Romanos 5
5
Su kuriq na jun mnaq che sk'um unom chjuch Dios
1Ni le' chik kqilo che xa rmal che xujkjon che Qajaw Jesucristo, jare Re xu'on sk'um chqe chjuch Dios. Ni chanim chik o utzil chiqxo'l ruk' Dios, mal xukuy qamak rmal su xu'on Qajaw Jesucristo chqe. 2Xa rmal che xujkjon che Qajaw Jesucristo, jare Re xuk'am qab'e chiquch rech xqariq ut'ob' Dios. Chewa chanim ko kqatak'b'a qib' chpam ut'ob' uy'om chqe. Kujki'ktik, mal o su qi'em che kqechb'ej na ruk' Dios che nim u'ij che kuya na chqe. 3Xaw taj le' qachlal, qo'j kujki'ktik rmal runjel uwuch k'ax kpi pqajlom. Kujki'tik mal qit'am chik che un k'ax kqariqo, kuya chqe che kqach'ij u'xom k'ax che kqariq na. 4Echi' kqach'ij runjel uwuch k'ax che kqariqo, tik'ri k'alnik che utz unom qak'asnmal ruk' Dios. Echi' utz unom qak'asnmal ruk' Dios, xa mas kinmir kub'sb'al qak'u'x chrij Dios che kuya na chqe su ub'im Re che ruk' saqlaj tzij kuya'o. 5Echi' ku'l qak'u'x chrij Dios, qit'am chik che qatz qtzij ku'on na su kub'ij. Kuya t chqe kqariq qak'ixb'al, mal xuk'utu che mas kujul'oj, rmal xunojsaj qanma' ruk' Tyoxlaj Uxlab'xel.
6Echi' kujkun taj kqato' qib' chjuch k'ax, jare taq ij xuchay Dios rech kkam Jesucristo qmal qech qo'j che xa ujajb'nal taq mak. 7Ot jun mnaq kraj kuya rib' pkamsxik rech ku'on uwuchb'al jun che sk'umlaj mnaq. Miskini' jala', pent o jun kuya rib' pkamsxik rech ku'on uwuchb'al jun chik mnaq che qatz qtzij utz ranma'. 8Per jare Dios xuk'ut chiquch che mas kujul'oj, mal echi' kujtjin qo'j che u'anik qamak chjuch, jare Re xutaq loq Qajaw Jesucristo rech xuya rib' pkamsxik rech qawuchb'al qo'j.
9Chewa chanim, Dios xu'on tz'qat chqe rmal ukmik Qajaw Jesucristo. Xa rmal, qatz qtzij kukub'saj qak'u'x che kujkoltaj na chjuch un k'ejsb'al qawuch che pitnaq chqij, mal Dios kukuy qamak, rmal ukmik Qajaw Jesucristo. 10Nab'e xa ujajch'oj ruk' Dios, per rmal ukmik uK'jol, Dios xujuya putzil ruk' Re. Chanim o ki'ktem chiqxo'l ruk'. We o ki'ktem chiqxo'l ruk' Dios rmal ukmik uK'jol, xani mas kukub'saj qak'u'x che kujkoltaj na rmal uk'asnmal, mal Re xk'astaj uwuch chikxo'l nk'aj kamnaq. 11Xaw taj ri' che kujkoltaj na, soq mas kujki'kat ruk' Dios, xa rmal che Qajaw Jesucristo xu'on tz'qat chqe ruk' Dios. Kqatyoxij che Qajaw Jesucristo, mal rmal Re o nimlaj utzil chiqxo'l ruk' Dios.
U Adán jare xuk'am loq qakmik, ni Jesucristo jare xuk'am loq qak'asnmal
12Jare utz we kich'ob' chrij su xuk'am loq un nab'e achi chqe, che Adán ub'i'. Echi' xu'on umak chjuch Dios, xpi mak chuchlew. Ni mak che xu'ono, jare xuk'am loq un kmik pkijlom kunjel mnaq chuchlew. Xa jala' che kikam kunjel mnaq, mal kunjel mnaq kinom kmak chjuch Dios, jala peche xu'on u Adán. 13Kqilo che echi' mja kpi upxab' u Moisés, nk'aj mnaq ya kiyitjin chik che u'anik kmak chuchlew. Per echi' mja kpi un pxab', ot su kb'ix chrij mak mal ot pxab' kuk', rech kuk'ut chikuch che ustaj su kiyitjin che u'anik. Xa rmal, nk'aj mak koksax taj prijlal. 14Miskini' jala', xpi un kmik pkijlom mnaq rmal u Adán, ast retal xo'pan ij echi' k'as u Moisés, y xa rmal kmak xik'ano, xikamik. Xa jala', xikje uchu'ab' un kmik pkijlom mnaq, miskini' xik'an taj kmak peche mak xu'on u Adán. Re xukoj t utzij Dios echi' xch'aw ruk' ti xuya jun taqnik che.
U Adán peche mow jun k'amb'al n'oj chqe chrij Qajaw Jesucristo.#5:14 U Adán xuk'am loq un kmik pkijlom mnaq, per Qajaw Jesucristo xuk'am loq un qak'asnmal che ot uk'isik. 15Per su xu'on Qajaw Jesucristo, junwi chik chjuch su xu'on u Adán. Usipnik Dios uy'om chqe rmal Qajaw Jesucristo, kujnamsaj taj ruk' umak u Adán, mal xa rmal umak un nab'e achi, ik'i mnaq xikriq kikmik. Per jare ut'ob' Dios uy'om chke mnaq mas nim na uchu'ab' chjuch umak u Adán. Jare Dios uy'om usipnik chke ik'ilaj taq mnaq rech kiyik'se' na, rmal su xu'on Qajaw Jesucristo echi' xuk'ut ut'ob' Dios chikuch. 16Jare usipnik Dios uy'om chke mnaq, junwi chik chjuch su xu'on un nab'e achi echi' xu'on umak chjuch Dios. Echi' xu'on umak u Adán, jare Dios xub'ij che kuriq na ukmik rmal, jare k'ejsb'al uwuch. Per echi' ik'i mnaq xik'an k'ilaj taq mak chjuch Dios, jare Dios xuk'ut ut'ob' chikuch mal xukuy kmak rmal ukmik Qajaw Jesucristo. 17Xikje uchu'ab' un kmik pqajlom qunjel rmal umak un nab'e achi, per mas nim na uptan ut'ob' Dios che kqariq rmal Qajaw Jesucristo. Ni le' chik kunjel mnaq che kikk'am un nimlaj utzil che jare jun sipnik kuya Dios chke, rech Dios kub'ij chke che isk'um chjuch Re, tik'ri jnam kiyikje chpam jun k'ak' kk'asnmal ruk' Qajaw Jesucristo. Ke kiyikje taj chuxe' uchu'ab' un kmik.
18Un k'ejsb'al qawuch xpi pqajlom qunjel, rmal mak che xu'on un nab'e achi. Per jare Qajaw Jesucristo xu'on tz'qat chqe chjuch Dios rech kub'ij che ujsk'um chjuch Dios. Xa jala', kujuresaj chjuch un k'ejsb'al qawuch, rech kuya chqe che kujk'se' na ruk' Dios. 19Xa jala', numak un nab'e achi xu'ono echi' xunmaj t utzij Dios, xujuya chpam qamak qunjel. Per rmal un chik achi che jare Jesucristo, jare rmal che xu'ono su xub'ij Dios, ku'on chqe che kuju'on sk'um chjuch Dios. 20Jare Dios xuya upxab' chqe rech kqilo che nim qamak qanom chjuch, xa rmal mel kujkun taj kqatz'qatsaj su kub'ij. Per echi' xqa'an mas qamak, jare Dios xuk'ut chiquch che o mas uchu'ab' ut'ob' chjuch qamak. 21Chewa chanim kqilo che peche mow jare qamak xitqan pqajlom, mal kujuk'am b'i chpam kmik. Ni le' chik, jare ut'ob' Dios kitjinik kitqan pqajlom. Xa jala', kujuk'am b'i chpam jun qak'asnmal che ot uk'isik, mal Dios kub'ij che ujsk'um chjuch, rmal Qajaw Jesucristo, che xu'on tz'qat chqe chjuch.
လက္ရွိေရြးခ်ယ္ထားမွု
Romanos 5: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global