Populaire Bijbelverzen uit ꠔꠃꠞꠣꠔ ১: ꠙꠄꠖꠣ ꠘꠣꠝꠣ 17

Delen

ꠀꠛ꠆ꠞꠣꠝꠞ ꠘꠤꠞꠣꠘ꠆ꠘꠛ꠆ꠛꠁ ꠛꠞꠍꠞ ꠡꠝꠄ ꠝꠣꠛꠥꠖꠦ ꠢꠤꠞꠛꠣꠞ ꠔꠣꠘꠞꠦ ꠖꠤꠖꠣꠞ ꠖꠤꠀ ꠇꠁꠟꠣ, “ꠀꠝꠤ ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣ। ꠔꠥꠝꠤ ꠀꠝꠣꠞ ꠖꠦꠅꠀ ꠙꠕꠅ ꠕꠣꠇꠤꠀ ꠇꠣꠝꠤꠟ ꠅꠅ।

ꠔꠥꠝꠣꠞꠦ ꠀꠞ ꠀꠛ꠆ꠞꠣꠝ [ꠝꠣꠘꠤ, ꠛꠠ ꠛꠣꠚ] ꠇꠁꠀ ꠒꠣꠇꠣ ꠅꠁꠔ ꠘꠣꠄ, ꠅꠈꠘ ꠕꠣꠇꠤ ꠔꠥꠝꠣꠞ ꠘꠣꠝ ꠅꠁꠟ ꠁꠛ꠆ꠞꠣꠢꠤꠝ [ꠝꠣꠘꠤ, ꠛꠃꠔ ꠎꠣꠔꠤꠞ ꠛꠣꠚ], ꠀꠝꠤ ꠔꠥꠝꠣꠞꠦ ꠛꠃꠔ ꠎꠣꠔꠤꠞ ꠝꠥꠟ ꠛꠣꠚ ꠛꠣꠘꠣꠁꠟꠣꠝ।

ꠀꠝꠤ ꠔꠥꠝꠣꠞ ꠀꠞ ꠔꠥꠝꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠅꠇꠟꠞ ꠟꠉꠦ ꠎꠦ ꠌꠥꠇ꠆ꠔꠤ ꠇꠣꠁꠝ ꠇꠞꠝꠥ, ꠁꠇꠐꠣ ꠢꠞ-ꠢꠣꠝꠦꠡꠣ ꠛꠅꠀꠁꠟ ꠕꠣꠇꠛ, ꠅꠃ ꠃꠍꠤꠟ꠆ꠟꠣꠄ ꠀꠝꠤ ꠔꠥꠝꠣꠞ ꠀꠞ ꠔꠥꠝꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠅꠇꠟꠞ ꠀꠟ꠆ꠟꠣ ꠅꠁꠝꠥ।

“ꠔꠥꠝꠣꠞ ꠟꠉꠦ ꠀꠝꠤ ꠅꠀꠖꠣ ꠇꠣꠁꠝ ꠇꠞꠤꠀꠞ, ꠔꠥꠝꠤ ꠛꠃꠔ ꠎꠣꠔꠤꠞ ꠝꠥꠟ ꠛꠣꠚ ꠅꠁꠛꠣꠄ।

ꠅꠃ ꠀꠟ꠆ꠟꠣꠄ ꠚꠞꠝꠣꠁꠟꠣ, “ꠑꠤꠇ ꠀꠍꠦ। ꠅꠁꠟꠦ ꠔꠥꠝꠣꠞ ꠛꠤꠛꠤ ꠍꠣꠄꠞꠣꠞ ꠙꠦꠐꠅ ꠢꠣꠍꠣꠃ ꠔꠥꠝꠣꠞ ꠙꠥꠀ ꠅꠁꠛ, ꠔꠥꠝꠤ ꠔꠣꠞ ꠘꠣꠝ ꠞꠣꠈꠛꠣꠄ ꠁꠍꠢꠣꠇ [ꠝꠣꠘꠤ, ꠢꠦ ꠀꠡꠦ]। ꠔꠣꠞ ꠟꠉꠦ ꠀꠝꠣꠞ ꠌꠥꠇ꠆ꠔꠤ ꠇꠣꠁꠝ ꠇꠞꠝꠥ, ꠔꠣꠞ ꠅꠀꠞꠤꠡꠞ ꠟꠉꠦ ꠁꠇꠐꠣ ꠀꠝꠣꠞ ꠢꠞ-ꠢꠣꠝꠦꠡꠣꠇꠥꠞ ꠌꠥꠇ꠆ꠔꠤ ꠅꠁꠛ।

ꠀꠞ ꠎꠦ ꠇꠦꠘꠣꠘ ꠖꠦꠡꠅ ꠔꠥꠝꠤ ꠅꠈꠘ ꠝꠥꠍꠣꠚꠤꠞ ꠅꠁꠀ ꠕꠣꠇꠞꠣꠄ, ꠁ ꠙꠥꠞꠣꠐꠣꠃ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠢꠞ-ꠢꠣꠝꠦꠡꠣꠇꠥꠞ ꠖꠈꠟꠞ ꠟꠣꠉꠤ ꠖꠤꠝꠥ। ꠀꠝꠤ ꠔꠣꠞꠣꠞ ꠀꠟ꠆ꠟꠣ ꠅꠁꠝꠥ।”

ꠅꠃ ꠁꠛ꠆ꠞꠣꠢꠤꠝꠦ ꠝꠣꠐꠤꠔ ꠍꠁꠎꠖꠣꠔ ꠙꠠꠤ ꠀꠡꠤꠀ ꠝꠘꠦ ꠝꠘꠦ ꠇꠁꠟꠣ, “ꠢꠣꠍꠣꠃ ꠄꠇ-ꠡ ꠛꠍꠞꠞ ꠛꠥꠠꠣꠞ ꠢꠥꠞꠥꠔ꠆ꠔꠣ ꠅꠁꠔ ꠘꠤ! ꠔꠣ-ꠅ ꠘꠛ꠆ꠛꠁ ꠛꠍꠞꠞ ꠛꠥꠠꠤ ꠍꠣꠄꠞꠣꠞ ꠙꠦꠐꠅ?”

ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞꠦ ꠇꠁꠟꠣ, “ꠔꠥꠝꠣꠞ ꠛꠤꠛꠤꠞꠦ ꠀꠞ ꠍꠣꠞꠣ ꠇꠁꠀ ꠒꠣꠇꠤꠅ ꠘꠣ। ꠄꠘ ꠘꠣꠝ ꠅꠁꠛ ꠍꠣꠄꠞꠣ [ꠝꠣꠘꠤ, ꠞꠣꠘꠤ]।

ꠔꠥꠝꠞꠣ ꠢꠇꠟꠦ ꠘꠤꠎꠞ ꠙꠥꠞꠥꠡ ꠅꠋꠉꠞ ꠝꠥꠈꠣꠞ ꠌꠣꠝꠠꠣ ꠇꠣꠐꠛꠣꠄ। ꠅꠇꠐꠣꠃ ꠔꠥꠝꠞꠣꠞ ꠀꠞ ꠀꠝꠣꠞ ꠝꠣꠎꠦ ꠛꠅꠀꠁꠟ ꠇꠞꠣ ꠌꠥꠇ꠆ꠔꠤꠞ ꠘꠤꠡꠣꠘꠣ।

ꠍꠣꠝꠘꠞ ꠛꠞꠍ ꠁ ꠌꠣꠘ꠆ꠖꠅ ꠍꠣꠄꠞꠣꠞ ꠊꠞꠅ ꠔꠥꠝꠣꠞ ꠎꠦ ꠢꠥꠞꠥꠔ꠆ꠔꠣ ꠅꠁꠛ, ꠢꠃ ꠁꠍꠢꠣꠇꠞ ꠟꠉꠦ ꠀꠝꠤ ꠀꠝꠣꠞ ꠌꠥꠇ꠆ꠔꠤ ꠇꠣꠁꠝ ꠇꠞꠝꠥ।”

ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤꠀ ꠔꠥꠝꠞꠣꠞ ꠢꠇꠟ ꠙꠥꠀꠂꠘ꠆ꠔꠞꠦ ꠎꠘꠝꠞ ꠀꠐ ꠖꠤꠘꠞ ꠖꠤꠘ ꠝꠍꠟꠝꠣꠘꠤ ꠇꠞꠣꠁꠛꠣꠄ। ꠎꠣꠞꠣ ꠔꠥꠝꠣꠞ ꠅꠀꠞꠤꠡ ꠘꠣꠄ, ꠈꠣꠟꠤ ꠔꠥꠝꠞꠣꠞ ꠛꠣꠠꠤꠔ ꠎꠘꠝꠤꠍꠦ ꠛꠣ ꠔꠥꠝꠞꠣꠞ ꠈꠞꠤꠖꠣ ꠉꠥꠟꠣꠝ, ꠔꠣꠞꠣꠞꠅ ꠝꠍꠟꠝꠣꠘꠤ ꠇꠞꠣꠘꠤ ꠟꠣꠉꠛ। ꠔꠥꠝꠞꠣꠞ ꠊꠞꠅ ꠎꠘꠝꠤꠍꠦ ꠛꠣ ꠈꠞꠤꠖꠣ ꠉꠥꠟꠣꠝ ꠅꠇꠟꠞꠦ ꠘꠤꠌꠄ ꠝꠍꠟꠝꠣꠘꠤ ꠇꠞꠣꠁꠛꠣꠄ। ꠔꠥꠝꠞꠣꠞ ꠡꠞꠤꠟꠅ ꠎꠣꠞꠤ ꠇꠞꠣ ꠀꠝꠣꠞ ꠁ ꠌꠥꠇ꠆ꠔꠤ ꠢꠞ-ꠢꠣꠝꠦꠡꠣꠇꠥꠞ ꠌꠥꠇ꠆ꠔꠤ ꠅꠁꠛ।