San Marcos 9
9
1Xub'ij chik chke:
—Ruk' saqlaj tzij kimb'ij chiwe, che jumpa mnaq iy'o chi' ile', iy'o keb' uxib' chke che kikam taj, ast retal kikkil na che pitnaq utzlaj atb'altzij rech Dios ruk' nim uchu'ab', —xche chke.
Xjaltaj ukayb'al ri Jesús
(Mt 17:1-13; Lc 9:28-36)
2Echi' axnaqch waqib' (6) ij, x'e Jesús chu jun nimlaj jyub'; xyuk'am b'i u Lu' rich'il u Santiago rich'il u Wan; xa kitkel ke iy'o chla'. Echi' iy'o chik chla', xjaltaj ukayb'al Jesús chikuch. 3Ni ritz'yaq su ktil'anik x'antjik, puro saqlaj b'ot xu'ono; ot jun mnaq chi' chuchlew che kikunik kuch'aj atz'yaq che jala ku'on che, peche ritz'yaq Jesús. 4Xaq t'et o keb' kri'jal x'aljan chikuch uxib' discípulo. Ke, jare u Elías rich'il u Moisés; kiyitjinik kich'aw ruk' Jesús. 5Ena xch'aw u Lu', xub'ij che Jesús:
—Ajtojnel, ¡utz ni me uj'o chiri'! Utz wet kqa'an uxib' kb'al, jun ech la, jun chik rech qari'jal u Moisés, y jun chik rech qari'jal u Elías, —xche che.
6Jala xub'ij u Lu' mal kuriq t chik su kub'ij, xa rmal mas xiyok il nk'aj discípulo che su xkilo. 7Tik'ri', o jun sutz' xqaj loq pkijlom, xyuch'uqu; per o Jun xch'aw loq chpam sutz', xub'ij: «Re, jare Re niK'jol, che mas k'ax nk'u'x che. ¡Chitatb'ej su kub'ij!» xche chke. 8Ni nk'aj discípulo xaq t'et xika'y ptaq kitlok', per ot jun chik mnaq xkil uwuch; xaq xaw Jesús xkilo che o na kuk'.
9Echi' iqajnaq loq chu un jyub', ri Jesús xyutaq nk'aj udiscípulo, xub'ij chke che xa mikb'ij che jun chik mnaq su xkilo, ast retal echi' kk'astaj chna uwuch Re chikxo'l nk'aj kamnaq, che jare Achi uK'jol Dios.
10Ke xikb'ij taj su xkilo. Xa xikta chikuch ke su kilwi che xub'ij chke, che kk'astaj chuwuch chikxo'l nk'aj kamnaq. 11Xikta k'ut che Jesús, xikb'ij:
—¿Suche che kikb'ij nk'aj ajtojnel rech upxab' Dios che nmister kpi qari'jal Elías nab'e? —xiche che.
12Ni Jesús xub'ij chke:
—Qtzij kpi u Elías nab'e rech ku'on utz che runjel. ¿Su k'ut tz'ib'tal kan chwij in, nAchi nuK'jol Dios? Jare tz'ib'tal kanoq che nmister kinriq na nimlaj k'ax, y xa knikixtuj na ri mnaq. 13Per kimb'ij chiwe che u Elías ya pitnaq chik; nk'aj mnaq xik'an che runjel jumpa k'ax kkaj kik'an che, jala peche tz'ib'tal kan chrij. —Jala xub'ij Jesús chke.
Ri Jesús xuresaj jun itzel espíritu che jun ala
(Mt 17:14-20; Lc 9:37-43)
14Tik'ri xiyaktaj loq chu un jyub'; echi' xik'un jawa kuk' nk'aj chik discípulo, xkilo che jwert mnaq kimlom kib' chkij, rich'il keb' uxib' chke nk'aj ajtojnel rech upxab' Dios che kichpom kib' che tzij kuk' nk'aj discípulo. 15Kunjel jumpa mnaq, echi' xkil uwuch Jesús, xikmiyma', anim xipi ruk', xkiy'a rtzil uwuch.
16Ni Re xuta chke, xub'ij:
—¿Su kixtjin che uchomxik kuk' ke? —xche chke.
17O jun chikxo'l xch'aw loq, xub'ij:
—Ajtojnel, o jun nik'jol xink'am loq chuch la che xa o itzel espíritu che; xa rmal, kikun taj kch'awik, unom mem che. 18Jumpa taq kuchap nitzel, kutrij chuchlew; kpi ujqow uchi', kuqch'ach'ej uwure, soq kche'ar ucuerpo. Xinta pawor chke nk'aj discípulo la che kikkesaj nitzel espíritu che, per xiyikun t che, —xche nachi che Jesús.
19Ena xch'aw chik Jesús, xub'ij:
—¡Ix iximnaq ix'o chu'ij saq, xa kikub'a t ik'u'x chwij! ¿Jumpa ij kraj na che kinkje iwuk'? ¿Jumpa ij kraj na che kink'is nk'u'x iwuk', xa rmal che kixkjon taj? Chima loq nala chinwuch, —xche chke.
20Xikk'am loq nala ruk'. Echi' nitzel xuril uwuch Jesús, chanim xuyikya nala. Xtzaq nala chuchlew, xumaj uwalqtixik rib', xpi ujqow uchi'. 21Ena xuta Jesús che uqaw nala, xub'ij:
—¿Jumpa xumaj un k'ax che urqom? —xche che.
Ni uqaw xub'ij:
—Su ak'ali' chi' ti xumajo. 22Nitzel, k'i b'welt uk'qom nala p'a', soq uk'qom pja', rech kukamsaj. We o su kkun la che u'anik, chil k'u'x la chqe, chujt'o la, —xche che.
23Ni Jesús xub'ij chik che:
—¿Suche che kab'ij chwe, “We o su kkun la che u'anik”? Chin jun che kukub'a uk'u'x chwij, ot su kri' jun cosa che mitji kikun che u'anik, —xche che.
24Ena ko' uqaw nala che ub'ixik, chanim xub'ij:
—¡Kinkub'a nk'u'x chij la! Chint'o la rech kinkjon mas, —xche che.
25Echi' xuril Jesús che mas mnaq kiktij anim kiyo'pan chla' kuk', xuyaj nitzel espíritu, xub'ij che:
—At, atitzel espíritu che ka'an mem y ka'an tak chke mnaq, katintaqo rech katel b'i che nala ri'. ¡Xaq matok jun b'welt chik ruk'! —xche che.
26Ni nitzel espíritu ko xusik'b'aj rib', jwert xuyikya nala, tik'ri xel b'ik. Su kislib' t chik nala, sare xa kamnaq chik ka'yik. Ena k'i mnaq xikb'ij: «¡Puk su xkamik!» xiche chikuch. 27Per ni Jesús xuchap qaj che u'ab', xuwa'lsaj. Ni nala xwa'ljik, xitk'e'ik. 28Tik'ri xok b'i Jesús pja. Echi' xaq utkel Jesús o chla' kuk' nk'aj udiscípulo, ke xikta che, xikb'ij:
—¿Suche lo che xujkun taj qo'j xqesaj nitzel espíritu che nala? —xiche che.
29Ni Re xub'ij chke:
—Nk'aj itzel taq espíritu peche umow nitzele', xaq xaw kikun resxik we jun kitjin che ch'ab'al ruk' Dios y kuch'ij numik, —xche Jesús chke.
Ri Jesús xub'ij che kkamsax na
(Mt 17:22-23; Lc 9:43-45)
30Echi' xiyel b'i chla', xib'e Galilea, chla' xi'ax wi. Ni Jesús et kraj Re qast mitji o jun mnaq kurit'amaj che chla' ik'wi, 31mal xa kitjin che ktojxik nk'aj udiscípulo. Jawa xub'ij chke: «In ri', nAchi nuK'jol Dios, kinjachtaj na pik'ab' nk'aj mnaq; jare ke knikkamsaj na. Per miskini' nkamnaq chik, kk'astaj chna nwuch churox ij chikxo'l nk'aj kamnaq», xche chke. 32Per ni ke xikch'ob' taj su xub'ij chke, mowni xik'an kwil xikta che su kilwi, mal xkix'ej kib' che utayik.
¿Chin jun mnaq che mas nim riltjik?
(Mt 18:1-5; Lc 9:46-48)
33Xiyo'pan chpam jun tinmit Capernaúm ub'i'. Echi' iy'o chik pja, xuta Jesús chke nk'aj udiscípulo, xub'ij:
—¿Su kixtjin che uchapik iwib' chrij ptaq b'e? —xche chke.
34Per ni ke xich'aw t chik, mal xa jare kiyitjin che uchapik kib' chrij che chin jun chke mas nim u'ij chikxo'l. 35Ena xikb'e' Jesús, xyusk'ij kab'aljuj (12) discípulo ruk', xub'ij chke:
—We o jun kraj che kukoj rib' che nim u'ij, nmister che peche ot reqle'n ku'on chikxo'l rich'il, jare ku'on uchak che kilik kunjel jumpa mnaq, —xche chke.
36Tik'ri xuk'am qaj jun ak'al y xuya pink'aj chke; ena, xu'aluj, xub'ij chke:
37—Chin jun mnaq che kuk'am jun ak'al peche umow juni' rmal wech in, jare in knuk'amo; per xaw tli in knuk'amo, jare kuk'am Qajaw Dios che xnutaq loq, —xche chke udiscípulo.
Chin jun che ajch'oj taj quk' jare qich'il
(Lc 9:49-50)
38Ena xub'ij u Wan che Jesús:
—Ajtojnel, o jun mnaq xqilo che kitjin che resxik itzel taq espíritu chke mnaq rmal kub'ij b'i' la. Ni qo'j xqa'atij uwuch, mal qich'il taj, —xche che.
39Per ni Jesús xub'ij:
—Xa mi'atij, mal ot chin jun mnaq ku'on jun k'utb'al ruk' kub'ij nb'i', tik'ri kub'ij itzel taq tzij chwij. 40Mal chin jun mnaq che ajch'oj taj quk', jare qich'il. 41Qatz qtzij kimb'ij chiwe, chin jun mnaq che kuya chiwe, miskini' xa jun vaso jron, xa rmal rit'am che ixwech in ri Cristo,#9:41 Cristo kel kub'ij jun chaytajnaq rmal Dios. Un tzij Mesías xaq jnam kilwi. kuriq na jun tojb'alre, —xche chke.
K'ax kuriqo chin jun che kutzaq jun chik chpam umak
(Mt 18:6-9; Lc 17:1-2)
42Xub'ij chik Jesús:
—Jumpa taq ch'in ajkojnel che kkub'am kk'u'x chwij, we o jun mnaq che kutaqch'ij jun chke che u'anik mak, mas utz wet kxim jun ka' rech amb'al k'em chqul un mnaq che jala ku'ono, tik'ri kk'eq b'i chpam mar. 43We xa rmal jun a'ab' ka'an amak, utz we karamo, mal jare mas utz che xa jun a'ab' katok chla' ruk' Dios jachi kariq junalik k'asnmal, chjuch xa kat'e p'a' che kchup taj, ruk' keb' a'ab'; 44mal chla' k'wi nk'aj amlo che kiktij mnaq, su kikam taj, mowni kchup un a'.#9:44 O nk'aj ujer taq wuj rech Tyox Wuj, manuscrito kb'ix che, che tz'ib'tal taj v. 44 chpam. 45Niw xa rmal jun awqan ka'an amak, utz we karamo, mal jare mas utz che xa jun awqan katok chla' ruk' Dios jachi kariq junalik k'asnmal, chjuch xa katk'eq b'i p'a' che kchup taj, ruk' keb' awqan; 46mal chla' k'wi nk'aj amlo che kiktij mnaq, su kikam taj, mowni kchup un a'.#9:46 O nk'aj ujer taq wuj rech Tyox Wuj, manuscrito kb'ix che, che tz'ib'tal taj v. 46 chpam. 47Y we xa rmal jun awuch ka'an amak, utz we kawesaj, mal jare mas utz we katik'se' chpam utzlaj atb'altzij rech Dios ruk' jun awuch, chjuch xa katk'eq b'i p'a' ruk' keb' awuch; 48mal chla' k'wi nk'aj amlo che kiktij mnaq, su kikam taj, mowni kchup un a'. 49Kunjel mnaq kikriq na k'ax peche a' koksax chke; xaq ijnam ruk' peche jun tiko'n ksipax chjuch Dios; nab'e kkamsxik, tik'ri kkoj atz'am che. 50Le atz'am, utz; per we kitzyin t chik, ¿su mow kqa'an che, rech kitzyin chik? Ix nmister che jala imow peche utzlaj atz'am ku'on je'lik che rkil; jala' o utzil chixo'l. —Jala xub'ij Jesús chke.
လက္ရွိေရြးခ်ယ္ထားမွု
San Marcos 9: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global