San Lucas 10
10
Ri Jesús xyutaq b'i setenta mnaq che ub'ixik utzij Dios
1Echi' antajnaq chik wari', ri Qajaw Jesús xyuchay nk'aj chik mnaq; 70#10:1 O nk'aj ujer taq wuj manuscrito kb'ix che, che kikb'ij 72 mnaq xyutaq b'i Jesús. Soq jala chpam versículo 17. nk'aj chik xyuchayo. Chkakab' xu'on chke; xyunab'saj b'i chjuch, xyutaq b'i chpam runjel jumpa tinmit rich'il jumpa lyar che k'e na Re chpam. 2Xub'ij chke: «Mas ik'i nk'aj mnaq che kkaj kikta ntzij, jala peche nk'aj ab'ix che mas kiwchinik. Nim ri jach', per ni mnaq che kik'an uchak tiko'n, xa ikeb' uxib'. Xa rmal, chita che un Rjaw tiko'n rech kyutaq loq ajchkib' che kmolik mnaq rech kiyok ruk' Dios, jala peche kik'an nk'aj ajchkib' echi' kikmol uwuch tiko'n.#Mt 9:38.
3»Jix ix pchak, in kixintaq b'ik. Jare ix peche mow ixchij ix'o chikxo'l utiw. Kixoqtaxik peche kiyoqtax taq chij kmal nk'aj utiw. 4Xaq mik'am b'i uk'olb'al irjil, mowni ikuxtar rech ub'itaqiwe, mowni keb' chik ixjab'; ot su kik'am b'ik ti kimaj ib'e. Xa mib'oy iwib' che tzij ptaq b'e, rech kixb'oytaj taj. 5Pachinchke ja jachi kixok wi, nab'e kiya rtzil kwuch mnaq iy'o pja, chib'ij chke: “Jaretb'a ri Qajaw Dios kuya nimlaj utzil chixo'l”, kixche chke. 6We o jun mnaq chla' che kraj kikje utzil ruk', chuk'ma kanoq. Per we ot jun kraj kuk'amo, iwuk' ix kkanaj kan wi ri utzil. 7We xixk'lax kmal mnaq chpam jun ja le', chixkanaj kan chla'. Chitja' su kya chiwe rech iwa, rich'il su kya chiwe rech imi'na', mal tqal che jun ajchak kya tojb'alre. Per xa mik'ex iposada, xaq chla' kixkje wi jachi xixok wi.#Mr 6:10.
8»We o jun tinmit kixo'pan chpam che kixkik'laj mnaq, chitja' su kikya chiwe. 9Chiknaj jumpa yab' iy'o chla', chib'ij chke: “Ya mer kuriq ij che kumaj utzlaj atb'altzij rech Dios pijlom, xa nqaj chik k'wi chiwe”, kixche chke. 10Ni we o jun tinmit kixo'pan chpam che kixik'lax taj kmal mnaq, chixel loq xo'l taq b'e, chib'ij: 11“Kujel chub'i chpam itinmit, mal xikoj t utzij Dios. Ast retal kqatota kanoq jumpa ulew knoj che qaqan chi' chpam itinmit, k'utb'alre che ust inom chjuch Dios. Chiwit'amaj wari': ri utzlaj atb'altzij rech Dios, xa nqaj chik k'wi chiwe”. Jala kib'ij chke mnaq», xche Jesús chke. Tik'ri xub'ij chik chke: 12«Kimb'ij k'ut chiwe che echi' kuriq ij che k'an atb'altzij pkijlom kunjel jumpa mnaq, mas nim k'ax kikriq mnaq ti kk'ejsax kwuch che iy'o chpam un tinmiti' che kixkik'laj taj. Nim na k'ax kikriqo chjuch k'ejsb'al kwuch xikriq nk'aj mnaq chpam un tinmit Sodoma#Gn 19:24-25. rmal kmak kinom». Jala xub'ij Jesús chke.
Ri Jesús xub'ij su kikriq na mnaq iy'o chpam nk'aj tinmit che xikkoj t utzij Dios
(Mt 11:20-24)
13Kch'aw na ri Jesús, kub'ij: «¡T'ob' iwuch ixjumpa ix'o chpam un tinmit Corazín! ¡T'ob' iwuch ixjumpa ix'o chpam un tinmit Betsaida! Wet x'an nmaq taq k'utb'al chpam un tinmit Tiro rich'il chpam un tinmit Sidón, jala peche antajnaq iwuk' ix, ujer tri xikk'ex kchomnik mnaq chpam kanma', ujer tri xikkoj kitz'yaq che o retal, k'utb'alre che kiyib'son rmal kmak. 14Xa rmal, echi' ko'pan ij che k'an atb'altzij pkijlom kunjel jumpa mnaq, mas nim k'ejsb'al iwuch kiriq na chjuch kikriq mnaq xikje chpam un tinmit Tiro rich'il chpam un tinmit Sidón ujer. 15Ni ix ix'o chpam un tinmit Capernaúm, mas kinmirsaj iwib'; ix kib'ij che ya mer kix'e chkaj. Xani ya mer kixqasax pixb'alb'a a', rmal naj ixk'wi che Dios». Jala xub'ij Jesús chke.
16Tik'ri, xub'ij chik Jesús chke udiscípulo: «Chin jun kutatb'ej su kib'ij ix che, jare kilik che kutatb'ej ntzij in. Chin jun che xa kixuxtuj, kilik che jare in knuxtuj. Chin jun knuxtuj in, jare kuxtuj Qajaw Dios che xnutaq loq». Jala xub'ij Jesús chke udiscípulo.
Xiyitzlij loq 70 mnaq ruk' Jesús che xyutaq b'i che ub'ixik utzij Dios
17Echi' xiyitzlij loq oxk'al ljuj (70) mnaq ruk' Jesús, jwert kiki'ktik, xikb'ij che Jesús:
—Qajaw, mas nim chu'ab' la, xaq ruk' che kqab'ij b'i' la, su kikkoj qatzij nk'aj itzel taq espíritu, —xiche che.
18Ri Jesús xub'ij chke:
—Echi' x'antaj wari' iwmal, jare xinwilo xtzaq loq nitzel Satanás chkaj, jala unom xtzaqik peche ktzaq jun rayo chkaj. 19¡Chitampe'! In niy'om ichu'ab', rech ot k'ax kiriqo we kitk'alb'ej itzel taq uy' peche kmatz rich'il sna'j. Niy'om ichu'ab' rech kixkunik kich'ako runjel jumpa uchu'ab' nitzel, ot su kri' jun k'ax kiriqo. 20Per xaq mixki'kat che, che xaw kikkoj itzij nk'aj itzel taq espíritu. Jare chixki'kat mas che, che tz'ib'tal ib'i' chpam wuj chla' chkaj ruk' Dios. —Jala xub'ij Jesús chke.
Ri Jesús mas xki'ktik xch'aw ruk' Dios
21Echi' xk'is utzij kuk' 70 mnaq, xki'kat Qajaw Jesús rmal Uxlab'xel, xumaj utzij ruk' Dios, xub'ij: «Kinmirsaj ij la nQaw, lal Rjaw kaj lal Rjaw ulew. Kintyoxij che la, mal xa xwaj uwuch la ri chomb'al la chikuch mnaq che mas o kin'oj kikb'ij, che mas o kit'am, rech kikch'ob' taj. Ni mnaq che ot mas kit'am kikb'ij, che peche mow ak'lab', y'om la chke rech mas kikch'ob'o. Jala x'an la nQaw, mal jala xuchomaj anma' la». Jala xub'ij Qajaw Jesús che Qajaw Dios.
22Tik'ri xub'ij chik: «Jare nQaw ujchom chwe runjel jumpa sutaq'ik olik. Ot chin jun mnaq rit'am nchin in che uK'jol Dios, xaq xaw qaQaw Dios rit'am. Soq ot chin jun mnaq rit'am chin qaQaw o chla' chkaj, xaq xaw in nuK'jol Dios wit'am. Soq rich'il chinoq kwaj kink'ut qaQaw chikuch, xaq xaw ke kit'am». Jala xub'ij Jesús.
23Tik'ri xyuka'yej nk'aj udiscípulo, xub'ij chke kitkel: «Utz ke chintaq mnaq che ya'tal chke kikkilo sutaq kin'ano che kixtjin ix che rilik chanim. 24Kimb'ij chiwe che ik'i nk'aj ajb'il utzij Dios ujer rich'il k'i nk'aj chik mnaq che o nmaq atb'altzij pik'ab', xkaj wet xikkilo su kixtjin ix che rilik chanim, per xikkil taj. Xkaj wet xikta' su kixtjin che utatb'xik, per xya taj chke». Jala xub'ij Jesús chke udiscípulo.
Ri Qajaw Jesús xub'ij jun k'amb'al n'oj chrij jun utzlaj achi kpi chla' Samaria
25Xuriq jun ij, o jun ajtojnel rech atb'altzij kech aj Israel. Re xwa'ljik xitk'e' chjuch Jesús, xuk'ot uchi' rech kurilo we o jun tzij kub'ij Jesús che ustaj. Ena xuta che, xub'ij:
—Ajtojnel, ¿chinchke nmister kin'ano, rech kinriq jun nk'asnmal che ot uk'isik? —xche che.
26Ri Jesús xub'ij che:
—¿Su tz'ib'tal chpam upxab' Dios? ¿Su kub'ij che kask'ij uwuch? —xche che.
27Ni nachi xub'ij:
—Chpam upxab' Dios kub'ij: “Chil'oj Qajaw Dios ruk' runjel awanma', ruk' runjel ak'u'x, ruk' runjel achu'ab', ruk' runjel apinsar”. Soq kub'ij: “Chil'oj arjil atz'qat jala peche kal'oj awib' at”. Jala kub'ij, —xche che.
28Ri Jesús xub'ij che:
—Jare', utz xab'ij. We jala katitjin che u'anik, kariq ak'asnmal ruk' Dios, —xche che.
29Ni nachi jare kraj re che kurit'amaj Jesús che utzlaj mnaq re. Xa rmal, xuta che Jesús:
—¿Chinchke jun mnaq che jare nirjil nitz'qat? —xche che.
30Ri Jesús xumaj ub'ixik jun k'amb'al n'oj, ena xub'ij che:
—O jun achi xqaj b'i chpam un tinmit Jerusalén, k'e chpam un tinmit Jericó. Kitjin che ub'e ti xyuk'laj keb' uxib' el'om xo'l b'e. Ke xikchapo, xikkel'aj runjel jumpa ruk'am, rich'il ritz'yaq ukjom xkesaj b'i chrij. Jwert xikch'ayo, ya mer xikkamsaj kanoq. Echi' x'antaj kan kmal, xib'ek. 31Xu'ono che o jun rajchak Dios aj Israel x'ax chla' jachi k'wi nachi che urqom k'ax. Ni re, echi' xuril nachi che soktajnaq, xa xusol ub'e chjuch, xuto' taj. 32Soq o jun chik achi x'ax chla', che levita#10:32 Jare ajchak chpam nimlaj rchoch Dios jala Jerusalén. kb'ix che. Echi' xuril nachi che soktajnaq, soq xa xusol ub'e chjuch. 33Per o jun achi aj Samaria kitjin che ub'e chla'.#10:33 Nk'aj mnaq aj Samaria ustaj xkil nk'aj mnaq aj Israel. Echi' xo'pan chla' jachi k'wi nachi che soktajnaq, mas xel uk'u'x che. 34Ena, xqib' ruk' nachi, rech kuknaj. Xukoj kumb'al che nk'aj soktajnaq, che jare aceite rich'il u'al uva. Xuxim nk'aj soktajnaq ruk' k'ul. Tik'ri xuyako, xura'nsaj chrij nukej, xuk'am b'i chpam jun posada, xuchjij chla'. 35Chkab' ij, echi' b'enam ku'ono k'ek, xuresaj loq urjil y xutoj kan kposada che un rjaw ja.#10:35 Tyox Wuj kch'aw chrij keb' denario. Jun pwaq che denario kb'ix che, jare jun saq pwaq che kikjom ujer. Rjil peche kuch'ak jun achi che keb' ij chak jare keb' denario. Tik'ri xub'ij che: “Chichjij nachi chwe ri'. Runjel jumpa kasach uwuch chrij, kintoj chawe echi' kintzlij loq”, xche che. —Jarewa xub'ij Jesús che najtojnel rech atb'altzij kech aj Israel.
36Tik'ri xuta che:
—¿Su kab'ij at? ¿Chin jun chke uxib' achjab'i' che qatz jare urjil utz'qat nachi chpom kmal nk'aj el'om? ¿Chin jun chke che mas k'ax uk'u'x che? —xche che.
37Re xub'ij:
—Jare jun che xuto'o, rmal xel uk'u'x che, —xche che.
Tik'ri xub'ij Jesús che:
—Jala china at peche xu'on re. China utz chke kunjel jumpa mnaq, —xche che.
Ri Jesús xo'pan chikchoch il Marta rich'il i Mri'y
38Ri Jesús rich'il nk'aj udiscípulo kiyitjin che kb'e ib'enaq. Jala kinom xiyo'pan chpam jun kanton jachi k'wi jun ixoq, Marta ub'i'. Re, xuk'laj Jesús chirchoch, xukoj pja kuk'. 39Il Marta o jun ucha' Mri'y ub'i'. I Mri'y xikb'e' qaj chwu rqan Jesús rech kutatb'ej sutaq kub'ij. 40Nil Marta kitjinik ku'on utz che wa, mas latz' uwuch rmal nk'aj rpi's. Ena xqib' ruk' Jesús, xub'ij che:
—Qajaw Jesús, ¿le kel t k'u'x la chwe che xa nitkel knuya kan ncha' chjuch nk'aj qapi's? B'ij la che, che knuto'o, —xche che.
41Ri Qajaw xub'ij che:
—Marta, Marta, mas katib'son rmal nk'aj iwpi's, che k'i u'anik kraj. Mas b'enaq ak'u'x ruk'. 42Per xa jun uwuch nmister olik, che jare kuta ntzij. Ni Mri'y jare xuchayo chinchke mas nmister, ot b'a jun mnaq kuresaj un utzil urqom rmal, —xche Jesús che.
လက္ရွိေရြးခ်ယ္ထားမွု
San Lucas 10: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global