တောလည်ရာကျမ်း 35

လေဝိအမျိုးအတွက်မြို့များ

1တစ်ဖန် ဂျေရိခေါမြို့တစ်ဖက်၊ ဂျော်ဒန်မြစ်အနီး၊ မောဘလွင်ပြင်၌ ထာဝရဘုရားက မောရှေအား 2“အစ္စရေးအမျိုးသားတို့သည် မိမိတို့ပိုင်သောအမွေမြေထဲမှ လေဝိအမျိုးတို့အား နေထိုင်စရာမြို့တို့ကိုလည်းကောင်း၊ ထိုမြို့တို့၏ပတ်ပတ်လည်ရှိ စားကျက်မြေတို့ကိုလည်းကောင်း ပေးရမည်ဟု ဆင့်ဆိုလော့။ 3ထိုမြို့တို့သည် လေဝိအမျိုးတို့အတွက် နေထိုင်စရာဖြစ်ပြီး စားကျက်မြေတို့သည်လည်း သူတို့၏သိုးနွားတိရစ္ဆာန်အားလုံးတို့အတွက် ဖြစ်ရမည်။ 4လေဝိအမျိုးတို့အား သင်တို့ပေးရမည့်မြို့၏စားကျက်မြေသည် မြို့ရိုးအပြင်ဘက် အတောင်တစ်ထောင်#35:4 “18000 လက်မ သို့မဟုတ် 45000 စင်တီမီတာ”။ပတ်ပတ်လည်ရှိရမည်။ 5သင်တို့သည် မြို့ကိုအလယ်ဗဟိုထား၍ မြို့ပြင် အရှေ့ဘက်ခြမ်းကို အတောင်နှစ်ထောင်#35:5 “36000 လက်မ သို့မဟုတ် 90000 စင်တီမီတာ”။၊ တောင်ဘက်ခြမ်းကို အတောင်နှစ်ထောင်၊ အနောက်ဘက်ခြမ်းကို အတောင်နှစ်ထောင်၊ မြောက်ဘက်ခြမ်းကို အတောင်နှစ်ထောင် တိုင်းတာရမည်။ ဤမြေသည် လေဝိအမျိုးတို့အတွက် မြို့၏စားကျက်မြေဖြစ်ရမည်။

6လေဝိအမျိုးတို့အား သင်တို့ပေးရမည့်မြို့များမှာ လူသတ်မိသောသူ ထွက်ပြေးပြီး ခိုလှုံနိုင်သောမြို့ခြောက်မြို့အပြင် မြို့လေးဆယ့်နှစ်မြို့ ပေးရမည်။ 7လေဝိအမျိုးတို့အား သင်တို့ပေးရမည့်မြို့စုစုပေါင်းမှာ လေးဆယ့်ရှစ်မြို့နှင့် ထိုမြို့တို့၏စားကျက်မြေများ ဖြစ်၏။ 8သင်တို့ပေးသောမြို့များသည် အစ္စရေးအမျိုးသားတို့ပိုင်ဆိုင်ရာမြေထဲမှ ဖြစ်ရမည်။ ပိုင်ဆိုင်ရာမြေများလျှင် များသည့်အလျောက်၊ နည်းလျှင် နည်းသည့်အလျောက် အသီးသီးရရှိသောအမွေပမာဏနှင့်အညီ လေဝိအမျိုးတို့အား မြို့များကို ပေးရမည်”ဟု မိန့်တော်မူ၏။

ခိုလှုံရာမြို့များ

9တစ်ဖန် ထာဝရဘုရားက မောရှေအား

10“အစ္စရေးအမျိုးသားတို့အား ဆင့်ဆိုလော့။ သင်တို့သည် ဂျော်ဒန်မြစ်ကို ကူး၍ ခါနာန်ပြည်သို့ရောက်သောအခါ 11မရည်ရွယ်ဘဲလူကိုသတ်မိသောလူသတ်သမားတို့ ထွက်ပြေးပြီး ခိုလှုံနိုင်သောမြို့တို့ကို သင်တို့ ရွေးချယ်ရမည်။ 12လူသတ်မိသောသူသည် လူထုရှေ့၌ရပ်၍တရားစီရင်ခြင်းမခံရမီ အသတ်မခံရမည့်အကြောင်း လက်စားချေသူ၏လက်မှလွတ်မြောက်ရန်အတွက် ထိုမြို့တို့သည် ခိုလှုံနိုင်သောမြို့ဖြစ်ရမည်။ 13သင်တို့ပေးသောမြို့တို့တွင် မြို့ခြောက်မြို့သည် သင်တို့ ခိုလှုံရာမြို့ဖြစ်ရမည်။ 14ဂျော်ဒန်မြစ်တစ်ဖက်၌ သင်တို့ပေးသောမြို့သုံးမြို့၊ ခါနာန်ပြည်၌ သင်တို့ပေးသောမြို့သုံးမြို့သည် ခိုလှုံရာမြို့ဖြစ်ရမည်။ 15ထိုမြို့ခြောက်မြို့သည် အစ္စရေးအမျိုးသားဖြစ်စေ၊ တိုင်းတစ်ပါးသားဖြစ်စေ၊ သူတို့၏ဧည့်သည်ဖြစ်စေ မရည်ရွယ်ဘဲလူသတ်မိသောသူမည်သူမဆို ထွက်ပြေးပြီး သွားရောက်ခိုလှုံနိုင်သောမြို့ဖြစ်ရမည်။

16သံထည်ပစ္စည်းဖြင့် ရိုက်၍လူသေသွားလျှင် ရိုက်သောသူသည် လူသတ်သောသူဖြစ်၏။ လူသတ်သောသူသည် မုချအသတ်ခံရမည်။ 17သေစေနိုင်သောကျောက်တုံးဖြင့် ထု၍လူသေသွားလျှင် ထုသောသူသည် လူသတ်သောသူဖြစ်၏။ လူသတ်သောသူသည် မုချအသတ်ခံရမည်။ 18သေစေနိုင်သောသစ်သားတုတ်ဖြင့် ရိုက်၍လူသေသွားလျှင် ရိုက်သောသူသည် လူသတ်သောသူဖြစ်၏။ လူသတ်သောသူသည် မုချအသတ်ခံရမည်။ 19သွေးကြွေးအတွက်လက်စားချေပေးသောသူသည် လူသတ်သောသူကိုတွေ့လျှင် သူကိုယ်တိုင်သတ်ရမည်။ 20မုန်းတီးစိတ်ကြောင့် လူကိုတွန်းချ၍ဖြစ်စေ၊ ချောင်းမြောင်းလျက် တစ်စုံတစ်ရာဖြင့် လူကိုပစ်၍ဖြစ်စေ ထိုလူသေသွားလျှင်လည်းကောင်း၊ 21ရန်ငြိုးထား၍ လက်သီးနှင့်ထိုးသဖြင့် လူသေသွားလျှင်လည်းကောင်း ထိုသို့ပြုသောသူသည် မုချအသတ်ခံရမည်။ ထိုသူသည် လူသတ်သောသူဖြစ်၏။ သွေးကြွေးအတွက်လက်စားချေပေးသောသူသည် လူသတ်သောသူကို တွေ့လျှင် သတ်ရမည်။

22ရန်ငြိုးမရှိဘဲ လူကိုအမှတ်မထင်တွန်းချမိ၍ဖြစ်စေ၊ မချောင်းမြောင်းဘဲ ပစ္စည်းတစ်ခုခုဖြင့် ပစ်မိ၍ဖြစ်စေ၊ 23မိမိ၏ရန်သူမဟုတ်၊ အန္တရာယ်ပြုရန်လည်းမရည်ရွယ်ဘဲ မမြင်သဖြင့် သေစေနိုင်သောကျောက်တုံးတစ်တုံးတုံးဖြင့်ပစ်မိ၍ဖြစ်စေ ထိုလူသေသွားလျှင် 24လူထုသည် လူသတ်မိသောသူနှင့် သွေးကြွေးအတွက်လက်စားချေပေးသောသူအကြား၌ ဤစီရင်ထုံးဖွဲ့ချက်များအတိုင်း တရားစီရင်ရမည်။ 25လူသတ်မိသောသူကို သွေးကြွေးအတွက်လက်စားချေပေးသောသူလက်မှကယ်နုတ်ရမည်။ သူထွက်ပြေးပြီး သွားရောက်ခိုလှုံခဲ့သောမြို့သို့ သူ့ကိုပြန်ပို့ရမည်။ သန့်ရှင်းသောဆီဖြင့်ဘိသိက်ခံယဇ်ပုရောဟိတ်မင်း ကွယ်လွန်သည့်တိုင်အောင် သူသည် ထိုမြို့၌နေရမည်။

26လူသတ်မိသောသူသည် ထွက်ပြေးပြီး သွားရောက်ခိုလှုံနေသောမြို့၏နယ်နိမိတ်အပြင်ဘက်သို့ ထွက်သွားသဖြင့် 27သွေးကြွေးအတွက်လက်စားချေပေးသောသူသည် သူ့ကို ခိုလှုံရာမြို့၏နယ်နိမိတ်အပြင်ဘက်၌ တွေ့၍ သူ့ကို သတ်လျှင် သွေးကြွေးအတွက်လက်စားချေပေးသောသူ၌ လူကိုသတ်သောအပြစ်မရှိ။ 28သူသည် ယဇ်ပုရောဟိတ်မင်းကွယ်လွန်သည့်တိုင်အောင် ခိုလှုံရာမြို့၌ နေထိုင်ရမည်။ ယဇ်ပုရောဟိတ်မင်းကွယ်လွန်ပြီးမှ မိမိပိုင်ဆိုင်ရာမြေသို့ပြန်လာခွင့်ရှိ၏။ 29ဤသည်ကား သင်တို့နေထိုင်ရာအရပ်ရပ်၌ သင်တို့၏မျိုးဆက်အစဉ်အဆက်အတွက် ပြဋ္ဌာန်းထားသောစီရင်ထုံးဖွဲ့ချက်ဖြစ်၏။

30လူကိုသတ်သော လူသတ်သမားတိုင်း သက်သေ၏ထွက်ဆိုချက်အတိုင်း အသတ်ခံရမည်။ သို့ရာတွင် ထိုသူသည် သက်သေတစ်ဦးတည်း၏ထွက်ဆိုချက်ဖြင့် သေဒဏ်မခံရ။ 31သေဒဏ်ခံထိုက်သည့်အပြစ်ရှိသောလူသတ်သမားသည် မုချအသတ်ခံရမည်ဖြစ်သောကြောင့် သူ၏အသက်အတွက် ရွေးနုတ်စရာအဖိုးအခကို မခံယူရ။ 32ခိုလှုံရာမြို့သို့ထွက်ပြေးသောသူသည် ယဇ်ပုရောဟိတ်မကွယ်လွန်မီ မိမိနေရပ်သို့ ပြန်သွား၍ နေထိုင်နိုင်ရန် သူ့ထံမှ ရွေးနုတ်စရာအဖိုးအခကို မခံယူရ။

33သွေးသည် ပြည်ကို ညစ်ညူးစေသည်ဖြစ်၍ သင်တို့နေထိုင်သောပြည်ကို မညစ်ညူးစေရ။ ပြည်၌ သွန်းသောသွေးအတွက် သွေးသွန်းသောသူ၏သွေးမှတစ်ပါး ထိုပြည်အတွက် အပြစ်ဖြေလွှတ်ခြင်းကိုမပြုနိုင်။ 34ငါထာဝရဘုရားသည် အစ္စရေးအမျိုးသားတို့အလယ်၌ကိန်းဝပ်သည်ဖြစ်၍ ငါကိန်းဝပ်ရာဖြစ်သည့် သင်တို့နေထိုင်သောပြည်ကို မညစ်ညူးစေရ”ဟု မိန့်တော်မူ၏။

လက်ရှိရွေးချယ်ထားမှု

တောလည်ရာကျမ်း 35: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

MYANMAR STANDARD BIBLE©

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။