Gurim 17
17
Kaane na dɔge varem tei to
1Malese serepɛ sem na jege zwe serepɛ sem to dedoa ma ba ka ta de amo ka we, “Ba se a bere‑m Wɛ na lage o pa ka-tola kalo na dana to na waarem tei to. Ka-tola kam konto jeiŋa jei mo ye jeiga kalo bwi na daga da to. 2Logo baŋa pwa bam yeini ba ke bwoorim de ka-tola kam konto. Balo na zoore logo baŋa ne to de maa tiini ba bwoori de-ka, ne nɔɔno na nyɔge sana o bugi tei to.”
3Wɛ Sin-laao kom laam ma ba amo tei de dam, ye a na we maleka kam kale-ne ka ja ka vo kagoa yuu. Jei sem konto ne mo amo nɛ kaane, o na dɔge juru kodwoŋi na ye nasoŋo chwɛ-chwɛ to baŋa ne. Yera yalo na twe Wɛ to ma popone juru kom yera ne. Ko maa jege yuni terepɛ de nyea fuga. 4Kaane wom ma zo gwaaro telo na ye nason-pupwiu de nasonno chwɛ-chwɛ to. O yera maa jege wonnu dedɛ telo na nyeene to. Te nam ye sabu-seŋa de kandwa-nyenno mo. O ma zei sabu-seŋa zoŋa, ye ka ni su de wo-zɔɔna yalo na bere o bwoorim kikia yam na jege digiru tei to. 5Yere delo kuri na seigi to ma popone o tiri ne de we:
Babilon#17:5 Babilon lage ko bere Rom teo kom na ye tei to mo. kolo na ye te-fɔrɔ to.
Ka-tole maama nu,
de logo baŋa wo-zɔɔna maama nu.#1 Piita 5:13
6Amo na nɛ kaane wom to mo a maane we o nyɔge Wɛ nɔɔna balo na bere Yezu chega kam ye ba go-ba to jana bam mo o su, ne o nyɔge sana mo o bugi tei.
Amo na nɛ‑o konto to, ko ma tiini ko so-ne. 7Maleka kam ma bwei-ne ka we, “Ko ke‑m yaau se bɛ mo? Ko ná ye juru kolo na jege yuni terepɛ tem de nyea fuga to, de kaane wolo na dɔge o baŋa ne to, amo wó pa n lɔre ba kuri na ye tei to. 8Juru kolo nmo na nɛ to ya ŋwe mo. Ko nam daa tera. Ko daare se ko nwoŋi gwoŋ-chanluŋu kom wone mo, se ko laam vo ko na chɔgem. Ko ná ye balo na zoore logo baŋa ne ye ba yera maŋe ya wo popone ya tiŋi Wɛ ŋwe-doŋa tɔnɔ kom wone maŋa kam logo baŋa ta na tera to, ba ná nɛ juru kom, ko wó so ba maama. Ko déem ya ŋwe mo, ye ko laam daa tera. Ko nam wó jwoori ko ba ko nwoŋi nabiina yiga ne.
9Konto mo tei n jege se n ta‑n jege boboŋ-dɛɛra de swa. Juru kom yuni terepɛ tem bere zwonnu terepɛ na ye tei to mo. Tento maa ye zwonnu telo kaane wom na jei te baŋa ne to mo. Yuni tem ta kwori te bere pwa barepɛ na ye tei to mo. 10Pwa bam konto banu maŋe ba to mo. Ba dedoa mo wora leile. Wolo na kweeli to ta wo tu. Ko daare, o ná tua, o paare dem bá dáane dedɛ. 11Juru kom tete kolo déem ya na ŋwe ye ko laam daa tera to bere pɛ wolo na ke ba wone nana to mo. Wonto mo ye pwa barepɛ balo na dɛ yiga to wo nɔɔno. O nam ná tua, o de laam wó vo o na chɔgem.
12Nyea fuga yalo nmo na nɛ to bere pwa fuga na ye tei to mo. Pwa bam konto ta wo jwoŋi ba paare dem. Ba nam wó ba ba jwoŋi dam se ba tɔge de varem wom ba taa tei nɔɔna, se ko maŋe de awa dedoa yerane. 13Pwa fuga bam maama jege boboŋe dedwe mo. Ba maa wó kwei ba dam maama ba ke juru kom jeŋa ne. 14Ba maa wó ke jara de wolo wom na ye Pipeila kam to. Pipeila kam nam wó wane-ba ka di, ka na ye wolo na ye yuu tiina maama Yuu-tu, de pwa maama Pɛ to ŋwaane. Balo na tɔge de wonto ye ba wane jara yam to mo ye balo o na maŋe o kuri se ba taa ye o nɔɔna to. Banto mo yɔɔre ba jege wo-dedoa ded‑o.”
15Maleka kam daa ta ma ta de amo ka we, “Ko ná ye bwi selo nmo na nɛ ye ka-tola kam jei da to, se bere logo baŋa teene de te nɔn-bia bam, de paare dim jei sem, de taana dwi maama tiina na ye tei to mo. 16Nyea fuga yalo nmo na nɛ to, de juru kom tete wó taa chuli ka-tola kam. Ba nam wó vere o wonnu tem maama o tei ne ba daare‑o kalambwolo. Ba laam wó di o ya-nɔna yam, ye ba daare ba zwɛ‑o de mini. 17Ba wó chɔge‑o konto, kolo ŋwaane Wɛ maŋe o pa se ba boboŋa taa ye konto, ye ba jege ni dedwe se ba ke ba dam maama juru kom jeŋa ne mo. Ko jege se ko taa ye konto mo, se ko vo ko yi maŋa kalo Wɛ taane dem na bere kolo to na wó ji chega, ye o boboŋa seene ya ke to. 18Ko daare kaane wolo nmo na nɛ ye o ye ka-tola to mo ye te-fɔrɔ kolo na tei logo baŋa pwa bam maama to.”
अहिले सेलेक्ट गरिएको:
Gurim 17: KBG
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2020, Ghana Institute of Linguistics, Literacy and Bible Translation (GILLBT)