Hawˇseˍ li‸ 9
9
Iˉsaˍreˍlaˆ chaw hta‸ ciˍ yanˍ tuˬ
1Iˉsaˍreˍlaˆ chaw teˇ hpaˍ-oˬ, buiˇshaˆaˉnaˆ chaw hkʼa shuˍ nawˬ hui pawehˇ taˇ te chehˇ-oˆ. Nawˬ hui lehˬ Gʼuiˬsha hta‸ baˬ taˉ leh, ka ti‸ maˇ yeˬ ve chaw hpeh‸ la peuˬ. Mvuhˇmiˬ hkʼaˬ ti chi ti lo, nawˬ hui lehˬ meh maˬ lanˉ hkʼa shuˍ a shu yawˇ awˬ to Baˍlaˆ gʼuiˬsha hta‸ hawˇ piˇ chehˇ ve yoˬ. Yawˇ lehˬ nawˬ hui hta‸ caˬ shiˍ piˇ laˇ chehˇ ve yoˬ teh‸ dawˇ taˍ ve yoˬ. 2Ya‸ hkʼaˇ, maˇ maw maw nawˬ hui lehˬ caˬ shiˍ, shaˍlonˍ chu leh a pehˉ meuˇ gʼuiˬ hkʼa law‸ cawˬ tuˬ ve maˇ heˆ. 3Iˉsaˍreˍlaˆ chaw hui lehˬ, Gʼuiˬsha ve mvuhˇmiˬ hkʼaw gʼa kʼaw‸ chehˇ tuˬ ve maˇ heˆ. Yawˇ hui Eˇjiˇtu‸ mvuhˇmiˬ lo gʼa kʼaw‸ kʼo‸-e leh, Aˍsuˇriˆ mvuhˇmiˬ hkʼaw cha‸ chiˆ ve caˇ tuˬ hta‸ gʼa caˇ tuˬ yoˬ. 4Mvuhˇmiˬ oˇ ve teˇ hpaˍ hkʼaw yawˇ hui lehˬ Gʼuiˬsha geh tuˉ tanˇ tuˬ awˬ ceuˬ yuˬ veu laˇ gʼa tuˬ ve maˇ heˆ. Yawˇ hui ve caˇ tuˬ hta‸ hkʼa caˇ ve chaw lehˬ, chaw suh taˍ ve yehˬ hkʼaw caˇ tuˬ caˇ ve chaw hkʼa shuˍ a shu yawˇ awˬ to hta‸ cha‸ chiˆ kʼai piˇ tuˬ yoˬ. Yawˇ hui ve caˇ tuˬ lehˬ, yawˇ hui meu‸ chehˇ ve hta‸ nyi hkʼaˇ suh piˇ ve hkʼe ceh hpeh‸ leh, caˇ tuˬ oˇ ve teˇ hpaˍ hta‸ Gʼuiˬsha ve bon yehˬ lo gʼa yuˬ kʼai tuˬ ve maˇ heˆ. 5Gʼuiˬsha ve pawehˇ te tuˬ tinˍ taˍ ve awˬ yanˇ gaˬ la htaˇ, yawˇ hui hkʼaˬ hkʼe te tuˬ ve le. 6Kawˆ tuˬ dawˇ haˍ tuˬ gaˬ la leh, chaw yaˇ teˇ hpaˍ hpaˆ da‸ guiˇ da‸ kʼai ve teˇ yanˇ, Eˇjiˇtu‸ chaw teˇ hpaˍ yawˇ hui hta‸ gʼawˆ hpoˆ leh Mehˇhpiˆ teh‸ kʼoˆ ve venˇ hkʼaw lo yawˇ hui hta‸ duˇ tuˍ piˇ tuˬ yoˬ. Yawˇ hui ve mawˇ jeˬ leh yehˬ awˬ paˇ awˬ kui lo mvuh‸ leh aˉ chuˇ buiˇ hkʼa biˇ yeˬ tawˆ la tuˬ yoˬ.
7Chaw yaˇ teˇ hpaˍ a shu yawˇ te taˍ ve kanˉ hta‸ keunˍ da‸ ve hkʼe piˇ leh, yawˇ hui hta‸ ciˍ yanˍ piˇ tuˬ awˬ yanˇ gaˬ la peuˬ. Oˇ hkʼe hpeh‸ la ve teˇ yanˇ, Iˉsaˍreˍlaˆ chaw hui gʼa shiˍ tuˬ yoˬ. Tcuh kaˍ paˍ chi lehˬ chaw gʼuˇ paˍ hpeh‸ leh, Gʼuiˬsha geh cuˇ yiˍ gʼa taˍ ve chaw chi lehˬ nyi ma maˇ biˇ ve chaw yoˬ, teh‸ nawˬ hui kʼoˆ chehˇ ve yoˬ. Nawˬ hui venˇbaˆ uiˍ jaˇ ve pa taw, nawˬ hui ngaˬ hta‸ canˇ jaˇ ve yoˬ. 8Gʼuiˬsha lehˬ yawˇ ve Iˉsaˍreˍlaˆ chaw hui hta‸ shaˍ ti‸ piˇ tuˬ, ngaˬ hta‸ tcuh kaˍ paˍ hkʼa shuˍ nawˬ hui geh peu laˇ taˍ ve yoˬ. Ya‸ hkʼaˇ, nawˬ hui lehˬ ngaˬ hkʼa kʼai kuiˬ teˇ kaˬ le le hkʼaw, ngaˆ ehˉ hta‸ va htaw ve hkʼe ngaˬ hta‸ va caw htaw laˇ chehˇ ve yoˬ. Gʼuiˬsha ve mvuhˇmiˬ awˬ hkʼaw lo htawˇ, chaw yaˇ teˇ hpaˍ tcuh kaˍ paˍ ve canˇ paˍ hpeh‸ chehˇ ve yoˬ. 9Giˇbaˬ venˇ hkʼaw chehˇ htaˇ hkʼe, yawˇ hui dawˇ law kuiˬ maˇ cawˬ leh haiˬ ve kanˉ hta‸ tiˉ te chehˇ ve yoˬ. Gʼuiˬsha lehˬ yawˇ hui ve venˇbaˆ hta‸ dawˇ nawˇ leh, yawˇ hui hta‸ ciˍ yanˍ piˇ tuˬ yoˬ.
Iˉsaˍreˍlaˆ chaw hui ve venˇbaˆ
10Gʼuiˬsha kʼoˆ ve, Iˉsaˍreˍlaˆ chaw hui hta‸ ngaˬ ca mawˬ ve teˇ yanˇ, yawˇ hui lehˬ heh puiˉ hkʼaw lo naw‸ chehˇ ve a pehˉ meuˇ shiˍ hkʼe hpeh‸ ve yoˬ. Nawˬ hui ve awˬ puˍ awˬ pi teˇ hpaˍ hta‸ ngaˬ ca mawˬ ve teˇ yanˇ, yawˇ hui lehˬ awˉ lawˉ peuˇ naw‸ la taˍ ve maˉ nawˆ shiˍ hkʼe hpeh‸ ve yoˬ. Ya‸ hkʼaˇ, yawˇ hui Peˍawˇ teh‸ kʼoˆ ve hkʼaw hkʼoˆ lo gaˬ la ve teˇ yanˇ, Baˍlaˆ gʼuiˬsha hta‸ oˉ kʼoˍ pui leh, yawˇ hui ha‸ve gʼuiˬsha hkʼa shuˍ hpeh‸ la ve yoˬ. 11Iˉsaˍreˍlaˆ chaw hui ve awˬ me‸ awˬ hponˇ lehˬ, ngaˆ hkʼa shuˍ poˬ hpaw-e leh, yawˇ hui geh yaˇ teˇ gʼaˇ ka‸ kʼaw‸ paw la tuˬ ve maˇ heˆ. Yaˇ miˇ teˇ hpaˍ htawˇ, teˇ gʼaˇ ka‸ yaˇ hu tuˬ ve maˇ heˆ. 12Yawˇ hui yaˇ cawˬ la ve htawˇ ngaˬ yawˇ hui hta‸ yuˬ hkʼaw‸ leh, teˇ gʼaˇ hta‸ ka‸ a sha‸ te‸ chehˇ tcuh tuˬ ve maˇ heˆ. Chaw chi teˇ hpaˍ hta‸ ngaˬ baˬ taˉ ve teˇ yanˇ, kawˆ tuˬ dawˇ haˍ tuˬ awˬ ceuˬ yawˇ hui awˬ hkʼoˆ lo gaˬ la tuˬ yoˬ, teh‸ Gʼuiˬsha kʼoˆ ve yoˬ.
13Gʼuiˬsha-oˬ, yawˇ hui ve yaˇ teˇ hpaˍ shu gʼa‸ yuˬ leh tiˇ pehˍ piˇ chehˇ ve hta‸ ngaˬ dawˇ mawˬ chehˇ ve yoˬ. 14Chaw chi teˇ hpaˍ hta‸ nawˬ hkʼaˬ hkʼe te piˇ tuˬ ve le. Yawˇ hui ve yaˇ miˇ teˇ hpaˍ hta‸ chaw meh ma hpeh‸ la piˇ leh, yawˇ hui ve yaˇ teˇ hpaˍ hta‸ ha‸ shaˉ maˇ gʼa tuˬ te piˇ-oˆ.
Iˉsaˍreˍlaˆ hta‸ Gʼuiˬsha suhˉ jehˬ ve
15Gʼuiˬsha kʼoˆ ve, Yawˇ hui lehˬ Giˇlaˍgaˍ venˇ hkʼaw venˇbaˆ tanˬ te ve yoˬ. Oˇ ve teˇ nyi hta‸ tanˬ leh ngaˬ yawˇ hui hta‸ canˇ la ve yoˬ. Yawˇ hui lehˬ haiˬ ve kanˉ hta‸ te ve pa taw, ngaˬ ve mvuhˇmiˬ hkʼaw yawˇ hui hta‸ ngaˬ gʼa‸ kʼoˬ piˇ tuˬ yoˬ. Ngaˬ yawˇ hui hta‸ kʼaw‸ ha‸ tuˬ ve maˇ heˆ. Awˬ lawn kʼo, yawˇ hui ve awˬ hoˉ awˬ naˬ hkʼa peu-eˬ ngaˬ hta‸ hpfuhˆ kʼai peuˬ. 16Iˉsaˍreˍlaˆ chaw hui lehˬ, awˬ geu goˇ kʼai peuˬ ve pa taw, awˬ shiˍ naw‸ la maˇ gʼa ve iˉ shiˍ cehˬ hkʼe hpeh‸ ve yoˬ. Yawˇ hui lehˬ awˬ yaˇ awˬ duˬ teˇ hpaˍ cawˬ la tuˬ ve maˇ heˆ. Yawˇ hui awˬ yaˇ awˬ duˬ cawˬ la ve htawˇ, yawˇ hui ha‸ jaˇ ve yaˇ oˇ ve teˇ hpaˍ hta‸ ngaˬ tiˇ pehˍ piˇ tuˬ yoˬ, teh‸ Gʼuiˬsha kʼoˆ ve yoˬ.
Iˉsaˍreˍlaˆ chaw awˬ lawn tcuh kaˍ paˍ tawˇ yaw ve
17Iˉsaˍreˍlaˆ chaw teˇ hpaˍ Gʼuiˬsha ve tawˇ hta‸ maˇ na yuˬ ve pa taw, ngaˬ ve Gʼuiˬsha lehˬ yawˇ hui hta‸ chiˇ baˬ piˇ tuˬ yoˬ. Yawˇ hui lehˬ awˬ nu ve chaw ceuˬ teˇ hpaˍ ve mvuhˇmiˬ hkʼaw gʼa hpaw toˇ chehˇ tuˬ yoˬ.
လက္ရွိေရြးခ်ယ္ထားမွု
Hawˇseˍ li‸ 9: LHBE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Lahu Bible Edited © Thailand Bible Society and Bible Society of Myanmar, 2010, 2020.