Hechos 15
15
Nk'aj mnaq kikjom utzij Dios xikmol kib' chpam tinmit Jerusalén
1Echi' iy'o u Pablo ruk' u Bernabé chpam tinmit Antioquía, iy'o keb' uxib' achjab' xiqaj loq Judea, xiyo'pan chpam tinmit Antioquía. Ena xikmaj ktojxik nk'aj qachlal chla', xikb'ij chke che we kkaj kikriq jun kk'asnmal ruk' Dios che ot uk'isik, nmister kikkoj retal kicuerpo tza'm amb'al kchul jala peche utz'ib'am kan qari'jal Moisés.#Gn 17:10-14. Un retali', circuncisión kb'ix che. 2U Pablo rich'il u Bernabé, ko xikchap kib' che tzij kuk' nk'aj achjab' ipitnaq Judea. Ena xichay u Pablo rich'il u Bernabé, soq rich'il keb' uxib' chik chke nk'aj mnaq kikjom utzij Dios, rech kib'e Jerusalén, rech kikch'ab'ej nk'aj apóstol kich'il nk'aj ajk'mal b'e chke mnaq che kikjom utzij Dios chla'. Xa jare kikchomaj we nmister che koksax retal kicuerpo nk'aj achjab' kikjom utzij Dios.
3Ni mnaq che kikjom utzij Dios chla' Antioquía xiktaq b'i u Pablo rich'il u Bernabé, soq rich'il keb' uxib' chik qachlal. Echi' kimjom kb'e ib'enaq Jerusalén, xi'ax chpam nk'aj chik lyar che ijare Fenicia rich'il Samaria. Xikb'ij chke nk'aj mnaq kikjom utzij Dios chla' che iy'o nk'aj mnaq che iyaj Israel taj, kiyitjinik kikya kan kmak, kikjach kib' pu'ab' Qajaw, kikkub'a kk'u'x chrij. Ena mas xiki'kat nk'aj qachlal che, ti xikta rson.
4Echi' xiyo'pan u Pablo rich'il u Bernabé chpam tinmit Jerusalén, xiyik'lax kmal mnaq kikjom utzij Dios, rich'il nk'aj ajk'mal b'e chke, soq rich'il nk'aj apóstol. Ena xikya rson chke runjel jumpa sutaq'ik unom Dios kuk'. 5Per iy'o keb' uxib' chke nk'aj fariseo che kikjom chik utzlaj taq rson chrij Qajaw Jesús. Ke xiyitk'e'ik, xikb'ij:
—Nmister che koksax retal kicuerpo nk'aj achjab' kikjom utzij Dios che iyaj Israel taj. Soq nmister kb'ix chke che kikkojo jumpa nk'aj tzij tz'ib'tal kan chpam upxab' qari'jal Moisés, —xicha'.
6Tik'ri xikmol kib' nk'aj apóstol, rich'il nk'aj ajk'mal b'e chke mnaq kikjom utzij Dios, rech kikchomaj rij su kik'an ruk' un k'utb'ali'. 7Echi' mas naj chik kimjom uchomxik, xwa'laj u Lu', xub'ij chke:
—Qachlal, ix iwit'am che mas ujer, ri Qajaw Dios xnuchay in chixo'l, rech kimb'ij utzlaj taq rson chrij Qajaw Jesús chke nk'aj mnaq che iyaj Israel taj, rech kikkoj utzij. 8Ri Qajaw Dios rit'am sutaq o pkanma' mnaq chikjunjnal. Jare Re xuk'utu che kyuk'laj mnaq chin kipi ruk', mal xuya Tyoxlaj Uxlab'xel chke ke, jala peche xuya chqo'j. 9Ri Qajaw Dios xaq jnam kujuril qo'j ujaj Israel kuk' mnaq che iyaj Israel taj. Re xuch'aj kanma', xukuy kmak, mal xikkub'a kk'u'x chrij. 10Ni le', ¿suche che kitaqch'ij Dios, ilb'alre we kuk'ejsaj iwuch? Xa kixtuj su unom Dios we xa kiya jun chak chikuch mnaq kikjom utzij Dios che iyaj Israel taj, peche jun eqa'n kiya chkij. Ni kujkun tni qo'j kquk'aj un eqa'n, soq mowni kiyikun qari'jal kkuk'aj. 11Jala taj kraj. Qo'j qit'am che xa rmal ut'ob' Qajaw Jesús che kqariq utob'nik Dios che kusipaj chqe, jala peche kusipaj chke nk'aj mnaq che iyaj Israel taj. —Jala xub'ij u Lu'.
12Xa jala', kunjel jumpa mnaq iy'o chla', xich'aw t chik, otchich jun tzij xikb'ij, xa jare xiktatb'ej chik sutaq xikb'ij u Bernabé rich'il u Pablo. Ke xikb'ij runjel jumpa nk'aj nmaq taq k'utb'al unom Dios chikxo'l nk'aj mnaq che iyaj Israel taj k'utb'alre che o Re kuk' u Pablo rich'il u Bernabé. 13Echi' xk'is ktzij u Bernabé rich'il u Pablo, xch'aw u Santiago, xub'ij:
—Qachlal, chitatb'ej umpe su kimb'ij chiwe: 14U Simón Lu' xub'ij chqe su xu'on Dios ti nab'e b'welt xuril to'b'al kwuch nk'aj mnaq che iyaj Israel taj, xyuchay chikxo'l jumpa nk'aj che xraj xu'on utinmit chke. 15Jumpa wari', jala x'antjik jnam ruk' peche ktz'ib'am kan nk'aj ajb'il utzij Dios ujer. Ke ktz'ib'am kanoq che Dios xub'ij:
16“Echi' k'antaj wari', kintzlij chnuloq rech kixinto'o.
Jala kin'ano peche we kinyak jun b'welt chik jun ja rech qari'jal David che tzaqnaq chuchlew.
Jun ja le' jnam ruk' peche un atb'altzij rech qari'jal David ujer. Kinkoj chna jun nim reqle'n rech kitk'e' pujlom un atb'altzije'.
17Jala kin'ano rech kunjel jumpa nk'aj chik mnaq, knikitzkuj na,
soq rech kunjel jumpa mnaq che iyaj Israel taj, jare kikjach kib' pin'ab', mal wech in. Jala kub'ij Qajaw Dios,
18che ujer taq tzij umjom loq ub'ixik nk'aj tziji'”. (Am 9:11-12)
Jarela xiktz'ib'aj kan nk'aj ajb'il utzij Dios ujer, —xche u Santiago chke.
19Tik'ri, xutaqej ub'ixik, xub'ij: «Xa rmal, jawa kinchomaj: jumpa nk'aj mnaq che iyaj Israel taj che kiyitjinik kikya kan nk'aj ujer taq kcostumbre rech kikjach kib' pu'ab' Qajaw Dios, ot mow kqab'ij chke che we nmister kikkoj retal kicuerpo. 20Xaq ruk' we kqatz'ib'aj b'i jun wuj y kqataq b'i chke, rech kqab'ij b'i chke che xa miktij chik jumpa sutaq'ik che xa y'om chikuch nk'aj dyosil rich'il nk'aj tyox. Soq kqab'ij b'i chke che xa miktz'e' jun ixoq ruk' jun achi we richjil taj, mowni kiktz'e' jun achi ruk' jun ixoq we rixqil taj. Soq kqab'ij chke che xa miktij ut'ijal tiko'n che o na kik' ruk', che xa kjitz'em kib', mowni kiktij kik'. Jarela kqatz'ib'aj b'i chpam un wuj che kqataq b'i chke. 21Mal mas ujer loq iy'o mnaq ptaq jun tinmit kkitjoj mnaq che utzij upxab' Dios, che tz'ib'tal kan rmal qari'jal Moisés. Jarewa tzij kisk'ix uwuch chpam rchoch Dios ptaq ij rech uxnb'al ij». Jala xub'ij u Santiago chke.
Jarewa wuj xtz'ib'ax chke nk'aj qachlal che iyaj Israel taj
22Ni nk'aj apóstol rich'il nk'aj ajk'mal b'e chke mnaq kikjom utzij Dios, rich'il jumpa nk'aj chik mnaq kikjom utzij Dios, jnam xikchomaj chikuch che kikchay keb' uxib' achjab' chikxo'l rech kiktaq b'i ruk' u Pablo rich'il u Bernabé jala Antioquía. Jare xikchay u Judas che soq kb'ix Barsabás che, rich'il u Silas. Ke, nmaq keqle'n chikxo'l nk'aj qachlal. 23Ena o jun wuj xiktaq b'i kuk' che jawa xiktz'ib'aj b'i chpami':
Qo'j ujapóstol rich'il nk'aj ajk'mal b'e chke mnaq kikjom utzij Dios ural, qo'j iwachlal chi' Jerusalén:
Kqaya pnoq rtzil iwuch jumpa iwuch ix ixqachlal che ixaj Israel taj, che ix'o chpam tinmit Antioquía rich'il nk'aj chik tinmit iy'o pukwent nk'aj lyar Siria rich'il Cilicia.
24Qo'j xqata rson che iy'o keb' uxib' mnaq xiyel b'i chiqxo'l, xiyo'pan iwuk'. Ke xikmaj ub'ixik tzij chiwe rech ksach ik'u'x rmal, xa xikyoj ijlom ruk' ktzij. Kiyitjin che ub'ixik chiwe che nmister koksax retal icuerpo, soq nmister ki'ano runjel jumpa utz'ib'am kan qari'jal Moisés. Per oj taj qatqom b'ik. 25Xa rmal, xa jun xqa'an che qachomnik y xqachomaj che jare utz kqachay keb' uxib' achjab' chiqxo'l rech kqataq b'i iwuk' rech kixkla'. Jnam kib'e kuk' lo'laj taq qachlal Bernabé rich'il u Pablo. 26Ke kiy'om runjel kk'asnmal che ub'ixik utzij Qajaw Jesucristo, miskini' su kikamsax rmal, per kikch'a' taj. 27Xa jala', jare kqataq b'i u Judas rich'il u Silas iwuk' rech kikb'ij chik chiwe su qatz'ib'am b'i chpam un wuj. 28Ri Tyoxlaj Uxlab'xel kraj taj we kya jun nimlaj chak chiwuch, che peche jun eqa'n o chiwij, soq jala kqil qo'j. Xaq xaw keb' uxib' tzij kqab'ij chiwe, rech kiwit'amaj chinchke nmister ki'ano. 29Jarewa nmister ki'ano: xa mitij chik jumpa sutaq'ik che xa y'om chikuch nk'aj dyosil rich'il nk'aj tyox, soq xa mitij t'ij che rich'il kik', soq xa mitij ut'ijal tiko'n che xa kikjitz'ej kib' ti kikamik. Soq miktz'e' jun achi ruk' jun ixoq we rixqil taj, mowni kiktz'e' jun ixoq ruk' jun achi we richjil taj. We kichjij iwib' che u'anik runjel jumpa wari', utz ki'ano.
Kqach'ab'ej chqib' iwuk'.
Jala xiktz'ib'aj b'i chpam un wuj che xiktaq b'ik.
30Xitaq b'i nk'aj achjab' che uya'ik un wuji'. Xib'e chpam tinmit Antioquía. Echi' xiyo'pan chla', xkisk'ij kunjel jumpa mnaq iy'o chla' che kikjom utzij Dios, xikmolo, xikjach un wuj chke. 31Echi' xkisk'ij uwuch un wuj nk'aj qachlal, mas xiki'kat che, mal xukub'saj kk'u'x su tzij tz'ib'tal chpam. 32U Judas rich'il u Silas, uy'om Dios chke che kiyikunik kik'axij utzij Dios chke mnaq. Ena xikkub'saj kk'u'x nk'aj qachlal, soq xikya jun kowlaj k'u'x chke, ruk' ktzij che xikb'ij chke. 33Xikanaj kan keb' uxib' ij chla', tik'ri k'ut xitaq loq kmal nk'aj qachlal, xijach loq putzil kmal. Ena xiyitzlij chuloq kuk' nk'aj kich'il che xitqaw b'i nab'e jala Jerusalén. 34Per nu Silas xuchomaj che kkanaj kan chla' Antioquía, ena xkanaj kan chla'.#15:34 O nk'aj ujer taq wuj rech Tyox Wuj, manuscrito kb'ix che, che tz'ib'tal taj v. 34 chpam. 35Soq jala xik'an u Pablo rich'il u Bernabé, xikanaj kan chla' Antioquía. Xiktaqej ktojxik mnaq che utzij Dios, soq xikb'ij utzlaj taq rson chrij Qajaw Jesucristo chke mnaq chla'. Jala xik'ano, jnam kuk' ik'i nk'aj chik kich'il kiriqtaj chla'.
U Pablo x'e jun b'welt chik che ub'ixik utzij Dios
36Echi' axnaqch keb' uxib' ij, u Pablo xub'ij che u Bernabé: «Jo qatzlij jun b'welt chik kuk' nk'aj qachlal ptaq kunjel jumpa tinmit jachi taq xqab'ij wi ri utzij ri Qajaw nab'e, rech kqala' su kinom nk'aj qachlal chpam kkojb'al», xche che. 37Nu Bernabé jare kraj re wet kikk'am b'i u Wan kuk', che soq kb'ix Marcos che. 38Per nu Pablo ustaj xurilo. Xuchomaj che ustaj we kikk'am b'ik, mal u Wan Marcos xa xutas kan rib' chkij echi' iy'o chpam un lyar Panfilia ub'i', xuk'is t u'anik uchak kuk'. 39U Pablo rich'il u Bernabé ko xikchap kib' che tzij rmal un qachlali'. Xa jala', xuriq t rib' kchomnik, ena xikjach kwuch kib'. U Bernabé xuk'am b'i u Marcos, jnam xib'e ruk', xib'e chpam jun barco rech kib'e chpam jun ulew Chipre ub'i' che o pink'aj mar. 40Nu Pablo, jare xuchay b'i u Silas che rich'il rech k'e ruk'. Nk'aj qachlal xikjach b'i keb' qachlali' pu'ab' Qajaw Dios rech kyuto' che u'anik kchak. Tik'ri xikmaj kb'e, xib'ek. 41Echi' ib'enaq, xi'ax chpam keb' lyar che jare Siria rich'il Cilicia. Xikpixb'ej kan mnaq chla' che kikjom utzij Dios, rech ko kiyitk'e' chpam kkojb'al chrij Qajaw.
လက္ရွိေရြးခ်ယ္ထားမွု
Hechos 15: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global