Matthew 8
8
1အဲနော့ ကိုယ်တော်ယေရှုဟ တော်ပေါ်ဟနေဆင်းလာဝိုခါမှာ လူအုပ်များဂီးဟလဲ ကိုယ်တော်နော့ဟနေ လိုက်ပါလာဂေ့လေရယ်။ 2အဲခီမှာ နာဂီးရောဂါဆွဲကပ်နေဝို လူတယော့ရော့လာပြီး ကိုယ်တော်ယေရှုရှေ့မှာ ဒူးထော့ပီး "ကိုယ်တော်ဆန္ဒရှေ့ရယ်ဆိုဝါ ကျနော်ရဲ့နာရောဂါဝို ပျော့ကမ်းအော် ကုသပေးနိုင်ပါရယ်" ဆိုပီး ရှော့တံလေရယ်။ 3အဲခါ ကိုယ်တော်ယေရှုဟ သူ့လက်ဝိုဆန့်ထုလိုက်ပြီး အဲမိုလူဝို လက်နထိပီး " ငါလိုရှေ့ပါရယ်။ နန့်ရောဂါ ပျော့ကမ်းစေလော့" ဆိုပီး မိလိုက်ရာ အဲမိုလူရဲ့နာဂီးရောဂါဟ ချင့်ချင်းဘဲ့ ပျော့ ဝါးလေရယ်။ 4အဲနော့ ကိုယ်တော်ယေရှုဟ အဲမိုလူဝို "နန် ဟယ်သူဝိုမှ အယ်မိုကြောဝိုပြောပါန။ ပုရောဟိတ်ဒွေဆီဝိုသွားပီး နန့်ကိုယ်နန်ပြသပြီး လူဒွေရှေ့မှာ သက်သေပြဝို့တွက် မောရှေပညတ်ရားဝိုတိုင်း လှူဖွယ်ပစ္စည်းဝို ဆစ်သလော့။" ဆိုပီး မိဆိုလေရယ်။ 5အဲနော့ ကိုယ်တော်ယေရှုဟ ကပေရနောင်ဗြို့ဝို ဝမ်တော်မူခါမှာ ရောမတပ်မှူးတစ်ယော့ဟ ကိုယ်တော်ဆီဝိုလာပီး 6သူ့ရဲ့စေခံတယော့ဟ လေဖြတ်ပီး နာနာကျင်ကျင်ခံစားနေရပြီး အိယာထဲမှာလှဲနေရပါရယ်" ဆိုပီး တောပန်ရှော့တံလေရယ်။ 7အဲခါ ကိုယ်တော်ဟ တပ်မှူးဝို "ငါလာပြီး သူ့ဝိုကုသပေးမယ်။" ဆိုပီး မိလေရယ်။ 8အဲခါ တပ်မှူးဟ "ကျနော်ရဲ့အီခေါ်မိုးအော့ထိ ကိုယ်တော်ဝမ်ရော့ကုသပေးဝို့တွက် ကျနော်ခံယူဝို့ထိုက်တန်ရ၊ အရှင် မိသာပေးလိုက်မယ်ဆိုဝါ ကျနော့်စေခံဟ ပလန်လည်ကျန်းမာလာမှာဖြစ်ရယ်။ 9ကျနော်ဟလဲ ကျနော်ရဲ့ထက်ရာရှေ့ဒွေရဲ့ အာဏာအော့မှာ ရှေ့ဝိုလူဖြစ်ပြီး ကျနော့လက်အော့မှာလဲ စစ်သည်ဒွေ ဘုံကီးရှေ့ရယ်။ ကျနော်ဟ 'သွားပါ' ဆိုပီး ပြောရယ်ဆိုဝါ သူ့နို့သွားရပြီး 'လာပါ' ဆိုပီး ပြောရယ်လဲ သူနို့လာရရိတွက် 'အယ်မိုဇာဝို လုပ်ပါ' ဆိုပီး ပြောရယ်လဲ သူ့နို့လုပ်ဂေ့လိမယ်ဖြစ်ရယ်" ဆိုပီး ရှော့တံလေရယ်။ 10ကိုယ်တော်ယေရှဟ အဲမိုဂါးဝိုကြားခါမှာ ရားဒိုင်းအံ့ဩဝါးပြီး သူ့နော့ဝိုလိုက်ပါလာဝိုလူဒွေဝို "ငါ နန်းနို့ဝိုမှန်တိုင်းပြောရမယ်ဆိုဝါ အစ္စရေးပြည်မှာဂိုမှ သူ့လော့ယုံကြည်မှုကီးမားဝို သူတစ်ယော့မှ ငါတွီ့ဖူးသေးရ။ 11နန်းနို့ဝို ငါပြောမယ်၊ လူများဂီးဟ ရှေ့ရပ်နနော့ရပ်ဒွေဟနေ လာဂေ့လိမှာဖြစ်ပီး ရွှေဗြို့တော်ရဲ့သာသနာတော်မှာ အာဗြဟံ၊ ဣဇက်၊ ယာကုပ်ဒို့နတူတူ ဘွဲမှာထိုင်ပီးစားသော့ဂေ့လိမယ်။ 12အယ်ဘေမဲ့ အဲမိုနိုင်ငံတော်နသက်ဆိုင်ရမဲ့ အစ္စရေးလူမျိုးဒွေဟလော မှော်မိုက်ဆုံးတွမ်းထဲဝို ပစ်ခလခံရဂေ့လိမယ်ဖြစ်ပြီး အဲမိုနေရာမှာ ငိုကြွေးနေရမှာဖြစ်ရယ်" ဆိုပီး မိဆိုလေရယ်။ 13အဲနော့ ကိုယ်တော်ယေရှုဟ ရောမတပ်မှူးဝို "သွားလော့၊ နန့်ယုံကြည်မှု ဟ နန့်စေခံဝို ကုသပေးလိုက်ပြီဖြစ်ရယ်" ဆိုပီး မိဆိုလိုက်ခီမှာ ချင့်ချင်းဘဲ့ တပ်မှူးရဲ့စေခံဟ ရောဂါပျော့ကမ်းဝါးလေရယ်။ 14အဲနော့ ကိုယ်တော်ယေရှုဟ ပေတရုရဲ့အီဝို ဝမ်ရော့တော်မူခါမှာ ပေတရုရဲ့ယောက္ခမဟ ဖျားနာပီးအိယာထဲမှာ လှဲနေဇာဝို တွီ့ရလေရယ်။ 15ကိုယ်တော်ဟ သူ့လက်ဝိုထိလိုက်ဝိုခီမှာ ဖျားရောဂါဟ ပျော့ကမ်းဝါးရိတွက် သူဟအိယာဟနေထပီး ကိုယ်တော်ဝိုဧည့်ခံလေရယ်။ 16အဲနေ့ညစ်နေခမ်းမှာ လူများဂီးဟ ကောဆိုးဝါးပူးကပ်ခံနေရဝိုလူဒွေဝို ကိုယ်တော်ယေရှုဆီဝို ခေါ်ဆော်လာဂေ့ရိတွက် ကိုယ်တော်ဟ ကောဆိုးဝါးဒွေဝို နှုနမိပေး နှံထုပေးပြီး ဖျားနာနေဝိုလူဒွေဝိုလဲ ပျော့ကမ်းအော် ကုသပေးလေရယ်။ 17အဲမျိုးနဘဲ့ ပရောဖက်ဟေရှာယဟောပြောရစ်ဝို "သူဟ ကျနော်ဒို့ရဲ့ဖျားနာခြင်းဒွေန နာရောဂါမျိုးမျိုးဝို ဖယ်ရှားပေးတော်မူလိမယ်။" ဆိုဝို ဂါးဟ ပလဲ့ဇုံမှန်ကန်ခဲ့လေရယ်။ 18ကိုယ်တော်ယေရှုဟ ပတ်ဝန်းကျင်ဟလူအုပ်ဂီးဝို ဒိထားမိဝိုခါမှာ ဗြိတော်ဒွေဝို အိုင်ရဲ့တဖက်ကမ်းဝိုကူးဝို့ မိတော်မူလေရယ်။ 19အဲခီမှာ ကျမ်းတတ်ဆရာတယော့ရော့လာပြီး "ကျနော် ကိုယ်တော်သွားလေရာနော့ဝို လိုက်ပါခွမ့်ပြုပါ" ဆိုပီး ရှော့တံလေရယ်။ 20အဲခါ ကိုယ်တော်ဟ အဲမိုလူဝို "ဝံပုလွေဒွေမှာ နေစရာတွမ်းရှေ့ဂေ့ပီး ငှက်ဒွေမှာလဲ နေစရာသိုက်ရှေ့ဂေ့လေရယ်။ အယ်ဘေမဲ့ ဘုရားရှင် စေလွှတ်လိုက်ဝို လူ့သားတော်မှာဟလော ခေါခလဝို့ နေဇာနေရာဂိုမှ မှေ့ရ" ဆိုပီး မိဆိုလေရယ်။ 21ကိုယ်တော်ယေရှုရဲ့ ဗြိနော့တယော့ဟ ကိုယ်တော်ဝို "အရှင်၊ ကျနော်ရဲ့ဖဝို ရင်သွားပီး သင်္ဂြိုဟ်ခွမ့်ပြုပါ" ဆိုပီး ရှော့တံလေရယ်။ 22အဲခါ ကိုယ်တော်ဟ အဲမိုလူဝို "ငါ့နော့လိုက်ခဲ့ပါ။ ကိုယ်ခန္ဓာသေဆုံးနေသူဒွေဝို စိဝိညာဉ် သေဆုံးနေသူဒွေဟ သင်္ဂြိုဟ်ဂေ့ပါစေ။" ဆိုပီး မိလေရယ်။ 23အဲနော့ ကိုယ်တော်ယေရှုဟ လှေပေါ် ဝိုတက်ခါမှာ ကိုယ်တော်ရဲ့ဗြိဒွေလဲ ကိုယ်တော်နော့ဝိုလိုက်ဂေ့လေရယ်။ 24ရုတ်တရစ်ရေအိုင်ပေါ်ဝို ပြင်းထန်ဝိုလေမူဒိုင်းဟ ကလရော့လာရိတွက်ဂျော့ လှေဟ လှိုင်းဒွေပုတ်ခတ်ရိတွက် လူးလှိနေလေရယ်။ အဲခီမှာ ကိုယ်တော်ဟ အိမောကလနေလေရယ်။ 25အဲခါ ဗြိတော်ဒွေဟ ကိုယ်တော်ယေရှုဆီသွားပြီး နိုးလေရယ် "ကိုယ်တော် ကျနော်ဒို့ဝို ကယ်တော်မူပါ ကျနော်ဒို့သေရဝေါ့မယ်" ဆိုပီး ရှော့တံလေရယ်။ 26အဲခါ ကိုယ်တော်ယေရှုဟ သူ့နို့ဝို "နန်းနို့ ဟဲဂျော့ ကြော့နေဂေ့နူး၊ နန်းနို့ အယ်မျိုးဂိုမှ ယုံကြည်မှု အားနည်းရလော" ဆိုပီး မိတော်မူပြီး လှိုင်းနလေဒွေဝို ငြီသက်စေဝို့ မိပေးလေရယ်။ 27အဲခါ ဗြိတော်ဒွေဟ ရားဒိုင်းအံ့ဩဝါးဂေ့ပြီး "လေ န လှိုင်းဒွေဂိုမှ သူ့ဂါးဝိုနာခံရလော့အော် အယ်လူဟ ဟဲမျိုးလူမျိုးနူး" ဆိုပီး ပြောဆိုဂေ့လေရယ်။ 28ကိုယ်တော်ယေရှုဟ အိုင်တစ်ဖက်ကမ်းမှာရှေ့ဝို ဂါဒရလူမျိုးဒွေရှေ့ရာရပ်ဝို ရော့လာဝိုခါမှာ အဲမိုနေရာမှာ သန်းခလိုင်းဂူဒွေဂျားဟထွက်လာဝို လူနှေ့ယော့ဝို တွီ့လိုက်ရလေရယ်။ အဲမိုလူဒွေထဲမှာ ရားဒိုင်းဆိုးဝါးဝို ကောဆိုးဝါးဒွေပူးကပ်နေရိတွက် အဲမိုလမ်းဟ ဟယ်သူမှသွားလာဂေ့ရ။ 29အဲမိုလူဒွေဟ "ဘုရားရှင်ရဲ့သားတော် သင်ဟ ကျနော်ဒို့ဝို ဟဲရာလုပ်ဝို့နူး။ ကျနော်ဒို့ဝိုခီတန်သေးဘဲန ပြစ်ပေးဝို့ အယ်နေရာဝို ကြွလာတော်မူဇာလော" ဆိုပီး ပြောဆိုဂေ့လေရယ်။ 30အဲခီမှာ သူ့နို့ရှေ့ဝိုနေရာန မလှမ်းမကမ်းနေရာမှာ ဝက်အုပ်ဂီးတစ်အုပ် ကျစ်စားနေလေရယ်။ 31အဲခါမှာ အဲမိုကောဆိုးဝါးဒွေဟ "ကျနော်ဒို့ဝို နှံထုရှင်ရယ်ဆိုဝါ အဲမိုဝက်အုပ်ဂီးထဲဝို ဝမ်ခွမ့်ပေးတော်မူပါ" ဆိုပီး ကိုယ်တော်ဝို တောပန်ဂေ့လေရယ်။ 32ကိုယ်တော်ယေရှုဟ သူ့နို့ဝို "သွားလော့" ဆိုပီး မိတော်မူလိုက်ဝိုခါမှာ ကောဆိုးဝါးဒွေဟ ဝက်အုပ်ဂီးထဲဝိုဝမ်ရားရိတွက် ဝက်အုပ်ဂီးဟ မတ်စော့ဝိုကမ်းပါးဟနေ ရေကန်ထဲဝိုခူခလပီး ရေနစ်ရားလေရယ်။ 33အဲခါ ဝက်ထီးမားဒွေဟ ဗြို့ထဲဝိုပလေးရားပြီး ဖြစ်ပျစ်သမျှကြောရာဒွေန ကောဆိုးဝါးပူးကပ်ခံရသူဒွေကြောဝို ပလန်လည်ပြောပြဂေ့လေရယ်။ 34အဲခါ ဗြို့ထဲဟလူဒွေဟလဲ ကိုယ်တော်ယေရှု န တွီ့ဆုံဝို့ထွက်လာဂေ့ပြီး ကိုယ်တော်ဝိုတွီ့ခါမှာ သူ့နို့ရပ်ဒေသဟနေ ထွက်ဝါးပေးဝို့ တောဘန်ဂေ့လေရယ်။
अहिले सेलेक्ट गरिएको:
Matthew 8: ttpv-rv
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
