Bagri

यीसू मसी गी पीढी इंया चाली है। अबरहाम ऊं दाऊद अर दाऊद ऊं यीसू।
अबरहाम गो बेटो इसहाक अर इसहाक गो बेटो याकूब पैदा होयो। फेर याकूब ऊं यहूदा अर बिंगा भाई पैदा होया। यहूदा गा बेटा फिरिस अर जोरह हा, आंगी मां गो नाम तामार हो। फिरिस गो बेटो हिसरोन हो। हिसरोन ऊं एराम पैदा होयो। एराम अम्मीनादाब गो पिता हो अर अम्मीनादाब ऊं नहसोन अर नहसोन ऊं सलमोन पैदा होयो। सलमोन ऊं बोआज पैदा होयो, बोआज गी मां गो नाम राहाब हो। बोआज अर रूत ऊं ओबेद पैदा होयो। ओबेद ऊं यिसै पैदा होयो। अर यिसै ऊं राजा दाऊद पैदा होयो।
अर दाऊद ऊं सुलेमान पैदा होयो, अर झिको बिं लुगाई ऊं पैदा होयो बा पेलां उरियाह गी घराळी ही। सुलेमान ऊं रहबाम पैदा होयो अर रहबाम ऊं अबियाह पैदा होयो अर अबियाह ऊं आसा पैदा होयो। आसा ऊं यहोसाफात पैदा होयो, यहोसाफात ऊं योराम अर योराम ऊं उजियाह गो जन्म होयो। उजियाह ऊं योताम पैदा होयो अर योताम ऊं आहाज अर आहाज ऊं हिजिकिय्याह पैदा होयो। हिजिकिय्याह ऊं मनसेह पैदा होयो अर मनसेह ऊं आमोन पैदा होयो। फेर आमोन ऊं योसे पैदा होयो। फेर इसराएल गै लोगां नै बंदी बणागे बेबिलोण ले जावंता टेम, योसियाह ऊं यकुन्याह अर बिंगै भाईयां गो जन्म होयो।
बेबिलोण जाणै गै बाद यकुन्याह सालतिएल गो पिता बण्यो अर फेर सालतिएल ऊं जरुबाबिल गो जन्म होयो। जरुबाबिल ऊं अबिहूद पैदा होयो। अबिहूद ऊं इल्याकिम गो अर इलयाकीम ऊं अजोर गो जन्म होयो। अजोर ऊं सदोक अर सदोक ऊं आखिम अर आखिम ऊं इलिहूद गो जन्म होयो। इलिहूद ऊं इलियाजर अर इलियाजर ऊं मतान अर मतान ऊं याकूब गो जन्म होयो। अर याकूब ऊं युसुफ पैदा होयो झिको मरियम गो घराळो हो अर मरियम ऊं यीसू पैदा होयो झिको मसी कुहायो।
ईं तरियां अबरहाम ऊं लेगे दाऊद तांई चौवदा पीढी होगी। अर दाऊद ऊं बेबिलोण बंदी होण तांई चौवदा पीढी अर बंदी होगे बेबिलोण जाण गै टेम ऊं लेगे यीसू मसी तांई चौवदा पीढी होगी।


यीसू मसी गो जन्म इंया होयो कै जद मरियम गो रिस्तो यूसफ ऊं होयड़ो हो। ब्या होणूं पेलां ई ठा लागग्यो कै पवितर आत्मा ऊं मरियम पेट ऊं है। पण युसुफ आच्छो आदमी हो अर बो मरियम गै बारै में लोगां नै बतागे बिनै बदनाम कोनी करणो चावै हो। जद बण चुपकै सी रिस्तो तोड़ण गी सोची। जद बो आं बातां नै सोचण ई लागरयो तो सपनै में बिनै सुरगदूत आ'गे केयो, ओ दाऊद गा बेटा युसुफ, मरियम नै बहु बणाण में ना डर। झिको टाबर बिंगै पेट में है बो पवितर आत्मा गो है। जद बो पैदा होवै तो तूं बिंगो नाम यीसू राखी क्यूंकै बो आपगै लोगां नै पापां ऊं मुकती दैयगो।
ओ सारो कीं ईंखातर होयो कै प्रभु परमेसर गी बात बताण आळा नै झिको केयो बो पूरो होवै। “एक कुंवारी छोरी एक टाबर नै जन्म देवैगी बिंगो नाम इम्मानुएल राखीज्यैगो,” झिकै गो मतलब है “परमेसर आपणै सागै है।”
जद युसुफ जाग्यो तो बिंयाई करयो जिंया सुरगदूत बिनै केयो। बो मरियम नै आपगै घरे ल्यायो। अर जद तांई टाबर गो जन्म ना होयो जद तांई युसुफ बिंगै कनै कोनी गेयो। अर युसुफ आपगै बेटै गो नाम यीसू राख्यो।

Luister naar मत्ती 1