တောလည်ရာကျမ်း 10

ငွေခရာနှစ်ခု

1တစ်ဖန် ထာဝရဘုရားက မောရှေအား 2“သင့်အတွက် ငွေတံပိုးခရာနှစ်ခုကို ထုလုပ်လော့။ လူထုကိုစုရုံးရာတွင်လည်းကောင်း၊ တပ်စခန်းတို့ ခရီးဆက်ရာတွင်လည်းကောင်း ထိုခရာတို့ကို မှုတ်ရမည်။ 3ခရာတို့ကိုမှုတ်သောအခါ လူထုအပေါင်းတို့သည် တွေ့ဆုံစည်းဝေးရာတဲတော်အဝင်ဝ၊ သင့်ထံ၌ စုဝေးရမည်။ 4ခရာတစ်ခုတည်းကိုသာမှုတ်လျှင် အစ္စရေးအမျိုးသားတို့ထဲမှ လူတစ်ထောင်ကိုအုပ်သောခေါင်းဆောင်တို့သည် သင့်ထံ၌ စုဝေးရမည်။

5အချက်ပေးသံအဖြစ်မှုတ်လျှင် အရှေ့ဘက်၌ စခန်းချနေသောတပ်စခန်းတို့ ခရီးပြုရမည်။ 6အချက်ပေးသံကိုနောက်တစ်ကြိမ်မှုတ်လျှင် တောင်ဘက်၌ စခန်းချနေသောတပ်စခန်းတို့ ခရီးပြုရမည်။ တပ်စခန်းတို့ ခရီးပြုရန် အချက်ပေးသံအဖြစ် ခရာကိုမှုတ်ရမည်။ 7လူအစုအဝေးကို စုရုံးစေလိုလျှင်လည်း မှုတ်ရမည်။ သို့သော် တပ်လှန့်အချက်ပေးသံအဖြစ် မမှုတ်ရ။ 8အာရုန်၏သား ယဇ်ပုရောဟိတ်တို့သည် ထိုတံပိုးခရာတို့ကို မှုတ်ကြရမည်။ ဤသည်ကား သင်တို့၏မျိုးဆက်အစဉ်အဆက် အစဉ်အမြဲလိုက်နာရမည့် ပြဋ္ဌာန်းချက်ဖြစ်၏။

9သင်တို့၏ပြည်၌ သင်တို့ကို ရန်ဖက်ပြုသောရန်သူတို့ကို တိုက်ခိုက်ရန် ချီတက်သွားသောအခါ တံပိုးခရာကိုတပ်လှန့်အချက်ပေးသံအဖြစ် မှုတ်ရမည်။ ထိုအခါ သင်တို့၏ဘုရားသခင် ထာဝရဘုရားသည် သင်တို့ကိုအောက်မေ့တော်မူ၍ ရန်သူ့လက်မှ သင်တို့ကို ကယ်တင်တော်မူမည်။ 10သင်တို့ဝမ်းမြောက်ရာနေ့ဖြစ်သည့် သတ်မှတ်ထားသောပွဲတော်များနေ့၊ လဆန်းနေ့တို့၌ သင်တို့မီးရှို့ရာယဇ်၊ မိတ်သဟာယယဇ်တို့ကို ပူဇော်သောအခါ တံပိုးခရာကိုမှုတ်ရမည်။ သင်တို့၏ဘုရားသခင်ရှေ့တော်၌ သင်တို့အတွက် အောက်မေ့ဖွယ်ရာဖြစ်မည်။ ငါသည် သင်တို့၏ဘုရားသခင်ထာဝရဘုရား ဖြစ်၏”ဟု မိန့်တော်မူ၏။

သိနာတောကန္တာရမှ ပါရန်တောကန္တာရသို့ ခရီးပြုခြင်း

11ဒုတိယနှစ်၊ ဒုတိယလ၊ နှစ်ဆယ်ရက်နေ့တွင် မိုးတိမ်သည် သက်သေခံချက်ထားရာကိန်းဝပ်တော်မူရာတဲတော်အပေါ်မှ ကွာသွားသဖြင့် 12အစ္စရေးအမျိုးသားတို့သည် သိနာတောကန္တာရမှ ခရီးထွက်ခွာလာကြ၏။ မိုးတိမ်သည် ပါရန်တောကန္တာရ၌ ရပ်တန့်လေ၏။ 13မောရှေမှတစ်ဆင့် ထာဝရဘုရားမိန့်တော်မူသည့်အတိုင်း သူတို့ခရီးပြုကြသည်မှာ ပထမအကြိမ်ဖြစ်၏။

14ယုဒ၏သားမြေးတို့သည် မိမိတို့တပ်ဖွဲ့အလိုက် တပ်စခန်းအလံနှင့်တကွ ရှေ့ဆုံးမှ ခရီးပြုကြ၏။ ထိုတပ်ဖွဲ့ကို အမိနဒပ်၏သား နာရှုန် ဦးစီး၏။ 15ဣသခါ၏သားမြေးတို့အမျိုးအနွယ်တပ်ဖွဲ့ကို ဇုအာ၏သား နာသနေလဦးစီး၏။ 16ဇာဗုလုန်၏သားမြေးတို့အမျိုးအနွယ်တပ်ဖွဲ့ကို ဟေလုန်၏သား ဧလျာဘ ဦးစီး၏။ 17ထို့နောက် ကိန်းဝပ်တော်မူရာတဲတော်ကို ဖြုတ်သိမ်းကြပြီး ဂေရရှုန်၏သားမြေး၊ မေရာရိ၏သားမြေးတို့သည် ကိန်းဝပ်တော်မူရာတဲတော်ကို သယ်ဆောင်ကာ ခရီးပြုကြ၏။

18ထို့နောက် ရုဗင်တပ်စခန်းသည် တပ်ဖွဲ့အလိုက် မိမိတို့တပ်စခန်းအလံနှင့်တကွ ခရီးပြုကြ၏။ ထိုတပ်ဖွဲ့ကို ရှေဒုရ၏သား ဧလိဇုရ ဦးစီး၏။ 19ရှိမောင်၏သားမြေးတို့အမျိုးအနွယ်တပ်ဖွဲ့ကို ဇုရိရှဒ္ဒဲ၏သား ရှေလုမျေလ ဦးစီး၏။ 20ဂဒ်၏သားမြေးတို့အမျိုးအနွယ်တပ်ဖွဲ့ကို ဒွေလ၏သား ဧလျာသပ် ဦးစီး၏။ 21ထို့နောက် ကောဟတ်အမျိုးတို့သည် သန့်ရှင်းရာဌာနနှင့်ဆိုင်သောအရာတို့ကို သယ်ဆောင်၍ခရီးပြုကြ၏။ သူတို့မရောက်မီ ကိန်းဝပ်တော်မူရာတဲတော်ကို တည်နှင့်ပြီဖြစ်၏။

22ထို့နောက် ဧဖရိမ်၏သားမြေးတို့သည် မိမိတို့တပ်ဖွဲ့အလိုက် တပ်စခန်းအလံနှင့်တကွ ခရီးပြုကြ၏။ ထိုတပ်ဖွဲ့ကို အမိဟုဒ်၏သား ဧလိရှမာ ဦးစီး၏။ 23မနာရှေ၏သားမြေးတို့အမျိုးအနွယ်တပ်ဖွဲ့ကို ပေဒါဇုရ၏သား ဂါမလျေလ ဦးစီး၏။ 24ဗင်္ယာမိန်၏သားမြေးတို့အမျိုးအနွယ်တပ်ဖွဲ့ကို ဂိဒေါနိ၏သား အဘိဒန် ဦးစီး၏။

25ဒန်၏သားမြေးတို့သည် မိမိတို့တပ်ဖွဲ့အလိုက် တပ်စခန်းအလံနှင့်တကွ တပ်စခန်းအားလုံးကိုအကာအကွယ်အဖြစ် နောက်ဆုံးမှ ခရီးပြုကြ၏။ ထိုတပ်ဖွဲ့ကို အမိရှဒ္ဒဲ၏သား အဟေဇာ ဦးစီး၏။ 26အာရှာသားမြေးတို့၏အမျိုးအနွယ်တပ်ဖွဲ့ကို ဩကရန်၏သား ပါဂျေလ ဦးစီး၏။ 27နဿလိသားမြေးတို့၏အမျိုးအနွယ်တပ်ဖွဲ့ကို ဧနန်၏သား အဟိရ ဦးစီး၏။ 28ဤအစီအစဉ်အတိုင်း အစ္စရေးအမျိုးသားတို့သည် မိမိတို့တပ်ဖွဲ့အလိုက် ခရီးပြုကြ၏။

29မောရှေသည် မိမိယောက္ခမဖြစ်သူ မိဒျန်လူမျိုးရွေလသား ဟောဗပ်အား “ ‘ထိုပြည်ကိုသင်တို့အား ငါပေးမည်’ဟု ထာဝရဘုရားမိန့်တော်မူခဲ့သောအရပ်သို့ အကျွန်ုပ်တို့ခရီးပြုနေကြပါ၏။ ထာဝရဘုရားသည် အစ္စရေးလူမျိုးတို့အား ကောင်းစားစေမည်ဟူသောကတိထားခဲ့သည်ဖြစ်၍ အကျွန်ုပ်တို့နှင့်အတူ လိုက်ခဲ့ပါ။ သင့်ကို ကျေးဇူးပြုပါမည်”ဟု ဆိုလေ၏။

30သို့သော် ဟောဗပ်က “ငါမလိုက်ပါ။ ငါ့ပြည်၊ ငါ့လူမျိုးတို့ရှိရာသို့သာ ငါပြန်သွားမည်”ဟု ဆိုလေ၏။

31မောရှေကလည်း “အကျွန်ုပ်တို့ကိုပစ်မထားပါနှင့်။ အကြောင်းမှာ တောကန္တာရထဲ၌ အကျွန်ုပ်တို့ စခန်းချရမည်ကို သင်သိ၏။ သင်သည် အကျွန်ုပ်တို့အတွက် မျက်စိသဖွယ်ဖြစ်ပါ၏။ 32သင်သည် အကျွန်ုပ်တို့နှင့်အတူလိုက်လျှင် ထာဝရဘုရားက အကျွန်ုပ်တို့အား ကျေးဇူးပြုသည့်ကောင်းသောအရာများဖြင့် အကျွန်ုပ်တို့သည် သင့်အား ကျေးဇူးပြုပါမည်”ဟု ဆိုလေ၏။

33အစ္စရေးအမျိုးသားတို့သည် ထာဝရဘုရား၏တောင်တော်မှ သုံးရက်ခရီးပြုကြ၏။ ထိုသုံးရက်ခရီးတွင် ထာဝရဘုရား၏ပဋိညာဉ်သေတ္တာတော်သည် သူတို့နားနေရာအရပ်ကိုရှာရန် သူတို့၏ရှေ့မှသွားလေ၏။ 34သူတို့သည် တပ်စခန်းမှ ခရီးပြုကြသောအခါ နေ့အချိန်၌ ထာဝရဘုရား၏မိုးတိမ်သည် သူတို့အပေါ်တွင် တည်၏။

35သေတ္တာတော်ခရီးပြုသောအခါ မောရှေက “အို ထာဝရဘုရား၊ ထတော်မူပါ။ ကိုယ်တော်၏ရန်သူတို့သည် ကွဲလွင့်ကြပါစေသော။ ကိုယ်တော်ကိုမုန်းသောသူတို့သည် ကိုယ်တော့်ထံမှ ထွက်ပြေးကြပါစေသော”ဟု လျှောက်ဆို၍

36သေတ္တာတော်ရပ်နားသောအခါ “အို ထာဝရဘုရား၊ အစ္စရေးလူမျိုးအထောင်အသောင်းတို့ထံသို့ ပြန်လာတော်မူပါ” ဟု လျှောက်ဆိုလေ့ရှိ၏။

လက်ရှိရွေးချယ်ထားမှု

တောလည်ရာကျမ်း 10: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

MYANMAR STANDARD BIBLE©

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။