1 KAWRINTHUX 3
3
Pui Yuh Kaing Jhaw Siyiex
1Puxaik khankix eue, aux ang pon ti sikah ka pex awm mawh pui pa dex mai khuan, viang mawh nan tak sikah ka pex awm pui pa dex mai nex nham mai awm mawh ka kawn ngie khankix ka daux Cao Khrit heue. 2Aux hoik tawx pex nyaux rawm teeih mai ang lai tawx pa ih kah,#He 5:12-13 mawh kheu ang pex nyang bax pon kham. Pie yam in kawx pex ang nyang bax pon kham, 3kheu kawn mawh pex pa dex mai nex nham heue. Mawh kheu koe pa boh rhawm mai pa simah ka daux pex, ang pex lai mawh pa dex mai nex nham mai pa hawt hu ka been kawn pui lie? 4Grawh grawng nawh yam tix kaux ah, “Aux mawh pa dex mai Pawlux,” mai tang kaux tix kaux ah, “Aux mawh pa dex mai Apawlux,”#1Kaw 1:12 pex kawn mawh pa dex mai nex nham ang mawh lie? 5Phan mawh nan Apawlux mawh pa yuh ka mawx? mai Pawlux mawh pa yuh ka mawx? Mawh pui cau pui soi pa hoik kieh pex yum rhawm, awm pa tang tawx Simiang ka kaux pui mawx kaux pui an heue. 6Aux mawh cao pa sum,#Cau 18:4-11 Apawlux mawh cao pa see rawm, #Cau 18:24-28viang mawh nan Siyiex mawh cao pa kieh haok huan heue. 7Mawh kheu nan kaw pa sum ang ah, kaw pa see rawm ang ah, ang lai mawh tidtix, viang mawh nan mawh Siyiex pa kieh haok huan heue. 8Lheu khaing nan kaw pa sum mai kaw pa see rawm mawh tix kaux khaing, viang mawh nan kaux pui mawx kaux pui an tak sang pon bwanson awm pa khaw mai kaing pa yuh tix heue. 9Grawh grawng nawh yiex mawh paox pa rom ti yuh kaing tau mai Siyiex mai pex mawh ma Siyiex mai nyiex Siyiex heue. 10Awm pa khaw mai bwanson Siyiex pa hoik tawx ka aux, aux hoik kaw num awm cao pa chix sum nyiex pa koe pingnya mai pui tang kaux hoik baox gawp ti sum ka piang an heue. Kieh pui ku kaux yuh satix ka grawng pa baox gawp nawh ti sum ka piang an heue. 11Grawh grawng nawh pui tix kaux kawx ang chix kaw num pa tang, pa lheu khaing num pa hoik kaw, pa mawh Yesux Khrit heue. 12Viang mawh nan, phan pui tix kaux kaux baox gawp ti sum ka piang num an, ka khri, mau, siang simaox pa ngawh, khaox, rib mai brex nghox ang ah, 13Kaing pa yuh kaux pui mawx kaux pui an tak sang kieh sidawng heue. Grawh grawng nawh, Singaix An tak sang kieh sidawng kah, mawh kheu tak sang plak jhi nawh ka daux ngu mai ngu an nong nong tak sang cheu ti yaox, kaing yuh, kaux pui mawx kaux pui an, grawng mawh kaing pa yuh ka mawx heue. 14Phan kaing pui tix kaux kaux pa hoik gawp nawh ti sum ka piang num an kawn kaux cong, kaw an tak sang pon bwanson heue. 15Phan kaing pui tix kaux kaux hoik proe, nawh tak sang som nai heue. Viang mawh nan tokaux nawh tak sang hoek krax taoh, mawh awm pa hoik boek nawh khaing ngu heue. 16Ang pex tawng grawng mawh pex nyiex bwan Siyiex mai grawng pa ot Khuan Siyiex ka daux pex lie?#1Kaw 6:19; 2Kaw 6:16 17Phan pui tix kaux kaux yieh nyiex bwan Siyiex laux, ka nawh kawx Siyiex tak sang yuh laux heue. Grawh grawng nawh nyiex bwan Siyiex mawh pa singax singeh, pex kawx mawh nyiex bwan an heue. 18Paw kieh pui tix kaux kawx deeh pie ka tokaux tix tiru. Phan pui tix kaux kaux ka daux pex ce tokaux tix mawh pa koe pingnya ka daux haktiex in, kieh nawh lih mawh pa daox pa aw, sonsang lih mawh nawh pa koe pingnya heue. 19Grawh grawng nawh pingnya pa dex mai haktiex in mawh ceu pa daox pa aw ka sivoe Siyiex heue. Kheu hoik tiiem ti deuh ah nin, #Bax 5:13 “Nawh giex kix ka jhawm lhak tokaux kix heue.”#Yaog 94:11
20Baox ah nin tix bawg, “Simiang tawng grawh grawng pa keud pui pa koe pingnya, grawng mawh kix pa giex going heue.” 21Mawh kheu nan paw kieh pui tix kaux kawx yaw rangdi ka daux kawn pui heue. Grawh grawng nawh ku ceu khawmuik mawh cie pex heue. 22Viang mawh Pawlux ang ah, Apawlux ang ah, Kephax ang ah, haktiex in ang ah, pa im ang ah, pa yum ang ah, ceu pa koe yam in khankix ang ah, ceu pa sang hoek ti mawh khaix khankix ang ah, khawmuik khawm leeing mawh cie pex, 23pex mawh cie Cao Khrit mai Cao Khrit mawh cie Siyiex heue.
अहिले सेलेक्ट गरिएको:
1 KAWRINTHUX 3: WCL
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Wa Common Language Bible © Bible Society of Myanmar, 2012