1 Makabi 15
15
1Taem Antiokas Mekseven san blong Demitrias hemi stap long olketa aelan long Mediterenian Si, hemi raet go long Saemon, hedprist an bikman blong provins blong olketa Jiu, an long evri traeb blong olketa. 2Olketa samting wea hemi raetem hemi olsem:
Mi King Antiokas. Mi raet go long yu Saemon, hedprist an bikfala lida long provins, an olketa traeb blong evri Jiu. Piis hemi stap wetem yufala. 3Yufala save wea olketa nogud pipol tekova finis provins wea olketa olo grani blong mi i stap long hem bifoa. Mi laekem fo mi tekembaek provins ya olsem olketa holem bifoa. Mi baem finis wanfala bik grup blong soldia, an redim tu olketa sip fo faet. 4Mi redi fo go long dea fo faet, an fo raosimaot olketa hu i spoelem nogud olketa taon long provins ya.
5Long distaem nao, mi mekem yufala fri long peim evri kaen taks, olsem olketa olo grani blong mi olketa duim finis long yufala. 6Mi letem yufala fo mekem seleni blong yufala seleva fo yufala yusim long ples blong yufala. 7Jerusalem an Tambuhaos bae tufala no peim eni taks. Evrisamting blong faet wea yufala mekem finis, an olketa strong haos wea yufala bildim an yufala stap long olketa distaem, bae yufala save tekem fo yufala nao. 8Evri kaon blong yufala wea yufala duim long king wea yufala no sensim yet, an evri kaon wea bae yufala duim bihaen, mi barava fogetem evriwan. 9Saemon, long taem wea bae mi kamap lida long ples blong mi, mi bae mekem yu hae moa, wetem traeb blong yu, an Tambuhaos, mekem nem blong yufala hemi bikfala moa long hol wol.
10Long yia 174,#15:10 “Long yia 174” Datfala yia hemi 138 B.K. Antiokas hemi stanap an go fo tekembaek olketa lan blong olketa olo grani blong hem. Plande long olketa soldia blong Trifo olketa kam long saet blong Antiokas, an no plande nao olketa stapbaek wetem Trifo. 11-12So Antiokas hemi ronem hem, an Trifo hemi ranawe go long Doa, wanfala taon long saetsi, bikos hemi lukim dat evri soldia blong hem olketa goawe finis, an hemi luksave tu evri nogud samting hemi kasem hem finis. 13Den Antiokas hemi go an stap raonem Doa wetem 120,000 soldia wea olketa savegud fo faet, an 8,000 soldia wea olketa savegud fo go long hos. 14Olketa sip blong hem tu olketa kam fo faet long disfala taon ya, so olketa ami blong Antiokas i stap raonem taon ya, an hemi barava had tumas fo eniwan fo go insaet o kamaot.
Rom hemi helpem olketa Jiu
15Long#1 Makabi 12:16. datfala taem ya, Niumenias an grup blong hem olketa stat kam long Rom an kambaek moa long Jerusalem, wetem leta wea olketa long Rom i raetem go fo plande king an plande provins. Raeting long leta ya hemi olsem:
16Mi Lusias, bikfala lida long Rom, mi raet go long yu king Tolemi. Piis hemi stap wetem yu. 17Wanfala grup long olketa Jiu wea olketa i brata an gud kaban blong mifala, olketa kam kasem mifala fo olketa mekem niu moa agrimen wea mifala mekem bifoa. Disfala hedprist Saemon, an olketa evri Jiu nao olketa sendem olketa kam, 18an olketa tekem kam fo mifala wanfala bikfala gif wea olketa mekem long gol. Hevi blong gif ya, hemi kasem 500 kilo. 19Bikos hemi olsem, mifala tingim mifala mas raet go long yufala olketa king long narafala provins, an askem yufala fo no duim enisamting nogud fo olketa Jiu, o ples blong olketa, o provins blong olketa. Yufala mas no statem eni faet long olketa Jiu, o helpem olketa narafala grup wea olketa kam fo faetem olketa Jiu. 20Mifala barava hapi fo tekem disfala gif long gol wea olketa kam givim long mifala. 21Bikos hemi olsem, sapos wanfala Jiu hemi save duim trabol an hemi ranawe from Jiudia an gohaed long provins blong yufala, hemi gud yufala kasholem an sendem hem go long hedprist Saemon fo hemi panisim hem falom lo blong Jiu.
22Lusias hemi raetem moa wanfala leta go long king Demitrias, an Atalas an Ariaratis an Asakes, 23an hemi sendem go tu semkaen leta go long olketa provins ya: long Samsames, Spata, Mindos, Sikion, Karia, Samos, Pamfilia, Lisia, Halikarnasas, Rodes, Paselis, Kos, Side, Aradas, Gotina, Nidas, Saepras an Saerin. 24An wanfala kopi long leta ya hemi sendem go tu fo Saemon hedprist.
Antiokas hemi no falom agrimen wea hemi mekem wetem Saemon
25King Antiokas hemi go-gohed fo faetem bikfala taon long Doa an stap raonem. Hemi putumap olketa stik fo klae long wolston, an hemi blokem evri bik geit, mekem hem had fo Trifo an olketa soldia blong hem fo go insaet o kamaot. 26Saemon hemi sendem go long Antiokas 2,000 soldia blong hem, wea olketa savegud fo faet, fo olketa go helpem Antiokas, an hemi givim go tu gol an silva, wetem plande samting blong faet. 27Bat Antiokas hemi les long olketa samting ya, an hemi brekem evri agrimen wea hemi mekem wetem Saemon, an so hemi kamap enemi blong hem. 28Bihaen, Antiokas hemi sendem go Atenobias, hemi wanfala advaesa blong hem wea hemi trastem gud, fo hemi go long Saemon an tok olsem long hem:
Yu nao bikman long tufala bikfala taon long Jopa an Gesa, an strong haos blong soldia long Jerusalem. Olketa ples ya olketa blong mi. 29Yu spoelem finis datfala kantri, an yu mekem bikfala trabol long olketa pipol long olketa ples ya, an yu holem plande ples blong mi insaet long kantri ya. 30Nao distaem yu mas givimbaek long mi olketa taon ya wea yu holem olketa, an yu mas givimbaek tu seleni blong taks wea yu tekem long olketa ples wea olketa no stap insaet long Jiudia. 31Sapos yu les fo duim olketa samting ya, yu mas givim kam long mi 15,000 kilo blong silva, an narafala 15,000 kilo blong silva moa fo peimbaek mi bikos yu spoelem mi an long taks wea yu tekem long olketa taon ya. Sapos yu les moa fo duim olketa samting ya, mifala bae go faetem yufala.
32So Atenobias hemi kam kasem Jerusalem an taem hemi lukim olketa samting wea olketa stap long haos blong Saemon, an olketa saen gud tumas, wetem olketa baol an kap wea olketa mekem long gol an silva an olketa stap long tebol, an plande samting moa wea hemi garem wea praes blong olketa hemi dia tumas, hemi barava sapraes tumas. Distaem nao hemi talem long Saemon olketa toktok blong King Antiokas, 33bat Saemon hemi sensim toktok an tok olsem long hem, “Mifala barava no tekem eni graon blong eni traeb, an mifala no tekem enisamting blong narafala pipol. !Nomoa! Mifala tekembaek nomoa lan wea olketa olo grani blong mifala olketa holem kam bifoa. Datfala lan ya, olketa enemi blong mifala tekem long mifala bifoa. 34Long disfala taem nomoa mifala save tekembaek olketa samting wea olketa olo grani blong mifala holem kam stat long bifoa. 35Yu talemaot wea tufala taon ya Jopa an Gesa tufala blong yu nao. Nomata olketa pipol long tufala taon ya olketa mekem bikfala trabol tumas long mifala, bae mifala givim kam long yu 3,000 kilo blong silva.”
Atenobias hemi no talem enisamting, 36bat hemi barava kros tumas, an hemi gobaek long King Antiokas. Taem hemi storim olketa samting wea Saemon hemi talem, an olketa gudfala samting wea hemi lukim long haos blong Saemon, distaem nao King Antiokas hemi barava kros bikfala moa.
Jon hemi winim Kendebaeas
37Long datfala taem ya, Trifo hemi go long wanfala sip an hemi ranawe go long taon long Otosia. 38Nao King Antiokas hemi siusim Kendebaeas fo hemi bikman long evri ples long saetsi, an givim long hem wanfala grup blong soldia hu i wakabaot, wetem wanfala grup hu i go long hos, 39an hemi odarem hem fo go long Jiudia fo faetem olketa Jiu. Hemi talem long hem tu fo hemi bildim gudbaek moa taon long Kedron, an fo hemi strongim olketa geit blong hem. King seleva nao hemi ronem go Trifo.
40Taem Kendebaeas hemi go kasem Jamnia, hemi stat fo spoelem olketa Jiu. Hemi go insaet long Jiudia, an kasholem olketa pipol an kilim olketa dae. 41Hemi bildim gudbaek moa Kedron, an hemi putum samfala soldia hu i go long hos an samfala hu i wakabaot fo stap long dea, mekem olketa go fo faetem olketa Jiu, an fo olketa gadem olketa rod long Jiudia, olsem king hemi talem long hem.
လက္ရွိေရြးခ်ယ္ထားမွု
1 Makabi 15: SIDC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Pijin Catholic Bible © Bible Society of the South Pacific, 2008.