɔi ti liini wɛlɛzu kabai ma.

2Gaamago, zou ɓali wolai ɠɛɛni. Mazɔlɔɔ Maliɠii ná-geezuɠeelai ɠila ge yeini, é kɔtui ɠilikili, é seɠe kabai la, é zei maazu. 3Gaazuʋɛ ɠɛni eɠɛ mainmain, ná-seɠeiti ti ɠole pepe eɠɛ kobe kolegi. 4Salaʋusui niiti ti ɠɛni wɛlɛzu kabai ma, naati ti zu ɠɛni ɓalizu ga duai, ti loo eɠɛ ta za.

5Kɛlɛ geezuɠeelai ɓɔɛni anzanuiti pɔ, é ɠɛ ti ma: «À mina lua. Gè kwɛni ga Yesu ɠa wo gaiziɛzu, nii ti kpadɔni saa wului ma. 6É la mɔ ʋɛ, é wuzeɠea, é ɠula saai ya, eɠɛʋelei é boni la. À ʋa, wo wɛlɛ, ʋɛ é ɠɛa laani ná. 7Naa ʋoluma, à li fala, wo bo ná-kaladopoiti ma ga é wuzeɠea, é ɠula saai ya. Wɛlɛ tɔun vɔlɔ, é toga da wo luɠɔ Galilé yooi zu, miná ɠa wa ka ná. Naa ɠa é ɠɛa bɛ̀ ga gè bo wo ma.»

8Ti zeɠeni kabalaʋɛ ga suvilɛ, ti-yiimaʋɛ laavegai ga dualuagi ta koozunɛ wolai. Ti ɓizɛni ga ti naama wooi laazeeli kaladopoiti ma. 9Gaamago Yesu ti laaɠomini, é ɠɛ ti ma: «Wo unga.» Ti maaɓuɠani ba, ti velevele ga kɔɠɔiti, ti nɔkɔ bu. 10Yesu zɛba é ɠɛ ti ma: «À mina lua. À li, wo ɠɛ kɛ̀ɛlointi ma, ti li Galilé yooi zu, miná ɠa ta kàa ná.»

Salaʋusuiti ta-ʋoluvaawogi

11Siɛgi zu anzanuiti ti ɠɛni la pelei ma, salaʋusui niiti ti ɠɛni kabai makɛsu, naa tanigaa ti lɛɛni taazuʋɛ. Nii pɛ é ɠɛɛni, ti naa wo zalaɠa ɠula ɠundiɠiiti ma. 12Tɛi naati ti ɓeni ga zoloo faa ɠila ma ta totuɠɔiti, ti wali wola veeni salaʋusuiti zea, 13ti ɠɛ naati ma: «Wa ɗa ɠɛ ma nɔ: ‹Gi yɛgɛ ɲiizu, ná-kaladopoiti ti ʋa kpidii, ti unma.› 14Ni kola vaa ma zou zɛʋɛ ɠundiɠii a mɛnina, gá ʋɛ zii ɠa, nii a kɛ kpɔlɔ mina zeeli wo ma.» 15Salaʋusuiti ti yeezeini naama walii wu, ti naa wo, nii zalaɠa ɠula ɠundiɠi wolaiti ti boni ti ma. Zaaɠaza naama wooi vazagɛ Zuifuiti saama.

Yesu ná-kaladopoiti teʋe fai

(Maleke 16:14-18; Luke 24:36-49; Zan 20:19-23; Kɛɛwotiiti 1:6-8)

16Kaladopo puugɔ maazu ɠilagiti (11) ti liini naama ɠizei ma Galilé yooi zu, ʋɛ Yesu ná lɛɛni ga tiye. 17Siɛgi zu ti pɛtɛni la, ti nɔkɔni bu, kɛlɛ anɛɛ naa ʋe, tanigaa ti ɠɛni inɛinɛsu. 18Yesu maaɓuɠani ti ʋa, é ɠɛ ti ma: «Zobogi pɛ feeʋɛ zèa geeɠɔlɔgi zu ta zooi ma. 19À li mu, wo ziiti pɛ kɛ ga nà-kaladopoiti, wo ti ɓatize Ɠɛɛɠɛ GALA, ta Doun Zunui, ta Zɛnvu Ɲadegai laaseigi zu, 20wo ti ɠala ga ti naati pɛ so, nii gè wo leveai la. Wɛlɛ, nà yɛsu wo ʋa foloi pɛ su, eyɛsu etea ɠaaɓela foloi zeeli.»

Nu geselecteerd:

Matiyo 28: GDZ

Markering

Kopiëren

Vergelijk

Wil je jouw markerkingen op al je apparaten opslaan? Meld je aan of log in

This work is licensed under the Creative Commons Attribution-NonCommercial-NoDerivatives 4.0 International.

https://creativecommons.org/licenses/by-nc-nd/4.0/

Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.

Meer informatie over GALA Daawoo Zɛʋɛi