ROMAX 9
9
Siyiex Mai Pui Cie Nawh
1Aux krai pa mawh meh ka daux Cao Khrit, ang aux pie lhen, rhawm aux kawx kham mhai rug tau mai aux ka daux Khuan Singax Singeh, 2grawh grawng kied ting khi rhawm aux mai pa kha rhawm rhawm aux ang jud jai heue. 3Grawh grawng nawh aux chix simie ti kieh tokaux aux mawh pa hoik jhax lawg khaing Cao Khrit, son puxaik aux khankix, pa mawh paox ru aux awm pa khaw mai nex nham heue. 4Kix mawh pui Isarelax, pa hoik pon pa sawn mawh kawn lih mai min plakngai mai sijax mukheu khankix mai pa hoik tawx lai beenli kah mai pa yuh kaing pa dex mai pa krub ka Siyiex mai lox mukheu khankix heue. 5Kix mawh pa hoik toe lih khaing tax du khankix mai ka daux kix kawx Cao Khrit lih mawh, awm pa khaw mai plak nex nham, pa mawh pa giex kaing piang khawmuik, pa mawh Siyiex pa ting bwanson leeing ju heue. Amen.
Pui Isarelax Mai Pa Bak Yiag Siyiex
6Viang mawh kawx nan gumlox Siyiex hoik lih tix laux mawh pa ang koe bwanson ang mawh heue. Grawh grawng nawh kix pa toe lih khaing Isarelax, ang tie mawh pui Isarelax khawmuik, 7Awm an, kheu mawh kix ru Abraham, kix ang tie mawh kawn praix khawmuik heue. Viang mawh nan, “Ka daux Icak tak sang kok mawh ru maix heue.”#Jah 21:12
8Mawh kheu nan, ang lai mawh kawn praix pa dex mai nex nham, pa mawh kawn praix Siyiex. Viang mawh nan mawh kawn praix pa dex mai lox mukheu pa sawn mawh ru heue. 9Grawh grawng nawh lox mukheu an hoik mawh nin. “Awm pa khaw mai pa khop bawg yam in sax, aux tak sang hoek mai Sa ra tak sang koe kawn simex heue.”#Jah 18:10
10Ang joeng mawh ngie nan. Yam koe kaux Rebekha kheu keeing ex Icak, 11Yam ang bax keh kawn an kiex, ka ang nyang bax yuh ceu pa mhawm, phan ang mawh nan ceu pa caox sonsang khaw mai pa yiag pa bak Siyiex, sonsang kaux cong awm pa khaw mai pa laug ti teei, ang mawh pa dex mai krax twah klaung, viang mawh nan mawh pa dex mai Kaw pa kok, 12hoik grux ah nin ka bun an, “Pa mawh puxke tak sang yuh siliex ka pa mawh pux heue.”#Jah 25:23
13Awm hoik tiiem ti deuh ah nin, “Aux moh ka Yakop, viang mawh nan Aux koeng ka Esaw heue.”#Ma 1:2-3
Pui Isarelax Mai Pa Prawng Ca Siyiex
14Phan mawh nan ex sang ah ka mawx? Khex koe pa ang rahsee mai Siyiex lie? Ang doh mawh nan. 15Nawh Cao hoik ah nin ka Mose. “Aux tak yuh bwanson ka pui pa mie Aux ti yuh bwanson kah mai Aux tak caux rhawm ka pui pa mie Aux ti caux rhawm kah heue.”#Lih 33:19 16Mawh kheu nan ang koe ka alo pui mai ang koe ka pa to pui, viang mawh nan koe ka pa yuh Siyiex bwanson heue. 17Grawh grawng nawh phuk lai sigang khri hoik ah nin ka Pharaw, “Grawh grawng nawh Aux hoik yaog maix ting kheu jao in sonsang pon jhi Aux sibrawm Aux ka daux maix mai sonsang tah hu ceu kaux Aux piang haktiex khawmuik heue.”#Lih 9:16
18Mawh kheu nan Nawh Cao yuh bwanson ka pui pa mie Nawh ti yuh kah mai Nawh Cao kieh kiien ka pui pa mie Nawh ti kieh kiien heue. 19Phan mawh nan maix tak ah nin ka aux, “Kheu Nawh Cao kawn baox deuh phimap? Grawh grawng nawh kaux pui mawx chix tiebtie ka alo Nawh Cao?” 20Pui pa deeh pawk lox thiang ka Siyiex, “Siyiex eue, maix mawh mawx?” Ceu pa hoik phan hoik yuh, tak sang ah ka Kaw pa phan pa yuh tix, “Maix lai yuh aux awm in yuh ka mawx lie?”#Isa 29:16, 45:9 21Phan ang mawh nan, cao pa yuh aw ang ting piang tiex klox, ti sang teei tiex khaing tiex tix lon ngie mai yuh aw ti kieh koe min plakngai tix mu mai tix ang koe min plakngai tix mu kah lie? 22Phan Siyiex koe rhawm ti sang jhi krax song rhawm Nawh mai ti sang kieh tawng sibrawm Nawh sidawng, viang mawh nan hoik gun yeung ka pa lang gun yeung tom nie ka aw son pa song rhawm khankix, pa hoik cox son pa laux leeing, tak sang koe ti ah ka mawx? 23son sang kieh Nawh tawng ka pa mi pa koe min plakngai Nawh piang aw pa caux rhawm khankix, pa hoik dawg grux cox Nawh son min plakngai, 24pa mawh ex, pa hoik kok Nawh Cao ti teei, ang mawh ngie khaing pui Yudax, viang mawh nan mawh khaing khawm pui tang ceu, tak sang koe ti ah ka mawx? 25Awm pa hoik ah Nawh Cao khawm ka daux lai Hose, “Aux tak kok mawh pui Aux, ka pa ang mawh pui Aux mai tak kok mawh bun pa moh Aux, ka pa ang Aux moh heue.”#Ho 2:23 26“Tak sang mawh nin, ka dee pa hoik ah ka kix, Pex ang mawh pui Aux tak sang kok kix mawh kawn Siyiex pa im ju tan heue.”#Ho 1:10 27Lheu khaing an Isayax hoik kok yo ah nin ka grawng pui Isarelax, “Viang kawn praix Isarelax hun awm mhaik rhawm sigrit sigra kawx, mawh ngie pa deuk khankix khaing pa sang hoek krax taoh heue. 28Siyiex tak sang prawng gumlox Nawh piang haktiex mai kieh hoik mai tat dawd heue.”#Isa 10:22-23
29Awm pa hoik krai Isayax sivoe an, “Phan Siyiex giex kaing kru naing cao raoma ang grham simie ka ex, ex hoik lih mawh awm veng Sawdom mai tak hoik yuh kieh awm veng Gawmawrax heue.”#Isa 1:9
Krax Ot Krax Koe Pui Isarelax
30Mawh kheu nan ex tak sang ah ka mawx? Sang ah, pui tang ceu, tang cat pa ang hawt leue khaix pa rahsee, hoik pon giex ka pa rahsee, pa mawh pa rahsee pa dex mai krax yum rhawm lie? 31Pui Isarelax pa hawt leue beenli pa dex mai pa rahsee, ang krup ang hoek ka beenli an heue. 32Mawh kheu patix ang hoek ka? Hoik mawh kheu ang kix viex krax yum rhawm ti hawt leue ka, viang mawh nan kheu hawt leue ka krax twah klaung. Kix hoik sideeing ka simaox dee sideeing, 33Awm hoik tiiem ti deuh ah nin, “Jhak heue, Aux een Simaox dee sang sideeing ka Zion mai Simaox pa sang kieh lud mai pui pa yum rhawm ka Simaox an, tak ang hoek krax kaig tua heue.”#Isa 28:16
अहिले सेलेक्ट गरिएको:
ROMAX 9: WCL
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Wa Common Language Bible © Bible Society of Myanmar, 2012