© Ahle Kitab Society. All rights reserved.
℗ Ahle Kitab Society

Sylheti NT

ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠎꠦꠛꠟꠣ ꠝꠣꠘꠡꠞꠦ ꠛꠄꠀꠘ ꠇꠞꠞꠣ ꠅꠃ ꠡꠝꠄ ꠁꠝꠣꠝ ꠅꠇꠟ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠛꠠ ꠖꠣꠞꠉꠣ ꠀꠞ ꠍꠤꠖ꠆ꠖꠦꠇꠤꠀ ꠝꠎꠛꠞ ꠝꠣꠘꠥꠡ ꠀꠈꠔꠣꠃ ꠔꠣꠞꠣꠞ ꠉꠦꠍꠦ ꠀꠁꠟꠣ। ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠝꠣꠘꠡꠞꠦ ꠔꠣꠟꠤꠝ ꠖꠤꠞꠣ ꠀꠞ ꠁꠍꠣꠞ ꠝꠣꠎꠖꠤꠀꠃ ꠝꠥꠞ꠆ꠖꠣ ꠅꠇꠟ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠛꠦꠙꠣꠞꠦ ꠔꠛꠟꠤꠉ ꠇꠞꠞꠣ ꠖꠦꠈꠤꠀ ꠔꠣꠞꠣ ꠈꠥꠛ ꠘꠣꠞꠣꠎ ꠅꠁꠍꠟꠣ। ꠔꠣꠞꠣ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠀꠐꠇ ꠇꠞꠟꠣ ꠀꠞ ꠢꠣꠁꠘ꠆ꠎꠣ ꠅꠁꠉꠦꠍꠤꠟ ꠇꠞꠤ ꠄꠞꠣꠞꠦ ꠛꠣꠖꠞ ꠖꠤꠘ ꠙꠞ꠆ꠎꠘ꠆ꠔ ꠛꠘ꠆ꠖꠤ ꠇꠞꠤ ꠕꠁꠟꠣ। ꠎꠦꠞꠣ ꠙꠤꠔꠞꠞ ꠛꠄꠀꠘ ꠢꠥꠘꠍꠤꠟꠣ ꠄꠞꠣꠞ ꠝꠣꠎꠦ ꠛꠃꠔꠦ ꠁꠝꠣꠘ ꠀꠘꠟꠣ, ꠔꠦꠃ ꠁꠝꠣꠘꠖꠣꠞ ꠛꠦꠐꠣꠁꠘ꠆ꠔꠞ ꠙꠞꠤꠝꠣꠘ ꠙꠣꠌ ꠀꠎꠣꠞꠞ ꠟꠣꠈꠣꠘ ꠅꠁꠟ।
ꠛꠣꠖꠞ ꠖꠤꠘ ꠁꠢꠥꠖꠤꠞ ꠘꠦꠔꠣ ꠅꠇꠟ, ꠝꠥꠞꠛ꠆ꠛꠤ-ꠡꠣꠟꠤꠡ ꠀꠞ ꠝꠃꠟꠣꠘꠣ ꠅꠇꠟ ꠄꠇꠟꠉꠦ ꠎꠦꠞꠥꠎꠣꠟꠦꠝꠅ ꠖꠟꠣ ꠅꠁꠟꠣ। ꠢꠤꠈꠣꠘꠅ ꠙꠞꠗꠣꠘ ꠁꠝꠣꠝ ꠢꠣꠘꠘ, ꠇꠣꠄꠀꠚꠣ, ꠁꠃꠢꠥꠘ꠆ꠘꠣ, ꠍꠤꠇꠘ꠆ꠖꠞ ꠀꠞ ꠙꠞꠗꠣꠘ ꠁꠝꠣꠝꠞ ꠈꠦꠡ-ꠇꠥꠐꠥꠝ ꠅꠇꠟꠅ ꠀꠎꠤꠞ ꠀꠍꠟꠣ। ꠔꠣꠞꠣ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠔꠣꠞꠣꠞ ꠝꠣꠎꠈꠣꠘꠅ ꠃꠛꠣ ꠇꠞꠣꠁꠀ ꠎꠤꠇꠣꠁꠟꠣ, “ꠔꠥꠝꠞꠣ ꠇꠥꠘ ꠛꠟꠦ ꠀꠞ ꠇꠣꠞ ꠘꠣꠝꠦ ꠁ ꠇꠣꠝ ꠇꠞꠞꠣꠄ?” ꠔꠦꠃ ꠙꠤꠔꠞꠦ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ ꠔꠣꠞꠣꠞꠦ ꠇꠁꠟꠣ, “ꠅ ꠝꠥꠞꠛ꠆ꠛꠤ ꠍꠣꠄꠛꠣꠁꠘ ꠀꠞ ꠖꠦꠡꠞ ꠛꠥꠎꠥꠞ꠆ꠉ ꠅꠇꠟ, ꠄꠇꠎꠘ ꠟꠦꠋꠠꠣ-ꠀꠔꠥꠞ ꠝꠣꠘꠡꠞ ꠜꠣꠟꠣꠁ ꠇꠞꠍꠤ ꠇꠞꠤ ꠀꠙꠘꠣꠞꠣ ꠀꠁꠎ ꠀꠝꠞꠣꠞꠦ ꠎꠦꠞꠣ ꠇꠞꠞꠣ, ꠝꠣꠘꠥꠡꠉꠥ ꠇꠤꠟꠣ ꠜꠣꠟꠣ ꠅꠁꠟ। ꠔꠦ ꠀꠙꠘꠣꠞꠣ ꠢꠇꠟꠦ ꠀꠞ ꠛꠘꠤ ꠁꠍꠞꠣꠁꠟ ꠅꠇꠟꠦꠅ ꠢꠥꠘꠃꠇ꠆ꠇꠣ, ꠘꠣꠍꠣꠞꠔꠞ ꠁꠍꠣ ꠀꠟ-ꠝꠍꠤꠞ ꠘꠣꠝꠦ, ꠎꠦꠘꠞꠦ ꠀꠙꠘꠣꠞꠣ ꠍꠟꠤꠛꠅ ꠉꠣꠕꠤꠀ ꠎꠣꠘꠦ ꠝꠣꠞꠍꠟꠣ, ꠎꠦꠘꠞꠦ ꠀꠟ꠆ꠟꠣꠄ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠔꠣꠘ ꠛꠟꠦꠃ ꠁ ꠝꠣꠘꠥꠡꠉꠥ ꠀꠙꠘꠣꠁꠘ꠆ꠔꠞ ꠍꠣꠝꠘꠦ ꠜꠣꠟꠣ ꠅꠁꠀ ꠃꠛꠣꠁꠍꠦ। ꠔꠣꠁꠘ ꠢꠃ ꠙꠣꠔ꠆ꠔꠞ, ꠎꠦꠔꠣꠞꠦ ꠞꠣꠎ ꠝꠦꠡ꠆ꠔꠁꠞ ꠅꠇꠟꠦ, ꠝꠣꠘꠤ ꠀꠙꠘꠣꠞꠣ ꠄꠟꠣꠝꠤ ꠇꠞꠤ ꠛꠣꠖ ꠖꠤꠟꠣꠁꠍꠟꠣ, ꠙꠣꠇ ꠇꠤꠔꠣꠛꠞ ꠇꠕꠣ ꠝꠣꠚꠤꠇ ꠢꠃ ꠙꠣꠔ꠆ꠔꠞꠃ ꠀꠁꠎ ꠁꠀꠘ ꠇꠥꠘꠣꠞ ꠢꠇꠟ ꠕꠣꠇꠤ ꠎꠞꠥꠞꠤ ꠈꠥꠐꠤ ꠅꠁꠍꠦ। ꠔꠞꠣꠘꠤꠞ ꠈꠦꠝꠔꠣ ꠀꠞ ꠇꠦꠃꠞꠞ ꠉꠦꠍꠦ ꠘꠣꠁ, ꠇꠣꠞꠘ ꠀꠍꠝꠣꠘꠞ ꠔꠟꠦ ꠀꠞ ꠎꠝꠤꠘꠞ ꠃꠙꠞꠦ ꠅꠃꠟꠣ ꠀꠞ ꠇꠥꠘꠥ ꠘꠣꠝ ꠖꠦꠅꠀ ꠅꠁꠍꠦ ꠘꠣ, ꠎꠦꠘ ꠘꠣꠝꠦ ꠀꠝꠞꠣ ꠞꠦꠢꠣꠁ ꠙꠣꠁꠝꠥ।”
ꠙꠤꠔꠞ ꠀꠞ ꠢꠣꠘ꠆ꠘꠣꠘꠞ ꠡꠣꠅꠡ ꠖꠦꠈꠤꠀ, ꠄꠞꠣ ꠎꠦꠘ ꠅꠡꠤꠇ꠆ꠇꠤꠔ ꠡꠣꠝꠣꠁꠘ꠆ꠘ ꠝꠣꠘꠥꠡ ꠁꠔꠣ ꠎꠣꠘꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣ, ꠀꠞ ꠄꠞꠣ ꠁꠍꠣꠞ ꠟꠉꠦ ꠀꠍꠟꠣ ꠇꠞꠤꠅ ꠌꠤꠘꠟꠣ। ꠎꠦ ꠛꠦꠐꠣ ꠜꠣꠟꠣ ꠅꠁꠍꠤꠟ, ꠢꠦ ꠄꠞꠣꠞ ꠟꠉꠦ ꠃꠛꠣꠁꠞꠂꠍꠦ ꠖꠦꠈꠤꠀ ꠄꠞꠣꠞꠦ ꠀꠞ ꠇꠥꠘ꠆ꠔꠣ ꠇꠅꠀꠞ ꠡꠣꠅꠡ ꠅꠁꠟ ꠘꠣ। ꠛꠣꠖꠦ ꠝꠎꠟꠤꠍ ꠕꠣꠇꠤ ꠄꠞꠣꠞꠦ ꠛꠣꠞꠦ ꠎꠣꠅꠀꠞ ꠢꠥꠇꠥꠝ ꠖꠤꠀ ꠔꠣꠞꠣ ꠢꠇꠟꠦ ꠙꠞꠣꠝꠤꠡ ꠇꠞꠣꠔ ꠛꠁꠀ ꠇꠁꠟꠣ, “ꠁ ꠝꠣꠘꠡꠞꠦ ꠟꠁꠀ ꠀꠝꠞꠣ ꠇꠤꠔꠣ ꠇꠞꠔꠣꠝ? ꠄꠞꠣ ꠔ ꠛꠃꠔ ꠛꠠ ꠄꠇ ꠇꠦꠞꠣꠝꠔꠤ ꠇꠣꠝ ꠇꠞꠍꠦ ꠀꠞ ꠁꠔꠣ ꠔ ꠀꠡ꠆ꠔꠣ ꠎꠦꠞꠥꠎꠣꠟꠦꠝꠞ ꠢꠇꠟꠦ ꠎꠣꠘꠦ, ꠀꠞ ꠀꠝꠞꠣꠅ ꠁꠐꠣꠞꠦ ꠅꠡ꠆ꠛꠤꠇꠣꠞ ꠇꠞꠔꠣꠝ ꠙꠣꠞꠤꠀꠞ ꠘꠣ। ꠅꠁꠟꠦ ꠝꠣꠘꠡꠞ ꠉꠦꠍꠦ ꠎꠣꠘꠥ ꠁ ꠇꠕꠣ ꠀꠞ ꠎꠣꠘꠣ-ꠎꠣꠘꠤ ꠘꠣ ꠅꠄ, ꠄꠞꠟꠣꠉꠤ ꠄꠞꠣꠞꠦ ꠒꠞ ꠖꠦꠈꠣꠁꠟ ꠅꠃꠇ, ꠎꠣꠔꠦ ꠁ ꠎꠘꠞ ꠘꠣꠝꠦ ꠔꠣꠞꠣ ꠀꠞ ꠇꠦꠃꠞꠞ ꠉꠦꠍꠦ ꠇꠥꠘ꠆ꠔꠣ ꠘꠣ ꠇꠄ।” ꠛꠣꠖꠦ ꠔꠣꠞꠣ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠢꠤꠞꠛꠣꠞ ꠀꠘꠣꠁꠀ ꠅꠃ ꠢꠥꠇꠥꠝ ꠖꠤꠟꠣ, “ꠔꠥꠝꠞꠣ ꠁꠍꠣꠞ ꠘꠣꠝꠦ ꠀꠞ ꠇꠥꠘꠥꠖꠤꠘ ꠄꠇꠖꠝ ꠇꠤꠌ꠆ꠍꠥ ꠇꠁꠅ ꠘꠣ, ꠇꠥꠘꠥꠎꠣꠔ ꠘꠍꠤꠅꠔꠅ ꠇꠞꠤꠅ ꠘꠣ।” ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠔꠣꠞꠣꠞꠦ ꠎꠥꠀꠙ ꠖꠤꠟꠣ, “ꠀꠝꠞꠣ ꠀꠙꠘꠣꠁꠘ꠆ꠔꠞ ꠢꠥꠇꠥꠝ ꠝꠣꠘꠔꠣꠝ, ꠘꠣ ꠀꠟ꠆ꠟꠣꠞ ꠢꠥꠇꠥꠝ ꠝꠣꠘꠔꠣꠝ? ꠀꠟ꠆ꠟꠣꠞ ꠘꠎꠞꠅ ꠇꠥꠘꠈꠣꠘ ꠑꠤꠇ, ꠁꠔꠣ ꠀꠙꠘꠣꠞꠣꠃ ꠛꠤꠌꠣꠞ ꠇꠞꠃꠇ꠆ꠇꠣ। ꠀꠝꠞꠣ ꠎꠦꠔꠣ ꠖꠦꠈꠍꠤ ꠀꠞ ꠢꠥꠘꠍꠤ, ꠁꠔꠣ ꠘꠣ ꠇꠁꠀ ꠔ ꠕꠣꠇꠔꠣꠝ ꠙꠣꠞꠤ ꠘꠣ।” ꠔꠦꠃ ꠔꠣꠞꠣ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠀꠞꠅ ꠒꠞ ꠖꠦꠈꠣꠁꠀ ꠍꠣꠠꠤ ꠖꠤꠟꠣ। ꠝꠣꠘꠡꠞꠦ ꠒꠞꠣꠁꠀ ꠔꠣꠞꠣ ꠄꠞꠣꠞꠦ ꠇꠥꠘꠥ ꠡꠣꠎꠣ ꠖꠤꠔꠣ ꠙꠣꠞꠟꠣ ꠘꠣ, ꠇꠣꠞꠘ ꠎꠦꠔꠣ ꠊꠐꠍꠤꠟ ꠁꠔꠣ ꠖꠦꠈꠤꠀ ꠢꠇꠟ ꠝꠣꠘꠡꠦ ꠀꠟ꠆ꠟꠣꠞ ꠙ꠆ꠞꠡꠋꠡꠣ ꠇꠞꠣꠔ ꠀꠍꠤꠟ। ꠎꠦ ꠝꠣꠘꠥꠡꠉꠥ ꠇꠦꠞꠣꠝꠔꠤ ꠇꠣꠝꠞ ꠝꠣꠎꠖꠤ ꠜꠣꠟꠣ ꠅꠁꠍꠤꠟ ꠔꠣꠞ ꠛꠄꠅꠡ ꠌꠣꠟ꠆ꠟꠤꠡ ꠛꠍꠞꠞ ꠛꠦꠡꠤ ꠀꠍꠤꠟ।

ꠁ ꠛꠤꠌꠣꠞ ꠕꠣꠇꠤ ꠔꠣꠞꠣꠞꠦ ꠍꠣꠠꠣꠞ ꠛꠣꠖꠦ ꠙꠤꠔꠞ ꠀꠞ ꠢꠣꠘ꠆ꠘꠣꠘ ꠔꠣꠞꠣꠞ ꠀꠙꠘ ꠝꠣꠘꠡꠞ ꠉꠦꠍꠦ ꠉꠦꠟꠣꠉꠤ, ꠉꠤꠀ ꠛꠠ ꠁꠝꠣꠝ ꠅꠇꠟꠦ ꠀꠞ ꠝꠥꠞꠛ꠆ꠛꠤ-ꠡꠣꠟꠤꠡ ꠅꠇꠟꠦꠅ ꠔꠣꠞꠣꠞꠦ ꠎꠦꠔꠣ ꠎꠦꠔꠣ ꠇꠁꠍꠟꠣ, ꠁꠔꠣ ꠢꠇ꠆ꠇꠟꠔꠣ ꠎꠣꠘꠣꠁꠟꠣ। ꠁꠔꠣ ꠢꠥꠘꠣꠞ ꠛꠣꠖꠦ ꠔꠣꠞꠣ ꠢꠇꠟꠦ ꠄꠇ ꠖꠤꠟꠦ ꠀꠟ꠆ꠟꠣꠞ ꠉꠦꠍꠦ ꠎꠥꠞꠦ ꠎꠥꠞꠦ ꠖꠥꠀ ꠇꠞꠟꠣ, “ꠅ ꠝꠣꠟꠤꠇ, ꠔꠥꠝꠤ ꠀꠍꠝꠣꠘ, ꠎꠝꠤꠘ, ꠖꠞꠤꠀ ꠀꠞ ꠁꠔꠣꠞ ꠝꠣꠎꠦ ꠎꠔꠔꠣ ꠀꠍꠦ ꠢꠇ꠆ꠇꠟꠔꠣ ꠙꠄꠖꠣ ꠇꠞꠍ। ꠔꠥꠝꠤ ꠔꠥꠝꠣꠞ ꠉꠥꠟꠣꠝ, ꠀꠝꠞꠣꠞ ꠈꠣꠘ꠆ꠖꠣꠘꠞ ꠛꠣꠚ ꠖꠣꠃꠖꠞ ꠎꠛꠣꠘꠅ ꠙꠣꠇ ꠞꠥꠢꠥꠞ ꠝꠣꠎꠖꠤꠀ ꠅꠃꠟꠣ ꠇꠁꠍ,

ꠢꠇ꠆ꠇꠟ ꠎꠣꠔꠤꠄ ꠇꠦꠘꠦ ꠅꠡ꠆ꠕꠤꠞ ꠅꠁꠀ ꠌꠤꠟ꠆ꠟꠣꠁꠞꠣ?
ꠇꠤꠅꠞ ꠟꠣꠉꠤ ꠝꠣꠘꠡꠦ ꠛꠦꠢꠥꠖꠣ ꠚꠘ꠆ꠖꠤ ꠇꠞꠦꠞ?
ꠎꠉꠔꠞ ꠛꠣꠖꠡꠣ ꠅꠇꠟ ꠛꠤꠉꠠꠤ ꠉꠦꠟ,
ꠞꠣꠎꠣ ꠅꠇꠟ ꠄꠇꠈꠣꠘꠅ ꠖꠟꠣ ꠅꠁꠟ,
ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠀꠞ ꠔꠣꠘ ꠀꠟ-ꠝꠍꠤꠞ ꠛꠤꠞꠥꠖ꠆ꠖꠦ।

ꠔꠥꠝꠣꠞ ꠙꠛꠤꠔ꠆ꠞ ꠉꠥꠟꠣꠝ ꠁꠍꠣ, ꠎꠦꠘꠞꠦ ꠔꠥꠝꠤ ꠀꠟ-ꠝꠍꠤ ꠇꠞꠤꠀ ꠖꠥꠘꠤꠀꠔ ꠙꠣꠑꠣꠁꠍ, ꠔꠣꠘ ꠛꠤꠞꠥꠖ꠆ꠖꠦ ꠞꠣꠎꠣ ꠢꠦꠞꠥꠖ ꠀꠞ ꠙꠘ꠆ꠔꠤꠅ ꠙꠤꠟꠣꠔ, ꠅꠃ ꠡꠢꠞꠅ ꠅ-ꠁꠢꠥꠖꠤ ꠀꠞ ꠛꠘꠤ ꠁꠍꠞꠣꠁꠟꠞ ꠟꠉꠦ ꠄꠇꠈꠣꠘꠅ ꠅꠁꠍꠤꠟ। ꠔꠥꠝꠣꠞ ꠝꠞ꠆ꠎꠤ ꠀꠞ ꠔꠥꠝꠣꠞ ꠇꠥꠖꠞꠔꠦ ꠎꠦꠔꠣ ꠊꠐꠣꠞ ꠟꠣꠉꠤ ꠔꠥꠝꠤ ꠀꠉꠦꠃ ꠑꠤꠇ ꠇꠞꠤ ꠞꠣꠈꠤꠍꠟꠣꠄ, ꠔꠣꠞꠣ ꠅꠃꠔꠣꠃ ꠊꠐꠣꠁꠍꠦ। ꠅꠈꠘ ꠅ ꠝꠣꠟꠤꠇ, ꠔꠣꠞꠣ ꠀꠝꠞꠣꠞꠦ ꠇꠤꠟꠣ ꠒꠞ ꠖꠦꠈꠣꠁꠞꠣ, ꠔꠥꠝꠤ ꠈꠤꠀꠟ ꠇꠞꠅ, ꠔꠥꠝꠣꠞ ꠉꠥꠟꠣꠝ ꠅꠇꠟꠞꠦ ꠅꠃꠟꠣ ꠔꠣꠇ꠆ꠇꠔ ꠖꠦꠅ ꠎꠣꠔꠦ, ꠙꠥꠞꠣꠙꠥꠞ ꠡꠣꠅꠡ ꠇꠞꠤꠀ ꠔꠥꠝꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠔꠣꠝ ꠙꠣꠞꠤ। ꠛꠦꠝꠣꠞꠤ ꠅꠇꠟꠞ ꠡꠤꠚꠣꠞ ꠟꠣꠉꠤ ꠔꠥꠝꠣꠞ ꠀꠔ ꠝꠥꠛꠣꠞꠇ ꠛꠣꠠꠣꠁ ꠖꠦꠅ, ꠀꠞ ꠔꠥꠝꠣꠞ ꠙꠣꠇ ꠉꠥꠟꠣꠝ ꠁꠍꠣꠞ ꠘꠣꠝꠦ ꠝꠥꠎꠦꠎꠣ ꠀꠞ ꠇꠦꠞꠣꠝꠔꠤ ꠖꠦꠈꠣꠘꠤꠞ ꠔꠚꠤꠇ ꠖꠦꠅ।”
ꠔꠣꠞꠣꠞ ꠖꠥꠀ ꠇꠞꠣꠞ ꠛꠣꠖꠦ ꠎꠦ ꠎꠣꠉꠣꠔ ꠔꠣꠞꠣ ꠖꠟꠣ ꠅꠁꠍꠟꠣ, ꠢꠤ ꠎꠣꠉꠣ ꠇꠣꠙꠤꠀ ꠃꠑꠟ। ꠀꠞ ꠔꠣꠞꠣ ꠢꠇꠟꠦ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ ꠡꠣꠅꠡ ꠇꠞꠤꠀ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠣꠔ ꠞꠁꠟꠣ।

ꠎꠦꠞꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠍꠤꠟꠣ, ꠔꠣꠞꠣꠞ ꠄꠇ ꠝꠘ ꠀꠞ ꠄꠇ ꠖꠤꠟ ꠀꠍꠤꠟ। ꠔꠣꠞꠣ ꠄꠇꠎꠘꠦꠅ ꠘꠤꠎꠞ ꠗꠘ-ꠖꠃꠟꠔꠞꠦ ꠘꠤꠎꠞ ꠇꠁꠀ ꠖꠣꠛꠤ ꠇꠞꠔꠣ ꠘꠣ, ꠢꠇ꠆ꠇꠟꠔꠣꠃ ꠢꠇꠟꠞ ꠖꠞꠇꠣꠞ ꠝꠔ ꠈꠞꠌ ꠇꠞꠔꠣ। ꠍꠣꠢꠣꠛꠤ ꠅꠇꠟꠦ ꠈꠥꠛ ꠢꠤꠝ꠆ꠝꠔ ꠇꠞꠤꠀ, ꠢꠎꠞꠔ ꠁꠍꠣꠞ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠛꠤꠡꠄꠄ ꠔꠛꠟꠤꠉ ꠇꠞꠔꠣ, ꠀꠞ ꠔꠣꠞꠣ ꠢꠇ꠆ꠇꠟꠞ ꠃꠙꠞꠦ ꠀꠟ꠆ꠟꠣꠞ ꠈꠣꠍ ꠞꠢꠝꠔ ꠀꠍꠤꠟ। ꠔꠣꠞꠣꠞ ꠝꠣꠎꠦ ꠇꠦꠃ ꠅꠜꠣꠛꠤ ꠀꠍꠟꠣ ꠘꠣ, ꠇꠣꠞꠘ ꠎꠦꠞꠣꠞ ꠎꠝꠤꠘ ꠛꠣ ꠛꠣꠠꠤ ꠀꠍꠤꠟ ꠔꠣꠞꠣ ꠁꠔꠣ ꠢꠇꠟꠔꠣ ꠛꠦꠌꠤꠀ, ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠘꠤꠀ ꠖꠣꠘ ꠇꠞꠤꠟꠤꠔꠣ, ꠛꠣꠖꠦ ꠎꠣꠞ ꠎꠦꠟꠣ ꠉꠞꠎ ꠔꠣꠞꠦ ꠅꠃꠟꠣ ꠖꠦꠅꠀ ꠅꠁꠔ।
ꠀꠞ ꠁꠃꠍꠥꠚ ꠘꠣꠝꠦ ꠟꠦꠛꠤꠞ ꠛꠋꠡꠞ ꠄꠇꠎꠘ ꠝꠣꠘꠥꠡ ꠀꠍꠟꠣ, ꠔꠣꠘ ꠛꠣꠠꠤ ꠍꠣꠁꠙ꠆ꠞꠣꠍ ꠖꠤꠙ, ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠒꠣꠇꠤꠔꠣ ꠛꠣꠞ꠆ꠘꠣꠛꠣꠍ, ꠝꠣꠘꠤ ꠃꠔꠡꠣꠢ ꠎꠥꠉꠣꠅꠞꠣ, ꠔꠣꠘ ꠄꠇꠎꠞꠣ ꠎꠝꠤꠘ ꠀꠍꠤꠟ, ꠔꠣꠁꠘꠅ ꠔꠣꠘ ꠎꠝꠤꠘꠈꠣꠘ ꠛꠦꠌꠤꠀ ꠐꠦꠇꠣ ꠀꠘꠤꠀ ꠍꠣꠢꠣꠛꠤ ꠅꠇꠟꠞ ꠇꠖꠝꠅ ꠖꠣꠘ ꠇꠞꠟꠣ।

Luister naar ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 4