Amatayo 4
4
Kulengekwa kwa Ayesu
Amaluko 1:12-13; Aluka 4:1-13
1Ngapena Mboomo jwa Annoongo akaalongolea Ayesu mpaka palulemba aleengekwe na Lichetani. 2Ayesu akatabha machobha makomi ncheche muhi na kilo pangali kulyee choha chela, akajemeka kubhinwa na njala. 3Bahi, jwakuapembelea akahikila na kwaalobholela, “Handa mwenga nga mwana bha Annoongo mugalobholele maganga haga gabhee nkate.”
4Ayesu akaajangula, “Jijaandikwe, ‘Mundu ngatama kwa nkate tu, ila kwa malobhe gagalobholekwa na Annoongo.’”
5Ngapena jwakuapembelea akaapetula Ayesu mpaka ku Chilambo cha Yelusalemu, Chilambo cha Annoongo, akaabheka nnani kundepela kunnala gwa Nyuumba ja Annoongo, 6akaalobholela, “Handa mwe nga mwana jwa Annoongo nchigwie pahi. Kwa kubhee jijaandikwe,
‘Annoongo apakwaatuma antumichi bhabhe ligongo lya mwenga,
bhapakumpetula mmabhoko gabhenji,
nkoto kobhanduka paliganga.’”
7Ayesu akaajangula, “Jijaandikwe kabhele, ‘Nkoto kwaalenga Hangwana, Annoongo bhinu.’”
8Ngapena jwakumpembelea akaatola Ayesu mpaka kunani kundepela kulitombi litandamao na kwaalangia hilebhe yoha ya pachilambo na goha gakubhajila pamiho. 9Jwakupembelea akaalobholela Ayesu, “Heye yoha imuilola mbakumpekeha handa mpakutindibhala majugwa na kunjalila nenga.”
10Penapo Ayesu akaajangula, “Nnyahule mwe jwakupembelea! Jijaandikwe, ‘Mpakwaachalila Hangwana Annoongo bhinu na kwaatumikila jonojwe jikajabhe.’”
11Bahi, jwakupembelea akaaleka Ayesu, akaatumichi bha kunani kwa Annoongo bhakahikanga, na kwaatumikila.
Ayesu bhatendakujemeka mahengo gabhe ku Galilaya
Amaluko 1:14-15; Aluka 4:14-15
12Ayesu pabhakajoha yakubhee Ayohana atabhwitwe mu nyuumba jakutabhila bhandu akajaula kuchilambo cha Galilaya. 13Akabhoka kuchilambo cha ku Nazaleti na kujaula kutama kuchilambo cha ku Kafalanaumu, chilambo chichibhile kubhandikila na bahali ja Genezaleti, mumpaka gwa chilambo cha ku Zabuloni na chilambo cha ku Nafutali, akatama konokwe. 14Akatenda henela ili gakwele malobhe gabhakalobhola Aisaya, alondohi bha Annoongo, kubhee,
15“Chilambo cha ku Zabuloni na chilambo cha ku Nafutali,
mu ndela ja kujaula ku bahali, kuntundu ja loochi lwa Yoludani,
na Galilaya kubhatamanga bhandu bhanga Bhayahudi!
16Bhandu bhabhatamitinge mulubhendu bhaluweni lumuli lwene.
Na bhenaangota bhandu bhabhatamanga pakujogoa muno,
nhana gutekwaamulikila!”
17Kubhoka gono muda Ayesu akajemeka kutangacha Lilobhe lya Annoongo abhi kulobhola, “Nnekange mabohu ginu, kwa kubhee Umwenye gwa kulihunde gutekubhandikila!”
Ayesu atendakwakema akaakoka homba ncheche
Amaluko 1:16-20; Aluka 5:1-11
18Ayesu paakibha atenda kujenda nngulugula ja litanda lya ku Galilaya, bhakaabhona akaanung'una bhabhele akaakoka, Asimoni jwakemitwa Apetulo, na Aandulea anung'una bhabhe. Bhabhikoka homba kwa hipelele mu litanda. 19Ayesu akaalobholelanga, “Ngagulange, na nenga mbakuntendanga mmangange bha kwaletanga bhandu kwa Annoongo.” 20Popopo bhakalekanga mapelele gabhenji na kwaakagula Ayesu. 21Pabhakajenda nnongi kachoko, bhakaabhonanga akaanung'una bhangi bhabhele, Ayakobo na Ayohana, bhaana bha Azebedayo. Bhenabho bhakibhanga mu ntumbwi pamo na atati bhabhenji Azebedayo, bhabhikuhalakihanga mapelele gabhenji. Bahi, Ayesu bhakaakemanga, 22na bhenaangota bhakagulekanga ntumbwi pamo na atati bhabhe, bhakaakagula Ayesu.
Ayesu bhatenda kwaajigana bhandu na kwalamihanga akaatamwa
Aluka 6:17-19
23Ayesu akajenda koha muchilambo cha ku Galilaya akabhajigananga bhandu mu Nyuumba ya konganilanga Bhayahudi na kutangacha Ngani Jammbone kwa ngani ja umwenye gwa Annoongo. Akaalamihanga bhandu itamwa yabhenji yoha hiibhakibha nayo. 24Ngani jabhenji jikajohanikiha koha kuchilambo cha Silia. Akaatamwa bhoa bhabhabhilinge na itamwa ya kila namuna na bhenibhala bhabhalaganga, bhandu bhabhabhilinge na mahoka, akaatamwa chiinduindu na akanangwabha, bhakaapelekanga kwa Ayesu, na bhenabho bhakaalamihanga bhoa. 25Mabhoga makolongwa ga bhandu kubhoka kuchilambo cha ku Galilaya, kubhoka ku Dekapoli, ku chilambo cha Yelusalemu na kubhoka kuchilambo cha Yudea na kubhoka kuntundu ja loochi lwa Yoludani bhakakaagula.
လက်ရှိရွေးချယ်ထားမှု
Amatayo 4: NTNHBL
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
The New Testament in Ndondehamba Language ©The Word for the World International and Ndondehamba Language Translation, All rights reserved.
Amatayo 4
4
Kulengekwa kwa Ayesu
Amaluko 1:12-13; Aluka 4:1-13
1Ngapena Mboomo jwa Annoongo akaalongolea Ayesu mpaka palulemba aleengekwe na Lichetani. 2Ayesu akatabha machobha makomi ncheche muhi na kilo pangali kulyee choha chela, akajemeka kubhinwa na njala. 3Bahi, jwakuapembelea akahikila na kwaalobholela, “Handa mwenga nga mwana bha Annoongo mugalobholele maganga haga gabhee nkate.”
4Ayesu akaajangula, “Jijaandikwe, ‘Mundu ngatama kwa nkate tu, ila kwa malobhe gagalobholekwa na Annoongo.’”
5Ngapena jwakuapembelea akaapetula Ayesu mpaka ku Chilambo cha Yelusalemu, Chilambo cha Annoongo, akaabheka nnani kundepela kunnala gwa Nyuumba ja Annoongo, 6akaalobholela, “Handa mwe nga mwana jwa Annoongo nchigwie pahi. Kwa kubhee jijaandikwe,
‘Annoongo apakwaatuma antumichi bhabhe ligongo lya mwenga,
bhapakumpetula mmabhoko gabhenji,
nkoto kobhanduka paliganga.’”
7Ayesu akaajangula, “Jijaandikwe kabhele, ‘Nkoto kwaalenga Hangwana, Annoongo bhinu.’”
8Ngapena jwakumpembelea akaatola Ayesu mpaka kunani kundepela kulitombi litandamao na kwaalangia hilebhe yoha ya pachilambo na goha gakubhajila pamiho. 9Jwakupembelea akaalobholela Ayesu, “Heye yoha imuilola mbakumpekeha handa mpakutindibhala majugwa na kunjalila nenga.”
10Penapo Ayesu akaajangula, “Nnyahule mwe jwakupembelea! Jijaandikwe, ‘Mpakwaachalila Hangwana Annoongo bhinu na kwaatumikila jonojwe jikajabhe.’”
11Bahi, jwakupembelea akaaleka Ayesu, akaatumichi bha kunani kwa Annoongo bhakahikanga, na kwaatumikila.
Ayesu bhatendakujemeka mahengo gabhe ku Galilaya
Amaluko 1:14-15; Aluka 4:14-15
12Ayesu pabhakajoha yakubhee Ayohana atabhwitwe mu nyuumba jakutabhila bhandu akajaula kuchilambo cha Galilaya. 13Akabhoka kuchilambo cha ku Nazaleti na kujaula kutama kuchilambo cha ku Kafalanaumu, chilambo chichibhile kubhandikila na bahali ja Genezaleti, mumpaka gwa chilambo cha ku Zabuloni na chilambo cha ku Nafutali, akatama konokwe. 14Akatenda henela ili gakwele malobhe gabhakalobhola Aisaya, alondohi bha Annoongo, kubhee,
15“Chilambo cha ku Zabuloni na chilambo cha ku Nafutali,
mu ndela ja kujaula ku bahali, kuntundu ja loochi lwa Yoludani,
na Galilaya kubhatamanga bhandu bhanga Bhayahudi!
16Bhandu bhabhatamitinge mulubhendu bhaluweni lumuli lwene.
Na bhenaangota bhandu bhabhatamanga pakujogoa muno,
nhana gutekwaamulikila!”
17Kubhoka gono muda Ayesu akajemeka kutangacha Lilobhe lya Annoongo abhi kulobhola, “Nnekange mabohu ginu, kwa kubhee Umwenye gwa kulihunde gutekubhandikila!”
Ayesu atendakwakema akaakoka homba ncheche
Amaluko 1:16-20; Aluka 5:1-11
18Ayesu paakibha atenda kujenda nngulugula ja litanda lya ku Galilaya, bhakaabhona akaanung'una bhabhele akaakoka, Asimoni jwakemitwa Apetulo, na Aandulea anung'una bhabhe. Bhabhikoka homba kwa hipelele mu litanda. 19Ayesu akaalobholelanga, “Ngagulange, na nenga mbakuntendanga mmangange bha kwaletanga bhandu kwa Annoongo.” 20Popopo bhakalekanga mapelele gabhenji na kwaakagula Ayesu. 21Pabhakajenda nnongi kachoko, bhakaabhonanga akaanung'una bhangi bhabhele, Ayakobo na Ayohana, bhaana bha Azebedayo. Bhenabho bhakibhanga mu ntumbwi pamo na atati bhabhenji Azebedayo, bhabhikuhalakihanga mapelele gabhenji. Bahi, Ayesu bhakaakemanga, 22na bhenaangota bhakagulekanga ntumbwi pamo na atati bhabhe, bhakaakagula Ayesu.
Ayesu bhatenda kwaajigana bhandu na kwalamihanga akaatamwa
Aluka 6:17-19
23Ayesu akajenda koha muchilambo cha ku Galilaya akabhajigananga bhandu mu Nyuumba ya konganilanga Bhayahudi na kutangacha Ngani Jammbone kwa ngani ja umwenye gwa Annoongo. Akaalamihanga bhandu itamwa yabhenji yoha hiibhakibha nayo. 24Ngani jabhenji jikajohanikiha koha kuchilambo cha Silia. Akaatamwa bhoa bhabhabhilinge na itamwa ya kila namuna na bhenibhala bhabhalaganga, bhandu bhabhabhilinge na mahoka, akaatamwa chiinduindu na akanangwabha, bhakaapelekanga kwa Ayesu, na bhenabho bhakaalamihanga bhoa. 25Mabhoga makolongwa ga bhandu kubhoka kuchilambo cha ku Galilaya, kubhoka ku Dekapoli, ku chilambo cha Yelusalemu na kubhoka kuchilambo cha Yudea na kubhoka kuntundu ja loochi lwa Yoludani bhakakaagula.
လက်ရှိရွေးချယ်ထားမှု
:
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
The New Testament in Ndondehamba Language ©The Word for the World International and Ndondehamba Language Translation, All rights reserved.