Nahumu 1
1
1 #
IZA 10.5-34; 14.24-27; SOF 2.13-15. Boo mɛn nə n da Ninivu#1.1 Ninivu na á goã Asiirii gána a kiwi gole lɛa lɛ̀ biɛsɔbaa (700) bɛ̀ Yezu tɔn yɛ wa. wɔ paǹ li, Elkɔɔsi min Nahumu a sii-yɛn manɛ.
Dɛnaa Lawa a foo yoo ka a sonborebaa
2Lawa a sii á kaka.
Min mɛnɛn bɛ́ n piɛ̃ nɛ,
Dɛnaa Lawa n dɔlɔ boe bɛn ganaa,
a foo-yoo á baraa.
Dɛnaa Lawa na a gɛ̀ dòo boe
a zɔ́ɔn ganaa,
a foo-yoo á kiɛ̃ wa.
3Dɛnaa Lawa foo a yui fufuu wa.
Sɛnɛ a zɛ̀rɛdɛnaa bíi
zɛ̀rɛbaãdɛnaa wa.
A pàã golebaa miã banban.
Piɛ̃ laanka kurunkurun na
a kiɛ̃ ǹ zii lɛa.
A gòã giulun gusuũ n ka labaran nɛ.
4A n boo diɛ yìsi mu gole ne,
a piɛ̃ ka daɛ̃.
A n tàn mu piɛ̃, a bɔ ǹ nɛ.
Basan a buu bǎã nyantoto ke
ka Karmɛli kele kɛ nɛ,
bɛn tumaa n damɛ ǹ taã ka bon,
Liban a da buũ kɛ tumaa n bɛbɛnɛ.
5Kelen man bìn diɛ a nyɛɛnɛ
tentenen man yoe.
A daa biikoo li, tán nə bìn diɛ
ka kanaa laanka a minbuiin
tumaa nɛ.
6A foo-yoo gɔ́ɔ̃ nɛ,
die n boe la a gole a yɔrɔ-a?
Die yii n boe la a goã koo
a foo-yoo baraa kɛ gɔ́ɔ̃ nɛ?
A foo-yoo n ka tɛ bɛ́ lɔn,
wɔlɔ tumaa kuĩ,
haalɛ gɛ̀fu din nə yɔyɔrɛ a nyɛɛnɛ.
7Dɛnaa Lawa á siĩni.
A n mìi duru ǹ bǎã lɛa koe pinaa.
Min mɛnɛn bɛ́ n dinin koe la,
a n giɛ bɛn walan.
8Sɛnɛ a n die Ninivu yui lenlen
ka mu gole ne.
A na a zɔ́ɔn papaɛ̃,
a nə́ ǹ kiɛ wɔlɔ tì biribiri li.
Lawa a zɔ́ɔn dɔlɔ
9Ka n wàa sii we kɔn
Dɛnaa Lawa ganaa?
Á re kaa zɔ́ɔn papaɛ̃ a ǹ bɔ bii-a,
ǹ gɔn ba re doe kaa gunyin paa doo wa.
10Maǹ ka nyan da mɛn nə́ ke,
we-n kɔn nɛ,
ǹsɛn yɔ-mili baraan kɛn lɛn.
Maǹ die kui lenlen
ka buu gere bɛ́ lɔn.
Ninivu kiwi wɔ paǹ li
11Nsɛ Ninivu,
giĩ goon soo n ne
a n sii wɔ kɔn yɔrɔ boe
Dɛnaa Lawa ganaa.
Zudaa minin wɔ paǹ li
12Dɛnaa Lawa n kɛ pii:
«Ta kaa zɔ́ɔn lɛn nə́ mɔnaa lɔn,
ta ǹ nə́ kaka kɔ lɔn,
ǹ tá re papaɛ̃, ǹ nya lenlen.
Ma ka puusə kɔ.
Sɛnɛ, ma a re bɛ miã zɛnɛɛ doo wa.
13Sisia kəni, ma ka si kaa zɔ́ɔn la,
ma fɔlɔ biɛn kɛn na ma ǹ bɔ ka-a.»
Ninivun kii wɔ paǹ li
14Dɛnaa Lawa n kɛ pii n wɔ paǹ li:
«N ba re nɛnyaanan yii doo
n tɔ nə n tɔ kɔ ǹ ganaa wa.
N dìn kɛn gɔn lɛa hinlaa fɔlɔ lɛa,
ma á re ǹ tumaa ziziɛ̃ ǹ kion.
Ma nə n yala yɔrɔ boe
a giala,
n ba màn kɔn lɛa ma yii li wa.»
अहिले सेलेक्ट गरिएको:
Nahumu 1: SCE2013
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
San Catholic Edition Bible © Bible Society of Burkina Faso, 2013.