Sirak 34
34
Olketa drim i samting nating
1Krangge#Diutronomi 13:1-5; 18:9-14. pipol i laea nomoa long olketa seleva long olketa strongfala tingting, an olketa seksek tumas taem olketa lukim samfala samting long drim. 2Man hu hemi bilivim evrisamting wea hemi lukim long drim, hemi olsem nomoa man hu hemi trae fo kasholem wanfala sado o hemi trae fo ronem win. 3Wanem yu lukim long drim, hemi olsem nomoa piksa blong fes blong yu wea yu lukim insaet mira. 4Wanem hemi no tru, hemi had fo mekem enisamting fo hemi tru, an wanem hemi doti, hemi had fo mekem enisamting fo hemi klin. 5Fo lukim olketa drim, an fo wosipim devol, an fo trastem olketa saen, evrisamting olsem hemi barava iusles nomoa. 6Sapos i no God hu hemi hae tumas nao hemi givim kam drim ya long yu, yu mas no wari long hem. 7Olketa drim i lidim rong finis plande pipol, an olketa biliv long hem an olketa barava sore fogud bihaen. 8Sapos yu falom finis Lo blong God, hemi no nidim nomoa fo yu trastem olketa laea samting olsem. Waes toktok wea olketa stret pipol i talem, hemi klia an stret finis nao.
Fo go long narafala ples
9Man hu hemi go long plande farawe ples, hemi save long plande samting, an hemi save talem waes toktok. 10Hemi had tumas fo yu save long plande samting sapos yu no lukim plande samting. Bat sapos yu go long plande ples bae yu save long plande samting. 11Taem mi go long olketa narafala ples, mi lukim an mi save moa long plande samting, Bat hemi had tumas fo mi storim evrisamting wea mi lukim. 12Plande taem nao mi kolsap dae, bat plande taem mi save sevem mi seleva long wanem mi lukim an mi save long bifoa.
Fo tinghae long Lod
13Olketa hu i tinghae long Lod bae i laef, bikos olketa trastem hu hemi save sevem olketa. 14Yu mas tinghae long Lod, an bae yu no save fraetem enisamting. Sapos yu trastem hem, bae yu no save fraet. 15Pipol hu i tinghae long Lod nao i lake, bikos olketa save, wea nao fo faendem help. 16Lod hemi lukaftarem olketa hu i lavem hem. Hem nao strongfala gaed an help blong olketa. Hemi lukaftarem olketa long taem blong bikfala win an hemi kavaremap olketa long hot blong san, an hemi kipim olketa fo no bangam lek blong olketa o foldaon. 17Hem nao hemi mekem olketa hapi, an mekem ae blong olketa braet. Hemi blesim olketa long gudfala laef an gudfala helt.
Fo ofarem sakrifaes
18Sapos yu sakrifaesim animol wea yu stilim, hemi no klin long ae blong Lod, an hemi les nomoa long hem. 19Lod hu hemi hae tumas, hemi no hapi long olketa sakrifaes wea olketa nogud pipol i ofarem. No eni sakrifaes olsem save aotem sin blong olketa. 20Eniwan hu hemi stilim wanfala animol long wanfala puaman an sakrifaesim go long God, hemi olsem man hemi kilim dae pikinini frant long dadi blong hem. 21Kaikai nao hemi laef blong pua pipol. An sapos wanfala hemi tekemaot long hemi, hemi olsem wea yu kilim dae man ya. 22Fo aotem kaikai blong narawan o fo ravem pei blong wakaman, hemi olsem wea yu kilim dae nao man ya.
23?Sapos wanfala man hemi bildim haos, an narawan hemi brekemdaon, tufala evriwan i wakahad, bat watkaen gud samting nao tufala tekem long hem? 24?Taem wanfala man hemi givim blesing, an narawan hemi kolem trabol fo kasem, hu long tufala nao bae Lod hemi herem? 25?Sapos yu tasim bodi blong man dae, den yu go wasim han blong yu long wata, bat bihaen, yu go tasim moa, wanem nomoa disfala was han blong yu hemi duim? 26?Sapos yu stop kaikai fo som sore fo olketa sin blong yu, den yu go duim disfala semsem sin moa, fo wanem nomoa yu stop kaikai fo som sore? ?Hu nao yu tingim bae hemi lisin long olketa prea blong yu?
လက္ရွိေရြးခ်ယ္ထားမွု
Sirak 34: SIDC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Pijin Catholic Bible © Bible Society of the South Pacific, 2008.