San Lucas 13
13
Ri Jesús xub'ij chke mnaq che nmister kikya kan u'anik kmak
1Chpam un tiempo le' iy'o nk'aj mnaq chla' xikya rson che Jesús su unom u Pilato. Xikb'ij che, che iy'o nk'aj achjab' iyaj Galilea xyukamsaj u Pilato echi' kiyitjin che usipxik nk'aj tiko'n chjuch Dios che kkamsam. Ena, jnam xb'in kijk'el nk'aj mnaq ruk' kijk'el nk'aj tiko'n, xuyuj rib' nk'aj kik'. Jala xikb'ij che Jesús. 2Ni Jesús xub'ij chke: «¿Le kib'ij ix che xa mas o kmak nk'aj achjab'e' chikuch nk'aj chik mnaq iyaj Galilea? ¿Le kichomaj ix che xa rmal kmak kinom che jala x'an che kkamsxik? 3In kimb'ij chiwe che rmal taj. Per we kik'ex t ichomnik ix chpam iwanma', we kiya t kan u'anik imak, soq jala kiriqo, ksachtaj iwuch iwunjel. 4Iy'o waxaqljuj (18) mnaq xikamik ti xtzaq loq un tak'tik ja chkij che Siloé ub'i'. ¿Xatb'a kib'ij ix che jala x'antjik, rmal mel ke mas nim kmak kinom chikuch nk'aj chik mnaq iy'o Jerusalén? 5In kimb'ij chiwe che rmal taj. Per we kik'ex t ichomnik ix chpam iwanma', we kiya t kan u'anik imak, soq ksachtaj iwuch iwunjel». Jala xub'ij Jesús chke mnaq.
Ri Jesús xub'ij jun k'amb'al n'oj chrij jun uch'el prut che kiwchin taj
6Ri Jesús xub'ij jun chik k'amb'al n'oj chke mnaq, xub'ij: «O jun achi utkom jun uch'el prut, higo ub'i', chpam un rlew. Re x'e che rilik we o uwuch rech kuxluj, per ot su kri' uwuch xuriqo. 7Ena xub'ij che najchjil tiko'n: “Chiwlampe', uxib' jnab' ntaqem che kimpitik kinwla' we o uwuch un che' ri', per ot jun b'welt kinrqa' che o uwuch. ¡Utz kaket b'ik! ¿Su uptan o chi' we xaq tob' ku'on latz' che ulew?” xche un rjaw che. 8Ni numoso xub'ij che: “Y'a kan la che jnab'i', rech o mow kink'ot rij, kinkoj mes chuxe'. 9We jala kin'an che, pent kiwchinik. Niw xa kiwchin taj, tik'ri utz kket b'ik”, xche che un rjaw». Jarela jun k'amb'al n'oj xub'ij Jesús chke mnaq.
Ri Jesús xuknaj jun ixoq chpam jun uxnb'al ij
10O jun b'welt chpam jun uxnb'al ij, kitjin Jesús che ub'ixik utzij Dios chke mnaq chpam jun rchoch Dios. 11O jun ixoq chla' waxaqljuj (18) jnab' b'enaq chik che, che urqom nuyab' che xa rmal jun itzel espíritu. Re xa luklik chik kb'inik, kikun t chik kusuk'maj rib'. 12Echi' xuril Jesús, xusk'ij ruk', xub'ij che:
—Ixoq, xatik'chojik, ot chayab', —xche che.
13Xuya u'ab' pujlom. Ena, mismo chanim xusuk'maj rib' nixoq, y xumaj unmirsaxik u'ij Qajaw Dios.
14Per ni nachi che tk'al pujlom un rchoch Dios, mas xpi riwal, mal xa chpam jun uxnb'al ij xuknaj Jesús un yab'. Ena xub'ij chke mnaq:
—O waqib' (6) ij chpam un semana rech o mow ki'an ichak. Jare utz kixpi chpam waqib' (6) ije' rech kixknaxik, mal ustaj we xa chpam uxnb'al ij, —xche chke.
15Ena xub'ij Qajaw Jesús che:
—¡Ix xa keb' iplaj! Iwunjel ix jumpa o ib'oyix rich'il ib'uru, ¿le ot mow kituru, kiwesaj loq pikral y kiyuqej b'ik rech kiy'a kijron chpam uxnb'al ij? 16Ni nixoqi', che jare ri'y umam u Abraham, ¿le tqal t k'ut che, che kiknax chpam uxnb'al ij rech kel pu'ab' nitzel? B'enaqch waxaqljuj (18) jnab' che, che urqom un yab'il, che peche mow ximtal rmal nitzel Satanás, —xche Jesús chke.
17Echi' jala xub'ij Jesús, jwert xik'ixik kunjel jumpa mnaq che xa iyajch'oj ruk'. Per jwert xiki'ktik kunjel nk'aj chik mnaq che kiyitjin che rilik jumpa nk'aj nmaq taq k'utb'al kitjin Jesús che u'anik.
Ri Jesús xub'ij jun k'amb'al n'oj chrij jun ub'a' tiko'n, mostaza ub'i'
(Mt 13:31-32; Mr 4:30-32)
18Ri Jesús xub'ij: «¿Su ruk' kinjnamsaj utzlaj atb'altzij rech Dios? ¿Chinchke jun k'amb'al n'oj kimb'ij na rech k'alnik? 19Jare jnam ruk' peche jun ub'a' tiko'n “mostaza” kb'ix che. Jun mnaq kuchay jun ub'a' mostaza, kutik chpam rlew. Kpo'ik kk'iyik, nimlaj che' kilik. Ni nk'aj tz'kin kik'an ksok xo'l nk'aj u'ab'». Jala xub'ij Jesús chke.
20Soq xub'ij chik Jesús: «¿Sut ruk' kinjnamsaj wi ri utzlaj atb'altzij rech Dios? 21Xaq jnam ruk' peche ch'am kuya jun ixoq ruk' k'ej ti ku'on kaxlenwa. Kutuk ch'am ruk' uxib' nmaq k'olb'al rech pajb'al k'ej, rech kuknaj runjel jumpa k'ej, runjel ku'on ch'am, rech kikunik kuwa'lsaj nk'aj kaxlenwa». Jala xub'ij Jesús chke.
Ri Jesús xub'ij che nmister kuj'ax chpam nuchija che xa ch'in uwuch
(Mt 7:13-14,21-23)
22Kitjin Jesús che ub'e rech nojim ko'pan chla' Jerusalén. Kitjinik k'ax ptaq kanton rich'il ptaq tinmit, kitjin che ktojxik mnaq che utzij Dios jachi taq k'ax wi. 23O jun mnaq xuta che, xub'ij:
—Qajaw, ¿le xa ikeb' uxib' mnaq kito'tjik rech kikriq kk'asnmal ruk' Dios che ot uk'isik? —xche che.
Ni Jesús xub'ij chke:
24—China jwers kix'ax chpam nuchija che xa ch'in uwuch. Kimb'ij chiwe, che ik'i mnaq kkaj ki'axik, per kiyikun taj kiyok chla'. 25Un rjaw ja, we utz'apim chik nuchija, kutor t chik chiwuch, ixjumpa ix ix'o kan chija. Miskini' kik'osk'a koq nuchija y kib'ij: “Tro la nuchija chiquch rech kujok b'ik”, kixche che. Per re kub'ij chiwe: “In kinch'ob' t iwuch, wit'am taj jachi kixpi wi”, kche chiwe. 26Ni ix kimaj ub'ixik che: “Qo'j qatjom qawa y qatjom qami'na' uk' la. Soq xitjoj la mnaq xo'l taq b'e chpam qatinmit”, kixche che. 27Ni re kub'ij chik chiwe: “Kimb'ij chiwe che kinch'ob' t iwuch, wit'am taj jachi kixpi wi. Kixel chi' wuk', iwunjel ixjumpa ix, che xa jare kixtjin che u'anik jumpa sutaq'ik che xa rech itzel”, kche chiwe.
28»Ix kixo' na rmal b'is, soq kiqch'uch'ej iwure rmal iwiwal echi' kiwilo che ixoknaq taj chla' ruk' Qajaw Dios, chla' jachi k'wi nk'aj qari'jal, che jare u Abraham, rich'il u Isaac, soq rich'il u Jacob. Soq kiwil kwuch kunjel jumpa nk'aj ajb'il utzij Dios chla' che iyoknaq chpam utzlaj atb'altzij rech Dios. 29Paja kipin mnaq. O mnaq kipi na pusuk'mal jachi kel loq ij rich'il psuk'mal jachi kqaj wi, soq o mnaq kipi ptaq utlok' ij. Kunjel kikriq kib' chla' chkaj chpam nim'ij jachi k'wi Qajaw Dios. Kunjel jumpa mnaq iyoknaq chpam utzlaj atb'altzij rech Dios, jare kiyikb'e' chu mixa, kiwa'ik. 30Iy'o mnaq che xa taq ch'in kika'y chanim, peche ot keqle'n, jare nma'q kika'y chla' ruk' Dios. Iy'o nk'aj chik mnaq che nmaq keqle'n kika'y chi' chuchlew, per xa ch'in kika'y chla' ruk' Dios. —Jala xub'ij Jesús chke mnaq.
Ri Jesús xib'son kmal mnaq iy'o chpam un tinmit Jerusalén
(Mt 23:37-39)
31Mismo ij xipi keb' uxib' chke nk'aj fariseo ruk' Jesús, ena xikb'ij che:
—Chatel b'i chi', mal u Herodes kraj katukamsaj, —xiche che.
32Ni Jesús xub'ij chke:
—Nachi le' peche umow jun yak. Jix jib'ij che, che jare u'jil kmik rich'il chwe'q kinwesaj nk'aj itzel taq espíritu chke mnaq y kyinknaj, ast kb'ij tik'ri kink'is nchak. 33Per nmister che kintjin na che nb'e pwa'ij, chwe'q, y kb'ij, ast retal kino'pan Jerusalén. Kinchkun na ast retal kino'pan chla', mal jun ajb'il utzij Dios, nmister che chpam tinmit Jerusalén kkam wi.
34»¡Ay, ix iximnaq ixaj Jerusalén! Xa kyikamsaj nk'aj ajb'il utzij Dios, xa kik'eq ab'aj chke nk'aj utaqo'n Dios che tqom loq iwuk'. K'i b'welt xwaj in wet xixinmolo rech kixinto'o, jala peche ku'on jun ak', kyumol taq ral kyuya chuxe' uxik'. Ni ix xiwaj taj. 35Kiwil na, ri itinmit kkanaj kanoq utkel, mal Dios kel b'i chixo'l. Kimb'ij chiwe che kiwil t chinwuch in, ast retal echi' kuriq ij che kink'un na iwuk'. Chpam un ije', kib'ij na: “¡Nimlaj utzil pujlom Jun che tqom loq rmal Qajaw Dios!”#Sal 118:26. kixcha na. —Jala xub'ij Jesús chke mnaq.
လက္ရွိေရြးခ်ယ္ထားမွု
San Lucas 13: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global