San Juan 15
15
Ri Jesús jare peche jun uch'el uva
1Ri Jesús xub'ij chik chke: «In ruk' saqlaj tzij, in jare in peche jun uch'el prut che uva ub'i', ni nQaw jare ajb'nal chak che. 2Runjel jumpa nk'aj u'ab' che' che o chwe, we kuya t uwuch, kuketo. Chintaq nk'aj che kuya uwuch, xa kujos'ij, rech kuya na mas uwuch. 3Ix ixch'ajtajnaq chik, mal jare nk'aj tzij che nb'im chiwe, xixuch'ajo. 4Chixkje wuk' rech kinkje in iwuk' ix. Jun u'ab' che' rech uva, kuya t uwuch we xa kettajnaq. Nmister che tkil che nuch'el un che', tik'ri kuya uwuch. Ix ixjala peche jun utux che' che tkil che nuch'el, we wuk' in ixk'wi.
5»In ri' ri uch'el uva, ni ix xa ixutux. Chin jun tkil chwe in, we soq nitkil in che re, tik'ri kuya uwuch. We ix'o taj wuk', ot su kixkun che u'anik. 6Chin jun che tkil taj chwe in, kesax pnoq, peche jun u'ab' che' che kettajnaq. We xa kettajnaq, kichqijik, ksik'ik, koksax p'a', kk'atik.
7»We kixkje wuk' in, soq we kikje ntzij iwuk', chita runjel su kiwaj, kya na chiwe. 8Kinmirsax u'ij nQaw we ki'ano peche jun u'ab' che' che kuya uwuch. We jala ki'ano, xa kixtjinik kik'utu che ixwech in. 9Peche xnul'oj in nQaw, jala xixinl'oj in ix. Ix soq chitaqej u'anik su xin'an in che mas xixinl'oj. Xa mitas iwib' chwij. 10We ki'ano sutaq kixintaq che u'anik, kixinl'oj. Jala peche in che kin'ano su knutaq nQaw che u'anik, jare rmal che knul'oj.
11»Jala ximb'ij chiwe rech kikje iki'ktem, jala peche ki'ktem o chwe in, rech knoj iwanma' che ki'ktem. 12Jare ntaqnik ri': chil'oj iwib' chiwuch, jala peche xixinl'oj in. 13Ot jun chik utz mas nim ku'on jun mnaq chjuch we jun mnaqe' kuya uk'asnmal pkamsxik rech kyuto' nk'aj rich'il. We jala ku'ono, jarela kuk'utu che qatz qtzij kyul'oj. 14Ix qatz qtzij ix utz wuk' we jare ki'ano su kixintaq che u'anik. 15Kimb'ij t chik ntaqo'n chiwe, mal jun taqo'n rit'am taj su ku'on nupatrón. Utzlaj taq wich'il kincha chiwe, mal ximb'ij chiwe runjel sutaq xub'ij loq nQaw chwe in. 16Ix taj xnichay in, xani in xixinchay ix, tik'ri xixintaq kanoq rech kixiwchinik. China' peche jun u'ab' che' che kk'is taj uwuch, ni nk'aj uwuch k'ay taj. We jala ki'ano, ri nQaw kuya chiwe runjel su kita che pinb'i'. 17Jare ri' kixintaq che u'anik: chil'oj iwib' chiwuch», xche Jesús chke.
Ri mnaq iyaj uwuchlew k'ax kixkkil na
18Ri Jesús xub'ij chik chke: «We mnaq iyaj uwuchlew k'ax kixkkilo, chiwit'amaj che nab'e ri' k'ax xnikkil in chiwuch ix. 19Wet ix rech uwuchlew, ri mnaq iyaj uwuchlew, kixkil'oj na, mal iwich'il iwib' kuk'. Ni le', ix rech t uwuchlew, mal xixinchay chikxo'l mnaq irech uwuchlew. Jarewa rmal, che k'ax kixkkilo. 20Chna'taj ntzij chiwe che ximb'ij kanoq: “Jun mnaq o pmokik, nim taj chjuch nupatrón”, xincha'. We xnikkoqtaj in rech kik'an k'ax chwe, soq kixkkoqtaj na ri ix rech kik'an k'ax chiwe. We xikkoj ntzij in nk'aj mnaq, soq kikkojo su kib'ij ix chke. 21Runjel nk'aj k'axi', kik'an na chiwe xa wmal in, mal kit'am t uwuch chin xnutaq loq. 22Mitji ximpi in che ub'ixik rson chke, ot kmak ri' che, che xnikik'laj taj. Ni le' che kit'am chik, otchich mow kikwaj uwuch kmak. 23Chin jun k'ax knuril in, soq k'ax kuril nQaw. 24Mitji o k'utb'al xin'an chikuch che ot chin jun chik kikun che u'anik, ot kmak ri'. Ni le', xikkil nk'aj nmaq taq k'utb'al xin'an chikuch, per xa k'ax xnikkil in, soq xa k'ax xikkil nQaw. 25Nmister k'ut che jala kik'ano rech k'antaj na su tz'ib'tal chpam kipxab' ke che kub'ij: “K'ax xnikkilo per ot su rmal”,#Sal 35:19; 69:4. kcha'.
26»Echi' k'ut kpi Jun che kukub'saj ik'u'x, che ruk' qaQaw kpi wi, che jare Tyoxlaj Uxlab'xel, che kintaq nuloq chiwe echi' n'o jala ruk' nQaw, jare Re kub'ij saqlaj tzij chiwe chwij in. 27Ni ix nmister kiya ub'ixik saqlaj tzij chwij in, mal ix kjenaq wuk' echi' xinmaj loq u'anik nchak chi' chuchlew». Jala xub'ij Jesús chke nk'aj udiscípulo.
လက္ရွိေရြးခ်ယ္ထားမွု
San Juan 15: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global