1 Korintos 1
1
Salaamta
1Bawlos, Yallih farhih Masiix kin Yeesus fartotta yakko deeco akah tekkeya, kee ni sacal Sosteneesko, 2#Fartottit hi Abittot 18:1tamaa Korintosulle geytimta Yallih kaniisah, tamaa Masiix kin Yeesus araxah yinqiddisiinih tinqiddisem yakkoona deeco akah tekke marah, amayim balih tamaa inkoh ummanille notta kee tenhi Maddara yakke, ni Maddara kin Yeesus Masiix migac deecima mara fanah tadiye farto:
3Ni Abba kin Yalla kee Maddara kin Yeesus Masiixko nicma kee maaxiyo sinlih takkoo.
Xamde
4Masiix kin Yeesus araxah sinah tomxoye Yallih nicmah sabbatah, umman gedda inni Yalla xamdishita. 5Umman ginah umbuka waani kee umbuka irhgah kayyadde gaddaalitteenih tanin. 6Masiix zacabah tekke shahaada gantah sin fanadde tisbiteh tane. 7Amaydo, Yeesus Masiix meceetih yamidhdhigem ilaalak sinak tanquse muttuxuwa mitane. 8Ni Maddara kin Yeesus Masiix lellec abar hin mara takkoona ciloh, usuk abayshima fanah sin yaysabato kinni. 9Yalli umun kinni. Ni Maddara kin Yeesus Masiix kaa Barhaalih zoobino taalloona sinah deecime.
Barhsa kaniisadde
10Yi saculo, inkoh tiya tekkinyaako inki xisaab kee inki xagara abita kibah, sinne-sinneh barhsime waytoona Yeesus Masiix migacalle sin asuusa. 11Yi saculo, sin fanadde zagaxa tanem Kholoweeti dik yoh warisheenih yanin. 12#Fartottit hi Abittot 18:24Tayim akah arhxem lel sinko gari: “Anu Bawlos kataa”, hido “Anu Abolloos kataa”, hido “Anu Keefa kataa”, hido “Anu Masiix kataa” yarhxeh kinni. 13Masiix xazziimeho? Bawlos sinah arhxuk masqalak takarimeh rabeho? Hido atin Bawlos migacalle tinthimmiqhiiniho? 14#Fartottit hi Abittot 18:8; 19:29; Rooma 16:23Anu Kirisbos kee Gaayosko bextih, sinko walaa inketta aythimmiqhe wayemih Yalla xamdishita. 15Amaymih sinko walaa inketti yi migacalle inthimmiqhe yarhxo mirhiica. 16#1 Korintos 16:15Istifaanos xawaz gantah iythimmiqheh aniyo. Amayimko fertamah, aketto iythimmiqhe inne makkale. 17Masiix mece ware warroysho kibah aythammaqho yi mifarinna. Masiix masqal ishi xaylaako foyya yakkemko ciloh lel, yi waanit dhicidde cikittem kuuk miyine.
Masiix Yallih kas kee xayla
18Masqal farto yalaye marah duudiino kinni, gargeerimeh yane nottah laakin Yallih xayla kinni.
19 #
Isayas 29:14
“Anu kas-le marahi kas aylawo kiyo,
irhga-le marahi irhga lel foyyaysho kiyo”
yarhxiinim tunkuttubeh tane. 20#Isayas 19:12; 44:25Kas-le ti awla yane? Sercat dhiiceeni awla yane? Ta waqhtih madareeni awla yane? Yalli ta caalamhi kasak duudiino akko abeh miyaneho? 21Yallih kasadde, ta caalam ishi kasah Yalla maarhaginnamhi zacabah, xiyaw duudinoh yablin warroyishnan araxah yeemene mara gargeeram yikxineh yane. 22Yahuud ishaarar yabloona esseran, Giriik xiyaw lel kas wagiyan, 23nanu laakin Yahuuduh andafo, Giriik xiyawah lel duudiino kinam, Masiix masqalak takarimem warroyishna. 24Too deeco akah tekke mari, inkoh Yahuud kee Giriik xiyawah laakin, Masiix Yallih xayla kee Yallih kas kinni. 25Yallih duudiino xiyaw kasko beyta, Yallih rukta lel xiyaw xaylaako beyta.
26Yi saculo, iski deeco aaginah sinah tekkem ubula. Sinko mango marak xiyaw araxah kas-le mara, hido xayla-le mara, hido lel maabakooko makaabun kuuk mitiniini. 27Yalli laakin kas-le mara xoolaysho, caalamalle duudiinodde loyyimtam doore; Yalli xayla-le mara xoolaysho, caalamalle ruktadde loyyimtam doore. 28Yalli caalamalle guba kinam, ilaacimtem, kee tamaa makko hinam gantah doore, amayim lel tamaa nafaaca lemidde loyyimtam foyyaysho ciloh kinni. 29Amayim lel xiyawti barha akkinnanti Yallih nifille falitamko ciloh kinni. 30Atin kaa sabbatah Yallih kas, xaqqe, anqaddas kee muuca noh yekke Masiix kin Yeesusudde kinni taniinim, 31#Ermiyaas 9:23,24amayimih lel: “Falitinnanti Maddarah falitoo” yarhxiinim tunkuttubeh tane.
अहिले सेलेक्ट गरिएको:
1 Korintos 1: SCC
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2024 Wycliffe Ethiopia