Janja 1
1
Jesu alehe ndayi Oduduma Santi
1Tyofile, nca osaangumu o me o ncomi, me ema teende maami a Jesu asi na a nde ayisihi aso o ntini e nde abaani janja e nde, 2tii ngo o cuhu mayeni na nde yulu. Nde oki okini oje yulu ni, ŋa nde osa ampa antuma a nde aswoli andwo mo Oduduma Santi. 3Ŋa Jesu omana okwa, nde olahi nyuru na bo, nde se olahi bo andiimi kuna, ndi nde oli mwo. Nde olahi nyuru na bo lemihi le ekuumi me ecuhu ena, ma owobo na bo ma Onkani o Njyami. 4Cuhu mo Jesu aki aja bɨla antuma a nde, nde olehi bo ngɨri ndi: «Be leka cyehe Jerusaleme ni. Ŋa be ledeli ndayi e Taara alehi, e me eki eduhi be. 5Jan ampi ateeme ma anja. Ŋa mo be, nca ecuhu ma eya, be leje obaha ateeme mo Oduduma Santi.»
Eyeniŋi e Jesu yulu
6Bo amakusaha abuha, ŋa Jesu se. Bo apɨsi nde ndi: «E Nkʉmu ji ntini e we avuura Onkani o Isayele?» 7Jesu okaali na bo ndi: «Be kaama mo oyaa esibi bɨla antini a Taara amayeese, lemihi na onkʉmu o nde kali. 8Ŋa be leje obasaha mpari o ntini Oduduma Santi aya o be, be leje oka baari masiisa enwa e me o Jerusaleme, na o nca Jude eso, na Samari tii ngo o yula ncye eso.»
9Nde omana owobo vwa, nde oyeni yulu o miisi a bo. Lengʉri lewuhi nde. 10Bo aki akini makeese na yulu mpili eyeniŋi nde, abalaha vwele ma amalaasa amfa a fu, awasihi kʉruu o paani e bo. 11Bo na antuma ndi: «Be baari a Ngalili, be lemakaana ŋa mo okeese yulu mo oma? Jesu a be lemoni ma aje ŋa nde yulu, aje oya na avuruha mo osuumbu ju jwa a be lemoni ma aje ŋa nde yulu.»
Oju antuma bɨla alwoni maamo
12Antuma acyehi Okuri eti me Eliive mo oje Jerusaleme. Okuri#1.12 Ma ocyehe Jerusaleme na etoohi ma okuri kya, we osa otini o tari o jwe. Ajife aki osa otini o tari o jwe, o cuhu ma awuumaŋa. kya la na Jerusaleme kali. 13Bo ato Jerusaleme, bo akumi nca otini o njo o yulu, o bo mavuniŋii o co na otiiri. Eki na Pyere, Jan, Jake, Andɨre, Filipe bɨla Toma, Batelemi bɨla Matye, Jake a mwana Alife, Simo a Jelote bɨla Jude a mwana a Jake. 14Bo aso avwoniŋi antini aso otima omo, mo ovwono bɨla na akaasi ake mva Mariya a nguhu a Jesu, bɨla baana ma anguhu a Jesu.
Maswolo Matyase o biri e Juda
15Nca ecuhu bya, Pyere otemiŋi o mwa baana ma anguhu. Bo aki mabuuna oto onkama na ekuumi jyele e baari. Nde oduhi ndi: 16«Baana ma anguhu a me, eki ove lemoni maami mo Oduduma Santi atoosi nca osaangumu o Njyami, mo onwa a Davide. Oduduma Santi owobi o Juda mvuuru abiri baari ma akwari Jesu. 17Nde aki bɨla bisi, nde se aki na o nde otomi mva bisi. 18Amana ompa nde adoro a gʉra e mbi, nde osuumi lepaangu. Nde ovi ocwi na nci, mwo obahi, nyyaha eso ecalihi. 19Baari a Jerusaleme ayuhi jaa jya. Kya obila o bo macwoli lepaangu lya ma “Aklidama” o juuyi le bo. Mo oduha ndi “lepaangu le tohi.” 20Kya obila ma amateende nca osaangumu Asoome ndi: “Njo e nde oka kʉru”, mvuuru se i ka o yo ni! Aluusi ndi: “Mvuuru okɨma ayaha biri e nde!” 21Saabe ove leswoli balaha mo o mpaniŋi e baari mayenihi bɨla saabe ntini Jesu ayirihi na epiinga. 22Mo obaana o ntini e Jan ampi nde ateeme, tii ngo cuhu mayeni na nde yulu o miisi a saabe. Ove balaha jya eki mvuuru asiisa enwa me enyusihi e Jesu bɨla saabe.»
23Alahi bo abalaha vwele: Jusefe, ma acwolihi o Barasabase nkuumi e nde e mo Jistise, ŋa na Matyase. 24Emana bo avwoni ndi: «E Nkʉmu, we mvuuru ajyabi etima e baari aso, laha bisi a we aswoli o mpaniŋi e bo vwele. 25Nde osa janja antuma o biri e Juda anyili mo oje mpili e nde anku aswoli.» 26Bo ati owani bɨla ankuumi a mwele. Nkuumi e Matyase ecuuhi. Aluusi Matyase bɨla antuma a kuumi na omo.
अहिले सेलेक्ट गरिएको:
Janja 1: MDT
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
