San Lucas 23
23
Nk'aj mnaq xikk'am b'i Jesús chjuch nachi Pilato ub'i', che nim atb'altzij o pu'ab'
(Mt 27:1-2,11-14; Mr 15:1-5; Jn 18:28-38)
1Tik'ri xiwa'laj kunjel jumpa mnaq che kimlom kib' chla', xikk'am b'i Jesús chjuch u Pilato. 2Chla' xikmaj ukojik tzijtal chrij, jawa kikb'ij:
—Xqariq nachi ri' che kitjin che ktukik mnaq chpam qatinmit. Kusach kin'oj rmal utzij kub'ij chke. Re kub'ij che nmister taj kqatoj alkawal che u César, che jare un nimlaj atb'altzij. Re, soq kukoj rib' che Cristo,#23:2 Cristo kel kub'ij jun chaytajnaq rmal Dios. Un tzij Mesías xaq jnam kilwi. che jare un rey kitk'e' pujlom qatinmit, —xicha'.
3U Pilato xuta che Jesús, xub'ij:
—¿Le qtzij che at atrey atitk'al pkijlom iyaj Israel? —xche che.
Ri Jesús xub'ij che:
—Jare', jala peche kab'ij at, —xche che.
4Tik'ri', xub'ij u Pilato chke nk'aj ajk'mal b'e chke nk'aj rajchak Dios, soq xub'ij chke nk'aj chik mnaq iy'o chla':
—In, ot su kri' jun mak kinriq chrij nachi ri', —xche chke.
5Per ni ke xikkoj mas kchu'ab' che ub'ixik, xikb'ij:
—Re xa kitjin che ktukik kunjel jumpa mnaq iy'o chpam runjel un tinmit Judea, rmal utzij kub'ij chke. Jala xumaj loq u'anik chla' Galilea, ni le' soq jala kitjin che u'anik chi' Jerusalén, —xicha'.
Nk'aj mnaq xikk'am b'i Jesús chjuch un rey Herodes che tk'al pujlom un tinmit Galilea
6Echi' xuta u Pilato sutaq xikb'ij mnaq, xuta chik chke we aj Galilea Jesús. 7Echi' xurit'amaj che aj Galilea Jesús, xutaq b'i ruk' u Herodes, mal jare re atb'altzij chla' Galilea. U Herodes, pre o pnoq chla' Jerusalén ptaq ije' echi' x'antaj wari'.
8Echi' xuril u Herodes che xk'un Jesús ruk', jwert xki'kat che, mal mas ujer chik, jaret kraj re wet kuril uwuch, mal mas utom rson chrij Jesús. Xa rmal, kraj re kuril uwuch jun nimlaj k'utb'al ku'on Jesús. 9U Herodes mas xuk'ot uchi' Jesús, per ot jun tzij xuk'ul uwuch Jesús chjuch. 10Chla' ik'wi nk'aj ajk'mal b'e chke nk'aj rajchak Dios, rich'il nk'aj ajtojnel rech upxab' Dios. Ke mas xikkoj kchu'ab' che ukojik tzijtal chrij Jesús. 11U Herodes, rich'il nk'aj usoldado, xa xiktij tze' che Jesús, ch'anik xik'an che. Xikkoj nk'aj atz'yaq chrij che mas utz ka'yik, peche atz'yaq kukoj jun rey nim reqle'n. Jala xik'an che, xa rech kiktijb'aj tze'. Tik'ri ri', xiktaq chuloq jun b'welt chik ruk' u Pilato. 12Ujer xa iyajch'oj u Pilato ruk' u Herodes, per echi' xuriq un ij che jala xik'an che Jesús, xik'an amigo chikuch.
Tojb'al mak xik'an che Jesús ti xikkamsaj
(Mt 27:15-26; Mr 15:6-15; Jn 18:39–19:16)
13U Pilato xyusk'ij nk'aj ajk'mal b'e chke nk'aj rajchak Dios, rich'il nk'aj che o atb'altzij pik'ab', soq rich'il jumpa mnaq iy'o chpam tinmit; kunjel xyumolo. 14Ena xub'ij chke:
—Nachi ri', xik'am loq chinwuch, mal kib'ij ix che xa kitjin che ktukik mnaq. Per echi' xink'ot uchi' chiwuch, ot su kri' jun mak xinriq chrij peche kib'ij ix. 15U Herodes soq xuriq t umak, mal xutaq loq jun b'welt chik quk'. ¡Chiwlampe'! Ot su kri' umak nachi ri'. Tqal taj che, che kkamsxik. 16Xa rmal, xaq kink'ejsaj uwuch, tik'ri kintzaqpij b'ik, —xche chke. 17Jawa xub'ij u Pilato chke, mal echi' kuriq nim'ij Pascua, jare nmister che kutzaqpij b'i jun preso chikuch mnaq.#23:17 O nk'aj ujer taq wuj rech Tyox Wuj, manuscrito kb'ix che, che tz'ib'tal taj v. 17 chpam.
18Per ni mnaq, kunjel jnam xich'awik xiksik'b'aj kib' che ub'ixik, xikb'ij:
—Jare utz ktaq ukamsxik Jesús, jare ktzaqpix b'i u Barrabás chiquch che kqata chawe, —xicha'.
19U Barrabás kikjom pkarsa, xa rmal che kitk'e' pkijlom nk'aj mnaq che kik'an ch'oj ruk' atb'altzij chla' Jerusalén, soq rmal che re xa kamsnel. 20U Pilato xyuch'ab'ej jun b'welt chik nk'aj mnaq. Jare kraj re kutzaqpij b'i Jesús. 21Per ni ke xa kiyitjin na che usik'b'axik kib', xikb'ij:
—¡Chirpa chjuch jun cruz! ¡Chirpa chjuch jun cruz! —xicha'.
22Churox mul xub'ij chik u Pilato chke:
—¿Su rmal lo? ¿Su mak unom nachi ri'? In ot su kri' jun mak kinriq chrij che tqal che kkamsxik. Xa rmal, xaq kink'ejsaj uwuch, tik'ri kintzaqpij b'ik, —xche chke.
23Ni ke mas xikyak uch'ojil, xa kiksik'b'aj chin kib' che ub'ixik che krip Jesús chjuch jun cruz che ukamsxik. Jnam xikb'ij kuk' nk'aj ajk'mal b'e chke nk'aj rajchak Dios, ast retal xya chke su xikta'. 24Xa rmal, u Pilato xu'on atb'altzij pujlom Jesús jala peche kkaj ke. 25Xutzaqpij b'i u Barrabás chikuch che xikta che. Nachi le' kjom pkarsa xa rmal ch'oj unom ruk' atb'altzij, soq rmal che xa kamsnel. U Pilato jare xujach Jesús pik'ab' rech kik'an che su kkaj ke kik'an che.
Ri Jesús xrip chjuch jun cruz
(Mt 27:32-44; Mr 15:21-32; Jn 19:17-27)
26Echi' kitjin che uk'amik b'i Jesús rech kikrip chjuch jun cruz, xikchap b'i jun achi chpam b'e, Simón ub'i', re jala kpi chpam un tinmit Cirene. Chutaq jyub' upitik wi, ti xiktaqo rech kutelej b'i un cruz, kitrij chrij Jesús. 27Ik'i mnaq itrin chrij. Iy'o nk'aj ixqib' chikxo'l che su kiksik'b'aj kib' che u'ej, mal mas kiyib'son che Jesús. 28Ri Jesús xutza'mej rib', xyuka'yej, xub'ij pan chke:
—Ixqib' ixaj Jerusalén, xaq mixo' chwi'n. Jare chiw'ej iwib' ix, soq jare chixo' chke iwal rmal k'ax che kpi na pijlom. 29Mal kurqan ij kikb'ij mnaq: “Utz ke ixqib' chintaq kiyikun taj kikya kal, utz ke ixqib' chintaq kyalan taj, utz ke ixqib' chintaq ot kal kiktub'saj”, kicha'. 30Tik'ri k'ut, kikmaj ub'ixik mnaq chke nmaq taq jyub': “¡Chixtzaq loq chqij!” kicha na. Soq kikb'ij chik chke ko'koj jyub': “¡Chujich'qu' rech kujkamik!” kicha na. Jawa kikb'ij na mnaq, mal mas nim un k'ax che kpi na. 31Mal, we jala kik'an che un rax che', xa pyor b'ari kik'an che un chqij che'.#23:31 Kel kub'ij: we jala kik'an che Qajaw Jesús che ot umak, peche un rax che', xa pyor b'ari kik'an chke jumpa mnaq che o kmak, peche un chqij che'. —Jala xub'ij Jesús chke nk'aj ixqib' che mas kiyo'ik.
32Iy'o keb' chik achjab' xikk'am b'ik, rech jnam kikkamsaj ruk' Jesús. Keb' achjab'e' o kmak kinom chjuch atb'altzij. 33Xikk'am b'i ruk' jun laj jyub' che «Ub'qil Ujlom Kamnaq» kb'ix che. Echi' xiyo'pan chla', xikrip Jesús chjuch jun cruz, soq xikrip keb' itzel mnaq chla' chjuch kicruz ptaq utlok' Jesús; jun xrip pu'b'im, nun chik xrip pumox.
34Echi' xikrip Jesús chjuch un cruz, Re xch'aw ruk' Dios, xub'ij: «NQaw, kyu la kmak, mal xa kit'am taj su kiyitjin che u'anik», xcha'.
Ni nk'aj soldado xikmaj u'anik sak, jare ritz'yaq Jesús xikkoj psak rech kikkilo chin kuch'ak b'i chke. 35Ni nk'aj mnaq xa itk'al chla', kiyitjin che rilik. Ni nk'aj che o atb'altzij pik'ab' xa xiktij tze' che Jesús, xikb'ij:
—Re, xyuto' nk'aj chik chpam k'ax; ni le', chut'o rib' Re mismo rech alnik we qtzij che jare Re Cristo,#23:35 Cristo kel kub'ij jun chaytajnaq rmal Dios. Un tzij Mesías xaq jnam kilwi. xchay rmal Dios, —xicha'.
36Ni nk'aj soldado soq xa xiktij tze' che Jesús. Xiqib' koq ruk' y xkitzjuj ch'amlaj taq vinagre rech u'al uva che. 37Tik'ri xikb'ij che:
—We qtzij che at atrey atitk'al pkijlom mnaq iyaj Israel, chat'o b'a awib' at atkel, —xiche che.
38O nk'aj tzij tz'ib'tal chjuch jun tz'lom kikjom chjuch jun cruz pujlom Jesús. Nk'aj tzij jare tz'ib'tal piktzij aj griego, soq piktzij aj latín, y soq piktzij aj hebreo.#23:38 O nk'aj ujer taq wuj rech Tyox Wuj manuscrito kb'ix che, che tz'ib'tal taj Nk'aj tzij jare tz'ib'tal piktzij aj griego, soq piktzij aj latín, y soq piktzij aj hebreo chpam un versículo ri. Jawa kub'ij nk'aj tziji': «Jare nachi ri' Rey tk'al pkijlom aj Israel», kcha'.
39O jun chke keb' itzel mnaq che jnam xirip ruk' Jesús, xuyo' Jesús, xub'ij che:
—We qtzij che at atCristo, xchay rmal Dios, chit'o awib' at, soq chujat'o qo'j, —xche che.
40Per nun chik itzel mnaq xuyaj un rich'il, xub'ij che:
—¿Le xa kax'ej t awib' chjuch Dios? Qo'j xaq jnam kitjin uk'ejsxik qawuch ruk' Re. 41Per qo'j tqal chqe kk'ejsax qawuch, mal jare kujtjin che utojik qamak qanom; per ni nachi ri' ot su kri' umak Re unom. —Jala xub'ij che un rich'il.
42Tik'ri xub'ij chik che Jesús:
—Qajaw, chin'na'taj che la echi' kmaj lu'anik utzlaj atb'altzij, —xche che.
43Ri Jesús xub'ij che:
—Ruk' saqlaj tzij kimb'ij chawe che mismo kmik katikje wuk' chla' chkaj ruk' Dios, —xche che.
Ri Jesús xkamik
(Mt 27:45-56; Mr 15:33-41; Jn 19:28-30)
44Ptaq kab'aljuj (12) chik unom ij ti xok qu'm chjuch runjel uwuchlew.#23:44 Tyox Wuj kch'aw chrij uwaq (6) hora. Uwaq hora kel kub'ij ptaq kab'aljuj unom ij (12:00). Jala unom qu'm ast retal xu'on a las tres hora rech uqajb'al ij.#23:44 Tyox Wuj kch'aw chrij uwaq (6) hora ast retal xuriq ub'elej (9) hora. Jarewa kel kub'ij 12:00-3:00 rech uqajb'al ij. 45Xu'on qu'm uwuch ij. Xuxer rib' un nimlaj k'ul pink'aj che mas pim, che kutas upam nimlaj rchoch Dios. 46Tik'ri ko xusik'b'aj rib' Jesús, xub'ij:
—NQaw, kinjach wanma' pi'ab' la, —xche che.
Xaw xb'itaj rmal, xel ranma', xkamik. 47Echi' xuril nachi che tk'al pkijlom nk'aj soldado sutaq x'antjik, xunmirsaj u'ij Qajaw Dios, xub'ij:
—Saqlaj tzij, nachi ri' puro utzlaj achi, ot umak, —xcha'.
48Ik'i nk'aj mnaq kimlom kib' che rilik sutaq kitjin u'anik chla'. Echi' xkilo sutaq x'antjik, mas kiyib'sonik xiyitzlij b'ik, xikmaj uch'ayik uwukk'u'x ruk' k'ab', k'utb'alre che mas kiyib'sonik. 49Per kunjel jumpa mnaq che kit'am uwuch Jesús, rich'il jumpa nk'aj ixqib' che kitrimb'em loq Jesús jala Galilea, naj xikanaj kan ke che Jesús, xaq xikka'yej pnoq ti xkamsxik.
Ri Jesús xmuqik
(Mt 27:57-61; Mr 15:42-47; Jn 19:38-42)
50O jun achi mas utzlaj achi, Jse ub'i', sk'umlaj achi. Re, jala kpi chpam un tinmit Arimatea, pukwent Judea. Jare jun chke nk'aj achjab' che nim atb'altzij o pik'ab' chpam nimlaj rchoch Dios. 51U Jse soq ri'em utzlaj atb'altzij rech Dios. Re, jun taj kuk' nk'aj rich'il che xik'an k'ax che Jesús. Ustaj xurilo sutaq xik'an ke. 52Ena x'e u Jse ruk' u Pilato che utayik loq ucuerpo Jesús che. 53Tik'ri x'e che uqasxik loq ucuerpo Jesús chjuch un cruz, xupis chpam jun k'ul che mas utz ka'yik. Tik'ri xuya chpam jun jul k'tom chpam jun nim ab'aj che ot jun kamnaq mqum chpam. 54Echi' kitjin u'anik wari', jare ij kikyijb'a kib' aj Israel, rech kikk'ul ij rech uxnb'al ij, che xa chkab' ij kuriqo.
55Jumpa nk'aj ixqib' che kitrimb'em loq Jesús jala Galilea, ke xiyitrij b'i chrij u Jse rech kikla' jachi kmuq Jesús, y xkilo su mow x'an che ti xya ucuerpo chpam un jul. 56Echi' xiyitzlij loq, xikmaj uyijb'axik k'ok'laj taq kumb'al che puro ki' ruxlab', rich'il aceite, rech kikjik ucuerpo Jesús chpam. Chkab' ij xiyu'xnik, mal jare uxnb'al ij, jala peche kub'ij chpam upxab' u Moisés.
လက္ရွိေရြးခ်ယ္ထားမွု
San Lucas 23: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global