Romanos 3
3
1¿Su ki'em nk'aj che iyaj Israel, che ki'em taj nk'aj chik mnaq? ¿Su kkechb'ej, che kikkoj retal kicuerpo taq ab'om jala peche kitqan upxab' u Moisés che kik'ano?
2K'i uwuch sutaq'ik kkechb'ej che jala kik'ano. Nim uptan chke mal Dios xuya utzij chke. 3Per we o nk'aj aj Israel che ot kkojb'al chrij Dios, ¿le jala kraj kub'ij che Dios kuk'is t u'anik su ub'im kanoq?
4¡Ot mow che jala k'antjik! Miskini' kunjel mnaq chi' chuchlew kikk'is t u'anik su kikb'ij, per Dios jala taj umow Re. Dios kuk'is u'anik runjel su kub'ij, ajsub'nel taj Re. Jawa tz'ib'tal kan chpam Tyox Wuj:
«Jare tzij la puro sk'um, chinchke kb'ij la echi' k'an la atb'altzij pkijlom mnaq.
K'aljan na che runjel tzij kb'ij la puro saqlaj tzij.
Lal kich'kan pkijlom nk'aj wajch'oj la echi' kik'an atb'altzij pijlom la», kcha'. (Sal 51:4)
5Per we qamak kajawtjik rech kuk'utu che Dios jare puro sk'um, ¿sut kqab'ij k'ut? ¿Xatb'a kqab'ij che xa sk'um taj Dios echi' kuk'ejsaj qawuch? (Keb' uxib' tzij che kintjin che ub'ixiki' xa jare uchomb'al mnaq). 6¡Ot mow che jala kqab'ij! Wet mitji sk'um Dios, ¿su mow k'ut ku'on sk'umlaj atb'altzij pkijlom mnaq?
7Pent o jun chik kub'ij jala': «We nk'aj tzij kimb'ij in che xa ch'anik, kuya che saqlaj tzij rech Dios che kuriq na mas nim u'ij, ¿suche che o keb' uxib' che kik'an atb'altzij pnijlom, peche xa o nmak in? Ot mow che jala k'antjik» kcha'. 8We jala', ¿suche k'ut jare taj kqa'ano chinchke xa ustaj rech kpi utz? Per jarewa xa jech'laj taq pinsar. O keb' uxib' mnaq che jala kikb'ij chqij, che xa jech'laj taq pinsar kqatjoj mnaq che. Pre chke che Dios kuk'ejsaj na kwuch mnaq che jala kikch'ob'o.
9¿Su kilwi runjel wari' che kintjin che ub'ixik chiwe? ¿Le jare qo'j ujaj Israel, nim na qa'ij chikuch nk'aj chik? Jala taj. Ya ximb'ij chiwe che qo'j ujaj Israel, xaq ujnam kuk' kunjel mnaq, mal xa ujajb'nal qamak chjuch Dios.
Ot jun mnaq che sk'um unom chjuch Dios
10Jarewa tz'ib'tal kan chpam Tyox Wuj:
«Ot jun mnaq che sk'um unom chjuch Dios, ot su kri' jun.
11Ot chin jun che kuch'ob'o su umow Dios,
ot chin jun che kraj kutzkuj Dios.
12Kunjel mnaq xa xiksach kb'e, rech kik'an taj su kub'ij Dios.
Kunjel xa iyajb'nal taq mak.
Ot jun mnaq kraj ku'ono su ri' che sk'um chjuch Dios. (Sal 14:1-3)
13Jare ktzij ke xa k'ax utayik, jala peche su o chpam jun muqb'al kamnaq che xa chu ruxlab'.
Kiksub' mnaq rmal tzijtal kikb'ij. (Sal 5:9)
Jare ktzij ke peche u'anik kuya yab'il chke mnaq, jala peche mow ti kti' jun rmal jun kmatz che o veneno puchi'. (Sal 140:3)
14Kikb'ij nk'aj k'axlaj taq tzij chkij nk'aj chik mnaq, k'axlaj taq tzij kel pikchi'. (Sal 10:7)
15Ke kiktij anim che ukamsxik jun chik mnaq.
16Xa kiksach uwuch runjel su o ruk' jun chik. Xa kikya k'ax chpam kanma' nk'aj chik.
17Kikch'ob' taj su kik'an che uya'ik un utzil chikxo'l mnaq. (Is 59:7-8)
18Mowni ch'in kkix'ej kib' chjuch Dios». (Sal 36:1)
Jala kub'ij chpam Tyox Wuj.
19Qo'j qit'am chik che runjel su tz'ib'tal kanoq chpam upxab' Dios kch'aw chkij kunjel mnaq che iy'o chuxe' upxab' Re. Ot su kiyikun che ub'ixik che Dios rech kkesaj kib' chjuch un k'ejsb'al kwuch kikriq na rmal kmak kinom, mal qunjel qo'j uj'o chuxe' u'atb'altzij Dios che ku'on na. 20Xa rmal che jala kub'ij chpam utzij Dios, qit'am che ot jun che sk'um unom chjuch Dios xa ruk' che kukoj uchu'ab' che utz'qatsaxik su kub'ij upxab' Re. Xani jare rmal che Dios kukuy kmak mnaq rech kyu'on sk'um, mal upxab' Dios kuk'ut chiquch che qunjel qo'j xa ujajb'nal taq mak chjuch Re.
Jare mnaq kik'an sk'um chjuch Dios rmal kkojb'al che Jesucristo
21Chewa chanim kwaj kimb'ij chiwe su mow ku'on sk'um Dios chqe. Jare t qo'j qatkel kqakoj qachu'ab' che utz'qatsaxik upxab', mal kujkun taj che u'anik. Xani jare Dios ku'on sk'um chqe chjuch Re. Jare upxab' Dios rich'il nk'aj ajb'il utzij Re, xaq jnam jala kikb'ij. 22Jare Dios kub'ij che ujsk'um chjuch rmal che xujkjon che Jesucristo uK'jol Dios. Xaq ruk' jala', Dios kusach uwuch qamak qanom. Xaq jnam kyuril wi kunjel mnaq, we iyaj Israel, we iyaj Israel taj. 23Qunjel qo'j xa ujajb'nal qamak. Xa rmal che naj ujk'wi che su o ruk' Dios che mas nim u'ij. 24Per rmal ut'ob', jare Dios kub'ij che ujsk'um chjuch mal xukuy qamak rmal su xu'on Jesucristo. Re xutoj rjil qamak, rech kujuresaj chuxe' un k'ejsb'al qawuch kqariq rmal qamak. 25Jare Dios xutaq loq uK'jol Jesucristo chi' chuchlew. Jare Jesús xuya rib' xkamsax chjuch jun cruz che'. Chla' xtix ujk'el rech ku'xan riwal Dios chqij rmal qamak qanom, rech kusach uwuch qamak, we kujkjon che Jesús. Jala xu'on Dios rech kuk'ut chikuch kunjel mnaq che jare Re puro sk'um unom kuk'. Xa xuri'ej rech kuk'ejsaj kwuch nk'aj ujer taq mnaq rmal kmak kinom. 26Chewa chanim, Dios xuya Jesucristo rech xkamsxik rech kutoj rjil kmak kunjel mnaq che kiyikjon che Jesucristo. Jare Dios kuk'utu che puro sk'um unom quk', mal kunjel jumpa kiyikjon che Jesús, jare Dios kub'ij che isk'um chjuch Re, mal xukuy kmak.
27¿Le o mow che kqanmirsaj qib'? Otaj. ¿Suche che ot mow kqanmirsaj qib'? ¿Le xa rmal che ujsk'um mal xqatz'qatsaj runjel su kub'ij upxab' Dios? Jala taj. Qo'j ujsk'um chjuch Dios rmal che xujkjon che Jesucristo. 28Jala kilwi che Dios kub'ij che kunjel mnaq kyu'on na sk'um chjuch mal kukuy kmak we kiyikjon che Jesucristo. Jare t rmal che kikkoj kchu'ab' che utz'qatsaxik upxab' Dios. 29¿Le xaw mnaq iyaj Israel kikoltaj na? Xaw taj ke. Jare mnaq che iyaj Israel taj rich'il nk'aj che iyaj Israel, xa rmal kkojb'al, isk'um chik chjuch Dios. 30Xa jun qaDios olik. Xaq jnam ku'on kuk' kunjel mnaq, we jare kjom ketal tza'm amb'al kchul circuncisión kb'ix che, soq we kjom taj. Xa rmal kkojb'al chrij Jesús, jare Dios kub'ij che kunjel isk'um chjuch Re, mal kukuy kmak. 31¿Le jala kilwi che ot uptan nk'aj ujer taq upxab' Dios che tz'ib'tal kanoq? Jala taj. Xani kqatz'qatsaj upxab' Dios we kujkjon che Qajaw Jesucristo.
လက္ရွိေရြးခ်ယ္ထားမွု
Romanos 3: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global