Bel Asin an Dragon 1
1
Si Daniel saka an mga Padi ni Bel
1Kan magadan si Hadeng Astyages, an nagpalakaw kan saiyang kahadean iyo si Ciro nin Persia. 2Si Daniel iyo an saro sa mga tawong hararani ki Hadeng Ciro, asin orog na ginagalangan kaini ki sa iba niyang mga parahatol.
3An mga taga Babilonia igwa nin dios-dios na inapod nindang Bel. Aroaldaw dinodolotan ninda ini nin doseng sako nin pinong arina, kwarentang karnero, saka singkwentang galon nin arak. 4Nagtutubod si Hadeng Ciro na sarong dios si Bel, asin nagduduman siya aroaldaw tanganing magsamba saiya. Alagad sinamba ni Daniel an sadiri niyang Dios.
5Sarong aldaw hinapot kan hade si Daniel, “Tadaw ta habo kang magsamba ki Bel?”
Nagsimbag si Daniel, “Dai ako nagsasamba sa mga dios-dios na gibo sana nin tawo. Nagsasamba sana ako sa buhay na Dios, na naglalang kan langit saka daga, asin Kagurangnan kan gabos na tawo.”
6“Dai ka nagtutubod na buhay an samong dios na si Bel?” an hapot kan hade. “Dai mo nahihiling kun gurano kadakul an saiyang kinakakan saka iniinom aroaldaw?”
7Nagngisi si Daniel dangan nagsabi, “Dai ka magpadaya, Mahal na Hade. Iyan na dios-dios na inaapod mong Bel sarong dalipay na napapatos nin bronse; dai pa iyan nin kinakan o ininom.”
8-10Huli kaini naanggot an hade asin inapod an setentang padi ni Bel. Tinaraman niya sinda, “Kun dai nindo isabi sako kun siisay an nagkakakan kan mga dolot na ini, magagadan kamo. Alagad kun mapatotoohan nindo na si Bel an nagkakakan kaiyan, magagadan si Daniel, huli ta linanghadan niya si Bel.”
Nag-oyon si Daniel sa kondisyon na ini.
11Dangan nagduman sinda gabos kaiba an Hade sa templo ni Bel. Nagsabi an mga padi, “Mahal na Hade, maluwas kami. Ika mismo an magbugtak kan mga kakanon sa lamesa saka mag-andam kan arak. Kun mahale ka na, baratan mo an pintoan dangan selyohan mo kan saimong singsing. 12Pagbalik mo sa aga, kun mahiling mo na dai naubos ni Bel an pagkakan, ipagadan mo kami. Alagad kun naubos niya, magagadan si Daniel huli ta nagsasabi siya nin mga kaputikan laban samo.”
13Dai nahadit an mga padi, huli ta sa irarom kan lamesa igwa sinda nin sekretong agihan, na inaagihan ninda kun banggi, dangan inuubos ninda an mga kakanon.
14Pakahale kan mga padi, inandam kan hade an kakanon para ki Bel. Pinagbotan man ni Daniel an saiyang mga sorogoon na magdara nin dakul na abo. Dangan iwinarak ninda ini sa salog kan templo. An hade sana an nakahiling kan ginibo nindang iyan. Pakatapos, nagluwas sinda gabos sa templo, sinerahan an pinto, sinelyohan kan hade, dangan nagharale sinda.
15Kan bangging idto, arog kan dati nindang ginigibo, naglaog sa templo an mga padi kaiba an saindang mga agom saka mga aki. Nag-agi sinda sa sekretong agihan, dangan kinakan ninda an gabos na pagkakan saka ininom an gabos na arak.
16Pagkaagang amay, nagduman sa templo an hade kaiba si Daniel. 17Naghapot an hade, “Ano, nagkararaot an mga selyo Daniel?”
“Dai, Mahal na Hade,” an simbag niya.
18Kan mabukasan an pinto, nahiling kan hade na mayo na an mga pagkakan. Nagkurahaw siya, “Dakula ka, O Bel! Totoo mananggad na saro kang dios.”
19Alagad nagngisi si Daniel dangan sinabihan an hade, “Bago ka maglaog sa templo, masdan mo ngona an salog dangan sabihan mo ako kun kiisay na mga gira an nahihiling mo.”
20“Nahihiling ko an mga gira nin mga lalaki, nin mga babae, saka nin kaakian,” an sabi kan hade. 21Naanggot nin marahay an hade kaya ipinadakop niya an mga padi saka an saindang mga pamilya. Itinukdo ninda saiya an sekretong mga pintoan na inaagihan ninda barobanggi tanganing kakanon an pagkakan na ibinugtak sa lamesa. 22Kaya ipinagadan kan hade an mga padi, saka itinao si Bel ki Daniel, na iyo an nagronot kan dios-dios saka naggaba kan templo kaini.
Ginadan ni Daniel an Dragon
23Igwa man kaidto nin dakulang dragon na sinasamba kan mga taga Babilonia. 24Sarong aldaw sinabihan kan hade si Daniel, “Dai ka na makakasabi sako na bakong buhay an dios na ini. Kaya sambahon mo siya!”
25Nagsimbag si Daniel, “Sinasamba ko an Kagurangnan huli ta siya sana an buhay na Dios. 26Alagad kun tutugotan mo ako, Mahal na Hade, gagadanon ko ining dragon mo maski dai maggamit nin espada o pamukpok.”
“Tinutugotan taka,” an simbag kan Hade.
27Kaya nagkua si Daniel nin alkitran, taba saka mga buhok. Pinakalakagaan niya an mga ini dangan ginibong garo mga bibingka saka ipinakakan sa dragon. Kan makakan na iyan kan dragon, buminotog ini asin puminutok. “Hilinga kun ano an sinasamba nindong mga taga Babilonia,” an sabi ni Daniel.
28Kan maaraman kan mga taga Babilonia an nangyari, anggot nin marahay na nagplano sinda laban sa hade. Nagsabi sinda, “Nagin Judio na an hade. Kan enot, rinaot niya si Bel dangan ginadan an mga padi, asin ngunyan ginadan niya an satong dragon.” 29Nagduman sinda sa hade saka hinagad saiya na itao sainda si Daniel. “Kun magsayuma ka,” an patanid ninda sa hade, “gagadanon mi ika asin an saimong pamilya.”
30Kan mahiling kan hade na talagang gigibohon kan mga tawo an saindang sinabi, napiritan siyang itao sainda si Daniel. 31Ihinulog ninda si Daniel sa lungib kan mga leon, asin binayaan ninda siya duman sa laog nin anom na aldaw. 32Pito an leon na nasa lungib, asin lambang aldaw duwang tawo saka duwang karnero an ipinapakakan sainda. Alagad sa laog kan anom na aldaw na idto dai sinda tinawan nin pagkakan, tanganing si Daniel an kakanon ninda.
Ilinigtas si Daniel sa Lungib kan mga Leon
33Kan panahon na iyan, nasa Juda si propeta Habakkuk. Nagluto siya nin gulay saka binugtakan nin rinonot na tinapay. Kan pasiring na siya sa oma dara an sarong mangko na pano kan saiyang linuto na ipapakakan sa mga nag-aani, 34nagtaram saiya an anghel nin Kagurangnan, “Darahon mo an pagkakan na iyan sa Babilon saka itao mo ki Daniel na nasa lungib kan mga leon.”
35Nagsimbag si Habakkuk, “Dai pa lamang ako nakaabot sa Babilon, asin dai ko aram kun saen an lungib kan mga leon.”
36Kaya kinapotan kan anghel si Habakkuk sa buhok asin dinara sa Babilon sa rikas kan doros.#1:36 sa rikas kan doros; o huli sa kapangyarihan kan saiyang espiritu. Ibinaba niya si Habakkuk sa harani kan lungib kan mga leon. 37Nag-apod si Habakkuk, “Daniel, Daniel! Kuaha an pagkakan na ini na padara saimo nin Dios.”
38Kan madangog ni Daniel si Habakkuk, namibi siya, “O Dios, nagiromdoman mo ako; dai mo pinabayaan an mga namomoot saimo.” 39Dangan nagtindog siya saka nagkakan, asin ibinalik tolos kan anghel si Habakkuk sa saiyang harong.
40Kan ikapitong aldaw, nagduman sa lungib an hade tanganing tangisan si Daniel. Pag-abot duman, nagdungaw siya sa laog asin nahiling niyang nakatukaw si Daniel. 41Nagkurahaw an hade, “Dakula ka, O Kagurangnan na Dios ni Daniel. Mayo na nin ibang Dios pwera sa saimo.” 42Kaya binaton niya si Daniel paluwas sa lungib saka ipinahulog duman an mga lalaking naghingowang gadanon si Daniel. Kinakan tolos sinda kan mga leon, mantang naghihiling an hade.
လက္ရွိေရြးခ်ယ္ထားမွု
Bel Asin an Dragon 1: MBBBIK92
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Marahay na Bareta Biblia © Philippine Bible Society, 1992.