Roomi 16
16
Nakayta
1Feepe akkiman enentinno a kiristaana a amanamte, a tikase a kiristaana katama Kinkiriya kara kitto karaayye koda koonitto, koddite akka upnaattane'en faani. 2Isheetta' qoota ana isho orra pila' lekayta qaarqaarte malla, akka hellaa a kiristaana' xaykitta' teyyatta ishootta parpaaccisnitto mina'e, akka maxxa Poqallaatin isheetta teyyattan ka wa isheetta parpaaccisna piisan isheetta qaarqaartanen atara ishina' kiini.
3Isasene ana olli koda Yesuusi Kiristoosi koona Prisqilla isho Aqilla'e nakaytiyyo lela#koda 18:2 . 4Ishootta paakkiyyo oppa' toota kuli'i harmisaden, seminan anka awta piisa ishootta kalataysanni; umma ana pattan ma, tikka a kiristaana a orra Yihutaata in koddinin oppa amaneeti kuli ishootta kalataysanni. 5Ka hellaasene a kiristaana tikaaysho' karopa qinseeta ollopa anna, kuli nakaytiyyo lela.
Ka Eebbenetoosise an jaalanno piita Issiya kara paayyota Kiristoosi amane, nakaytiyyo lela. 6Ka maariyaami se a kuttati ishin malla yaalte'e, nakaytiyyo lela. 7Isasene erkamampayaappa upnaatame ka ana olli hidame, daltayaasene xayyo Andiroqoosi isho Yuuniyaasi#16:7 “yuuniyaasi” mataaffa a ollopa marrama ademo ikiini “yuuliya” nakaytiyyo lela. Ishootta Kiristoosi amana'e i'ana' qatten.
8Ampiliyatoosise an Poqallaan jaalanno'e nakaytiyyo lela. 9Isase ino olli koda Kiristoosi koono Urpanoosi isho Istakuusise an jaalanno kuli nakaytiyyo lela. 10Abiliisise amanteetase a Kiristoosin qapon ekkaysatamte, ikka ishi' maakkumamte'e, nakaytiyyo lela. Ka toola Aristopuloosi kuli nakaytiyyo lela. 11Ka Herodiyooni Yihutittase daltaytiyyo kodde'e, nakaytiyyo lela. Ka toola Naarsisi oppaayye a Poqalla amaneeti nakaytiyyo lela.
12Iskattase Poqallaan co Tirufaayna isho Tirofoossa isasene a kuttati yaallaati nakaytiyyo lela ka Persiisise an jaalanno akata Poqalla Yaallitto'e nakaytiyyo lela. 13Ka Ruufosise Poqalla' koda kodeetan a kuttati upnaysame'e, nakaytiyyo lela. Ka aayyasene xaaysho, a innaadi mina ana jaalannitto kuli nakaytiyyo lela#Maari 15:21 . 14Ka a Sinkirtoosi ka Filekooni ka Hermeesi ka Paatiropaasi ka Hermaasi isho hellaa Kiristaana a ishootta olli caati nakaytiyyo lela. 15Ka Filolokoosi ka Yuuliya ka Neeriya isho enenta opa neeriya kuli nakaytiyyo lela. Ka assew
Olumpaasi isho hellaa Kiristaana a ishootta olli ca piisa nakaytiyyo lela. 16Ka dinkitta a qulqullaawen oli qara nakayta qeeda. Tikka kiristaana a Kiristoosi piisa ishina nakayta kiini.
Dehaamta a pirampira
17Hellaanno a kiristaanatiiyyi! Orra kollissase a kollatten toorro ka otantaayshin oppa' rakkoota qeenno ka ishin oppa qoonno kapa issi tooytaada ka ishootta kapa sekaada. 18Orra asse paho xajeeltaaysho kamma aananni diisheey, Poqallaanno Kiristoosi kela koda kooni in caan; ka afaa nukulla isho neyneyaanne tajjana sassapanni.
19Sede a otootase a fayyaati a ajajamma kodditen qoota orra piisa tura upnaatamte malla, kadi punu xasa ana' dakaannaayye, akka wa paxaarati ookka kodditan ka wa neeqati a dapa in qapnini kodditane in faani. 20Oton asse' koonittaneeyye, Waaqase a nakayta eennoow seetana loqqaassin kela xata yooqa.
Daassata a Poqallaanno a Yesuusi Kiristoosi a ishin olli caatto.
21Timotoosise an ollin koda koono nakayta ishina' kiini. Yihutaatase, daltayaayyo koddite Luqiiyoosi ka Iyyaasooni isho Soosibaatiroosi kuli nakayta ishina kiini#koda 16:1 .
22Anti Tertiyoosi a erkanoosen ishina' taafe kuli Poqallaan nakaytan ishina' kiini.
23Kaayoosise ana isho tikka kiristaana piisa tikaadippa teyyade kuli nakayta ishina' kiini. Eraastoosise tika meeha a katama' qara saarummo isho innasene xanno a kiristaana Qo'astroosi kuli nakayta ishina' kiini#koda 19:29; Qoro 1ta 1:14; Timo 2ta 4:20 .
24Daassata a Poqallaanno a Yesuusi Kiristoosi, a ishin piisa olli caatto. #16:24 dikoose kunnda lakki afur mataaffasene ollopa marramma a xatta qara in kitto
Qinseeta kalata
25Otootase a fayya an anti torrinonne ka juuttose a dukaata a xattati paayyatte ka dekatte ka amma sookte minanne ka erkanasene qoota Yesuusi Kiristoosi desa lelammaatinni, isha amanteetaayshinan ishin qa'atissa i'ettansha, 26Ammaa xoori dukaatase isookte; ajaja a Waaqase a paraparatinni akka orra piisa amano ka ishi ajajamo'e, mataaffa a xuumampaya qudanne lekna piisa akka upnaado'e, ikodamte.
27Takkaytase a Waaqa a isha patta ookuma qapo'e, Yesuusi Kiristoosi qudanne haka paraparati kalata a isha kayo! Ameen.
လက်ရှိရွေးချယ်ထားမှု
Roomi 16: MaQu
အရောင်မှတ်ချက်
ကူးယူ
နှိုင်းယှဉ်
မျှဝေရန်
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ