Mateusi 1
OYMNT
1
Jesu rãmõi kõ jeapyry kõ rewarà
(Rukasi 3.23-38)
1[Jesu rekoawerà akusiwa ajupa ky'y. Jesu Kiristu rekoawerà.] Ãwitõ tãmõ Tavi amyry jõvijã wasu e'eay rõmõ karamoe remẽ, a'evo ve Jesu Tavi jeapyrerà rõmõ. Tãmõ Aparão amyry jeapyrerà teve Jesu.
Amovyvytà Jesu rãmõi rerà kõ tapekuwa. 2Kejõ Aparão jeapyrerà rerà kõ:
Aparão ra'yry pè Isaki eu. A'e ra'yry pè Jako eu. Ãmẽ Jako ra'yry mõ pè Jutaa eu. Ijatyray ipe Jako ra'yry kõ. Namovyvypa'ãi ajamã'ẽ. Jutaa kõrijõ tè amovytà.#Jinõ. 21.6; 28.13; 35.23
3Ãmẽ Jutaa ra'yry kõ ojipupewarà kõ tè. Ajawyi mõrijõ erà kõ. Sera eu. Ãmõ pè, Peresi eu. Tamaa eu ijy kõ pè.
Ãmẽ Peresi ra'yry pè Esirõ eu.#Jinõ. 38.29; 46.12 Ãmẽ Esirõ ra'yry pè Rão eu.
4Ãmẽ Rão ra'yry pè Aminatapi eu. Ãmẽ Aminatapi ra'yry pè Naasõ eu. Ãmẽ Naasõ ra'yry pè Saumõ eu.
5Ãmẽ Saumõ ra'yry pè Poasi eu ky'y. A'e y rerà pè sa'i Raapi eu. Ãmẽ Poasi ra'yry pè Opeti eu. Sa'i Ruti eu ijy rerà pè. Ãmẽ Opeti ra'yry pè Jese eu.#Jos. 2.1-21; Ruti 4.19-22
6Ãmẽ Jese ra'yry pè Tavi eu. A'e jõvijã wasu rõmõ ekoi karamoe remẽ, Tavi.
Ãmẽ Tavi ra'yry pè Saromão eu.#1Sa. 16.1-13; 2Sa. 12.24 Uria amyry rerekwarerà tè Saromão y.
7Ãmẽ Saromão ra'yry pè Ropoão eu. Ãmẽ Ropoão ra'yry pè Apijasi eu. A'e ra'yry pè Asa eu.#1To. 11.13; 14.1; 15.8
8Ãmẽ Asa ra'yry pè Josapa eu. A'e ra'yry pè Jorão eu. A'e jeapyrerà pè Usia eu.
9Ãmẽ Usia ra'yry pè Jotão eu. Ãmẽ Jotão ra'yry pè Akasi eu. Ãmẽ Akasi ra'yry pè Esekia eu.#2To. 15.30-34,38; 16.1; 18.1–19.37; Isa. 1.1
10Ãmẽ Esekia ra'yry pè Manase eu. Manase ra'yry pè Amoni eu. Amoni ra'yry pè Josia eu.#2To. 20.21–23.30
11Ãmẽ Josia jeapyrerà pè Jekonia eu. A'e Papironi taa wãnà kõ ojiapisi paire werojisyry eraa wemĩgwai kõ rõmõ. Ãmõ, pirujẽ Juteu jõvijã mitikwerà kõ revejẽ weraapa kupa. Ãmõ, otekokuwa mãe kõ ve weraapa kupa. Sota kõ tè weraapa wena kyty, Papironi taa kyty. A'e pè oiko puku temĩgwai ai kõ rõmõ kupa.#2To. 24.14-15; Jer. 27.20
12Ãmẽ Papironi taa pè weraapa kõ remẽwarà wyi amovyvytà ky'y. Kejõ:
Jekonia ra'yry pè Saratiu eu. Ãmẽ Saratiu jeapyrerà pè Soropapeu eu.#Ne. 7.7; 12.1,47
13Ãmẽ Soropapeu ra'yry pè Apiusi eu. Ãmẽ Apiusi ra'yry pè Eriakĩ eu. Ãmẽ Eriakĩ ra'yry pè Aso eu.
14Ãmẽ Aso ra'yry pè Satoki eu. Satoki ra'yry pè Akĩ eu. Akĩ ra'yry pè Eriuti eu.
15Ãmẽ Eriuti ra'yry pè Eriasa eu. Eriasa ra'yry pè Mãtã eu. Ãmẽ Mãtã ra'yry pè Jako eu. Mokopejõ Jesu rãmõi kõ.
16Ãmẽ Jako ra'yry pè Juse eu. A'e si Maria mẽtarà rã tè ky'y, Jesu y mẽtarà rã tè. [Jesu ruu a'u tè Juse ãmẽ.] Janejare'e Remimuurerà tè Jesu ky'y, pirujẽ jane kõ Rõvijã wasu rõmõ.
17Ãmẽ Aparão jeapyrerà kõ Tavi pe'ĩ jamoirõ irõ remẽ, 14 rõmõ. Ãmõ, Tavi jeapyrerà kõ jamoirõ irõ remẽ, a'e 14 rõmõ ojeapy mijẽ kupa ajaate Papironi taa wãnà kõ weraapa kõ. Ãmẽ a'evoa remẽwarà wyi a'e 14 rõmõ ojeapy mijẽ kupa. A'e a'e kõ jeapyrerà Janejare'e Remimuurerà Janerõvijã wasu rõmõ tè ky'y.#1.17 Karai kõ Messias e'i Janejare'e Remimuurerà pè, Juteu kõ ayvu rupi. Cristo e'i teve kupa, Kereku kõ ayvu rupi. Jesu tè a'e.
Yvapewarà Juse pè omojenu amãtejẽ Jesu sakya rã remẽwarà
18Agyvo Jesu Kiristu oiko osaky rõmõ. Maria eu ijy rerà pè. Juse rerekwatarà tè a'e. Ajamã'ẽ Juse noerekoive remeve ipuru'a sikaepo iko Jesu rã rè. Janejare'e 'Ãg tè sikaepo omomuru'aoka okasia rupi.#Ruk. 1.27
19Ãmẽ imẽnà rã pè ojenu a'evoa, Juse pè. [Ãmẽ ipõ Juse e'i tite oupe:
– Ãmõ kwaima'e teipõ omomuru'a vija mijã, e'i. Ajawyi a'e jẽsi toereko Maria! e'i tite oupe.]
Ajawyi noereko'ãi werekwarà rõmõ mijã. Ajamã'ẽ ivo katuay mã'ẽ tè Juse. Mira katuay tè. Ajawyi oporijauesa jẽ Maria. Nopotai omojaiwe. Ajawyi teã'ã rupi tè opoità iwyi mijã.
20Ãmẽ a'evoa rè Juse ojipy'amogeta upa remẽ jakatu, py'awarà mõ Janejare'e remĩgwai yvapewarà ojimoikatu javo ijupe. Ikery pè tè ajamã'ẽ. A'e ipõ e'i Juse pè:
– Juse, Tavi jeapyrerà! Nejipy'amogeta sõ nejupa Maria puru'aa rè, e'i. Ãmõ kwaima'e rõwã omomuru'a vija, e'i ijupe. Janejare'e 'Ãg kasia rupi tè ipuru'a. Ereko jẽsi awi nererekwarà rõmõ, e'i ijupe. 21Ajaire imemy'atà kwaima'e rõmõ. Isaky remẽ Jesu eretà ijupe ãmẽ, erà pè, jane kõ wereko katutà ijaiwererà kõ wyi rewarà mõ, e'i Juse pè, ikery pè.#1.21 “Poroereko katuarà” jaa tè Jesu pè.
22-23Karamoe remeve Janerõvijã ywete ayvu mojenuarà Jesu sakya rã rè wenone'apa oporegeta amãtejẽ. Aekwerà rupi tè isaky, “aje” taoty ijayvukwerà pè, kee e'i maekwerà pè: “Kãramõ kõjãmuku mãrãne'ã ipuru'atà. Ajaire imemy'atà kwaima'e rõmõ. Emanueu eutà imemyry pè, erà pè”, e'i maekwerà.#Isa. 7.14 (“Janejare'e janepyterà rupi ekoi” jaa tè Emanueu.) Aepo e'i Jesu rã rè oporegeta amãtejẽ. Kãramõ Jesu ovãetà, Janejare'e e'i maekwerà rupi katu.
24Ãmẽ Juse oke paire, omã'ẽ. “Aje” e'i Janerõvijã ywete remĩgwai yvapewarà ayvukwerà pè. Wereko Maria werekwarà rõmõ ãmẽ ky'y. 25Noikoive ee ajamã'ẽ mijã, ajaate imemy ky'y. Isaky paire, Juse weenõ. Jesu e'i erà pè.#Ruk. 2.21