Sirak 44
44
1So, yumi preisim olketa olo grani blong yumi long bifoa hu i tinghae long Lod. 2Olketa ya nao Lod hemi givim bik nem long olketa, an hemi somaot bikfala paoa blong hem long laef blong olketa, stat kam long taem wea hemi mekem evrisamting. 3Samfala long olketa i king, an samfala moa olketa i strong tumas. Samfala long olketa save givim waes advaes, an samfala moa olketa i save tok olsem olketa profet. 4Samfala long olketa save tumas long lo blong ples an wei fo rul, an givim oda long olketa pipol, an samfala hu i garem save an i tok waes, an samfala moa hu i yusim olketa waes toktok. 5Samfala long olketa save tumas hao fo mekem singsing an tiun blong olketa. 6Samfala long olketa i ris an strong tumas, bat i stap long piis long ples blong olketa. 7Evriwan ya i garem biknem long taem olketa laef, an pipol i tinghae long olketa. 8Samfala long olketa i somaot gudfala wei, an pipol i preisim olketa yet ka-kam kasem tude. 9Bat no eniwan hemi tingimbaek samfala narafala pipol nao. Olketa pipol ya nao wetem olketa pikinini blong olketa, olketa ya i olsem olketa i no bon kam an no stap long wol ya.
10Bat bae yumi preisim olketa hu i tinghae long Lod, olketa nao, olketa hu i duim gudfala waka wea no eniwan save fogetem. 11An pikinini blong olketa bae falom gudfala wei blong olketa, disfala gud samting nao bae olketa tekova long olketa. 12Olketa smol grani blong olketa bihaen bae i kipim agrimen wetem God olowe, olsem olketa olo grani blong olketa i duim bifoa. 13Famili laen blong olketa bae hemi gohed olowe, an bik nem blong olketa bae hemi no save finis. 14Bodi blong olketa hemi res finis long graon, bat gudfala wei blong olketa bae hemi laef olowe. 15Pipol long plande kantri bae talemaot waes blong olketa, an olketa pipol blong God bae preisim olketa.
Inok
16Lod#Jenesis 5:24; Hibrus 11:5; Jiud 14. hemi hapi long Inok an hemi tekem hem laef goap long heven. Eksampol blong hem fo sore fo olketa sin bae hemi stap olowe nao.
Noa
17Noa#Jenesis 6:9—9:17. hemi wanfala stret man. An bihaen taem God hemi spoelem disfala wol, hemi mekem Noa fo statem niu laen fo yumi pipol. Hem nao pipol i stap long wol bihaen flad hemi finis. 18Lod hemi mekem wanfala spesol agrimen wetem Noa, an promisim dat bae hemi no spoelem moa disfala wol long flad.
Ebraham
19Ebraham#Jenesis 15:1—17:27; 22:1-18. nao hemi bikfala olo grani blong plande kantri, an wei blong hem hemi stret. 20Ebraham hemi kipim Lo blong Lod hu hemi hae tumas an God hemi mekem wanfala agrimen wetem hem. Hemi makem disfala agrimen long bodi blong Ebraham. Taem Lod hemi traem hem, hemi lukim dat Ebraham hemi tinghae tumas long hem. 21Bikos hemi olsem, Lod hemi mekem wanfala strong promis dat olketa hu i bon kam bihaen long hem bae hemi blesing fo evri pipol long wol. An olketa bae i plande tumas olsem dast long graon, an pipol bae tinghae long olketa winim evri narafala pipol long wol. An lan blong olketa bae hemi bik fogud stat long Mediterenian Si go kasem long Ded Si, an long Iufretis Riva go kasem en blong disfala wol.
Aesak an Jekob
22-23Lod#Jenesis 17:19; 26:3-5; 27:28; 28:14. hemi mekem niu disfala agrimen wetem Aesak, an bihaen hemi mekem moa wetem Jekob. Hemi mekem moa promis dat olketa hu i bon kam bihaen bae i olsem blesing fo evri pipol long wol. Lod hemi promis long Jekob dat bae hemi blesim hem, an givim lan long hem fo onam, an bae hemi divaedem long tuelfala pat, wanfala pat fo evriwan long olketa tuelfala traeb long Israel.
လက္ရွိေရြးခ်ယ္ထားမွု
Sirak 44: SIDC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Pijin Catholic Bible © Bible Society of the South Pacific, 2008.