YAM JAH 43
43
Deeh Viex Binyamin Hu Ejiptux
1Sibhawm praix, kied nie kin daux haktiex Khanan heue. 2Khaix hoik uik ih kix nghox pa viex ti khaing Ejiptux, keeing kix ah nin ka kix, “Deeh hu liag priex son ex ceeix heue.” 3Yam an Yudax ah nin ka nawh, “Pui an hoik tawx satix mai hoik ah lox kin ka yix yuh nin, phan pex ang viex pux tix hoek, pex tak ang pon ti yaox ka ngai aux heue.” 4Phan maix ploi pux yix hu mai yix, yix tak hu liag pa ih, 5viang mawh nan phan maix ang ploi nawh hu, yix tak ang lai hu, mawh kheu hoik ah pui an ka yix yuh nin, phan pex ang viex pux ti hoek, pex tak ang pon ti yaox ngai aux heue.” 6Isarelax ah nin, “Mawh kheu tix, pex lai krai pui an mhong ka kawn koe pux tix mai yuh krax kha rhawm ka aux yuh ka mawx?” 7Kix ah nin, “Pui an, chawk grawng yix mai grawng doeh ru yix kriem kre, nawh ah nin, kawn im ju keeing pex lie? Koe pux tang kaux pex lie?” Yix deeh krai nawh mhong awm pa chawk nawh, mawx sang tawng ah nawh, “Viex pux pex hoek yuh ka mawx?” 8Yudax ah nin ka keeing tix Isarelax, “Ploi kawn nyawm tau mai yix mai yix sang yaog tix hu, sonsang im ju ex mai ang yum, ex ku kaux khawm maix mai kawn nyawm iak khankix heue. 9“Aux lawk mawh cao kham nawh maix tak deeh mhaing nawh khaing daux taix aux, phan aux ang pon viex nawh hoek mai deuh sivoe ngai maix, kieh aux klawm phimap an leeing ju heue. 10Phan yix ang rheung yuh nin yam in, yix tee hoik hoek ra bawg heue.” 11Keeing kix Isarelax ah nin ka kix, “Phan mawh nan, yuh nin, teei pex viex plix khaox pa mhawm khaing daux haktiex in daux bau pex mai tawx totaix ka pui an, viex sidah peeh khaox ceeix, rawm hia ceeix, nyawng bhawng mai sidah muran, plix khaox pa awm sok kram jung mai plix khaox pa awm sok ceem tiex heue. 12Teei pex viex mau ra son daux taix tix mai mau pa yaox pex ka daux moing chee kawx deeh viex hu, bawg blah ha mawh kix pa pi nieh. 13“Viex pux pex mai deeh kaoh hu ka pui an, phan aux yaox ti som kawn tix, aux tak lai kham ka heue. 14Kieh Siyiex pa ting sibrawm tawx krax caux rhawm ka pex sivoe pui an, sonsang deeh ploi nawh puxke pex mai Binyamin heue.” 15Mawh kheu nan kix teei totaix mai mau ra son daux taix tix, khawm Binyamin lih hu ka meung Ejiptux mai cung sivoe Yosiep heue.
16Yam yaox Yosiep ka Binyamin tau mai kix, nawh ah nin ka pui cau tix daux nyiex, “Viex pui inkix laig ka daux nyiex mai pah tobrie yuh priex preem, mawh kheu pui inkix, sang ih priex ngaix tau mai aux heue.” 17Pui ankix yuh awm pa krai Yosiep mai viex kix hu nyiex Yosiep heue. 18Kix kied koe krax lhat graung, mawh kheu kok nawh kix hoek ka nyiex Yosiep ah nin, “In tee mawh grawng mau, pa deeh viex ex ing daux chee ex bawg voe nhaox, kix tom kok ex hoek tin, sonsang sawg krax lud ex mai plee piang ex mai sang khrawt la viex ex mai kieh ex mawh siliex tix heue.” 19Yam an kix greed ti dex pui cau nyiex Yosiep, kix sikah tau mai nawh hawt diang siviex, 20mai kix ah nin, “Cao simiang eue, bawg sivoe nhaox, yix hoek ti liag priex tete, 21yam hoek yix ka dee bang tix, yix paoh chee tix mai yaox mau daux cie pui mawx cie pui an daux moing chee, mau yix khankix kawn grum uik, mawh kheu nan, yix tom deeh viex mau in hoek heue. 22Yix baox viex mau tang dah, daux taix tix, sonsang liag pa ih, yix ang lai tawng ka pui pa sau mau yix, daux chee yix heue.” 23Pui cau an deeh ah nin, “Kieh pa nhim koe mai pex, paw lhat graung, Simiang Siyiex pex mai Siyiex keeing pex, sau mau daux chee pex, aux hoik pon mau pex, ” khaix an nawh ap Simion ka kix heue. 24Kawncau an, viex kix laig daux nyiex Yosiep mai tawx rawm kieh kix khoek caong tix mai nawh tawx la kix sawm, 25kix dah ti cox khrex totaix ka hoek Yosiep yam ponngaix, mawh kheu mhong kix ti sang ih priex ngaix tau mai nawh heue. 26Yam hoek Yosiep ka nyiex, kix ap totaix pa viex kix daux taix Yosiep mai gup ti piang tiex sivoe nawh heue. 27Yosiep singeuh taix kix ah nin, “Keeing pex tax kuad pa ah pex kawx nyawm ot lie? Kawn im ju nawh lie?” 28Kix ah nin, “Yix pa mawh kawncau maix, keeing yix nyawm ot, nawh kawn im ju.” Kix gup ngai tix mai krub ka nawh heue. 29Nawh maong ti jhak mai yaox pux tix Binyamin pa mawh kawn simex miex nawh ah nin, “In mawh pux ghoik pa hoik krai pex ka aux lie?” Nawh ah nin, “Kawn simex aux eue, kieh Siyiex nawb bwan piang maix.” 30Nawh kied koe krax caux rhawm yam yaox ka pux tix, mawh kheu nan, Yosiep yaog ti kaoh sijaox mai sawg dee sang yiiem tix, nawh laig daux lawg it tix mai yiiem heue. 31Khaix an nawh khoek ngai tix mai lih plak praix, gun rhawm tix ah nin, “Khan priex heue.” 32Kix khan dah dee son Yosiep tix dah, son puxaik nawh tix dah mai son pui Ejiptux pa sawm tau mai nawh tix dah, mawh kheu pui Ejiptux ang sax ih priex tau mai pui Hebrie, kheu mawh pa seeing pui Ejiptux ka heue. 33Kix ngawm sivoe ngai nawh, jah ka kawn Ai tom hoek ka kawn ghoik, pa ting pa iak awm hoik koe been kix, kix ra lai jhak pakngai paox tix, ka daux pa daox deng heue. 34Khaix an Yosiep teei pa khan kheu kix sivoe nawh mai tawx ka kix, viang mawh nan, pa khan kheu nawh son Binyamin hoik nie khaing kix phwan son mai kix ih nyau tau mai nawh ka daux pa gaux rhawm heue.
अहिले सेलेक्ट गरिएको:
YAM JAH 43: WCL
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Wa Common Language Bible © Bible Society of Myanmar, 2012