San Lucas 4
4
Nitzel jare kraj re wet xutaqch'ij Jesús che mak
(Mt 4:1-11; Mr 1:12-13)
1Ri Jesús xel b'i chla' ruk' un ja' Jordán. O nimlaj uchu'ab' Tyoxlaj Uxlab'xel ruk'. Tik'ri, xtaq b'i Jesús rmal Tyoxlaj Uxlab'xel chpam jun lyar che xa chqi'j ulew.
2Kawnaq (40) ij xu'on Jesús chla'. Xtaqch'ix che mak rmal nitzel Satanás, per ni Jesús xtzaq taj chpam umak. Runjel jumpa ij xu'on chla', ot su kri' xutijo, mas ma'tan tik'ri xpi mas numik che.
3Ena xub'ij nitzel che:
—We qtzij che at atuK'jol Dios, chb'ij che nab'aji' che kujal kaxlenwa, rech katijo, —xche che.
4Ri Jesús xuk'ul uwuch utzij, xub'ij che:
—Kin'an taj, mal tz'ib'tal kan chpam Tyox Wuj che kub'ij: “Nk'aj mnaq, xaw taj kwa kiktijo che kiyik'se' rmal. Soq kiyik'se' rmal runjel jumpa utzij kub'ij Dios”,#4:4 O nk'aj ujer taq wuj rech Tyox Wuj, manuscrito kb'ix che che tz'ib'tal taj Soq kiyik'se' rmal runjel jumpa utzij kub'ij Dios chpam. kcha'. (Dt 8:3)
—Jala xub'ij che.
5Tik'ri ri', nitzel xuk'am b'i Jesús puwi jun nimlaj jyub'. Chpam jun laj rat, xuk'ut chjuch runjel jumpa tinmit o chuchlew. 6Ni nitzel xub'ij che:
—In kinya chawe che katitk'e' pkijlom runjel nk'aj tinmite'. Soq mas kinmirsax a'ij kmal, mal runjel wari' y'om chwe in. In kinwilo chin che kinya wi. 7Xa ruk' we katixke' chinwuch, kanmirsaj n'ij, runjel kinya chawe, —xche nitzel che.
8Ni Jesús xuk'ul uwuch utzij, xub'ij che:
—Katel chinwuch, itzel Satanás. Kin'an taj, mal tz'ib'tal chpam Tyox Wuj che kub'ij: “Kanmirsaj u'ij Awjaw Dios. Xaq xaw Re kakoj u'ij”, kcha'. (Dt 6:13)
—Jala xub'ij Jesús che.
9Tik'ri', nitzel xuk'am b'i Jesús chpam un tinmit Jerusalén, xuresaj b'i pujlom nimlaj rchoch Dios, xub'ij che:
—We qtzij che at atuK'jol Dios, chik'qa b'i awib' chuchlew. 10We jala ka'ano, ot k'ax kariqo, mal tz'ib'tal chpam Tyox Wuj che kub'ij:
“Dios kyutaq loq nk'aj u'ángel rech katkichjij.
11Ke, katikyak b'i ruk' k'ab'
rech kach'ay t awqan chjuch ab'aj”, kcha'. (Sal 91:11-12)
—Jala xub'ij nitzel che.
12Ri Jesús xutzlij ub'ixik, xub'ij che:
—Jala taj kin'ano, mal tz'ib'tal chpam Tyox Wuj che kub'ij: “Xaq mataqch'ij Awjaw Dios”, kcha'. (Dt 6:16)
—Jala xub'ij Jesús che.
13Xa jala', kuriq t chik nitzel su ku'on che utaqch'ixik Jesús. Echi' x'antaj rmal, xel b'i chjuch, ast retal kurqan jun chik ij rech kutaqch'ij na che u'anik umak.
Ri Jesús xumaj u'anik uchak chla' Galilea
(Mt 4:12-17; Mr 1:14-15)
14Tik'ri', xitzlij Jesús chla' Galilea. Nimlaj uchu'ab' Tyoxlaj Uxlab'xel o ruk'. Mas xel rson chpam runjel un tinmit sutaq ku'on Jesús. 15Ri Jesús xyutjoj mnaq che utzij Dios chpam nk'aj rchoch Dios kech ke. Kunjel xkinmirsaj u'ij.
Ri Jesús xitzlij chpam un tinmit Nazaret
(Mt 13:53-58; Mr 6:1-6)
16Tik'ri x'e Jesús chpam un tinmit Nazaret chla' jachi xk'iy wi. Chpam jun uxnb'al ij, xok b'i chpam rchoch Dios, peche k'manaq che. Tik'ri, xitk'e'ik rech kusk'ij uwuch Tyox Wuj. 17Jare xya un wuj ub'tom rib' che, che tz'ib'tal kan rmal nujer ajb'il utzij Dios che Isaías ub'i'. Xutor un wuj, xuriqo jachi tz'ib'tal wi un tzij che jawa kub'ij:
18«Ri Uxlab'xel Qajaw Dios o wuk', mal xnuchayo
rech kimb'ij utzlaj taq rson rech Dios chke mnaq che xa ipobre.
Soq nutqom loq rech kinkub'saj kk'u'x mnaq che o nimlaj b'is chke.
Soq nutqom loq che ub'ixik che kitzaqpix b'ik jumpa mnaq che ichaptajnaq rmal nitzel.
Soq xnutaq loq che ub'ixik che kika'y chik nk'aj mnaq che xa kika'y taj nab'e.
Xnutaq loq rech kinto' mnaq che kirqom k'ax.
19Xnutaq loq che ub'ixik che xuriq ij chaytal rmal Qajaw
rech kuya nimlaj utzil chikxo'l mnaq». (Is 61:1-2; 58:6)
Jala utz'ib'am kan u Isaías ujer. Jarela xub'ij Jesús chke.
20Ri Jesús xub'ot un wuj, xuya che najklol re, tik'ri xikb'e'ik rech kyutjoj mnaq. Kunjel jumpa mnaq iy'o chpam un ja, mas xikka'yej. 21Re xumaj ub'ixik chke, xub'ij:
—Pwa'ij kinmaj u'anik chiwuch jumpa tz'ib'tal chpam Tyox Wuj che xinsk'ij uwuch chiwuch, —xche chke.
22Nab'e, kunjel mnaq utz xich'aw chrij Jesús, mas xikmiyma' ri utzlaj taq tzij xub'ij chke. Per tik'ri xikmaj utayik chikuch:
—¿Mere jaret lo jun che xaq uk'jol u Jse? ¿Le o su rit'am lo? —xicha chikuch.
23Ri Jesús xub'ij chke:
—Wit'am su kib'ij chwe, che kib'ij: “Ajkun, chiknaj awib'”, kixche chwe. Kixtjin chik che ub'ixik chwe: “Jumpa k'utb'al qatom che xa'an chla' Capernaúm, soq china chi' chpam atinmit at”. Jala kib'ij na chwe, —xche chke.
24Soq xub'ij:
—Saqlaj tzij kimb'ij chiwe, che ot jun ajb'il utzij Dios che kik'lax kmal mnaq chpam utinmit re. Xa rmal che soq kikoj taj su kimb'ij in chiwe. 25Utz utatb'xik ki'an che nk'aj saqlaj tzij kimb'ij chiwe. Ik'i b'yu't ixqib' iy'o kan chpam un tinmit Israel echi' kitjin u Elías che ub'ixik utzij Dios. Chpam un tiempo ri', uxib' jnab' ruk' nk'aj ot lo'laj jab' xu'ono. Ena nimlaj wijal xu'on chpam runjel un tinmit. 26Per nu Elías xtaq t ub'i che kto'ik nk'aj b'yu't ixqib' che iy'o Israel, xa jare xtaq b'i ruk' jun b'yu't ixoq che aj Israel taj o chpam un tinmit Sarepta, ukwent Sidón. 27Soq ik'i mnaq xiyikje chla' Israel che o un yab'il chkij che peche ch'a'k, awas ub'i'. Iy'olik ti kitjin u Eliseo che ub'ixik utzij Dios, per ot jun chke che xiknax rmal, xaq xaw u Naamán xiknaxik. Re kpi chpam un tinmit Siria, aj Israel taj. —Jala xub'ij Jesús chke.
28Kunjel jumpa mnaq iy'o chpam rchoch Dios, echi' xikta' su xub'ij Jesús, mas xpi kiwal che, mal ustaj xikta' su kub'ij chke. 29Xiwa'ljik, xkesaj loq Jesús chpam tinmit, xikk'am b'i puwi un jyub' jachi kiykom wi un ktinmit. Jare kkaj ke wet kikk'eq loq chuchi' un swan. 30Per ni Jesús xaq x'ax chikxo'l, x'ek.
Ri Jesús xuresaj un itzel espíritu che jun achi
(Mr 1:21-28)
31Xuriq jun ij, ri Jesús jnam xiqaj b'i kuk' nk'aj udiscípulo chpam un tinmit Capernaúm, ukwent Galilea. Kitjin che ktojxik mnaq chla' ptaq uxnb'al ij. 32Ke xikmiyma' su ku'on che ktojxik, mal mas o uchu'ab' utzij kub'ij, peche utzij jun atb'altzij.
33Chla' chpam rchoch Dios o jun achi che xa o jun itzel espíritu che. Re ko xusik'b'aj rib', 34xub'ij:
—Chujay'a kanoq. ¿Su kawaj chqe, at Jesús aj Nazaret? ¿Le xa atpitnaq le' che usachik qawuch? In wit'am awuch, kinch'ob'o che at ri', at Tyoxlaj Utaqo'n Dios, —xche che.
35Ni Jesús xuyaj nitzel, xub'ij che:
—¡Tz'apij achi', xa match'aw chik, chiy'a kan nachi ri'! —xche che.
Ni nitzel espíritu xuk'eq b'i nachi chuchlew chikuch, xel b'i che nachi, ot jun k'ax xu'on kan che.
36Kunjel nk'aj mnaq poqlaj xkilo, xikb'ij chikuch: «¿Su kilwi un tziji' che mas junwi ktanik? Nachi ri', o atb'altzij pu'ab', o uchu'ab' kyutaq b'i nk'aj itzel taq espíritu. Ni ke kikkoj utzij, kiyel b'i chke mnaq», xicha'.
37Mas xel rson chrij sutaq kitjin Jesús che u'anik. Jumpa mnaq iy'o pukwent un tinmite', kunjel xo'pan rson kuk'.
Ri Jesús xuknaj uji' u Simón
(Mt 8:14-15; Mr 1:29-31)
38Tik'ri, xwa'laj Jesús, xel b'i chpam rchoch Dios, jnam xib'e kuk' nk'aj udiscípulo chirchoch u Simón. Ni nuji' ixoq u Simón mas yab', o nimlaj a' chrij. Ena xikb'och'ij ujlom Jesús rech kuto'o. 39Ri Jesús xqib' ruk' un yab', xitk'e' putlok', xuyaj a' chrij, xu'atij. Nun a' xel chrij. Chanim xwa'laj nixoq, xok che uya'ik chke su nmister chke.
Ri Jesús ik'i nk'aj yab' xyuknaj chpam uxnb'al ij
(Mt 8:16-17; Mr 1:32-34)
40Echi' xqaj ij, kunjel jumpa mnaq che o yab' kuk', xikk'am loq ruk' Jesús. Miskini' jaljoj uwuch yab'il o chke, ni Jesús xuya u'ab' pkijlom chikjunjnal, xyuknaj.#4:40 Ya'tal taj chke nk'aj aj Israel kiyichkun chpam uxnb'al ij ast retal k'e ij chrij jyub'. Xa rmal che xki'ej ast retal xqaj ij, tik'ri xikk'am b'i nk'aj yab' ruk' Qajaw Jesús. 41Soq ik'i mnaq che xesax itzel taq espíritu chke. Echi' xiyel b'i nk'aj itzel taq espíritu, ko xiksik'b'aj kib', xikb'ij: «Jare at atuK'jol Dios», xiche che. Ni Jesús xyuyajo, xuya taj chke kich'aw chrij Re,#4:41 Xa xraj taj che chanim kkit'amaj mnaq che Re jare Jun xchay rmal Dios, mal mja na kuriq tiempo rech kikch'ob'o su mer uptan Re. rmal mel kit'am che jare Re ri Cristo,#4:41 Cristo kel kub'ij jun chaytajnaq rmal Dios. Un tzij Mesías xaq jnam kilwi. xchay rmal Dios.
Ri Jesús xub'ij utzij Dios chla' Galilea
(Mr 1:35-39)
42Echi' xisqarik chkab' ij, xel b'i Jesús chpam un tinmit, x'e chpam jun lyar chla' jachi ot mnaq. Per ni mnaq xkitzkuj ast retal xiyo'pan ruk' jachi k'wi loq chi'. Jare kkaj ke kik'atij rech kel taj chikxo'l. 43Per ni Jesús xub'ij chke:
—Nmister kimb'e chik chpam nk'aj chik tinmit rech kimb'ij utzlaj taq rson chrij utzlaj atb'altzij rech Dios, mal jare niptan, xa rmal nutqom loq Qajaw Dios, —xche chke.
44Jala xu'on Jesús. Xb'in chla' Galilea soq rich'il ptaq nk'aj chik lyar iy'o pkikwent nk'aj aj Israel, kitjin che ub'ixik utzij Dios chke mnaq chpam nk'aj rchoch Dios.
လက္ရွိေရြးခ်ယ္ထားမွု
San Lucas 4: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global