He Ekeny Gál Alb Fimiká 20
20
Báulo lés Makeˈdonia ubaa lés Hellen mé il nadhe
1Aalé shalalaam he górof galieká Báulo gál giri nyaaram láli al kinaalloká máádhat ali ˈdú kaay. Gaal ali kí ˈdieká mu gáál guofsie, gáál hol Waag ki vie, kie, lés Makeˈdonia mé nie. 2Mu lés kinaal lúl gaa sedhe, mu gál nyaaram alb kinaalloká ˈdeeny burnay hí gogofsuoká onisie, đo lés Hellen mé nie. 3Mu lés Hellen kinaal ˈguiyam seđ gaa yíéđie. Aalé mú sienylé lés Siriaká ka ˈjobondheká, mu ˈdeeny gál Yuuˈdi hí mú tág ki nieká hemitle maale. Mu đo kas máálle Makeˈdónia hol ˈdú nannaatká hí ká hille. 4Gál mú hol eedhdheká he Sobátiros giri iny Burros-, giri ˈjaallé kinaal máá Beryaká, mú Aristákos tá Sekúónoˈdos giri gál Dhesalonikeká, Gáyyos giri máá ˈDerbeká, ubaa Tímote, héétí mú Túkiko tá Torofímos giri Asiaká. 5Gálallá nyí met nadhe, nyí Torówas kí esse. 6Aalé ˈjila balashalle máá hí maat fafuo-, mánká rámle ˈgiteká nyiin nyí Filíbi kadich gaa hille, ram chen chieká nyí Torówas ki faanne, ál kinaal nyí tiiya gaa rayye.
Yútukos giri úr gáá ˈjie-, kufeká geđi luolnodhe
7Rám tiiyaká kúlíchlé erká nyí hol ˈdu gáá chimie, giri nyí balashá ˈgieˈgicha-, nyí gólól Máá Guđoká hol ˈgar golmosotoká. Aalé ˈdaa giri Báulo biiy ká biˈdeka kekeenká mu gálaat ˈdeeny Waaˈgiet onisie, ˈjíig chúúre hurtáka. 8ˈBíl ki seđe-, biiy ˈdug ˈdú yiel-, nyí hol ˈdú iđeká nyátáá burnayyeká hí gaa boloonne. 9Máá ruorich gaalí Yútukos yegie mare ˈbíl ˈdína állé eiy iđeká he ˈdú ije. Aalé Báulo he ˈdéé súm chuoyká mu állé ijeká in hí súm dhie, waaware, ram hí eeteká đo úr gáá ˈjie, le ˈdoy, gaalí les gaa eeyká kuf. 10Aalé Báulo đo leedhe, sedhe, mú ˈdú ˈdoy, mú gil ˈdinnam nie, gáál geey, kieye, Haí bírginy, mu hé luol, yie. 11Aalé Báulo geđi ˈbíl biiy ˈdug yielká hol ˈdú nadheká, mu balashá ˈgieˈgie, gáál hol balashá ˈgar koey. Mu gáál ˈdeeny Waaˈgiet onisie ˈjíig biiy biˈde, đo kie, sedhe. 12Aalé máá ruorich-, giri loolnodheká gaalí é ˈdú eedhdhe, ameeny máá giri ál kinaal gaa ijeká gerlé hí súm gaa ˈdeenedheká hí gaa meedhe.
Báulo ˈjien Miletos sedhe
13Aalé nyí Báulo met naate nyí kadich hille, Ássos giri álle nyí mú ki egeetoká nyí ˈdú kuate. Báulo íín kisso sieny ˈgas kí yiimet-, Ássos mé ká nannieká tág kodhdhe. 14Aalé mu nyí Ássos gáá hileká nyí mú kadich gaa kaate, đo nyí Mítulen ki faanne. 15Bííy éíy taaka ka biˈdeká nyí ˈjien Mitulen gaa kiiyye, nyí koro Kiyos nyuoˈde. Kúlích ki seđeká nyí ál kinaal gaa kiiyye, nyí Sámos ki faanne. Aalé bííy éíy geđo ka biˈdeká nyí ál Samos kinaal gaa kiiyye, nyí ˈjien Miletos ki faanne. 16Báulo Eféso ma gáá náánallá, mu Yerúsalem ál ˈjob gaa higile-, ˈjíig ˈjila Bentekos el ˈdú higileká fede.
Báulo karu Efeso hol Waag ki vie
17Milétos állé kinaal Báulo Eféso gálaat ali ˈdú fie, giri gál nyaaram al kinaalloká gál hí met ki ˈgieká gaalí ká veveen-, mú hol aargiroká. 18Gaal ali kí fameká mu gáál geey, kieye, Bár giri erkob yú Ásia kí ˈjieká, it yaalmit chia yú ki ije-, bar lulle ke hol af ijeká, it óg. 19Har úba gál Yuuˈdi ye mé il gaa ˈgie-, hé burnayká il hí ye aargiˈdeka, yáá hol máá ˈdúwaká ma ka dháany, yú hújích Máá Guđoká imiro ki nannie. 20Yú hí ˈdeeny Waaˈgiet ka oonisieká yáá ˈdeeny níínní hí ki midhab-, hí af ˈgidhieká mán. Yú innum gálaat ubaa ˈjien kíchia hí he gaa oonisie. 21Yú yáá gál Yuuˈdi ubaa gál Hellen ki ˈdiiyime, giri gaal ađaabano ubaa nyuogim le haađuo-, Waag makan fafaan-, Máá kúnnaa Guđo Yíésu iiy yegetká.
22Aalé káána Hím Naasan Waaˈgiet hé ye guofsiche, giri yú Yerúsalem seseenká. Yáá yaalmit chia al kinaalloká muog. 23Kor Hím Naasan Waaˈgiet íín hé ˈjien lullé yú ki ˈjeˈjemeká hiigin ubaa manyjasiny ye egeteká ye geđiche. 24Tá yú yáá sídhchú ye geer ma gaa ˈdeeneny. Hé chia ye ki ˈdúwaká he hújích Máá Guđo Yíésu hí ye ká shieká, giri Fayam Midhab gielmiti Waaˈgietká đulalle yú kirmisat-, yú ˈdiyeen-, yú beđisatká.
25It giri yú hí hurt gaa seseme-, lulkícho yú hí Guch Waaˈgiet ˈdeenyle ki ˈdiiyimeká, hát máá níínní geđi ye aargiro-, mánká, yáá óg. 26Aalé lulkícho kúlích ki gaa ijóóllá yú hí geeye, itín máádhat hí gaa bađayka, yáá máá níínní bađanyle gaalí ye ˈdú ˈdeensetká mán. 27He fedit Waaˈgiet hé níínní yú hí in ka kaayká mán, lulle yáá hí ki ˈdiiyime, muí gáál yie.
28Mu geđi gáál geey, kieye, Hol ˈdeeˈdemíe, gál Kiristo lullé Hím Naasan Waaˈgiet hí mé ki koyyééllá úba ˈdeeˈdemíe. Hát máádhat hí aanyle ˈdeˈdeenká Máá Guđo Yíésu gállé he fásle ká hidhdheká lulle hát tikiˈde kinaallá ˈdeeˈdemíe. 29Yáá óg, yú kieka, đanyar hurt haí ká higila, hé hí ma biisiny. 30Itín hurtkícho úba gál gálaat baađisuo-, gál Yíésu iiy yieká ˈbaal laatká yé haí gáá ˈdeeme. 31Aaléka, biiy ˈdeeˈdemíe, warram seđ geerle hát yú hí chúúre ubaa kúlíchle buony af ki tatieká táb ˈduoˈdodhíe.
32Yáá hí Waag gíl geerle fie, hí Waag ˈdeenylé gielmitiká ˈdú hay, giri ˈdee hí iiy yeenkícho higirasuo-, ubaa gál Waag hí gálle hosote-, muí taak koyká lulle hí mú áˈjánle hol ˈgar aargiˈdaká. 33Yú yáá máá níínní bírelle ubaa đafaraamle ílle ˈgieká mán. 34Itín dhúrkícho it óg, hát yú gil ger chiallá hujich ki nannie-, hé chia ye ki ˈgeerˈgerneyká, ubaa gál chia nyí hol ˈgayyeká héllé hí ki ˈgeerˈgerneyká, nyí ki aargiˈdeká. 35Yáá hí yaalmit ke hujich hát ˈdabaanká ki nannuo-, ke gál he hí ki ˈgierˈgereká ke ˈdú ˈjeˈjeenká hí ká argisie. ˈDeeny Máá Guđo Yíésu hí hodheká mé ka ˈgáa, giri máálle kieye, Hé ke máádhat shieká geer gaa meentlé ke aargiroká geer gaa meent hélle ke máádhat gaa argeká a mé ˈdaatíká, muí yieká, Báulo hí gáál yie.
36Báulo ˈdeenyéél beeteká les kurram ˈdoy, gáál lulle hol Waag ˈgar vite. 37Gaal lulle ger hí gudhdhe, buoy, Báulo hođoˈd gaa ˈgiiliˈgay, mú a ˈdinnam ˈduungume. 38Hé súm gáál geer gaa ˈdeeneyká he ˈdeeny giri Báulo hí hodhe-, mu kieye, It geđ ye ma aargiriny, muí yieká. Aaléka gaal kie, mú eey, ˈjíig mú kadich álle đig hoy.
अहिले सेलेक्ट गरिएको:
He Ekeny Gál Alb Fimiká 20: dsh
हाइलाइट
शेयर गर्नुहोस्
तुलना
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
