2 Ɩya-ɩya 27
27
Yuda wogyu Yotam
2 Begyu-dɩrɛ 15:32-38
1Yotam e di bɩkyan dikpilin ma ton pɛ gɛ e di bugyu. Gɛ e di bugyu Yerusalem bɩkyan fwo kooron. Wɔna n di Yerusa Sadoki wobi-nanɩ Yerusa. 2Ɛ mɛ ade gɛtɛ ɩ tʋna Yahwe bʋnʋn, anlɛ gɛtɛ wote Usiya ɛ mɛ fɔ. Mɔ Yotam bɩrɛ en gyu Yahwe Dikwo-dɩrɛ fɔ daanɩ anlɛ gɛtɛ wote ɛ mɛ fɔ. Mɔ fɔ bɛnɩ bɛ̀ bɔ bɛɛ mɛ baade-kpen fɔ. 3Yotam na biri na sere Yahwe Dikwo-dɩrɛ fɔ dɩɩ Gatala Giitunu fɔ, gɛ e biri ɛ mɛ gʋtʋn-dɩrɛ ɛ ka ɛ pɩna ɔpɔrɩ gɛtɛ wʋ̀ gbɛma Ofeli wodon fɔ. 4E sere atele Yuda idon yii koro, gɛ e sere atele gɛtɛ bɛ mara ɩpɔrɩ be silin yi ma ayelakʋn-dɩyɛlɛ akan yaanɩ.
5Yotam ɛ ma kpà ma Amon bete boogyu-dɩrɛ, gɛ e di boo koro. Gɩkyan gɩtɔkɔ Amon bete be le wɔ sɩka-fututu bekilo gbaa ma nkpɩn kwarankɩ (3,400), ma anaabi bekilo miliyon, ma amɔrɔ bekilo miliyon. 6Gɛ Yotam e wura ɔkɛma-dɩrɛ yema ɛ tɛrɛma Yahwe nʋnkwarɩ anɩ, wɔ Wurubwarɛ fɔ nʋnkwarɩ anɩ.
7Bɛ ŋwara ade-kurumakyɛɛ gɛtɛ Yotam ɛ mɛ wo bugyu buu gedi gaanɩ fɩya ma akpà gɛtɛ ɛ san, ma ade kurumakyɛɛ gɛtɛ ɛ mɛ fɔ, bɛ sa Isareli ma Yuda begyu-dɩrɛ boo koro gaade yɩɩ gɩkpa-dɩrɛ fɔ gaanɩ. 8E di bɩkyan dikpilin ma ton pɛ gɛ e di bugyu. Gɛ e di bugyu Yerusalem bɩkyan fwo kooron. 9Yotam e ku gɛ be lò wɔ wotu ɛbɛ bɔɔ bɩsan baanɩ ɔkʋn gɛtɛ bee kpèlè Dafidi Ditele-dɩrɛ fɔ. Gɛ wobi Ahasi e di bugyu e sere wɔ gɩsɩrɩ.
လက္ရွိေရြးခ်ယ္ထားမွု
2 Ɩya-ɩya 27: ADE
အေရာင္မွတ္ခ်က္
ကူးယူ
ႏွိုင္းယွဥ္
မၽွေဝရန္
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
2025 Ghana Institute of Linguistics Literacy and Bible Translation