यूहन्ना 4
4
सामरी मास्टोखाटा येशूये कुरा जाट्च
1यूहन्नै डेनाङ येशूये वास्टै जना चेलाको खासार बप्तिस्मा याम्हन ले डेच कुरा फरिसीकै सेया। 2येशू लहे न सुकीर बप्तिस्मा माह्यामन्या, तर होसकुङ चेलाकै चहिँ बप्तिस्मा याम्हन्या। 3जब फरिसीकै इसे कुरा सेया डेम थाहा डीन्हा, तब येशू यहूदिया क्षेत्र डासार फेरि गालीलाङ ल्हेसा। 4होसको गालीलाङ नुङ्नाङ सामरिया क्षेत्रौ लाम छानार नुङ्की पर्नन्या। 5अनि येशू सामरिया क्षेत्रौ सुखार डेच लाङ्घाङ टाह्रा। इसे लाङ्घा चहिँ याकूबै लहो मीजा योसेफकी याछ ह्या खेरेप लेया। 6होला याकूबौ इनार लेया। येशू ह्वानाङ-ह्वानाङ म्हुङार होसे इनारौ छेवाङ ङुम-ङुमन्या। होडीक बेला मध्य नाम्सीन छानन्या।
7होला होडीक बेला काट सामरी मास्टो भर्मी डी गाप्की डेयार राहा। येशूये होसकी डेया, “ङाकी डी गाकी यान्ही।” 8होसकुङ चेलाको चहिँ होडीक बेला लाङ्घाङ ज्याच ठोक लोकी नुङ्नन्या।
9होसे सामरी मास्टोये येशूकी डेया, “नाको यहूदी छानार ङा काट सामरी मास्टोओ मीहुटीङ कुटजाट्न डी गाकी ङेल्हे?” (हीजैडेनाङ यहूदीकै सामरीकोखाटा हीर सम्बन्ध माडामन्या।)
10येशूये होसकी डेया, “इडीक नाकै परमेश्वरौ वरदान र नाकोखाटा डी ङेछ भर्मीकी चीन्डीच लेनाङ नाकै होसेखाटा ङेछ लेया, र होचे नाकोकी जिउँदो डी याछ लेया।”
11होसे मास्टो भर्मीये येशूकी डेया, “हजुर, नाकोखाटा गाप्च भाँडा र माले, अनि इनार र लुप्च ले। तब नाकै होसे जिउँदो डी कुटै राक्ले? 12इसे इनार कानुङ पुर्खा याकूबै खास्च हो। आसकै र आसकुङ मीजाकै र ह्रा-भेडाकै इसे न इनारौ डी गामन्या। ही नाको कानुङ पुर्खा याकूब डेनाङ र महान हो?”
13येशूये होसकी जवाफ याहा, “इसे डी गाचको पट्ट न फेरि डी सोन्ल्हे, 14तर ङै याछ डी गाचको चहिँ फेरि सेन र डी मासोन्ल्हे। हीजैडेनाङ ङै याछ डी होसे भित्री गीट्न ङुच डीयो मुल छान्ने र होचे होसकी सेन र मासीच जीवन याल्हे।”
15होसे मास्टो भर्मीये येशूकी डेया, “गुरु ज्यु, होटडेनाङ ङाकी होसे डी यान्ही, र ङाकी फेरि सेन र डी मासोन्ल्हे, अनि ङा इला डी गाप्की राम्ह ङुकी र मापर्ले।”
16होटै न्हुइङ येशूये होसे मास्टोकी डेया, “नुङ्नी, र नाकुङ लेन्जाकी इला आर्घार राक्नी।”
17होसे मास्टो भर्मीये डेया, “ङौ च लेन्जा न माले।” येशूये होसकी डेया, “‘ङौ लेन्जा माले’ डेयार नाकै ठिक न डेया। 18नाकुङ बाङा जना लेन्जा छान्न भ्यामने, चाहाँ नाको सुखाटा ङुमने, होसे नाकुङ लेन्जा होइन। नाकै डेच कुरा साँच्ची न हो।”
19होसे मास्टो भर्मीये डेया, “गुरु ज्यु, अब ङाकी थाहा छाना नाको च अगमवक्ता टी लेसा। 20कानुङ सामरी पुर्खाकै च इसे डाँडाङ परमेश्वरौ आराधना जाट्नन्या। तर नाखुरीक यहूदीको चहिँ आराधना जाट्च ठाउँ च यरूशलेम न हो डेले।”
21येशूये होसे मास्टो भर्मीकी डेया, “ङै डेच कुराङ विश्वास जाट्नी, होसे बेला राम्हन ले, जब नाखुरीक परमेश्वर बोइकी आराधना जाट्की न इसे डाँडाङ न यरूशलेमाङ नुङ्ले। 22नाखुरीक सामरीकै ही की आराधना जाट्नने होसे माह्वार्ले। कान ही की आराधना जाट्ले होसे वार्ल्हे, हीजैडेनाङ मुक्ति चहिँ यहूदीको लकीङ न राल्हे। 23तर बेला राम्हन ले र होसे बेला चाहाँ न हो, जब साँचो आराधना जाट्चकै परमेश्वर बोइकी आत्मा र सत्यताङ आराधना जाट्ले। हीजैडेनाङ परमेश्वर बोये याङ्च न आराधना जाट्चकोलाक पाले। 24परमेश्वर आत्मा हो र होसकोकी आराधना जाट्चकै आत्मा र सत्यताङ आराधना जाट्की न पर्ले।”
25होसे मास्टो भर्मीये येशूकी डेया, “ङाकी थाहा ले, मसीह राल्हे (होसकोकी मुक्ति याछ ख्रीष्ट डेले), जब होसको राल्हे, तब होसकै न कानकी पट्ट न कुरा डेम याल्हे।”
26येशूये होसे मास्टो भर्मीकी डेया, “नाकोखाटा ङाक्चै जाट्च, ङा होसे न हो।”
27होडीक न बेला येशूओ चेलाको टाह्रा, र होसको काट मास्टो भर्मीखाटा ङाक्ङ ङुच डाङार होखुरीक छक्क पर्या। तर सुयेर “नाको ही मीमन जाट्ले?” अथवा “नाको होसे मास्टोखाटा हीजै कुरा जाट्नन ले?” डेयार मागीना।
28होस न्हुइङ होसे सामरी मास्टो डीओ कुँडा होला न डासार लहो लाङ्घाङ नुङा, र भर्मीकोलाक डेया, 29“रान्ही र काट जना भर्मीकी ङोस्नी। होसकै ङै जाट्च पट्ट न काम ङाकी डेम याहा। ही होसको न मुक्ति याछ ख्रीष्ट च होइन?” 30तब पट्ट न भर्मीको लाङ्घा लकीङ ख्योहार येशूकी ङोस्की नुङा।
31होडीक न बेला चेलाकै येशूकी ज्याच ठोक याछै, “गुरु ज्यु, अब हीर ज्याच कुरा ज्यानी” डेयार बिन्ती जाटा।
32तर येशूये होखुरीककी डेया, “ङाखाटा ज्याच कुरा ले, होच्यो बारेयाङ नाखुरीककी थाहा माले।”
33इसे कुरा सेयार चेलाकै मेखुरीक-मेखुरीक डेया, “कुचे होसकोकी ज्याच कुरा राक्ङ याहा की ह्याले?”
34येशूये होखुरीककी डेया, “ङौ ज्याच कुरा चहिँ ङाकी बीर्न्हकाचौ इच्छा अनुसार होसकुङ काम पूरा जाट्की हो। 35नाखुरीक डेले, ‘बाली म्हीन्की अझै बुली महिना लग्डीस्ले’ तर ङा नाखुरीककी डेले, बारी पट्टी सेम्हजा ङोस्नी, बाली म्हीन्न भ्यामने अब चेच बेला छाना।#४:३५ इला म्हीन्छ बाली डेच चहिँ येशू न मुक्ति याछ ख्रीष्ट हो डेम विश्वास जाट्की तयार छान्च भर्मीको हो। 36सुये बाली चेले होचे ज्याला डुप्ले, र होचे सेन र मासीच जीवनौ लागि अन्न बटुलीले, अनि भेरेट्च र बाली चेच नीस न काठोवाङ न माह्राङ्ले। 37इला ‘काट जनै भेरेट्ले र अर्कोये बाली चेले’ डेच सत्य हो। 38ङै नाखुरीककी कुला बाली चेकी बीर्न्हका, होला नाखुरीकै मारोप्डीमने। अरुकै न होला रोप्डीया, अनि होखुरीकै जाट्च कामौ फल नाखुरीकै डुप्मने।”
39सामरी मास्टोये, “ङै जाट्च पट्ट न कामौ बारेयाङ होसकै ङाकी डेम याहा” डेच गवाही याछये जाट्नाङ होसे लाङ्घुङ वास्टै जना सामरीकै येशूमीटाक विश्वास जाटा। 40होटबाटै सामरीको येशूकी डुप्की राहा, अनि होसकोकी होखुरीकखाटा न ङुनी डेयार बिन्ती जाटा र होसको नीस याकसम्म ङुवा। 41होटै येशूये याछ शिक्षौ कारणै झन् वास्टै सामरीकै होसको मीटाक विश्वास जाटा। 42होखुरीकै होसे मास्टोकी डेया, “नाकै डेच कुरा सेयार मट्टै कानै विश्वास जाट्च होइन, तर अब च कान लहे न होसकुङ शिक्षा सेचबाटै विश्वास जाट्नने। होसको साँच्ची न संसारौ मुक्तिदाता हो डेच कुरा अब कानै वार्न्हने।”
येशूये सरकारी कर्मचारीयो लेन्जा मीजाकी गेपाक्च
43येशू होला नीस याकसम्म ङुवा, र होटै ख्योहार गालीलाङ नुङा। 44येशू मेखोल्है न गवाही याहा, “अगमवक्ताकी लहो ठावाङ र लहो इमाङ आदर माजाट्ले।” 45जब होसको गालीलाङ टाह्रा, तब होलुङ भर्मीकै होसकोकी स्वागत जाटा, हीजैडेनाङ यरूशलेमाङ छुटकारौ चाड मन्डीकी नुङ्च बेलाङ होसकै जाट्च अचम्मौ कामको होखुरीकै डाङ्ङन्या।
46येशू फेरि गालीलुङ काना सहराङ राहा, होला होसकै डीकी अङ्गुरौ मद्य खास्नन्या। येशू इसे सहराङ लेच बेलाङ काट जना सरकारी कर्मचारी र होला लेया। होच्यो लेन्जा मीजा चहिँ कफर्नहुम सहराङ छामन्या। 47येशू यहूदिया लकीङ गालीलाङ राम्हने डेच कुरा सेयार होसे सरकारी कर्मचारी होसको लेठाङ राहार, “ङौ लेन्जा मीजाकी गेपाक्ङ यान्ही” डेयार बिन्ती जाटा, हीजैडेनाङ होच्यो लेन्जा मीजा छार सीकी पामन्या। 48येशूये होसकी डेया, “चिन्हको र अचम्मौ कामको माडाङ्ठर नाखुरीकै सेन र विश्वास माजाट्ले।” 49होसे सरकारी कर्मचारीये डेया, “प्रभु, ङौ लेन्जा मीजा सीकी डेनाङ अगाडि न राम्ह यान्ही।” 50येशूये होसकी डेया, “नुङ्नी, नाकुङ लेन्जा मीजा जीवाले।” अनि येशूये डेच वचनाङ होचे विश्वास जाटा र होसे ल्हेसा।
51होटै न्हुइङ होसे नुङ्चै जाट्नाङ मेन नोकरकै होसकी लामाङ न डुपार डेया, “नाकुङ लेन्जा मीजा गेपा!” 52होचे नोकरकोलाक, “ङौ लेन्जा मीजा कुडीक बेला लकीङ गेप्च हो?” डेयार गीना। होखुरीकै डेया, “टीस्यामीङ नाम्सीन काट बजेलकीङ होसकी ज्वरै डास्च हो।” 53येशूये होसे लेन्जा जजौ बोइकी, “नाकुङ लेन्जा मीजा जीवाले” डेच समय लकीङ न गेप्च हो लेसा डेम होचे थाहा डीन्हा। होटबाटै होसे सरकारी कर्मचारी मेल्हा र होच्यो पट्ट न परिवारै येशूवाङ विश्वास जाटा।
54इसे चहिँ यहूदिया लकीङ गालीलाङ राहार येशूये जाट्च दोस्रो अचम्मौ चिन्ह लेया।
अहिले सेलेक्ट गरिएको:
यूहन्ना 4: EMGP
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2025 by Mother Tongue Translators Society and Wycliffe Bible Translators, Inc.
