Janja 10
10
Pyere bɨla Korneye o Sesare
1O Sesare eki na balaha mo nkuumi e nde Korneye. Nde aki nkʉmu onkama aworo macwoloho mo «Oju a Itali.» 2Nde aki avwono na lenyiima le Njyami bɨla nkwono e nde eso. Nde se aki ayamaŋa anga owuha kuna makihi Ajife. Nde se avwoniŋi Njyami antini aso. 3Cuhu mo na ngula njanga atari aki amiyira atari, Korneye omoni, nde omoni obaanji a Njyami yemiŋi onyuniŋa ca njo e nde. Obaanji na nde ndi: «E Korneye!» 4Korneye okeesi obaanji na vwoho oso, na nde ndi: «Co oma Nkʉmu?» Obaanji okaali nde ndi: «Njyami amayalaha evwoniŋi e we bɨla apuha a we ampaha anga owuha. Njyami aka limaŋa we ni. 5O ŋa tuma abalaha Jope bo aya na Simo balaha macwoloho o Pyere. 6Nde oli o njo e Simo otʉli, nga njo eli o paani okeri onini.» 7Ŋa obaanji awobihi bɨla Korneye na oje, Korneye ocwoli ajanji a nde vwele bɨla oworo omo, anyiimaŋa Njyami. Bo aki amabiha bɨla nde. 8Nde omana oduha bo maami ma ayiri aso, nde otumi bo Jope.
Pyere o Jope
9Eto na encyere, bo aki akini o njila tuha na onguundu o Jope, ŋa mwa njanga, Pyere okumi yula oleembe a njo na avwono. 10Njala esi nde, nde osahi oja. Aki akini malaama nde biila, nde omoni maami a njimi. 11Nde omoni yulu eki emanaaha. Nde omoni kiila ewa na yulu mva mfa amakwara ma ancwo ma ana. Co osuruha na ava o ncye. 12Nca mfa jya eki na anyama aso na ma ali na embono ena, na ma jyeŋe o bali bɨla ankaka ma anywi aso. 13Juuyi lewobi ndi: «Pyere temeŋe, buma we oja!» 14Pyere ndi: «Kali Nkʉmu! Mo oma, me kini oja biila engɨri bɨla me ebi ni.» 15Juuyi levɨrihi lewobi na nde ndi: «Biibi e Njyami amaduha ndi eli yemiŋi, we i buuna oduha mbɨri jo ebi ni.» 16Nde omoni maami maa amihi atari, o ŋiŋa mfa jya avurihi na yo yulu.
17Pyere aki apɨsa nde anku ndi: «Maami a me emoni maa ayiri buni?» Jya biri abalaha a Korneye atumi na asaha Simo aki amiyaa njo e nde, bo ato mo onwa a njo. 18Bo acwoli, apɨsi ndi: «Simo macwoloho o Pyere, akaha o njo ji?» 19Pyere oki okini acimiŋa maami a nde amoni, ŋa Oduduma na nde ndi: «Abalaha atari a ba masaha we. 20Suruha paraabu, we oje bɨla bo we oka amasyaha ancinciha ni. Obila me mvuuru etumi bo.» 21Pyere osurihi na abasaha abalaha baa, na bo ndi: «Me eyu, me mvuuru a be lesaha, ŋa be lesaha me mo oma?» 22Bo akaali ndi: «Korneye mvuuru atumi bisi. Nde nkʉmu onkama aworo, nde mvuuru a tele nde se anyiima Njyami. Ŋa Ajife aso manyiima nde. Obaanji opeende omo omawobo na Korneye ndi cwolo Pyere oya njo e we, nde oyuha maami a we aduha nde.» 23Pyere oyambi abalaha ma atari, nde olahi bo biri e tolo.
Eto na encyere nde otemiŋi oyeni bɨla bo. Ŋa na baana ma anguhu a Jope se ayeni bɨla bo. 24Eto na encyere me emo bo ato Sesare, Korneye aki adɨla bo, nde se aki amacwolo nkwono e nde bɨla andihi a nde mo otima. 25Ntini e Pyere anyuniŋi, Korneye oyi na yamba nde, nde owʉri avwo o ncina nyiili e nde mo owooso nde bɨla onyiimi. 26Pyere osaari nde oduhi ndi: «Temeŋe, me se ŋa mvuuru omwo!» 27Bo ma aje na owobo, anyuniŋi nca njo. O ŋa Pyere omoni baari kuna amakusaha abuha. 28Nde na bo ndi: «Be leyaa mbɨri Ojife na ngɨri mo oka bɨla mvuuru ali njya. Si ma onyuniŋa nca njo e nde, nde i buuna ni. Ŋa Njyami omisa me oyuha ndi me i buuna omabese mvuuru omwo, me se i mabuuna olabaha na mvuuru mbɨri nde na nkɨri ni. 29Kya obila o me eyi, me eka bɨsa o ntini e we acwoli me ni. Ŋa me epɨsa we jaa e we atumi me oyaha o yo.» 30Korneye okaali ndi: «Ecuhu eya ŋa etari, atari se atari a ngula njanga mimaa, me eki evwono o nca njo e me. O ŋiŋa balaha mo eki na amfa makyemeŋe, oyi o miisi a me. 31Nde na me ndi: “Korneye, Njyami omi yuha evwoniŋi e we. Nde aka limaŋa apuha a we asihi anga owuha ni. 32Tuma baari aje Jope na acwolo Simo ma cwoloho o Pyere. Nde okaha o njo e Simo omo otʉli, onga njo eli o paani okeri onini.” 33O nci na nci ŋaa me etumi baari na ayaha we. We se asi yemiŋi ma oya. Bisi aso leli ŋa o miisi a we mo oyuha maami a Nkʉmu atumi we oduha bisi.»
Mbari e Pyere o njo e Korneye
34Ŋa Pyere oyahi mbari ndi: «Sisyele me emi yaa mbɨri Njyami aka pamaŋa reŋe ni. 35O nca esi eso, mvuuru anyiima Njyami, asa maami a tele, Njyami amono ove mo nde. 36Njyami atumi mbari e nde na baari a Isayele. Otoosi bo Ncya e Mve oduusu o Jesu Krisi a Nkʉmu a baari aso. 37Be leyaa mbɨri maami ma ayiri o nca osi o Jude oso, mo abaani o Ngalili, o ntini e Jan atoosihi mbari na lempa le ateeme. 38Be leyaa osuumbu a Njyami ampi Jesu a Najarete a nde aswoli mpari Oduduma Santi. Jesu ayirihi me ebiri eso na osa leve. Nde ovusihi baari a Jabɨri aswesihi, obila Njyami aki bɨla Jesu. 39Bisi baari lesiisa enwa o maami a nde asi aso, nca osi Ajife bɨla Jerusaleme. Bo abumi nde mo okomo nde ma lembanji. 40Ŋa cuhu otari Njyami onyuusi nde nca leku. Nde ompi nde lengulu mo olaha nyuru e nde na baari. 41Ka na baari aso ni, ŋa na bisi. Mo oma Njyami aki amabɨha na oswolo bisi, baari lesiisaha enwa. Ŋa ntini e Jesu anyusihi nca leku bisi, leji lenywi bɨla nde. 42Jesu otumi bisi otooso baari maami maa, na lesiisa le enwa ndi: Jesu mvuuru a Njyami aswoli mo opama baari ma ali mwo bɨla akwi. 43Awobi a Mbari e Njyami aso aduhi o nde ndi, mpɨni mvuuru alehe oyalihi o nkuumi e Jesu, abolihi ambiini a nde.»
Baari ma ali ka Ajife ni mabaha Oduduma Santi
44Pyere oki okini awobo, Oduduma Santi oyi o yula baari mayuuhi mbari e Njyami aso. 45Baari ma amayalaha Jesu ma ali Ajife#10.45 Bo omakaaha baari ma ama sa sasi., ma ayi bɨla Pyere akimi. Mo osuumbu ma ampi puha Oduduma Santi o baari ma ali ka Ajife ni! 46Mo oma bo aki ma yuha baari baa mawobo ajuuyi akɨma, makuusa lekʉma le Njyami. Pyere ovurihi oyahi mbari ndi: 47«Baari ba amibaha Oduduma Santi, mva na osa mabuuna oliha bo ateeme ma anja?» 48Ŋa Pyere otumi baari ompa bo ateeme o nkuumi e Jesu Krisi. Bo aso apɨsi nde mo osa aca ecuhu bɨla bo.
अहिले सेलेक्ट गरिएको:
Janja 10: MDT
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
