San Juan 16
16
1Ri Jesús xub'ij chik chke: «Ximb'ij nk'aj tzij chiwe ri', rech ku'on t keb' ik'u'x chpam ikojb'al. 2Kixesax nub'i chpam rchoch Dios. Ko'pan na ij che chin jun kixukamsaj, kub'ij wa' che ruk' che jala ku'ono, xa uchak ku'on ruk' Dios. 3Jala kik'ano mal xa kit'am t uwuch nQaw, soq kit'am t nwuch in. 4Kinab'saj pnoq ub'ixik chiwe, rech echi' ko'pan ij che k'antaj wari', kna'taj chiwe che b'itajnaq chik wmal.
Jarewa uchak Tyoxlaj Uxlab'xel
»Ot ximb'ij chiwe nab'e, echi' xqamaj qachak iwuk' mal n'o na iwuk'. 5Ni le' kimb'e jala ruk' chin xnutaq loq, per ot jun chiwe kuta chwe: “¿Jachi k'e la?” 6Rmal su ximb'ij chiwe, xnoj iwanma' che b'is. 7Qatz qtzij kimb'ij chiwe, utz kiriqo we kimb'ek, mal mitji kimb'ek, ot mow ri' kpi Jun iwuk' rech kukub'saj ik'u'x, che jare Tyoxlaj Uxlab'xel. We kimb'ek, kintaq nuloq chiwe. 8Echi' kpi Tyoxlaj Uxlab'xel, Re kuk'ut chikuch mnaq iyaj uwuchlew che o kmak, soq kuk'ut chikuch su qatz kilwi un sk'umlaj k'asnmal chjuch Dios, soq kuk'ut chikuch che o jun ajb'nal atb'altzij pkijlom. 9O kmak mnaq iyaj uwuchlew, mal kiyikjon taj chwe. 10Ri Tyoxlaj Uxlab'xel kuk'ut chikuch mnaq iyaj uwuchlew su kilwi un sk'umlaj k'asnmal chjuch Dios. Jala kuk'ut chikuch, mal in kimb'e ruk' nQaw. Ni ix kiwil t nwuch echi' n'o ruk' nQaw. 11Qit'am che k'an na atb'altzij pkijlom mnaq iyaj uwuchlew, mal ri jun che o pkijlom, antajnaq chik atb'altzij pujlom re rech k'ejsax na uwuch.
12»K'i na kraj ub'ixik chiwe, per kixkun taj kich'ob'o su kilwi we kimb'ij ile' chiwe. 13Echi' kpi Tyoxlaj Uxlab'xel, jare Re kuk'ut na runjel chiwuch chinchke saqlaj tzij, mal utkel taj Re kch'awik, xani kub'ij chiwe sutaq kb'ix che Re rmal Dios, soq kub'ij chiwe sutaq kpi na. 14Jare Re kunmirsaj n'ij in, mal sutaq wech in, Re kuk'amo, kuk'ut na chiwuch ix. 15Runjel sutaq o ruk' nQaw, soq wech in. Jare rmal che ximb'ij chiwe che ri Tyoxlaj Uxlab'xel kuk'am loq runjel sutaq wech in, kuk'ut na chiwuch ix.
16»Xa ch'in chik kraj che kiwil t chinwuch, per echi' k'ax keb' uxib' ij, tik'ri kiwil chna nwuch». Jala xub'ij Jesús chke nk'aj udiscípulo.
Ri b'is kujal na ki'ktem
17O keb' uxib' chke nk'aj udiscípulo Jesús xikb'ij chikuch:
—¿Su lo kilwi che kub'ij? Jala kub'ij chqe: “Xa ch'in chik kraj che kiwil t chinwuch, per k'ax keb' uxib' ij, tik'ri kiwil chna nwuch, mal in jala ruk' qaQaw kimb'e wi, kcha'”. ¿Su lo kilwi? —xiche chikuch.
18Tik'ri xikb'ij:
—¿Su lo kilwi nk'aj tzij che xub'ij: “Pkeb' uxib' ij”? Kqach'ob' taj su kilwi nk'aj tzij che xub'ij, —xiche chikuch.
19Ni Jesús xurilo che o sutaq kkaj kikta che chrij sutaq ub'im chke, xub'ij:
—¿Kixtjinik kita chiwuch su kilwi che ximb'ij chiwe: “Xa ch'in chik kraj che kiwil t chinwuch, per pkeb' uxib' ij, tik'ri kiwil chna nwuch?” xincha'. 20Qatz qtzij, qatz qtzij, kimb'ij chiwe che ix kixo' na, soq kixb'son na. Ni mnaq che iyaj uwuchlew, xa kiki'kat na. Per ni ix, miskini' kixb'sonik, ib'is kujal na ki'ktem. 21Jun ixoq echi' kurqa ij rech kuril uwuch jun ral, kutij k'ax rmal u'xom che ku'axij. Per we xalax un ral, kna'taj t chik che, un tijb'al k'ax che xu'axij, rmal uki'ktem che xalax jun chik mnaq chuchlew. 22Jala ix, ile' kixb'sonik. Per in kinwil chna iwuch jmul chik, tik'ri kki'kat iwanma'. Un ki'ktemi', ot chin jun kikunik kuresaj chiwe. 23Echi' ko'pan un iji', otchich su kita chwe. Qatz qtzij, qatz qtzij, kimb'ij chiwe, che runjel su kita che nQaw pinb'i' in, Re kuya na chiwe. 24Jumpa pitnaq loq, ot su itom pinb'i' in. Ile', chita', rech kya na chiwe, rech knoj iwanma' che ki'ktem.
Ri Cristo ch'kanaq chjuch ri uwuchlew
25»Runjel sutaq nb'im chiwe, xa ruk' k'amb'al taq n'oj nb'im wi. Per ko'pan na jun ij che kixinch'ab'ej t chik ruk' k'amb'al taq n'oj, xani kixinya psaq chrij nQaw. 26Echi' ko'pan un iji', kita che nQaw pinb'i' in. Kimb'ij taj chiwe che xa in kimb'och'ij nQaw rech kuya chiwe, xani ix kita che. 27NQaw kixul'oj, mal ix xnil'oj in, soq xikojo echi' ximb'ij chiwe che in ruk' Dios npitnaq wi. 28Ruk' nQaw nelnaq loq wi, ximpi chi' chuchlew. Ile', kinya kan uwuchlew, knitzlij chik jala ruk' nQaw, —xche Jesús chke.
29Ni nk'aj udiscípulo Jesús xikb'ij che:
—Ile' k'alnik su kab'ij, mal ruk' k'amb'al n'oj taj kujach'ab'ej wi. 30Ile' xqaj pqajlom che runjel it'am la. Nmister taj che o jun o su kuta che la, mal kch'ob' la su kraj kurit'amaj echi' mja kch'awik. Jare rmal wa' che kqakojo che ruk' Dios elnaq loq la, —xiche che.
31Ni Jesús xub'ij chke:
—¿Le tela kixkjonik? 32Xa ch'in chik kraj che ko'pan ij, soq xo'pan ij ile', che kixch'u'jarsax na, kitix na iwib' iwunjel. Chijunjnal kitzkuj na jachi kix'e wi, ni in xa nitkel kniya kanoq. Per nitkel taj kinkanjik, mal o nQaw wuk'. 33Kimb'ij nk'aj tzij chiwe ri', rech kiriq kulb'al ik'u'x, rmal utzil kinya chiwe. Chi' chuchlew, kiriq na k'ax per china jun kowlaj k'u'x, mal in nch'kanaq chjuch runjel jumpa k'ax kiriq chi' chuchlew. —Jala xub'ij Jesús chke.
လက္ရွိေရြးခ်ယ္ထားမွု
San Juan 16: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global