यशैया 33:1-6
यशैया 33:1-6 नेपाली नयाँ संशोधित संस्करण (NNRV)
धिक्कार, तँ नाश गर्नेलाई, जो आफैचाहिँ नष्ट पारिएको छैनस्! तँ विश्वासघातीलाई, धिक्कार, जसलाई चाहिँ कसैले विश्वासघात गरेको छैन! जब तैंले नाश गर्न बन्द गर्छस्, तब तँ पनि नष्ट पारिनेछस्। जब तैंले विश्वासघात गर्न बन्द गर्छस्, तब तँलाई विश्वासघात गरिनेछ। हे परमप्रभु, हामीमाथि अनुग्रह गर्नुहोस्। हामी तपाईंको चाहना गर्दछौं। बिहानैपिच्छे तपाईं हाम्रा शक्ति र दु:खमा हाम्रो उद्धार हुनुहोस्। तपाईंका सोरको गर्जनमा मानिसहरू भाग्छन्। तपाईं उठ्नुहुँदा जाति-जातिहरू छरपष्ट हुन्छन्। हे जाति-जातिका मानिस हो, तिमीहरूका लूटको कटनी ससाना सलहहरूले खाएझैँ हुनेछ। सलहहरूझैँ मानिसहरू त्यसमा झम्टिनेछन्। परमप्रभु उच्च हुनुभएको छ, किनकि उहाँ उच्चमा विराजमान हुनुहुन्छ। उहाँले सियोनलाई न्याय र धार्मिकताले परिपूर्ण पार्नुहुनेछ। तिमीहरूका समयको लागि उहाँ पक्का जग र मुक्ति तथा ज्ञान र बुद्धिको बहुमूल्य भण्डार हुनुहुनेछ। परमप्रभुको भय मान्नु नै यस भण्डारको साँचो हो।
यशैया 33:1-6 पवित्र बाइबल, नेपाली समकालीन संस्करण (NCV)
धिक्कार तँ नाशकर्तालाई, जो नष्ट पारिएको छैनस्! धिक्कार तँ विश्वासघातीलाई, जसले धोका पाएको छैनस्! जब तैँले नष्ट गर्न छोड्छस्, तब तँ नष्ट पारिनेछस्; जब तैँले विश्वासघात गर्न छोड्छस्, तब तिनीहरूले तँसँग विश्वासघात गर्नेछन्। हे याहवेह, हामीप्रति अनुग्रही हुनुहोस्; हामी तपाईंको बाटो हेरिरहन्छौँ; हरेक बिहान हाम्रो सामर्थ्य र विपत्तिमा हाम्रो मुक्ति बन्नुहोस्। तपाईंको सेनाको गर्जनको आवाजमा मानिसहरू भाग्छन्; तपाईं खडा हुनुहुँदा राष्ट्रहरू तितरबितर हुन्छन्। हे राष्ट्रहरू हो, तिमीहरूका लुटका सामान सलहहरूले झैँ कटनी गरिएको छ; मानिसहरू लुटका सामानमा सलहका बथानझैँ झम्टन्छन्। याहवेह अति महान् हुनुहुन्छ; किनकि उहाँ उच्च स्थानमा विराजमान हुनुहुन्छ; उहाँले सियोनलाई न्याय र धार्मिकताले भरिदिनुहुनेछ। उहाँ तिमीहरूका समयमा तिमीहरूका दृढ जग; मुक्ति, बुद्धि र ज्ञानका मूल्यवान् भण्डार हुनुहुनेछ; याहवेहको भय नै यस भण्डारको साँचो हो।
यशैया 33:1-6 पवित्र बाइबल (NERV)
हेर, तिमीहरू युद्ध गर्छौ र मानिसहरूका चीजबीजहरू लुटपीट पार्छौ, तर ती मानिसहरूले तिमीहरूबाट केही पनि लुट्दैनन्। तिमीहरू मानिसहरूको विरूद्ध जानेछौ, तर ती मानिसहरू तिमीहरूका विरूद्ध कहिल्यै उभिने छैनन्। यसर्थ तिमीहरूले जब चोर्न छोड्नेछौ, अरू मानिसहरूले चोरी गर्न थाल्नेछन्। जब तिमीहरू मानिसहरूको विरूद्ध उभिन छोड्नेछौ अरू मानिसहरू तिमीहरूका विरूद्ध उभिन थाल्नेछन्। हे परमप्रभु, हामीमा अनुग्रह गर्नुहोस्। हामी तपाईंको सहायतकोलागि पर्खिरहेका छौं। परमप्रभु, हामीलाई प्रत्येक बिहान शक्ति प्रदान गर्नुहोस, कष्टमा हाम्रो उद्धार हुनुहोस। तपाईंको प्रभावपूर्ण सोरले मानिसहरूलाई भयभीत पार्दछ। अनि तिनीहरू तपाईंदेखि भाग्नेछन् तपाईंको महानताले जातिहरूलाई भगाउँछ। तिमीहरूले युद्धमा चोरेका चीजबीजहरू तिमीहरूबाट खोसिनेछन्। धेरै-धेरै मानिसहरू आउनेछन् र तिमीहरूको धन सम्पत्ति लुटेर लानेछन्। यो त्यस्तो समय हुनेछ जब सलहहरू आएर तिमीहरूका सबै अन्नहरू खानेछन्। परमप्रभु महान हुनुहुन्छ। उहाँ एकदम उच्च ठाउँमा बस्नुहुन्छ। परमप्रभुले सियोनलाई न्याय अनि धार्मिकताले भरिपूर्ण पार्नुहुनेछ। यरूशलेम तिमी सम्पन्न छौ। तिनी ईश्वरी ज्ञान र बुद्धिले सम्पन्न छौ। तिमीहरू मुक्तिले समृद्ध छौ। तिमीहरू परमप्रभुको आदर गर्छौ, अनि त्यसैले तिमीहरू समृद्ध छौ। यसर्थ तिमीहरू जान्न सक्छौ तिमीलाई यस्तै भइरहनेछ।
यशैया 33:1-6 सरल नेपाली पवित्र बाइबल (सरल नेपाली)
हाम्रा शत्रुहरू नाश हुनेछन्! तिनीहरूले डाँका मारेका र धोका दिएका छन् तर तिनीहरूलाई भने कसैले त्यसो गरेका छैनन्। तर तिनीहरूको डाँका मार्ने र धोका दिने बेला बितिसक्यो र तिनीहरूमाथि पो डकैती र धोकाबाजी हुनेछ। हे परमप्रभु, हामीहरूमाथि दया गर्नुहोस्। हामीले तपाईंमा आशा गरेका छौं, दिन-दिन हाम्रो रक्षा गर्नुहोस् र कष्टका समयमा हामीलाई बचाउनुहोस्। तपाईंले हाम्रो निम्ति लडाइँ गरिदिनुहुँदा तपाईंको आवाजको गर्जन सुनेर जाति-जातिहरू भाग्छन्। झम्टेर तिनीहरूका सर-सामान खोसिनेछन् र लुटका मालझैँ लगिनेछन्। परमप्रभु कति महान् हुनुहुन्छ! उहाँ उच्चमा विराजमान् हुनुहुन्छ। उहाँले न्याय र इमानदारीले यरूशलेम भरपूर पार्नुहुनेछ र देशलाई स्थिर बनाउनुहुनेछ। उहाँले सधैँ आफ्ना प्रजालाई रक्षा गर्नुहुन्छ र तिनीहरूलाई ज्ञान र बुद्धि दिनुहुन्छ। परमप्रभुसितको सम्मान नै तिनीहरूको सबैभन्दा ठूलो धन हो।