भजनसंग्रह 107:10-16
भजनसंग्रह 107:10-16 नेपाली नयाँ संशोधित संस्करण (NNRV)
कोही-कोही घोर अन्धकारमा बसे, कैदीहरू जो फलामका साङ्लाले बाँधिएर पीडामा थिए, किनभने तिनीहरूले परमेश्वरका वचनको विद्रोह गरेका थिए, र सर्वोच्चका सल्लाहको अवहेलना गरेका थिए। यसकारण उहाँले तिनीहरूलाई कठोर परिश्रममा पर्न दिनुभयो। तिनीहरू लोटे, तर तिनीहरूलाई गुहार गर्ने कोही भएन। तब तिनीहरूले आफ्नो सङ्कष्टमा परमप्रभुको पुकारा गरे, र उहाँले तिनीहरूलाई तिनीहरूको आपद्बाट छुटाउनुभयो। उहाँले तिनीहरूलाई घोर अन्धकारबाट बाहिर ल्याउनुभयो, र उहाँले तिनीहरूका बन्धन टुक्रा-टुक्रा पारिदिनुभयो। तिनीहरूले परमेश्वरको अचूक प्रेमको निम्ति र मानिसहरूप्रति उहाँका आश्चर्य कामका निम्ति उहाँलाई धन्यवाद चढ़ाऊन्! किनभने उहाँले काँसाका मूल ढोकाहरू तोडिदिनुहुन्छ, र फलामे आग्लाहरू छिनालिदिनुहुन्छ।
भजनसंग्रह 107:10-16 पवित्र बाइबल, नेपाली समकालीन संस्करण (NCV)
कोही-कोही अन्धकार, र घोर अन्धकारमा जिइरहेका थिए, कैदीहरू फलामका साङ्लाले बाँधिएर कष्ट भोगिरहेका थिए, किनकि तिनीहरूले परमेश्वरका वचनको विरुद्धमा विद्रोह गरेका थिए र सर्वोच्च परमेश्वरको योजनालाई तिरस्कार गरेका थिए। यसकारण उहाँले तिनीहरूलाई कठोर परिश्रम गर्न लगाउनुभयो; तिनीहरूले ठक्कर खाए, तर मदत गर्नलाई कोही थिएन। तब आफ्ना कष्टहरूमा तिनीहरूले याहवेहलाई पुकारे, र उहाँले तिनीहरूलाई तिनीहरूका सङ्कष्टहरूबाट बचाउनुभयो। उहाँले तिनीहरूलाई अन्धकार, र घोर अन्धकारहरूबाट निकाल्नुभयो; र तिनीहरू बाँधिएका साङ्लाहरू चुँडाइदिनुभयो। उहाँको अचुक प्रेम र मानिसहरूप्रति उहाँका अद्भुत कार्यहरूका निम्ति तिनीहरूले याहवेहलाई धन्यवाद देऊन्; किनकि उहाँले काँसोका मूलढोकाहरू भत्काइदिनुहुन्छ, र फलामका आग्लोहरू काटेर टुक्रा-टुक्रा पारिदिनुहुन्छ।
भजनसंग्रह 107:10-16 पवित्र बाइबल (NERV)
परमेश्वरका कतिपय मानिसहरू कैदीहरू थिए, झ्यालखानाको अँध्यारो कोठाहरूमा बन्दी थिए। किनभने तिनीहरू परमेश्वरले भनेका कुराहरूका विरूद्ध लडेका थिए। तिनीहरूले सर्वोच्च परमेश्वरबाट आएका सल्लाहहरू प्रति कानै थापेनन्। परमेश्वरले तिनीहरूकै कु-कर्मको कारणले गर्दा उनीहरूका जीवन जीउन कठिन परिदिनु भयो। तिनीहरू ठेस लागेर लडे अनि त्यहाँ तिनीहरूलाई साथ दिने कोही पनि थिएन। ती मानिसहरूलाई सङ्कटहरूमा फँसाइयो। यसैकारण तिनीहरूले परमेश्वरलाई गुहार मागे अनि उहाँले तिनीहरूलाई सङ्कटबाट बचाउनु भयो। कालो कोठरीको कैदबाट परमेश्वरले तिनीहरूलाई बाहिर निकाल्नु भयो। तिनीहरूलाई बाँधिएका डोरीहरू उहाँले चुडाई दिनुभयो। उहाँको अनन्त प्रेम र मानिसहरूको निम्ति उहाँले सृजना गर्नु भएको आश्चर्यकामहरूको निम्ति उहाँलाई धन्यवाद देऊ। हाम्रा शत्रुहरूलाई नाश गर्न परमप्रभुले हामीलाई सहायता दिनुभयो, परमेश्वरले तिनीहरूको काँसाको मूल ढोका भत्काउन सक्नुहुन्छ। परमेश्वरले तिनीहरूका फलामका बारहरू टुक्रा-टुक्रा पारिदिन सक्नुहुन्छ।
भजनसंग्रह 107:10-16 सरल नेपाली पवित्र बाइबल (सरल नेपाली)
कति निराशा र अन्धकारमा जिइरहेका थिए, साङ्लाले बाँधिएर कैदीसरि तिनीहरूले कष्ट भोगिरहेका थिए किनभने तिनीहरूले सर्वशक्तिमान् परमेश्वरका आज्ञाहरूको विरोध गरेका थिए र उहाँका अर्ती अस्वीकार गरेका थिए। कठोर परिश्रमले तिनीहरू थाकिसकेका थिए, तिनीहरू भूइँमा लोट्दथे, तिनीहरूलाई मद्दत गर्ने कोही थिएन। तब तिनीहरूले परमप्रभुलाई आफ्ना कष्टमा पुकारे र उहाँले तिनीहरूलाई सबै दु:ख-कष्टबाट बचाउनुभयो। उहाँले तिनीहरूलाई निराशा र अन्धकारबाट निकाली ल्याउनुभयो, र तिनीहरूका साङ्ला टुक्रा-टुक्रा पारिदिनुभयो। तिनीहरूले परमप्रभुलाई उहाँको अटुट प्रेमको निम्ति र उहाँले तिनीहरूको लागि गर्नुभएको उदेकका कामहरूको निम्ति धन्यवाद दिनैपर्छ। उहाँले काँसाका ढोकाहरू तोड्नुहुन्छ र फलामका छेक-बारहरू टुक्रा-टुक्रा पार्नुहुन्छ।