San Marcos 16
16
Ri Jesús xk'astaj uwuch chikxo'l nk'aj kamnaq
(Mt 28:1-8; Lc 24:1-12; Jn 20:1-10)
1Echi' axnaq chik uxnb'al ij, nk'aj ixqib' xiklo' k'ok'laj taq kumb'al che puro ki' ruxlab', rech kikkoj chrij ucuerpo Jesús che xmuq kanoq, k'manaq chke che jala kik'an chke nk'aj kicuerpo nk'aj kamnaq. Jare i Mri'y aj Magdala rich'il i Mri'y uchuch u Santiago, soq rich'il il Salomé. 2Echi' xuriq nab'e ij rech un semana, b'ajchi' echi' tela xel loq ij, ke xikmaj kb'e. Xib'e chla' jachi xmuq Jesús. 3Kiyitjin che kb'e, kikb'ij chikuch: «¿Chin lo kuresaj un tz'lom ab'aj chiquch che kjom chuchi' un jul jachi xmuq Jesús?» xicha'.
4Per echi' xiyok chunqaj un jul, xika'y pnoq y xkilo che walqtim chub'i un nim tz'lom ab'aj, tel chkan uchi' un jul. 5Echi' xiyok chpam un jul, xkilo che ku'l jun ala pi'b'im; saq ka'y un ritz'yaq ukjom. Ena mas xkix'ej kib' che. 6Ni re xub'ij chke:
—Xa mix'ej iwib'. Ix jare kixtjin che utzukxik Jesús aj Nazaret che xrip chjuch un cruz. Per ni Re xk'astaj b'i uwuch chikxo'l nk'aj kamnaq; ot chik chi'. Chiwlampe' jachi xikyaw ub'qil. 7Per jib'ij che u Lu' rich'il nk'aj chik discípulo, chib'ij: “Ri Jesús knab'aj chnub'i chiwuch pukwent Galilea. Chla' kiwil na uwuch, peche ub'im kan chiwe”, kixche chke. —Jala xub'ij nala chke nk'aj ixqib'.
8Ni nk'aj ixqib' xsach kk'u'x ruk'. Kib'arb'atik xiyil b'i chpam un jul, xiyanmaj b'ik. Ot su kri' jun tzij xikb'ij che jun chik mnaq, rmal mel kix'em kib'.
Ri Jesús xuk'ut rib' chjuch i Mri'y aj Magdala rich'il keb' chik udiscípulo Jesús
(Mt 28:9-10; Lc 24:13-35; Jn 20:11-18)
9B'ajchi' xk'astaj Jesús chikxo'l nk'aj kamnaq chpam un nab'e ij rech un semana. Echi' k'astajnaq chik, jare nab'e xuk'ut rib' chjuch i Mri'y aj Magdala. Jare re xuresaj jqub' (7) itzel taq espíritu Jesús che ujer. 10Echi' xuril i Mri'y aj Magdala che jare Jesús xk'astjik, x'e che ub'ixik chke mnaq che xiyikje ruk' Jesús echi' mja kkamik. Echi' xo'pan kuk', ke mas kiyib'sonik, kiyo' che Jesús, rmal mel xkamik. 11Per echi' xikta' che k'as chik Jesús, y iltajnaq uwuch rmal i Mri'y aj Magdala, ke xikkoj taj.
12Tik'ri', o keb' chik rich'il Jesús kib'in chpam un b'e k'e pujyub'. Xuk'ut chrib' Jesús chikuch, per jala taj xu'on che uk'utik rib' peche nab'e b'welt. 13Echi' xikch'ob' uwuch Jesús, tik'ri xib'e che ub'ixik chke nk'aj chik kich'il; per mowni xikkoj ktzij ke.
Ri Jesús xyutaq nk'aj udiscípulo rech kikya ub'ixik utzlaj utzij Dios
(Mt 28:16-20; Lc 24:36-49; Jn 20:19-23; Hch 1:6-8)
14K'isb'alre, ri Jesús xuk'ut rib' chikuch ju'ljuj (11) apóstol echi' kiwa'ik. Re xyuyajo, rmal mel ot mas kkojb'al, xikkoj t ktzij mnaq che kilom che k'astajnaq uwuch chikxo'l nk'aj kamnaq. 15Tik'ri xub'ij Jesús chke: «Jix chjuch runjel uwuchlew, chiy'a ub'ixik utzlaj taq rson chke kunjel jumpa mnaq kiriqtaj chi' chuchlew. 16Chin jun kikjonik y k'an qasna' che, jare re kto'taj na, rech kuriq uk'asnmal ruk' Dios. Per chin jun kikjon taj, kk'ejsax na uwuch rmal umak unom. 17Chin kiyikjon chwe, ya'tal chke che kik'an nmaq taq k'utb'al; jare ke kikkesaj na itzel taq espíritu chke mnaq ruk' kikkoj nb'i' in; soq kich'aw na ruk' k'ak' taq tzij. 18We kikchap na kmatz, we kiktij jun cosa che o veneno kjom ruk', ot jun k'ax kikriq rmal. Soq kikya k'ab' pkijlom nk'aj yab', ni ke kiyik'chojik». Jala xub'ij Jesús chke.
Ri Jesús xk'am b'i chkaj
(Lc 24:50-53; Hch 1:9-11)
19Echi' xuk'is ub'ixik chke udiscípulo, ri Qajaw Jesús xyaktaj b'i chikuch, x'e chkaj; chla' xikb'e' pu'b'im uQaw Dios. 20Ni nk'aj discípulo xiyel b'ik, xib'e che ub'ixik utzij Dios chke mnaq chpam runjel jumpa lyar jachi ik'wi mnaq; jare Qajaw xyuto' chpam kchak. Echi' xikb'ij utzij Dios, soq xik'an nmaq taq k'utb'al chikuch mnaq; xa rmal, nk'aj mnaq xikch'ob'o che qtzij su xikb'ij. Amén.#16:20 O nk'aj ujer taq wuj rech Tyox Wuj manuscrito kb'ix che, che tz'ib'tal taj Amén chpam un versículo ri'.
လက္ရွိေရြးခ်ယ္ထားမွု
San Marcos 16: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global