Populaire Bijbelverzen uit Aj Colosa 2

Delen

Ikytziꞌn tzeꞌnku xi xkye akꞌaj kychwinqila tukꞌa qAjaw Jesucrist te tnejil noq tuꞌn kynimbꞌila; ikytzin tuꞌn kybꞌetejiꞌy jaꞌlin tukꞌa, toj tkyaqil. Jun nimil ikyjo, ikyx tzeꞌnku jun tze, a nimxix ma txaꞌye tlokꞌ toj txꞌotxꞌ, tuꞌn tchꞌiy wen, ex tuꞌntzin mi yekje. Ex ikytzin jun nimiljo qa ma qexix tkꞌuꞌj tiꞌjjo nimbꞌil twutzxix, a tzaj xnaqꞌtzin te, nlay jaw kaꞌmin tkꞌuꞌj tojjo tnimbꞌil, ex kukx nqꞌoꞌn chjonte te qMan Dios.

Tuꞌnpetziꞌn, kyqꞌonktziꞌn tilil tuꞌn mina chi kubꞌ sbꞌuꞌniꞌy kyuꞌnxjal, a nya twutzxix kyyol, ex nimxix t-xilin kynabꞌl tuꞌn kysbꞌun. Quꞌn atziꞌn kyxnaqꞌtzbꞌil, ntiꞌ tumil, quꞌn nya tzajnin tiꞌj Crist; qalaꞌ tiꞌjjo kyxnaqꞌtzbꞌil ojtxe xjal, ex tiꞌjjo jun ojtxe kawbꞌil, a ntiꞌ tumil.

Tej naꞌmtaq tel kypaꞌn kyibꞌa tiꞌjjo ojtxe kyteꞌn, kyimninqetaqa twutz Dios, ex otaq chi naja toj kyila. Me atziꞌn jaꞌlin, ma tzaj tqꞌoꞌn qMan Dios akꞌaj kychwinqila junx tukꞌa Jesucrist; ex noq tuꞌn Jesús, o najsit tkyaqil kyila. Noq tuꞌn tpaj qil, at jun qkꞌas twutz Dios, a nqanintaq qiꞌj tuꞌn qkyim, ikyxjo tzeꞌnku ntqꞌmaꞌn ojtxe tkawbꞌil Dios. Ex ojtxe, iltaq tiꞌj tuꞌn tkyim jun aj il twutz cruz tjaqꞌ jun tuꞌjil til, a pejkꞌinktaq tibꞌaj twiꞌ. Me atzin te Jesús, ntiꞌ til, me xi tqꞌoꞌn tibꞌ te qxel tuꞌn tchjet tkyaqil qil, nyakuj ma tzꞌok pejkꞌit tuꞌjil qil junx tukꞌa, tej tkyim twutz cruz tuꞌn qpaj.

Me ate Jesucrist, ax Diosjo, quꞌn tiꞌjxjo Crist, a ichin skꞌoꞌnxix tuꞌn Dios, yekꞌineꞌ tkyaqiljo t-xilin qMan. Ex ayetzin kyeꞌ tzꞌaqleqexixa tuꞌn kymujbꞌil kyibꞌa tukꞌa Jesucrist, ex tuꞌn najle Crist toj kyanmiꞌn. Ex ax Jesús at nimxixtl toklin tibꞌaj tkyaqil nmaq nejinel ex jniꞌ kawbꞌil.

Tuꞌnpetziꞌn, mi txi kyqꞌoꞌn ambꞌil kyexjal tuꞌn kyyolbꞌin kyiꞌja noq tuꞌn tpaj ojtxe kawbꞌil, tzeꞌnku tiꞌ tuꞌn t-xi kywaꞌn, ex tiꞌ tuꞌn kyxi kykꞌwaꞌn; ex tuꞌn tpajjo nintz qꞌij nchi ikyꞌsit, mo kyiꞌjjo xim tiꞌj neꞌẍ yaye, mo tuꞌn tpajjo tuꞌn tbꞌant jun tiꞌla kyuꞌn toj qꞌij te ajlabꞌl. Quꞌn kykyaqiljo luꞌn n-ajbꞌintaq ojtxe noq te jun techil tiꞌjjo akꞌaj tumil, a iltaq tiꞌj tuꞌn tul, tuꞌn kykyijxjal toj wen tukꞌa Dios. Quꞌn tkyaqiljo luꞌn, a tzajnin toj ojtxe kawbꞌil, ikytziꞌn tzeꞌnku jun t-xlekemil, a jun paqx n-ikyꞌ. Me atziꞌn jaꞌlin, ate Crist, a twutzxix, o tzul te jun majx, ex tkyaqiljo txqantl, nlay chi mojin qukꞌa toj qnimbꞌil.