Peragenebesi 12
12
Allah eiyagai di obotut yu obotut loksogo tagonobogu legesa wene
1Asogo togu legesa eria hegit e, ap ’gain onuk logo a’ge Herodes en Allah eiyagai a’ge logon wiagabenebiogoluk tegei. 2Asogo tegeitik, at Yohanes ue Yakobus woruagoluk osi mo’gulentesimu ’garok pam ebe modogat werigisa. 3Asogo werigisema, at Herodes ogola en e,
“An asogo taga legi ai pam, is ap Yahudi a’ge onogola enagai modok a’bik hegesa o,” oluk, pobuk Petrus e’gik herle woruagoluk osi mo’gulentesimu, seni roti periso erlak a’ge no’gukhwe re, at e’gik herle werigisa. 4#Kel. 12:1-27Asogo werigisarik e, o aphwami ene’gik herle wusogo onobogumu eba pei legesa. Pei legesarik e, ap tentara a’ge enebe 16 en welat e, naduk enebe ugan en tenakho welat, pobuk nin enebe ugan en tenakho welat, togu lemagoluk yo’go onoboluk e, at ’gain Herodes ogola en e, disogo epesi,
“Seni onuk Paskah, nul a’ge ano arat noluk e, Petrus wik-wok aphwami enilem wene ebam poluk woruok en, e’gik herle weragat welemak o,” oluk ogola epesi. 5At Petrus e’gik herle wusogo ’gwelakpoluk oruakhwe re, is Allah eiyagai en se’banat ebaget mo u erlakma en, hwedik-hwadigat enedemu enat modok ogu legesa.
Allah en Petrus e’gik herle hebilogo lebikpesi wene
6Se’ban asogo ogukhwe re, at ’gain Herodes en hubet ’gela’ge Petrus ebe wik-wok aphwami ene’gik pam paiogoluk ede epesirik, owan oruakhwe re, o ai erlige hup, ap tentara a’ge ebano, is enebe pema ’godukmu ’gagalak oruakhwe, enebe ’biren mesik Petrus e’gik pema-pema herle wusogo nogo osokhwe re, is abel pema-pema welat herle ologun ene’gik pam erlilogo welegesa. 7Asogo oruakma re, malaikat nonue ’gain Onuk Logo a’ge en yo’go ’belagonobou wago a’ge ebano mesik ’ga en ’gela’geat eba inagoam e, o holu ogorlitakma ebano modok atia aga. Asogo atia agama, at malaikat ano en e, Petrus elaluk emagoluk e’gik en abel akhit dunghasulat, disogo mo’gulesi.
“Perlene inemen,” oluk mo’gulesimu inagoam e, ’besieme’gen ano e’gik pam en ’goboksogo ’begei. 8’Begeimu re, at malaikat ano en e, disogo mo’gulesi,
“’Bagaluk ’buktagalat, hoyuk sum ’buktagalat, tin o,” oluk mo’gulesi. Asogo mo’gulosoam ’buktegeimu re, at malaikat ano en e,
“Sum o’borl o’gwe a’ge ’buksogo re, ne’berlik suk o,” oluk mo’gulesimu, 9e’berligat libaga. Libagalat e, at malaikat ano en demat tegei a’geat de, at Petrus ede nalagama welat e,
“Nabi hasu legi hwi a,” oluk ede epesi. 10Ap tentara a’ge enebe ogola o’borlma ’gagalak welegesa a’ge ebano oruakhwe, eneragam o’gwe libegesarik e, ’goduk edip akhit o selimu lebagaimu eba ebe ’besieme’gen pam tak o’gwe libomogoluk tugumu re, ’goduk omuat huragama libegesa. Libegesarik ebela lok o’gwe lagalat, at malaikat ano Petrus ukpoluk ’ga laga ’gela’geat nalaga.
11Nalagama, at Petrus ede e’gat agarik e, ogola en e, disogo epesi,
“I. At ’gain Herodes anni pam tenniarok oruakma, is aphwami Yahudi a’ge ’berlek en e,
Disogo tua o, oluk nobok ’balugukhweat, malaikat nonue ’gain Onuk Logo a’ge en demat yo’go ’belakpou wagama herle hebilnebegei hegi,” oluk pobi tegei. 12Asogo pobirak poluk e, ap onuk Yohanes ogulat, Markus ogulat, ogwi a’ge ai ia hwe Maria owi pam eba aphwami enebe esanat odoktigisarik e, se’ban ogumu laga. 13Lagarik e, ’goduk pam e’gik ’bak-’bakhasuam, is ebano en e,
“Sa en ’bak-’bakhasu,” oluk hwele eneragam a’ge mesik onuk Rode ai hau waga. 14Il hau wagarik, Petrus iak enak a’ge pobirak poluk, ogola agai en, ’goduk hutho erlakma enat ukpoluk pungtak ’gwegeitik e,
“Petrus ’godukmu wagarik oruak o,” oluk mo’gulentesi. 15Asogo mo’gulentesimu, is en e,
“Eige. Hwele yu, hede ’balaga hegi,” oluk mo’gulegisema, at en e,
“Erlak o. Demat o,” oluk iak ningsogoat egei. Asogo egeimu, is en e,
“Holuk e, ai malaikat Allah en yo’go ’belagonobou wago a’ge ebano, mesik Petrus paget ’belakpou waga a’ge hwi a,” oluk egesa. 16Asogo ogukhwe, at Petrus ebe ’godukmu welat, ’goduk ’bak-’bakhasu modok mo egei. ’Bak-’bakhasu modok mo egeimu re, is ebano en ’goduk husogo yethai legesa ’gal e, Petrus oruakma hegesarik erliktigisa. 17Erliktugumu, at en e,
“Heniak ogup o,” oluk e’gik sebelhesi. E’gik sebelholuk e,
“Ne’gik herle werak oruakma, nonue ’gain Onuk Logo a’ge en hebilogo lebiknobou wagama wegi o,” oluk wene ’beli’gogo mo’gulentesi. Asogo mo’gulentesirik,
“Yakobus emin, narilak norokhwi Allah eiyagai logon enemin, wene yu mo’gulentai lu o,” oluk mo’gulontoluk e, at ebe o momu laga.
18Asogo libagama, nogoluk loruk o’gwe hubetsogoat, is ap tentara Petrus ’gagalak welegesa a’ge ebano en e,
“Petrus ano ebe ’ga laga,” oluk eniak logat sagaligisa. 19Eniak asogo sagaligisema re, at ’gain Herodes ano en Petrus ebe horotuagoluk ap logon mo’gulentesimu horotigisa a’ge, ebe erlagat en e, is ap tentara ’gagalak welegesa a’ge ebano enemdema wokholuk e, enebe modok waronobuagoluk osi ado yo’go enebesi. Yo’go enebesimu enebe warenebegisema re, at ’gain Herodes ebe o Yudea en e, o kota Kaisarea orlu agarik welaga.
At ’gain Herodes ebe waraga wene
20O eba welat, is aphwami o Tirus emin, Sidon emin, a’ge paget e, at ’gain Herodes ano olot het a’bik aga. Olot het a’bik agama, is ’berlek enebe la’buksogo en e,
“O nis welegema yema re, so’boru ap ’gain Herodes oruakma re, o’go ’balogo obat wogu legerikmu,” oluk ap onuk Blastus, at Herodes eragam a’ge welat di a’ge yu a’ge at owi pam a’ge tenak welaga a’ge ano e’bek legesarik, is oruak o’gwe emagoluk, at naduk ede ’gagaligisa. At naduk ede ’gagaligisarik e, pobuk Herodes emin la’boluogoluk e’bek ’gwigisarik mo’gulegisa. 21Mo’gulegisema re, at ’gain Herodes en e,
“Agauwa ai pam en la’bolul o,” oluk wene weragenebesi. Wene weragenebesi ano pam hegit agama, at en sum ap ’gaindek ’buktogwi a’ge ’buktegeitik, wene ologun weriselat alo’gwe e delak pam hweriogo welagama huragarik, enesa’go werigoluk wene edip lebikpesi. 22-23Asogo lebikpesirik enesa’go werisoma, is aphwami esan ebano en e,
“Ap yu re, iak aphwami eniak ’gela’ge oso erlak o. At e, we, walhebak welago a’ge iak ’gela’ge oso yo,” oluk erliktigisa. Asogo erliktigisema erianoat malaikat nonue ’gain Onuk Logo a’ge en yo’go ’belagonobou wago a’ge ebano mesik ’bu agarik e,
“At Allah at erliktu erlakma en de, u’gwarek erliktegei ai o,” oluk Herodes ebe weregeimu, wa’go ogola yagaragarik ebe modok waraga.
24Asogo agama re, Allah iagat wiyalegeitik, lok aga. 25Asogo lok agokhwe re, is Barnabas Saulus emin, aphwami Yerusalem a’ge arat lerontoluk e, togolik womogoluk, ap onuk Yohanes ogulat, Markus ogulat, ogu legesa a’ge ano woluk wegesa.
လက်ရှိရွေးချယ်ထားမှု
Peragenebesi 12: Wul
အရောင်မှတ်ချက်
ကူးယူ
နှိုင်းယှဉ်
မျှဝေရန်
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ