Like 19
19
Jesu bɨla Jase
1Jesu onyunuha nca Jeriko, oya atina onguundu. 2Eki na balaha mo o ŋa ma cwolihi o Jase, nkʉmu atoniŋi ma adoro, nde aki nga osolo. 3Nde aki asaha omono Jesu, ŋa nde aki i buuna ni. Mo oma, lemvuuru leki lema vʉla kuna, ŋa nde se aki otele okʉbi. 4Nde oyeni o nciini levusu, okumi o yula oti a sikomoore, ma omono Jesu aya na ayira o ŋa.
5Ntini e Jesu ato obiri jya, osaari miisi na yulu, na nde ndi: «Jase, suriha woowo! Lobi ove me eki o njo e we.» 6Jase osurihi asisari, oyambi nde na oswere oso. 7Baari aso amono vwa aya ma ŋiina ndi: «Nde omi aje na aka mpili e nga ambiini!»
8Ŋa Jase ma otele o miisi a Nkʉmu, na nde ndi: «E Nkʉmu, me empa anga owuha obari osolo a me. Ŋa yuhu me ema yaha adoro a mvuuru a kuna, me evuura nde abuhu a na.» 9Jesu okaali nde ndi: «Lobi ami vusuha baari a ma njo ji. Obila yu se mwana Abraame. 10Obila Mwana mvuuru ayi na asaha, na le vusuha le baari ma aki ama nywoŋo.»
Ncincami akele amvunu
11Baari aki ma yuha mbari e Jesu, nde oluusi ncincami mo, obila nde aki tuha na Jerusaleme. Baari acimihi ndi Onkani o Njyami ma oya o nci na nci ŋa. 12Ŋa nde ndi: «Balaha mo eki mvuuru onini, na nkwono e nde se eki baari ma anini. Nde oyeni osi o la, ma oyaha mbara onkani. Emana nde oyi na avuriha. 13Nde ocwoli ajanji a nde a kuumi. Nde ompi bo akele amvunu. Emana nde na bo ndi: “Lesa ombuungu bɨla mo, be lebaha adoro akɨma, tii ngo e me eya na avuriha.” 14Ŋa baari amo osi o nde aki ama bele nde. Bo atumi baari ngula nde na aduha ndi: “Bisi njala mbɨri balaha jya eka nkani a bisi kali.” 15Ŋa si o bo ma beli nde, ampi nde onkani, nde oyi na avuriha. Nde ocwoli ajanji a nde ampi adoro o paani e nde. Ma oyaa ombuungu a mvuuru na mvuuru asi. 16Ojanji ancomi oyi, oduhi ndi: “E nkʉmu, kele le we le mvunu le we ampi me, lemi tusaha me akele a mvunu akɨmakuumi.” 17Nkani okaali nde ndi: “Yemihi, we ojanji ove. Obila we aki tele o maami ma akyehe, me empa we onkani o yula enguundu kuumi.” 18Ojanji o ju oyi, oduhi ndi: “E nkʉmu, kele le we le mvunu, lemi mpa me akele akɨmaamvunu ataani.” 19Nkani okaali na nde ndi: “Me empa we onkani o yula enguundu etaani.” 20Ojanji okɨmaoyi oduhi ndi: “E nkʉmu mono kele le we le mvunu, me eki ema kyele yo nca obari o mfa. 21Obila me eki na vwoho o we. We balaha e nkala. We ayaha biibi e we aka cuusa ni. We otoloho biibi e we aka kuna ni.” 22Nde okaali na nde ndi: “We ojanji obi. Me epama we o mbari e we anku. We oki oya mbɨri me balaha e nkala, me eyaha biibi e me eka cuusa ni, me etoloho e me eka kuna ni. 23Ŋa we abɨsi olehe adoro a me o njo ma kyele he adoro oma? Kaa ntini e me eyi na avuriha, me basihi adoro a kuna.” 24Emana nde na baari ma aki ŋa ndi: “Lepiina nde kele le mvunu lya, be lempa ali na akele amvunu kuumi.” 25Bo akaali nde ndi: “E nkʉmu, nde oya na akele amvunu kuumi!” 26“Me eduha be: Mvuuru ali na kiila, ma aje ovuriha oluusa nde. Ŋa ali onyaŋa ma cyese okyehe ma oli na nde. 27Ŋa ma abuha a me ma ombangu, ma aduhi ndi me i ka nkani a bo ni, le eya na bo kuuni, be lecebehe bo ankii o mwa me.”» 28Jesu omana owobo vwa, oyiri levusu, okumi Jerusaleme.
Jesu anyuniha nca Jerusaleme
29Nde ociina tuha na Betefaje bɨla Betani, mpili okuri eti ma Eliive#19.29 Okuri ma cwoloho ma okuri eti ma oliive, mpili osi a Ajife. Oti oliive, ma jyaha mburu, ma syaga se maari o mburu e nde., nde otumi alwoni a nde vwele. 30Nde na bo ndi: «Lejyehe nca mpuhu eli tele na be. Ntini e be lenyuniha, be leje omono mwana ane#19.30 Ane omakaaha nyama abiriha baari, bɨla biibi. Nde ajanja kuna. ama kura, eli mvuuru okini sa aka o nci o yula nde ni. Lenaana be leya na nde kuuni. 31Ŋa mvuuru opɨsa be ndi: “Be lenaana nde mo oma?” Be lekaali mbɨri: “Nkʉmu na kaama o nde.”»
32Alwoni a vwele a nde atumi ayeni, bo amoni maami mo osuumbu a Jesu aduhi bo. 33Ntini e bo ma naanihi mwana ane, anga nde apɨsi bo ndi: «Be lenaana mwana ane yu mo oma?» 34Bo akaali ndi: «Nkʉmu na kaama o nde.» 35Bo ayi na mwana ane mpili e Jesu. Bo ayali amfa a bo o yula mwana ane. Alehi Jesu o yula nde. 36Ntini e Jesu acinihi, baari ma yala amfa a bo o njila.
37Nde oki oya aciina na Jerusaleme, asuraha okuri eti ma Eliive. Lenkɨndi la alwoni, nca oswere, leya leyima aluumu a Njyami nkara yulu. Ma emaa e bo ma amoni eso. 38Bo aduhi ndi: «Andosoho aka na nkani aya o nkuumi e Nkʉmu! Oduusu oka o yulu, lekʉma le Njyami leka me ebiri e nkara yulu!»
39Afarisi ake ma aki o mpaniŋi lemvuuru na Jesu ndi: «E Nkʉmu, duha alwoni a we aka pi!» 40Jesu okaali na bo ndi: «Me eduha be, bo aka pi, akele ma, ma aje owʉla ankɨma!»
Jesu alila mo Jerusaleme
41Ntini e Jesu aciini tuha na Jerusaleme, omono onguundu, oya alila obila o co. 42Nde ndi: «We se aki ma oyaa o cuhu e lobi osuumbu ma obaha oduusu! Ŋa ama jisiha co o miisi a we! 43Obila ecuhu ma eje oya o we, ma eli abuha a we ma ombangu ma aje ocwa ebaha, bo ajenehe we, bo apya we ma angulu aso. 44Bo ma aje onyya we bɨla baana a we. Bo ma aka aje onyila si kele mo o yula buha ni. Mo oma we aka yiimba ntini e Njyami ayi na ayamaha we ni!»
Jesu acuura atehi a biibi nca njo e Njyami
45Jesu onyunuha nca njo e Njyami, oya acuura baari ma teehi biibi. 46Nde na bo ndi: «Ama teende ndi: “Njo e Njyami eje oka njo mavwonoŋo.” Ŋa be lemi sa yo eyiha biri ajibi!» 47Ecuhu eso Jesu aki ayisiha nca njo e Njyami. Ŋa ankʉmu ma asi ma avwoŋi, ayisihi me ekele, bɨla ankʉmu mo okuha, asahi obuma nde. 48Ŋa bo aki i yaa osuumbu mo osa ni. Obila baari aso aki ma ayuha nde na njele.
अहिले सेलेक्ट गरिएको:
Like 19: MDT
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
