Roomi 9
9
Waaqa akka samayta Isira'eeli' reexade
1Anti Kiristoosinni dukaatan haasawanni, diisheey darta an kooni an co. Karittase xayyo, Hapura Qulqullootatin marra'ammo kuli ka ana' maakkummi: 2nyarrahata a kutta isho qaapa ana diinni in kinnini karittiyyo kara ca. 3Qoota orriyyo ka a dakintan daltaytiyyo kodde malla, katin mattiyyo Kiristoosi kapa mayna, jiija a Waaqa ka ana qara' kaynaan jaalannin heene. 4Ishootta Isira'eeleta, Waaqa ka hellaadi' ishootta kodade ka ulfeenaadi ishootta akkishe ka kodayteeta ishootta olli kodade ka seera ishootta' daashe ka taanteta a waaqaysatta a dukaata ishootta akkishe ka qaaleta kippeetaadi ishootta' daashe#sooka 9:4 . 5Ishootta, delootaaysho oppaayye, aappada kaffada' kara daladen. Kiristoosi kuli ka so'an ishoottoppa de'e. Isha we piisa qara qapa kan Waaqase haka paraparati eeppisame, Ameen!
6A koddito ma qaaleta Waaqa'e alle' mayshen kideetan. Sanynyeeta Isira'eeli piisa Isira'eeleta a dukaata'en. 7Akimoose mina'ew sanynyeeta Aprihaami piisa, hellaa Aprihaami kideetan. Sede nefo qoota Waaqa Aprihaami' kide, “Sanynyeetaayti piisa Hisaaqinni ke' halaamta#uuma 21:12 .” Malla; 8semmalla, a dakintan dalade' piisa hellaa Waaqa'en, ma xoori a sanynyeeta kodda ka dikama, hellaa a qaalese a kippeeta' patta. 9Qaaletase a kippeeta a Waaqa daashe nefo ikiini, “Anti paraanna essen de'a, Saara ka inna diirta' xaayta#uuma 18:10 .”
10A se patta in koddinin maliiyyiiw, Ripiqa ete Hisaaqi aappase' xanno a kaffa' kela, sallahama hellaa' hitteeyye, 11reexatta Waaqa akkima kodaan koddini in kinnin ka haleettaadin koddino akkisa'e, a hellasene lakki in dalannin ka wa a neeqa isho a paxaara in koonin turanne, 12Waaqa iRipqa' kide, “Qaarta kussitta'e piddama. #uuma 25:23 ” 13Sede nefo akkimase a taafamte ka kiinitto, “Yayqoopin jaalade ka Eesaawi needdade#Mil 1:2-3 .” mina.
14Semmalla, oori maanan kiina? Hela Waaqa qatayma kooni kideeta in ettaninna? Waaqa qatayma kooni kideeta an ettaninno. 15Waaqa iMuuse' kide, “Nama an ishi' diissata heeno'e in diisha ka nama an suraysatta heeno suraysada#sooka 33:19 .” 16Semmalla reexatta a Waaqa, diissata a Waaqatinni teyanni diisheey, heena nama isho koda namatin opa teyni in caan. 17Seminanne qoota nuqusa Kipsiti desa mataafa qulqulloota oppa'e qaaleta a kiinitto, “Ken hupniyyo akkissa'e ka maxxiyyo akka piita piisa qara upnaysamo' koda mallan ke nuqusumshe#sooka 9:16 ;” taafame. 18Semmalla Waaqa nama ishi' diissata heeno'e, idiinni ka nama a kamtoollayta koda heeno kamtoollayta' kooni.
Miira Waaqa isho diissataadi
19Semmalla, takka punu i''ana kaassatta ka kiita “Heenna Waaqa dawreeta nama takka' nefo ettaninni in cooy, isha' maana'e haka ammati ino qootinni?” 20Atti namo! Waaqa oli shiisha'e, mapteeta maana'e' qapta? Hela okkota i'aappa isheetta kode' kiini, “Maana'e asse ana koote#Issa 29:16; 45:9?” 21Hela aappa okkotowwa koono, dooqeta takkoppaayyeew okta takka koda ulfeenati koda'e ka takka koda kuyyaata piisati koda'e mapteeta in qapo?
22A takka punu Waaqa miiraadi akkissa ka hupnaadi sookissa fade ka mehaddasene a miira pateetta' harmisame' kela a kuttati duupade maana' upta? 23Wa malla asse kode nefo, mehaddasene a diissata a turan ulfeena' harmisheeti kuttuma ulfeenaadi akkissa malla. 24Ka ino mehaddasene' xaadi a diissatta Yihutaata pattoppa in koddinini maliiyyi, a Yihutaata in koddinin kuli oppa hale. 25Sede nefo akkima xuumampaytase Hoose' kide,
“A samaytiyyo in koddinini'in ‘Samaytiyyo’ kida ka hala;
ka a in jaalatammini ‘A jaalatame’ kida ka hala#Hoose 2:23 .
26Ishootta ka porase a oppa samaytiyyon ishootta' kidamte oppa'e,
‘hellaa a caattampayta Waaqa’ kidaman ka halaaman#Hoose 1:10 .” mina.
27Qoota Isira'eeletati desa, Issayyaasi kuli ka nessaadi kuttishe ka kide, “Lekuma hellaa Isira'eeli kadi punu hinkaajjeta daka kela' pahan nefooyye, a ishoottoppa paha shakkayaaw#Issa 10:22-23 . 28Poqalla a in jarrin mali jarjartan piita qara' farata.” 29Akkimoose mina'ew, Issayyaasi' turanne haasawadeew ka kide, “Kati Waaqa xela moonta sanynyeeta ino'en hattinnin kiiteeyye, helati akka katama Sotoomi isho a Kamoora mina'en panni heenne. #Issa 1:9 ”
30Semmalla oori maanan kiina? Orrase Yihutaata in koddinin a hanqeellumaan in kallaannini hanqeelluma teye; hanqeellumoosen nefo, hanqeellumasene amanteetan teyanna. 31Ma xoori Isira'eeletase seerase hanqeelluma qeennon kallaatte, qoota seerase tooytaatta in ettaninnin malla, hanqeelluma in teyne. 32Kati kiinaane maana malla hanqeelluma in teyniniiyyi? Qoota ishootta hanqeellumasene amanteetan in faanin ka kodaan teya faden malla. Semmalla daka a orra kehaytinno qara kehaden. 33Sede nefo akkimase a taafamte ka kiinitto,
“Tin anti, daka orra kehaytinnon Siyyooni' xaaya.
Dakase' nefo, shila orra kehaytinno ka kanno.
A isha amanno xoori, in jeero.”
Mina'e asse koddite#Issa 28:16 .
လက်ရှိရွေးချယ်ထားမှု
Roomi 9: MaQu
အရောင်မှတ်ချက်
ကူးယူ
နှိုင်းယှဉ်
မျှဝေရန်
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ