Matyu 4
4
Satan Tuba Yesu
(Mak 1:12-13; Luk 4:1-13)
1Baing Urana Aningonoa xai Yesu mahaing long xoliania bu xaungadi yanamidinga#4:1 xaungadi yanamidinga—haruanga li daxanga tela daharua mana Satan. tuba. 2Saha mana angingua laing xaidap yambong 40 disup, baing gesagina. 3Lipu tubaikkama#4:3 Lipu tubaikkama—Yaya baguli mogu Satan namua na baxanga kubolunoa. ma rangua saing harua ba, “Nabu ung Urana Garanoa, bing ubala sianggadi li bu duxugia salanga.”
4Ne Yesu haxuya ba, “Urana Xuanoa harua ba:
“ ‘Lipudi sanga ba daxap walinga mana salanga ing ganina te.
Walinga sibuna ma mana Urana haruangang longgalo dima suxungunia.’#Hanaunaunga (Lo) 8:3 ”
5Baing xaungadi yanamidinga xai mahaing long sabangga Urana inia Yerusalem saing ta mahaing etua sibuna Urana Numang urongania. 6Harua na ba, “Nabu ung Urana Garanoa, bing uhixi mari la li. Namua na Urana Xuanoa harua ba:
“ ‘Bagula tabina uleginamdi maung bu duwasa xai maung.
Bagula ditiung rimadingia
nam utua kima siangia.’#Olaidi (Buk Song) 91:11-12 ”
7Yesu haxuya ba, “Urana Xuanoa harua xauna ba: ‘Labu uta Toxoratamona, Urana ungia, tubaigiau tai.’#Hanaunaunga (Lo) 6:16 ”
8Baing xaungadi yanamidinga xai mahaing bimbi eta loam tela saing hatanga xaitamoxidi yonggaxiding longgalo xaung haringingadingdi na. 9Baing harua na ba, “Bagula ngasina axadi li naung bu uwa etua manadi, nabu ugung kim tuxundi saing usabu manga.”
10Baing Yesu harua na ba, “Satan, usauya! Namua na Urana Xuanoa harua ba:
“ ‘Usabu mana Toxoratamona, Urana ungia,
saing utuxu ing oxatanoa ing ganina.’#Hanaunaunga (Lo) 6:13 ”
11Baing xaungadi yanamidinga sauya, saing Urana uleginamdi dima dahauli Yesu.
Yesu Ungguti Oxatanoa
12Bungina Yesu lungu haruanga ba dita Yon salak yabania, yunga probinsia Yudia saing ila titia Galili. 13Muga ila longga Nasaret, baing yunga saing ila long sabangga Kaperneam, wa Lang Gamolingana Galili rubinia mana titiadi Sebulan xaung Naptali. 14Alali libu haruanga aningona Urana lipuxing suxunguxunguama Aisaya bung ba:
15“Mana titia Sebulan xaung titia Naptali,
lang gamolingang rubinia, Langga Yodan hataina—
mana titia Galili Yuda Teguam xumana duwa mana ba—
16lipuadi ba dirung labiania
dibagu nagung sabanga saxaxangia daxangua.
Baing mana adi duwa titia maxuwanga matiama xapdi,
nagung tela saxaxangiadi.”#Aisaya (Aisaia) 9:1-2
17Mana bungina baguba saing ila, Yesu ungguti ba baxanga ba, “Axugia hatumingaimdi, namua na Long Xaiya Yonggaxinoa wa haxek ba.”
Lipuadi Yesu Wagidi Muga
(Mak 1:16-20; Luk 5:2-11; Yon 1:35-42)
18Xaidap tela Yesu haxa Lang Gamolingana Galili rubinia, baing bagu neng sabangandi—Saimon duxu ba Pita gabu kixinginoa Andru. Tang diting amagua lang gamolingania, namua na dingtang lipu xuningamdi. 19Yesu harua nadi ba, “Tang gama anaxu manga, saing bagula ngalibuang asok lipu xuningam mana lipudi.”#4:19 lipu xuningam mana lipudi—Yesu uxudi bila ba namua na bagula ditubatuba mana kubolua daxai lipudi dima rangua Yesu bu dinaxu mana xauna. 20Baing hata sibuna li tang diyunga amagadingdi saing dinaxu mana.
21Haxa monga mala baing bagu neng sabangang teladi—Sebedi garanoa Yems gabu kixinginoa Yon. Tang duwa maluxuʼm waga tela rangua tang tibuding Sebedi, dahamaringia amagadingdi. Yesu wagi mana dingtang dima xauna. 22Baing hata sibuna li tang diyunga wagadinga xaung tibuding, saing tang dinaxu mana.
Yesu Waxata Galili
23Yesu haxa mauli maluxu titia Galili, tubatuba maluxuʼm sabungading numandi xaung long longgalo baxanga ulek xaiyua mana Yonggawa. Baing hamaringia businga xangxang longgalo liwe mana lipudi. 24Naxuyanganoa ila mana titia Siria hataing longgalo, baing lipudi dahau lipu longgalo businga xangxana daxapdi, adi salak sabanga xapdi, adi xaungadi duwa manadi, adi asaxa garanoa haing manadi xaung adi rimading kiding dahamati ma rangua, saing hamaringiadi. 25Buranga sabangadi mana titia Galili, titia Dekapolis,#4:25 Dekapolis—namuxina ba long 10. long sabangga Yerusalem, titia Yudia xaung Langga Yodan hataina, ding disu mana.
လက်ရှိရွေးချယ်ထားမှု
Matyu 4: met
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2018, Wycliffe Bible Translators, Inc. All rights reserved.